1 КОРЬНТʹИ

1 Әз Паԝлос, йе кӧ бь ԛьрара Хԝәде ча шандийе Мәсиһ Иса һатьмә газикьрьне, ве нәʹме дьньвисьм. Состенис бьре мә жи тʹәви мьн ә. 2 Әз ве нәʹме дьньвисьм щьвата Хԝәдейә Корьнтʹерʹа, демәк ԝәрʹа, йед кӧ ча шагьртед Мәсиһ Иса һатьнә пирозкьрьне.* Һун тʹәви һʹәму кәсед кӧ һәр дәра гази наве Хӧдане мә Иса Мәсиһ дькьн, ча кәсед пироз һатьнә газикьрьне. Әԝ Хӧдане ԝан у Хӧдане мә йә:

3 Бьра Хԝәде Баве мә у Хӧдан Иса Мәсиһ, ԛәнщийа хԝәйә мәзьн һьндава ԝәда бьдьнә кʹьфше у әʹдьлайе бьдьнә ԝә.

4 Әз һәртʹьм шькьрийе дьдьмә Хԝәдайе хԝә, чьмки әԝи бь Мәсиһ Иса һьндава ԝәда ԛәнщийа хԝәйә мәзьн да кʹьфше. 5 Жь бо ԝе йәке кӧ һун тʹәви Мәсиһ йәктийеда ньн, ԝә гәләк кʹәрәм стандийә. Һун хәбәра Хԝәде бь щурʹе баш бәла дькьн у хәбәра ԝи рʹьнд фәʹм дькьн. 6 У шәʹдәтийа дәрһәԛа Мәсиһ нав ԝәда кʹур һʹимгьрти йә. 7 Ләма жи һʹәта һун һивийа әʹйанбуна Хӧдане мә Иса Мәсиһ нә, һәр тьште кӧ ԝәрʹа лазьм ә, бал ԝә һәйә. 8 Хԝәде ԝе ӧса жи али ԝә бькә кӧ һун һәртʹьм ԛәԝи бьминьн, сәва кӧ рʹожа Хӧдане мә Иса Мәсиһда тʹӧ кәс нькарьбә ԝә бона тьштәки нәһәԛ кә. 9 Хԝәде амьн ә, йе кӧ гази ԝә кьрийә, ԝәки тʹәви Кӧрʹе ԝи, Хӧдане мә Иса Мәсиһ йәктийеда бьн.

10 Бьрано, әз бь наве Хӧдане мә Иса Мәсиһ жь ԝә рʹәща дькьм, ԝәки гьлийед ԝә йәк бьн. Бьра нав ԝәда дӧтирәти тʹӧнә бә, ле бьра фькьр у ньһерʹандьна ԝә йәк бә. 11 Бьред мьн, әз жь һьнә нәфәред мала Хьло пеһʹәсийам, кӧ нав ԝәда дәʹԝ-доз һәнә. 12 Мьн бьһистийә кӧ һәр йәк жь ԝә ӧса дьбежә: «Әз пәй Паԝлос дьчьм», йан «Әз пәй Аполос дьчьм», йан «Әз пәй Кифас* дьчьм», йан жи «Әз пәй Мәсиһ дьчьм». 13 Гәло Мәсиһ һатийә пʹарәвәкьрьне? Гәло Паԝлос бу кӧ бона ԝә сәр стуне һатә дардакьрьне? Йан жи, гәло һун бь наве Паԝлос һатьнә ньхӧмандьне?* 14 Шькьр Хԝәдерʹа кӧ хенщи Кьриспо у Гайос, мьн тʹӧ кәс жь ԝә нәньхӧмандийә. 15 Ләма жи тʹӧ кәс жь ԝә нькарә бежә, ԝәки һун бь наве мьн һатьнә ньхӧмандьне. 16 Әре, мьн нәфәред Стефанас жи ньхӧмандьнә. Ле ԝәки майин, найе бира мьн кӧ мьн диса кәсәк ньхӧмандьбә. 17 Мәсиһ әз нәшандьмә кӧ бьньхӧминьм, ле әԝи әз шандьм кӧ мьзгинийе бәла кьм, у мьн әв йәк бь биланийа мәрьва нәкьр, сәва кӧ мьрьна Мәсиһ сәр стуна щәфе бадиһәԝа нибә.

18 Хәбәрдан дәрһәԛа стуна щәфе, беаԛьлайи те кʹьфше бона ԝан, йед кӧ ԛьрʹ дьбьн. Ле бона мә, йед кӧ хьлаз дьбьн, әв хәбәр ԛәԝата Хԝәде йә. 19 Чьмки Ньвисаред Пирозда те готьне: «Әзе биланийа кәсед билан бьдьмә һьлдане, у занәбуна йед аԛьл бәтал кьм». 20 Әм ида чь дькарьн бежьн дәрһәԛа кәсед билан, ԛанунзана йан аԛьлмәндед ве дьнйайе? Нә Хԝәде ӧса кьрийә, кӧ биланийа ве дьнйайе беаԛьлайи бе һʹәсабе? 21 Жь бо ԝе йәке кӧ мәрьвед ве дьнйайе гӧмана хԝә дьдьнә сәр биланийа хԝә, ԝана Хԝәде нас нәкьрийә. Хԝәде биланийа хԝә бь ви щурʹәйи нишан кьр, ԝәки бь сайа хәбәра кӧ әм бәла дькьн, кәсед кӧ баԝәр дькьн хьлаз кә. Ле әв хәбәр бона мәрьвед ве дьнйайе беаԛьлайи йә.

22 Щьһу нишана дьхԝазьн, у Йунан биланийе дьгәрʹьн. 23 Ле әм дьдьнә бьһистьне кӧ Мәсиһ сәр стуне һатә кӧштьне. Әв әʹламәти Щьһуйарʹа дьбә мәʹнийа лькʹӧмандьне, у бона мьләтед дьн жи беаԛьлайи йә. 24 Ле бона мәрьвед кӧ жь алийе Хԝәдеда һатьнә газикьрьне, һьм бона Щьһуйа һьм жи Йунана, Мәсиһ ԛәԝат у биланийа Хԝәде йә. 25 Тьштед жь Хԝәде, йед кӧ мәрьв беаԛьлайи һʹәсаб дькьн, жь мәрьва билантьр ьн. У тьштед жь Хԝәде, йед кӧ мәрьв сьст һʹәсаб дькьн, жь мәрьва ԛәԝаттьр ьн.

26 Бьрано, һун дьвиньн, ԝәки әԝи гази чь щурʹә мәрьва кьрийә. Ль гора ньһерʹандьна мәрьва жь ԝана гәләк кәс билан ниньн, гәләк кәс ԛәԝат ниньн, у гәләк кәс жь малбәтед нав-дәнг ниньн. 27 Ле Хԝәде кәсед кӧ дьне ԝана беаԛьл һʹәсаб дькә, бьжартьн, ԝәки билана бьдә шәрме. У Хԝәде кәсед кӧ дьне ԝана сьст һʹәсаб дькә, бьжартьн, ԝәки йед ԛәԝат бьдә шәрме. 28 Хԝәде кәсед кӧ дьне ԝана беԛимәт, ньмьз у бекер һʹәсаб дькә, бьжартьн, ԝәки кәсед кӧ фәрз тенә һʹәсабе, рʹәт кә, 29 ԝәки тʹӧ кәс бәр Хԝәде пʹайе хԝә нәдә. 30 Бь сайа Хԝәде һун ньһа тʹәви Мәсиһ Иса йәктийеда ньн, йе кӧ биланийа Хԝәде мәрʹа әʹйан кьрийә. Хԝәде мә бь сайа Иса рʹаст у пироз һʹәсаб дькә, у Иса мә хьлаз кьрийә бь ве йәке, кӧ бона гӧнед мә һәԛ да. 31 Чаԝа кӧ Ньвисаред Пирозда те готьне: «Йе кӧ пʹайе хԝә дьдә, бьра бь Йаһоԝа пʹайе хԝә бьдә».

2 Бьрано, гава әз һатьм кӧ ԝәрʹа бәʹса сӧрʹа пирозә Хԝәде бькьм, әз нәһатьм кӧ бь гьлийед хԝә сәр ԝә һʹӧкӧм кьм, йан жи хԝә билан бьдьмә кʹьфше. 2 Мьн сафи кьр кӧ дәрһәԛа тʹӧ тьште дьн ԝәрʹа хәбәр нәдьм, тʹәне дәрһәԛа Иса Мәсиһ у ве йәке кӧ әԝ сәр стуне һатә кӧштьне. 3 У гава әз һатьмә бал ԝә, әз сьст бум у жь тьрса дьләрьзим. 4 Хәбәрдан у һинкьрьнед мьн нә бь гьлийед билани бун, кʹижан кӧ мәрьв бьдана баԝәркьрьне. Ле гьлийед мьнда ԛәԝата рʹӧһʹе Хԝәде дьһатә кʹьфше, 5 сәва кӧ баԝәрийа ԝә нә кӧ сәр һʹиме биланийа мәрьва бә, ле сәр һʹиме ԛәԝата Хԝәде.

6 Ньһа әм тʹәви йед рʹӧһʹанида гьһишти дәрһәԛа биланийе хәбәр дьдьн. Ле әв биланийа ве дьнйайе, йан жи биланийа сәрԝеред ве дьнйайе нинә, йед кӧ ԝе бәтавәбьн. 7 Ле әм бәʹса биланийа Хԝәде дькьн, биланийа сӧрʹа пирозда вәшарти. Хԝәде ԝәʹде бәреда бона рʹумәта мә ԛьрар кьр, ԝәки ль гора ве биланийе һәрәкʹәт бькә. 8 Тʹӧ сәрокед ве дьнйайе ве биланийе ньзаньн. Һәрге ԝана әв билани бьзаньбуйа, ԝе Хӧдане мәйи рʹумәте, нәдана кӧштьне. 9 Ле чаԝа кӧ Ньвисаред Пирозда те готьне: «Тʹӧ кәси нәдитийә,* тʹӧ кәси нәбьһистийә* у һʹьше тʹӧ кәсирʹа дәрбаз нәбуйә, чь кӧ Хԝәде һазьр кьрийә бона кәсед кӧ ԝи һʹәз дькьн». 10 Хԝәде бь рʹӧһʹе хԝә әв тьшт мәрʹа әшкәрә кьрьнә. Рʹӧһʹе пироз һәр тьшти, һәла һе фькьред Хԝәдейә кʹур жи әшкәрә дькә.

11 Гәло кәсәк фькьред мәрьвәки дьн занә? Тʹәне мәрьв хԝәха тьштед дьле хԝәда занә. Һәма ви щурʹәйи, тʹӧ кәс нькарә фькьред Хԝәде бьзаньбә, пештьри рʹӧһʹе Хԝәде. 12 Ижа мә нә кӧ рʹӧһʹе ве дьнйайе, ле рʹӧһʹе кӧ жь Хԝәде те, стандийә. Бь ви аԝайи әм дькарьн тьштед кӧ Хԝәде бь дьловани әм һин кьрьнә, фәʹм кьн. 13 У әм жи дәрһәԛа ван тьшта хәбәр дьдьн, нә бь гьлийед кӧ жь мәрьвед билан һин бунә, ле бь гьлийед кӧ рʹӧһʹе пироз әм һин кьрьнә, ԝәки рʹастийед жь Хԝәде шьровәкьн.

14 Ле мәрьве бәдәни* тьштед кӧ рʹӧһʹе Хԝәде әшкәрә кьрьнә, ԛәбул накә, чьмки әԝ бона ԝи беаԛьлайи нә. Әԝ нькарә ван тьшта фәʹм кә, чьмки әв тьшт тʹәне бь аликʹарийа рʹӧһʹе Хԝәде тенә фәʹмкьрьне. 15 Мәрьве рʹӧһʹани* һәр тьшти әʹнәнә дькә, ле хԝәха жь кәсәки найе әʹнәнәкьрьне. 16 Чаԝа кӧ Ньвисаред Пирозда те готьне: «Гәло кʹи нет-фькьред Йаһоԝа занә, кӧ ԝи һин кә?» Ле әм мина Мәсиһ дьфькьрьн.

3 Бьрано, мьн нькарьбу тʹәви ԝә ча тʹәви мәрьвед рʹӧһʹани хәбәр да. Лазьм бу кӧ мьн ԝәрʹа ӧса хәбәр да, чаԝа тʹәви мәрьвед ве дьнйайе, чаԝа тʹәви зарʹед бьчʹук баԝәрийа Мәсиһда. 2 Мьн нә кӧ хԝарьна гьран дьда ԝә, ле шир. Һун бона хԝарьна гьран һазьр нибун, у ньһа жи һун һазьр ниньн. 3 Ньһерʹандьна ԝә һе мина ньһерʹандьна мәрьвед ве дьнйайе йә. Жь бо ве йәке кӧ нав ԝәда һʹәвсуди у шәрʹ-дәʹԝ һәйә, әшкәрә йә ԝәки һун мина мәрьвед ве дьнйайе һәрәкʹәт дькьн. 4 Чьмки гава йәк дьбежә: «Әз пәй Паԝлос дьчьм», ле йәки дьн жи дьбежә: «Әз пәй Аполос дьчьм», гәло һун мина мәрьвед ве дьнйайе ниньн?

5 Ле Аполос кʹи йә? Йан Паԝлос кʹи йә? Әм тʹәне хьзмәткʹар ьн, йед кӧ али ԝә кьрьн, ԝәки һун бьбьнә баԝәрмәнд. Мә тʹәне шьхӧле кӧ Хӧдан дайә мә, ани сери. 6 Мьн чанд, Аполос ав да, ле йе кӧ мәзьн кьр Хԝәде йә. 7 Хԝәдейе кӧ мәзьн дькә һежайи пәсьна йә, нә кӧ йе дьчинә, у нә жи йе кӧ ав дьдә. 8 Йе кӧ дьчинә у йе кӧ ав дьдә йәктийеда шьхӧл дькьн, у һәр йәк ԝе ль гора шьхӧле хԝә хәлате бьстинә. 9 Чьмки әм һәвалкʹаред Хԝәде нә. Һун жи зәвийа Хԝәде нә, йа кӧ әԝ бещәр дькә, һун авайе Хԝәде нә.

10 Ль гора ԛәнщийа Хԝәдейә мәзьн, йа кӧ мьнрʹа һатә дайине, мьн ча авакʹарәки һостә һʹим дани, ле йәки дьн сәр ве ава дькә. Ле бьра һәр кәс һаж хԝә һәбә, кӧ әԝ чаԝа сәр ви һʹими ава дькә. 11 Чьмки тʹӧ кәс нькарә һʹимәки дьн дайнә, хенщи һʹиме кӧ ида һатийә данине, у әԝ Иса Мәсиһ ә. 12 Кәсәк дькарә сәр ви һʹими бь зерʹ, зив, кәвьред ԛимәт, дар, гиһайе һʹьшк* йан бь ԛьрш ава кә. 13 Ле әԝ рʹож ԝе бе, гава шьхӧле һәр кәси әʹйан бә, чьмки агьр ԝе һәр тьшти әшкәрә кә у нишан кә, кӧ шьхӧле һәр кәси чь щурʹәйи бу. 14 Һәрге авакьрьна кәсәки сәр ви һʹими бьминә, әԝе хәлате бьстинә. 15 Ле һәрге бьшәԝьтә, әԝе зьраре бьвинә, ле хԝәха ԝе хьлаз бә, ча йәки кӧ жь агьр хьлаз буйә.

16 Һун ньзаньн ԝәки һун пʹарьстгәһа Хԝәде нә, у рʹӧһʹе Хԝәде нав ԝәда йә? 17 Һәрге кәсәк пʹарьстгәһа Хԝәде ԝеран кә, ԝе Хԝәде ԝи ԝеран кә. Чьмки пʹарьстгәһа Хԝәде пироз ә, у әв пʹарьстгәһ һун ьн.

18 Хԝә нәхапиньн: Һәрге кәсәк ве дьнйайеда хԝә билан һʹәсаб дькә, бьра бьбә йәки беаԛьл, ԝәки бьбә йәки билан. 19 Чьмки биланийа ве дьнйайе бәр чʹәʹве Хԝәде беаԛьли йә. Чаԝа кӧ Ньвисаред Пирозда те готьне: «Әԝ йед билан фелбазийа ԝанда дьгьрә». 20 У диса ӧса те готьне: «Йаһоԝа занә кӧ фькьред билана пʹучʹ ьн». 21 Ләма бьра тʹӧ кәс пе мәрьва ԛӧрʹә нәбә. Чьмки һәр тьшт пʹара ԝә йә: 22 Паԝлос, Аполос, Кифас,* дьнйа, жийин, мьрьн, тьштед ньһа, тьштед кӧ ԝе бен, һәр тьшт пʹара ԝә йә. 23 Ле һун пʹара Мәсиһ нә, у Мәсиһ пʹара Хԝәде йә.

4 Бьра мәрьв мә чаԝа хӧламед* Мәсиһ һʹәсаб кьн, кʹижанарʹа сӧрʹед Хԝәдейә пироз һатьнә тʹәсмилкьрьне. 2 Жь ԝан хӧламед бь итʹбар те хԝәстьне кӧ амьн бьн. 3 Бона мьн фәрз нинә кӧ һун, йан жи һʹакьм мьн сущдар дькьн. Һәла һе әз жи хԝә сущдар накьм. 4 Чьмки исафа мьн рʹьһʹәт ә. Ле әв йәк избат накә кӧ әз мәрьвәки рʹаст ьм. Һʹакьме мьн Йаһоԝа йә. 5 Жь бо ве йәке, пешийа ԝәхте кʹьфшкьри диԝана тʹӧ кәси нәкьн, һʹәта Хӧдан бе. Әԝ ԝе тьштед кӧ тәʹрийеда вәшарти нә, дәрхә рʹонайе у әшкәрә кә, кӧ дьле һәр мәрьвәкида чь һәйә. Һьнге һәр кәс ԝе ль гора шьхӧле хԝә жь Хԝәде пәсьна бьстинә.

6 Бьрано, мьн әԝ тьшт ча мәсәлә сәр хԝә у Аполос ньвиси, сәва кʹара ԝә, ԝәки һун ви ԛәйдәйи һин бьн: «Жь ньвисаре дәрнәкʹәвьн». Һәрге һун хԝә ль ве йәке бьгьрьн, һуне нәбьнә мәрьвнә бабах, у һуне йәки сәр йәки дьнрʹа нәгьрьн. 7 Тӧ чьда жь кәсәки дьн щӧдә дьби? Гәло тьштәки тә һәйә, кӧ тә нәстандийә? Һәрге тә жь Хԝәде стандийә, ле чьма тӧ пʹайе хԝә дьди, те бежи тә пе ԛәԝата хԝә стандийә?

8 Һун дьфькьрьн һʹәму тьштед ԝә һәнә? Һун дьфькьрьн кӧ һун дәԝләти бунә? Һун дьфькьрьн кӧ ԝә бейи мә дәстпекьрийә ча пʹадша сәрԝертийе бькьн? Хԝазьл ԝә бь рʹасти дәстпекьра ча пʹадша сәрԝерти бькьра. Һьнге мәйе жи тʹәви ԝә сәрԝерти бькьра. 9 Мьнрʹа ӧса те кʹьфше кӧ әм бона дьнйайе, мәрьва у мәләка бунә тʹәмаша тейатре. Хԝәде әз у шандийед дьн чаԝа мьрьнерʹа дайи, хьлазийеда дәрхьстьнә тʹәмаше. 10 Әм жь бо Мәсиһ беаԛьл ьн, ле һун дьфькьрьн кӧ һун Мәсиһда сәрԝахт ьн. Әм сьст тенә кʹьфше, ле һун ԛәԝи тенә кʹьфше. Һун хԝәйирʹумәт ьн, ле әм берʹумәт ьн! 11 Һʹәта ньһа әм тʹи у бьрʹчи нә, бе кʹьнщ ьн, тенә ледане, бе щи-сьтʹар ьн, 12 у бь хирәт дьхәбьтьн. Гава мә беһӧрмәт дькьн, әм дӧа ль ԝан дькьн. Гава мә дьзериньн, әм сәбьр дькьн. 13 Гава бӧхдана давежьнә мә, әм бь нәрми щабе дьдьн. Һʹәта ньһа дьнйа мә һʹәсаб дькә ча гәмар у хԝәлийа әʹрде.

14 Әз ве йәке ԝәрʹа дьньвисьм, нә кӧ ԝә бьдьмә шәрме, ле ԝәки ԝә мина зарʹед хԝәйә дәлал ширәт кьм. 15 Һәрге нава шагьртед Мәсиһда 10 000 дәрсдаред* ԝә һәбьн жи, йәкә гәләк бавед ԝә тʹӧнә нә. Ле әз бь сайа Мәсиһ Иса бумә баве ԝә бь ԝе йәке, кӧ мьн мьзгини ԝәрʹа ани. 16 Аԝа әз жь ԝә рʹәща дькьм, кӧ һун чʹәʹв бьдьнә мьн. 17 Ләма жи әз Тимотʹейо дьшиньм бал ԝә. Әԝ баԝәрийа Хӧданда зарʹа мьнә дәлал у амьн ә. Әԝе бинә бира ԝә кӧ әз чаԝа рʹийа Мәсиһ Исада дьчьм, у ве йәке әз һʹәму дәра, һʹәму щьватада һин дькьм.

18 Һьнәк ԛӧрʹә бунә, чьмки дьфькьрьн кӧ әзе нәйемә щәм ԝә. 19 Ле һәрге Йаһоԝа бьхԝазә, әзе зутьрәке бемә щәм ԝә. Әзе бем нә кӧ хәбәрдана ԝан мәрьвед ԛӧрʹә бьбьһем, ле дьхԝазьм бьвиньм һәла ԛәԝата Хԝәде тʹәви ԝан ә йан на. 20 Чьмки Пʹадшатийа Хԝәде нә кӧ хәбәрданеда йә, ле ԛәԝата Хԝәдеда йә. 21 Һун ча дьхԝазьн? Әз пе шьве бемә щәм ԝә, йан бь һʹәзкьрьн у бәрбьһерийе?

5 Мьн бьһист кӧ нав ԝәда зьнекʹари* те кьрьне. У әв зьнекʹарикә ӧса нә, кӧ һәла һе нав нәбаԝәрмәндада* жи тʹӧнә. Мьнрʹа һатийә готьне кӧ мәрьвәк тʹәви жьна баве хԝә дьжи. 2 У һун бь ве йәке фьрнаԛ дьбьн? Нә һун гәрәке хәмгин бьн, у ԝи мәрьви йе кӧ әв тьшт кьрийә, жь нав хԝә дәрхьн? 3 Рʹаст ә әз бал ԝә ниньм, ле һʹьше* мьн тʹәви ԝә йә. Мьн әԝ мәрьве кӧ әв тьшт кьрьнә, ида сущдар кьрийә, тебежи әз тʹәви ԝә бум. 4 Гава һун тʹәвайи бь наве Хӧдане мә Иса тʹоп дьбьн, бьзаньбьн кӧ һʹьше мьн у ԛәԝата Хӧдане мә Иса жи тʹәви ԝә йә. 5 Һун гәрәке ԝи мәрьви бьдьнә дәсте Шәйтʹан, ԝәки һʹӧкӧме хьраб кӧ әԝи анийә щьвате, бе һьлдане. Бь ви аԝайи, рʹӧһʹе щьватейә баш ԝе рʹожа Хӧданда бе пʹарастьне.

6 Баш нинә кӧ һун ве йәкерʹа фьрнаԛ дьбьн. Һун ньзаньн, ԝәки һьнә һәвиртьрʹшк тʹәмамийа һәвир тьрʹш дькә? 7 Һәвиртьрʹшке кәвьн бавежьн, кӧ һун бьбьнә һәвире ну бе һәвиртьрʹшк, у ӧса бьминьн. Чьмки Мәсиһ, бәрхе мәйи Щәжьна Дәрбазбуне һатийә ԛӧрбанкьрьне. 8 Ләма ԝәрен әм Щәжьна Дәрбазбуне нә кӧ бь һәвиртьрʹшке кәвьн дәрбаз кьн, нә жи бь һәвиртьрʹшке гӧнә у хьрабийе, ле бь нане беһәвиртьрʹшк, демәк бь нане һʹәлалийе у рʹастийе, дәрбаз кьн.

9 Мьн нәʹма хԝәда ԝәрʹа ньвиси, ԝәки һәләԛәтийа ԝә тʹәви кәсед кӧ зьнекʹарийе дькьн, гәрәке тʹӧнә бә. 10 Ле мьн дәрһәԛа зьнекʹар, чʹәʹвбьрʹчи, тʹаланкʹар, йан жи пʹутпʹарьстед ве дьнйайе нәгот. Һәрге ӧса буйа, һун гәрәке жь ве дьнйайе дәркʹәтана. 11 Ле ньһа әз ԝәрʹа дьньвисьм, ԝәки һәләԛәтийа ԝә тʹӧнә бә тʹәви кәсе кӧ жерʹа те готьне бьра, ле зьнекʹарийе дькә, йан чʹәʹвбьрʹчи йә, йан пʹута дьһʹәбинә, йан гьлийед хьраб дьбежә,* йан бь зедәйи вәдьхԝә, йан тʹаланкʹар ә. Һун гәрәке тʹәви кәсе ӧса хԝарьне жи нәхԝьн. 12 Әв ише мьн нинә кӧ әз диԝана ԝан бькьм, йед кӧ жь щьвате дәр ьн. Нә һун гәрәке диԝана ԝан бькьн, йед кӧ щьватеда ньн? 13 Ле диԝана ԝан, йед кӧ жь щьвате дәр ьн, Хԝәде дькә. «Кәсе кӧ хьрабийе дькә жь нав хԝә дәрхьн».

6 Гава йәк жь ԝә тʹәви йәки дькʹәвә дәʹԝе, һун ча дьԝерьн һәрʹьн диԝане бәр нәбаԝәрмәнда? Һун чьрʹа начьн бал йед пироз щьватеда? 2 Чьрʹа һун ньзаньн кӧ йед пироз ԝе диԝана дьнйайе бькьн? Һәрге һун нькарьн пьрсед бьчʹук сафи кьн, һуне чаԝа диԝана дьнйайе бькьн? 3 Һун ньзаньн кӧ әме диԝана мәләка бькьн? Ижа чьма һун нькарьн пьрсед бьчʹукә ве жийине сафи кьн? 4 Чахе лазьм ә кӧ һун пьрсед ве жийине сафи кьн, чьма дәʹԝ-дозед хԝә дьбьнә бал ԝан һʹакьма, йед кӧ пʹара щьвате ниньн? 5 Әз ӧса дьбежьм, ԝәки һун шәрм кьн. Гәло нав ԝәда ԛә мәрьвәки билан тʹӧнә кӧ бькарьбә пьрсед нав бьрада сафи кә? 6 Ле бьра бьре хԝә дьбә бәр диԝане, у ԝи бәр нәбаԝәрмәнда сущдар дькә!

7 Һун гава һәврʹа дькʹәвьнә дәргәһ-диԝана, ԝә ида дайә дәр. Дьһа баш нинә һун нәһәԛ дәрен? Дьһа баш нинә кӧ һун зьраре бьвиньн? 8 Дәԝсе, һун нәһәԛийе дькьн у зьраре дьдьнә бьред хԝә!

9 Чьма һун ньзаньн ԝәки кәсед кӧ хьрабийе дькьн ԝе Пʹадшатийа Хԝәде ԝар нәбьн? Нәхапьн! Кәсед кӧ бенамусийе дькьн, пʹута дьһʹәбиньн, зьнекʹарийе дькьн,* зәԝащеда нәмамийе дькьн, меред кӧ сәре хԝә мерарʹа датиньн,* 10 йед дьзийе дькьн, йед тьмакʹар, йед сәрхԝәш, йед кӧ гьлийед хьраб дьбежьн,* у йед тʹаланкʹар ԝе Пʹадшатийа Хԝәде ԝар нәбьн. 11 У һьнәк жь ԝә һәма мәрьвнә ӧса бун. Ле Хԝәде бь наве Хӧдане мә Иса Мәсиһ у бь рʹӧһʹе хԝә һун паԛьж кьрьн, пироз кьрьн у рʹаст һʹәсаб кьрьн.

12 Изьна мьн һәйә әз һәр тьшти бькьм, ле һәр тьшт керһати нинә. Изьна мьн һәйә әз һәр тьшти бькьм, ле әзе нәһельм, кӧ тьштәк мьн бькә бьн һʹӧкӧме хԝә. 13 Хԝарьн бона зьк ә, у зьк бона хԝарьне йә. Ле Хԝәде ԝе һьм хԝарьне, һьм жи зьк кʹӧта кә. Бәдән бона зьнекʹарийе нинә, ле бона шьхӧле Хӧдан ә, у Хӧдан жи бона бәдәне йә. 14 Хԝәде бь ԛәԝата хԝә Хӧдан жь мьрьне рʹакьр, у әԝе мә жи жь мьрьне рʹакә.

15 Чьма һун ньзаньн кӧ бәдәнед ԝә әндәмед Мәсиһ нә? Гәло рʹаст ә ԝәки һун әндәмед Мәсиһ һьлдьн, у ԝана тʹәви йа ԛав кьн? Тʹӧ щар на! 16 Гәло һун ньзаньн кӧ һәрге кәсәк тʹәви йа ԛав дьбә йәк, әԝ тʹәви ԝе дьбә бәдәнәк? Чьмки Хԝәде дьбежә: «Һәрдӧ ԝе бьбьнә йәк».* 17 Ле йе кӧ тʹәви Хӧдан йәктийеда йә, әԝ тʹәви ԝи рʹӧһʹда дьбә йәк. 18 Жь зьнекʹарийе бьрʹәвьн! Чьмки тʹӧ гӧнәки дьн сәр бәдәне ӧса һʹӧкӧм накә. Ле кәсе кӧ зьнекʹарийе дькә, әԝ мьԛабьли бәдәна хԝә гӧнә дькә. 19 Гәло һун ньзаньн кӧ бәдәна ԝә пʹарьстгәһа рʹӧһʹе пироз ә, йа кӧ нав ԝәда йә? У әв рʹӧһʹ жь Хԝәде йә. Һун хԝәйе сәре хԝә ниньн, 20 чьмки Хԝәде ԛимәтәки мәзьн бона ԝә дайә. Ләма жи бь бәдәна хԝә ԝи рʹумәт кьн.

7 Ньһа әз дьхԝазьм дәрһәԛа тьштед кӧ ԝә мьнрʹа ньвисинә хәбәр дьм: Бона мер дьһа баш ә кӧ дәсте хԝә нәдә жьне.* 2 Ле чьмки зьнекʹари* ӧса бәла буйә, бьра щәм һәр мерәки жьна ԝи һәбә у бьра щәм һәр жьнәке мере ԝе һәбә. 3 Мер гәрәке һʹәԝщед* жьна хԝә рʹази кә, у жьн жи гәрәке һәма ӧса бона мере хԝә бькә. 4 Жьн хԝәйе бәдәна хԝә нинә, ле мер ә хԝәйи, ӧса жи мер хԝәйе бәдәна хԝә нинә, ле жьн ә хԝәйи. 5 Ве йәкеда һәвдӧрʹа на-на нәкьн, хенщи гава һун һәврʹа ԛайил дьбьн кӧ сәр ԝәхтәке ԝәʹде хԝә бьдьнә дӧакьрьне, ле паше диса ль һәв вәгәрʹьн, ԝәки Шәйтʹан ԝә нәщерʹьбинә жь бо хԝәнәгьртьна ԝә. 6 Тьштед кӧ мьн ԝәрʹа готьнә, һун дькарьн бькьн, ле әва тʹәми нинә. 7 Мьне бьхԝәста кӧ һʹәму мина мьн бьн. Ле һәр йәк жь мә пʹешкʹеша* хԝә жь Хԝәде стандийә. Жь бо ве йәке, кәсед кӧ дьзәԝьщьн һәнә, у кәсед кӧ назәԝьщьн жи һәнә.

8 Әз нәзәԝьщийарʹа у жьнәбийарʹа ве йәке дьбежьм: Һәрге әԝана мина мьн бьминьн, әв бона ԝан һе баш ә. 9 Ле һәрге әԝана нькарьн хԝә бьгьрьн, бьра бьзәԝьщьн у мер кьн. Дәԝса кӧ әԝана хԝәда бьшәԝьтьн, дьһа баш ә кӧ бьзәԝьщьн, йан мер кьн.

10 Ле йед зәԝьщирʹа у меркьрийарʹа әз ве рʹебәрийе дьдьм: Гәрәке жьн жь мере хԝә нәԛәтә. Әв рʹебәри жь Хӧдан ә. 11 Ле һәрге әԝ жь мере хԝә бьԛәтә, бьра мер нәкә, йан жи тʹәви мере хԝә ль һәв бе. Мер жи гәрәке жьна хԝә бәрʹнәдә.

12 Ле йед майинрʹа, әз ве йәке дьбежьм, нә кӧ Хӧдан: Һәрге жьна бьраки, йа кӧ баԝәрмәнд нинә, дьхԝазә тʹәви ԝи бьминә, бьра ԝе бәрʹнәдә. 13 У һәрге мере жьнәке, йе кӧ баԝәрмәнд нинә, дьхԝазә тʹәви ԝе бьминә, бьра әԝ жь ԝи нәԛәтә. 14 Чьмки мере нәбаԝәрмәнд пе жьна хԝә пироз дьбә, у жьна нәбаԝәрмәнд пе мере хԝә пироз дьбә. Йан на, зарʹед ԝә ԝе паԛьж нибуна, ле ньһа әԝана пироз ьн. 15 Ле һәрге нәбаԝәрмәнд сафи дькә же бьԛәтә, бьра бьԛәтә. Ве дәрәщеда, хушк йан бьра мәщбур нинә, ԝәки тʹәви ԝи кәси бьминә. Хԝәде гази ԝә кьрийә кӧ һун әʹдьлайеда бьн. 16 Кʹӧлфәте, тӧ чь зани, бәлки те мере хԝә хьлаз ки? Йан меро, тӧ чь зани, бәлки те жьна хԝә хьлаз ки?

17 Йаһоԝа чаԝа пʹара һәр кәси да у чаԝа Хԝәде гази һәр кәси кьр, бьра әԝ ԝәкә ԝе йәке жи бьжи. Әв ә тʹәмийа кӧ әз дьдьмә һʹәму щьвата. 18 Һәрге йәк сьнәткьри бу гава һатә газикьрьне, бьра ви һʹалида бьминә. Һәрге йәк нәсьнәткьри бу гава һатә газикьрьне, бьра әԝ нәйе сьнәткьрьне. 19 Нә сьнәтбун тьштәк ә у нә жи нәсьнәтбун. Сәри әԝ ә, кӧ мәрьв хԝә ль тʹәмийед Хԝәде бьгьрә. 20 Бьра һәр кәс чь һʹалида бу гава һатә газикьрьне, ӧса жи бьминә. 21 Һәрге тӧ хӧлам буйи гава һати газикьрьне, ԛә хәм нәкә. Ле һәрге тӧ дькари аза би, ве мәщале жь дәсте хԝә бәрʹнәдә. 22 Чьмки хӧламе кӧ жь алийе Хӧданда һатийә газикьрьне, аза дьбә у пʹара Хӧдан ә. У кәсе аза, йе кӧ жь алийе Хӧданда һатийә газикьрьне, дьбә хӧламе Мәсиһ. 23 Һун бь ԛимәтәки мәзьн һатьнә кʹьрʹине. Ида нәбьнә хӧламед мәрьва. 24 Бьрано, һун чь һʹалида һатьнә газикьрьне, бәр Хԝәде ӧса жи бьминьн.

25 Бона ԛиз у хортед нәзәԝьщи,* мьн тʹәми жь Хӧдан нәстандийә. Ле әз ча йәки амьн, кӧ жь алийе Хӧданда рʹәʹм стандийә, дьхԝазьм ньһерʹандьна хԝә ԝәрʹа бежьм: 26 Ван рʹожед зор у зәʹмәтда, әз дьфькьрьм кӧ йа һәрә баш әԝ ә, ԝәки мәрьв һʹале хԝәда бьминә. 27 Жьна тә һәйә? Мәʹнийа нәгәрʹә кӧ же бьԛәти. Бе жьн и? Жьне нәгәрʹә. 28 Ле һәрге тӧ бьзәԝьщи йан мер ки жи, тӧ гӧнә наки. У йе азәп* жи һәрге бьзәԝьщә, гӧнә накә. Ле йәкә йед кӧ дьзәԝьщьн, тәнгасийед ԝан ԝе һәбьн. Ле әз дьхԝазьм али ԝә бькьм, кӧ ԝә жь ван тәнгасийа хԝәй кьм.

29 Хенщи ве йәке, бьрано, әз ве йәке ԝәрʹа дьбежьм: Ԝәхт һьндьк майә. Жь вьр шунда, йед кӧ жьна ԝан һәйә бьра ӧса бьн, ча бежи жьна ԝан тʹӧнә йә. 30 Йед кӧ дьгьрин бьра ӧса бьн, ча йед кӧ нагьрин. Йед кӧ ша дьбьн бьра ӧса бьн, ча йед кӧ ша набьн. Йед кӧ дькʹьрʹьн бьра ӧса бьн, ча әԝед кӧ тьштед ԝан тʹӧнә. 31 У йед кӧ тьштед ве дьнйайе дьдьнә хәбате, бьра бь тʹәмами нәдьнә хәбате, чьмки һʹале ве дьнйайе те гӧһастьне. 32 Әз дьхԝазьм кӧ һун жь хәма хьлаз бьн. Йе нәзәԝьщи хәм дькә, кӧ чаԝа шьхӧле Хӧдан бинә сери, чьмки дьхԝазә ль ԝи хԝәш бе. 33 Ле кәсе зәԝьщи бона тьштед ве дьнйайе хәм дькә кӧ ча дьле жьна хԝә рʹази кә, 34 у ӧса һʹьш-аԛьле ԝи дьбә дӧ пʹара. Һәма ви щурʹәйи, кʹӧлфәта бемер йан ԛиз хәм дькә, кӧ әԝе чаԝа шьхӧле Хӧдан бинә сери, ԝәки һьм бәдәна ԝе һьм жи аԛьле ԝе пироз бә. Ле кʹӧлфәта меркьри бона тьштед ве дьнйайе хәм дькә, кӧ ча дьле мере хԝә рʹази кә. 35 Әз ве йәке бона кʹара ԝә дьбежьм, нә кӧ ԝәки ԝә синор кьм. Ле әз дьхԝазьм ԝәки һун бь тʹәрбәти һәрәкʹәт бькьн, сәва кӧ тʹьме бь дьл у щан Хӧданрʹа хьзмәт кьн.

36 Ле һәрге кәсәк бәдән у аԛьле хԝәда гьһишти йә, у дьфькьрә кӧ һәрге әԝ нәзәԝьщә әԝ ида нькарә хԝә бьгьрә, һьнге бьра әԝ ль гора дьле хԝә бькә; әԝ гӧнә накә. Бьра бьзәԝьщә. 37 Ле һәрге кәсәк дӧдьли нинә у хԝә мәщбур һʹәсаб накә кӧ бьзәԝьщә, у дькарә хԝәстьнед хԝә зәфт кә у дьле хԝәда сафи кьрийә кӧ нәзәԝьщә, әԝ баш дькә. 38 Аԝа кәсе кӧ дьзәԝьщә баш дькә, ле кәсе кӧ назәԝьщә һе баш дькә.

39 Һʹәта кӧ мере жьне сах ә, әԝ гәрәке тʹәви ԝи бьминә. Ле һәрге мере ԝе бьмьрә, һьнге әԝ аза йә у кʹе бьхԝазә дькарә бьстинә, ле тʹәне гәрәке әԝ баԝәрмәнде Хӧдан бә. 40 Ле бь ньһерʹандьна мьн, һәрге әԝ ӧса бьминә, әԝе һе бәхтәԝар бә. У бь рʹасти әз дьфькьрьм кӧ рʹӧһʹе Хԝәде сәр мьн ә.

8 Ньһа әз дьхԝазьм дәрһәԛа хԝарьна пʹутарʹа ԛӧрбанкьри бьньвисьм: Занәбуна мә һʹәмуйа дәрһәԛа ве йәке һәйә. Занәбун бабах дькә, ле һʹәзкьрьн ава дькә. 2 Һәрге йәк дьфькьрә, кӧ әԝ тьштәки занә, әԝ һе ве йәке ча лазьм ә ньзанә. 3 Ле һәрге кәсәк Хԝәде һʹәз дькә, Хԝәде ԝи кәси нас дькә.

4 Ньһа дәрһәԛа хԝарьна пʹутарʹа ԛӧрбанкьри: Әм заньн кӧ пʹут тьштәк нинә, у тʹәне Хԝәдек һәйә. 5 Ль әʹзмен бә йан сәр рʹуйе әʹрде бә, йед кӧ сәр ԝан «хԝәде» те готьне, һәнә. Гәләк мәрьв ԝана «хԝәде» йан «хӧдан» һʹәсаб дькьн. 6 Ле бона мә тʹәне Хԝәдек һәйә, әԝ Бав ә. Һәр тьшт жь ԝи те, у әм бона ԝи дьжин. У бона мә тʹәне Хӧданәк һәйә, әԝ жи Иса Мәсиһ ә. Һәр тьшт бь ԝи чебу, у бь ԝи әм дьжин.

7 Ле һәр кәс ве йәке фәʹм накә. Һьнәка бәре пʹут дьһʹәбандьн. Ләма жи гава әԝана хԝарьнәкә пʹутарʹа ԛӧрбанкьри дьхԝьн, һʹәсаб дькьн кӧ әв йәк пʹутва гьредайи йә. Паше исафа ԝан ԝана дьһʹәрʹьминә, чьмки сьст ә. 8 Хԝарьн мә незики Хԝәде накә. Һәрге әм нахԝьн, әм тьштәки ӧнда накьн, у һәрге әм дьхԝьн жи, әм тьштәки настиньн. 9 Һаж хԝә һәбьн кӧ азайа бьжартьна ԝә нәбә кәвьре лькʹӧмандьне бона кәсед сьст.* 10 Һәрге жи һун заньн кӧ пʹут тьштәк нинә, мәрьве бь исафа сьст дькарә бьвинә кӧ һун пʹарьстгәһа пʹутда хԝарьне дьхԝьн. Әв йәк дькарә ԝи һелан кә, ԝәки хԝарьна кӧ пʹутарʹа һатьбу ԛӧрбанкьрьне, бьхԝә. 11 Һәрге жи тӧ зани ԝәки изьна тә һәйә ве хԝарьне бьхԝи, тӧ баԝәрийа кәсе сьст һьлдьшини. Бир нәкә, әԝ бьре тә йә, бона кʹижани Мәсиһ мьр. 12 Һәрге һун бь ви щурʹәйи мьԛабьли бьред хԝә гӧнә дькьн у исафа ԝанә сьст бьриндар дькьн, һун мьԛабьли Мәсиһ гӧнә дькьн. 13 Жь бо ве йәке, һәрге хԝарьна кӧ әз дьхԝьм, дьбә сәбәбе сьстбуна баԝәрийа* бьре мьн, әзе ида тʹӧ щара гошт нәхԝьм. Әз нахԝазьм тьштәки ӧса бькьм, чь кӧ дькарә баԝәрийа бьре мьн сьст кә.

9 Нә әз аза мә? Нә әз шанди мә? Нә мьн Хӧдане мә Иса дитийә? Нә һун кʹәда мьн ьн хьзмәтийа Хӧданда? 2 Һәрге кәсед дьн мьн шанди һʹәсаб накьн жи, бона ԝә бе шьк әз шанди мә! Һун избатийа ԝе йәке нә, кӧ әз шандийе Хӧдан ьм.

3 Әз ԝанрʹа, йед кӧ мьн сущдар дькьн, щаба хԝә ӧса дьдьм: 4 Гәло изьна мә тʹӧнә, ԝәки тьштед кӧ дьдьнә мә, әм бьхԝьн у вәхԝьн? 5 Гәло изьна мә тʹӧнә кӧ әм бьзәԝьщьн у жьна баԝәрмәнд тʹәви хԝә бьвьн рʹеԝитийе? Шандийед майин, бьред Хӧдан у Кифас* жи ӧса дькьн. 6 Гәло тʹәне әз у Барнабас мәщбур ьн бьхәбьтьн, ԝәки әʹбура хԝә бькьн? 7 Гәло кʹижан әскәр кʹиси хԝә ԛӧльх дькә? Гәло кʹи рʹәзәки дьчинә у жь бәред ԝи нахԝә? Гәло кʹижан шьван шире кәри вәнахԝә?

8 Әз ван тьшта ль гора ньһерʹандьна мәрьва набежьм. Ԛанун жи бәʹса ван тьшта дькә. 9 Ԛануна Мусада һатийә ньвисаре: «Дәве гайе кӧ бедәреда* дьхәбьтә, гьренәдә». Гәло Хԝәде тʹәне бона га хәм дькә? 10 Йан әԝ бь рʹасти бона кʹара мә дьбежә? Бәле, әв йәк бь рʹасти бона кʹара мә һатийә ньвисаре. Һьм йе кӧ әʹрд щот дькә, һьм жи йе кӧ бедәреда дьхәбьтә, дькарә бь гӧман һивийа пʹара хԝә бә.

11 Һәрге мә нава ԝәда тьштед рʹӧһʹани бәла кьрьнә,* гәло ԝе нәрʹаст бә кӧ әм һьнә тьшта бона һʹәԝщед хԝә жь ԝә ԛәбул кьн?* 12 Һәрге изьна кәсед дьн һәйә, кӧ аликʹарийа ԝә бьстиньн, нә һе зедә изьна мә һәйә? Ле диса жи мә әв изьна хԝә нәдайә хәбате. Дәԝса ве йәке, әм бәр һәр тьшти тәйах дькьн, сәва әм рʹийа тʹӧ кәси нәгьрьн, ԝәки баԝәрийа хԝә мьзгинийа дәрһәԛа Мәсиһ биньн. 13 Гәло һун ньзаньн кӧ әԝед пʹарьстгәһеда хьзмәт дькьн, тьштед пʹарьстгәһе дьхԝьн? Йан жи, һун ньзаньн кӧ әԝед бәр ԛӧрбангәһе хьзмәт дькьн, пʹарәкә жь тьштед кӧ сәр ԛӧрбангәһе тенә ԛӧрбанкьрьне, дьстиньн? 14 Һәма бь ԝи щурʹәйи, Хӧдан тʹәми дайә, ԝәки әԝед кӧ мьзгинийе бәла дькьн, пе мьзгинийе әʹбура хԝә бькьн.

15 Ле диса жи мьн тьштәк жь ԝә нәхԝәстийә. У әз ван тьшта бона ве йәке наньвисьм, ԝәки тьштәки жь ԝә бьхԝазьм. Һе баш ә әз бьмьрьм, нә кӧ кәсәк мәʹнийа мьнә фьрнаԛбуне жь мьн бьстинә! 16 Һәрге әз мьзгинийе бәла дькьм, мәʹнийа мьн тʹӧнә әз пʹайе хԝә бьдьм. Чьмки әв борще мьн ә. Ԝәй ль мьн, һәрге әз мьзгинийе бәла нәкьм! 17 Һәрге әз бь рʹәзәдьли ве йәке дькьм, хәлата мьн һәйә, ле һәрге жи нә бь хԝәстьна хԝә ве йәке бькьм, йәкә әв борщдари мьнрʹа һатийә дайине, әз гәрәке бькьм. 18 Ԝәки ӧса нә, хәлата мьн чь йә? Хәлата мьн әв ә, кӧ әз дькарьм бь рʹәзәдьли у бепʹәрә мьзгинийе бәла кьм. Бь ви щурʹәйи, әз ча мьзгинван һʹӧкӧме хԝә бона кʹара хԝә надьмә хәбате.

19 Рʹаст ә әз мәрьвәки аза мә, ле мьн хԝә кьрә хӧламе һәр кәси, ԝәки чьԛас дькарьм гәләк мәрьва ԛазанщ кьм. 20 Бона Щьһуйа әз бумә мина йәки Щьһу, ԝәки Щьһуйа ԛазанщ кьм. Бона кәсед кӧ бьн ԛанунеда ньн, әз бумә мина кәсәки кӧ бьн ԛанунеда йә. Рʹаст ә әз бьн ԛанунеда ниньм, ле ве йәке дькьм, ԝәки кәсед кӧ бьн ԛанунеда ньн, ԛазанщ кьм. 21 Бона кәсед бе ԛанун әз бумә мина кәсәки бе ԛанун. Рʹаст ә әз бе ԛанун ниньм бәр Хԝәде, ле бьн ԛануна Мәсиһда мә, әз ве йәке дькьм, кӧ йед бе ԛанун ԛазанщ кьм. 22 Бона йед сьст әз бумә йәки сьст, ԝәки йед сьст ԛазанщ кьм. Әз бона һʹәму щурʹә мәрьва бумә һәр тьшт, ԝәки чьԛас те стандьн һьнәка хьлаз кьм. 23 Әз һʹәму тьшти бона хатьре мьзгинийе дькьм, ԝәки ве мьзгинийе кәсед дьнрʹа бәла кьм.

24 Һун заньн, ԝәки йед кӧ ләщмәйданеда ньн, һʹәму жи дьрʹәвьн, ле тʹәне йәк хәлате дьстинә. Һун жи ӧса бьрʹәвьн, кӧ хәлате бьстиньн! 25 Һәр кәсе кӧ дькʹәвә ләще, һәр тьштида хԝәгьртьне дьдә кʹьфше. Әԝана ве йәке дькьн, ԝәки тʹаще кӧ дьчʹьлмьсә, бьстиньн. Ле әм ве йәке дькьн, ԝәки тʹаще кӧ һʹәта-һʹәтайе начʹьлмьсә, бьстиньн. 26 Бона ве йәке әз бе нет нарʹәвьм. Әз бадиһәԝа кʹӧлма хԝә навежьмә һәԝе. 27 Әз бәдәна хԝә дьхьм у ԝе дькьмә хӧлам, ԝәки ӧса нибә кӧ әз хәлԛерʹа мьзгинийе бәла кьм, ле хԝәха жи нәйемә ԛәбулкьрьне.

10 Бьрано, әз дьхԝазьм биньм бира ԝә, кӧ һʹәму кал-бавед мә бьн әʹԝрда бун у һʹәму жи Бәʹра Соррʹа дәрбаз бун. 2 Гава әԝана пәй Муса дьчун, һʹәму жи бьн әʹԝр у бәʹреда һатьнә ньхӧмандьне.* 3 Ԝана һʹәмуйа хут хԝарьнәкә рʹӧһʹани дьхԝар, 4 у һʹәмуйа жи хут вәхԝарьнәкә рʹӧһʹани вәдьхԝар. Ԝана жь зьнаре рʹӧһʹани, йе кӧ пәй ԝан дьчу, ав вәдьхԝар. Әԝ зьнар Мәсиһ бу. 5 Ле Хԝәде жь ԝан гәләка рʹази нибу, ләма жи әԝана бәрʹийеда мьрьн.

6 Әв тьштед кӧ һатьнә сәре ԝан, бона мә бунә дәрс, ԝәки дьле мә мина дьле ԝан нәчә сәр тьштед хьраб. 7 Нә жи бьбьнә пʹутпʹарьст, чаԝа жь ԝан һьнәк бун. Чаԝа кӧ Ньвисаред Пирозда те готьне: «Щьмәʹт рʹуньшт кӧ бьхԝә у вәхԝә. Паше әԝана рʹабун кӧ ԝәʹдәки хԝәш дәрбаз кьн». 8 Нә жи зьнекʹарийе* бькьн, чаԝа кӧ һьнәка жь ԝан зьнекʹари кьрьн у рʹожәкеда 23 000 мәрьв мьрьн. 9 Нә жи Йаһоԝа бьщерʹьбиньн, чаԝа кӧ жь ԝан һьнәка әԝ дьщерʹьбандьн у бь гәзкьрьна мәʹра һатьнә кӧштьне. 10 Нә жи бькьнә кӧтә-кӧт, чаԝа кӧ һьнәка жь ԝан дькьрьнә кӧтә-кӧт у бь дәсте мәләк һатьнә кӧштьне. 11 Әв тьштед кӧ һатьнә сәре ԝан, бона мә бунә дәрс. У әв тьшт һатьнә ньвисаре бона ширәткьрьна мә, кӧ хьлазийа ԝан дәмада дьжин.

12 Ләма жи кʹи дьфькьрә кӧ әԝ ԛайим сәкьни йә, бьра һаж хԝә һәбә кӧ нәкʹәвә. 13 Һʹәму щерʹьбандьнед кӧ тенә сәре ԝә, тенә сәре мәрьвед дьн жи. Ле Хԝәде амьн ә у әԝе нәһелә кӧ һун жь ԛәԝата хԝә дәр бенә щерʹьбандьне. Ле Хԝәде ԝе щерʹьбандьнеда ӧса жи дәлиләке бькә, ԝәки һун бькарьбьн тәйах кьн.

14 Ләма дәлалед мьн, жь пʹутпʹарьстийе бьрʹәвьн. 15 Әз тʹәви ԝә ча тʹәви мәрьвед сәрԝахт хәбәр дьдьм. Һун хԝәха готьнед мьн бьдьнә бәр һәв. 16 Әԝ кʹаса кʹәрәме, бона кʹижане әм шькьрийе дьдьнә Хԝәде, гәло мә накә һәвпʹаред хуна Мәсиһ? У әԝ нане кӧ әм кәр дькьн,* гәло мә накә һәвпʹаред бәдәна Мәсиһ? 17 Нан йәк ә, у рʹаст ә әм гәләк ьн, ле әм бәдәнәк ьн, чьмки әм һʹәму һәвпʹаред ԝи нани нә.

18 Һәла дина хԝә бьдьнә щьмәʹта Исраеле: Гава әԝана тьштед кӧ тенә ԛӧрбанкьрьне дьхԝьн, нә әԝана дьбьнә һәвпʹаред ԛӧрбангәһе? 19 Әз чь дьхԝазьм бь ве йәке бежьм, ԝәки пʹут йан жи чь кӧ пʹутрʹа тенә ԛӧрбанкьрьне, тьштәк ьн? 20 На, әз ӧса набежьм. Әз дьбежьм кӧ мьләтед дьн, нә кӧ Хԝәдерʹа, ле щьнарʹа ԛӧрбана дьдьн. У әз нахԝазьм кӧ һәләԛәтийа ԝә тʹәви щьна һәбә. 21 Һун нькарьн һьм жь кʹаса Йаһоԝа, һьм жи жь кʹаса щьна вәхԝьн. Һун нькарьн һьм жь «сьфра Йаһоԝа», һьм жи жь сьфра щьна бьхԝьн. 22 Йан әм дьхԝазьн ‹һерса Йаһоԝа рʹакьн›? Чьма әм жь ԝи ԛәԝаттьр ьн?

23 Һәр тьшт изьн ә, ле һәр тьшт керһати нинә. Һәр тьшт изьн ә, ле һәр тьшт нашьдинә. 24 Бьра һәр кәс нә кӧ кʹара хԝә бьгәрʹә, ле кʹара кәсе дьн.

25 Һәр гоште кӧ базареда те фьротане, бьхԝьн. Һәрге һун сафи дькьн гошт бьхԝьн, һьнге бь исафа тʹәмьз һун дькарьн бьхԝьн, 26 чьмки Ньвисаред Пирозда те готьне: «Әʹрд у һʹәму тьштед кӧ сәр әʹрде һәнә, йед Йаһоԝа нә». 27 Һәрге кәсәки нәбаԝәрмәнд ԝә тʹәглифи сәр хԝарьне дькә, у һун сафи дькьн һәрʹьн, чь жи дайньн бәр ԝә пе исафа тʹәмьз бьхԝьн. 28 Ле һәрге кәсәк ԝәрʹа бежә: «Әв гошт пʹутәкирʹа һатийә ԛӧрбанкьрьне», һьнге бона хатьре ԝи кәсе кӧ ԝәрʹа әв йәк гот у жь бо исафе, нәхԝьн. 29 Әз нә кӧ бәʹса исафа ԝә, ле бәʹса исафа мәрьвәки дьн дькьм. Чьрʹа исафа мәрьвәки дьн гәрәке азайа мьн сущдар кә? 30 Һәрге жи әз бь шькьрдайина Хԝәде хԝарьне дьхԝьм, у изьна мьн һәйә бьхԝьм, ле әв йәк ԝе бьбә сәбәб кӧ кәсед дьн мьн сущдар кьн, чьрʹа әз гәрәке ве йәке бькьм?

31 Ләма жи һун бьхԝьн йан вәхԝьн йан жи тьштәки дьн бькьн, һәр тьшти бона рʹумәта Хԝәде бькьн. 32 Тʹӧ кәсирʹа нәбьнә сәбәбе лькʹӧмандьне, нә Щьһуйарʹа, нә Йунанарʹа, нә жи ԝанрʹа, йед кӧ щьвата Хԝәдеда ньн. 33 Әз жи хирәт дькьм кӧ ӧса бькьм. Әз хирәт дькьм кӧ пе һʹәму кьред хԝә дьле гьшка рʹази кьм. Әз нә кӧ кʹара хԝә, ле кʹара гәләка дьгәрʹьм, ԝәки әԝана хьлаз бьн.

11 Һун чʹәʹв бьдьнә мьн, чаԝа әз чʹәʹв дьдьмә Мәсиһ.

2 Әз пʹайе ԝә дьдьм, чьмки һун һәртʹьм мьн тиньн бира хԝә у хԝә ԛәԝи ль ԝан рʹебәрийа* дьгьрьн, йед кӧ мьн данә ԝә. 3 Ле әз дьхԝазьм һун бьзаньбьн, кӧ сәре һәр мери Мәсиһ ә, сәре жьне мер ә, у сәре Мәсиһ жи Хԝәде йә. 4 Һәр мере кӧ сәргьредайи* дӧа дькә йан пʹехәмбәртийе дькә, әԝ сәре хԝә беһӧрмәт дькә. 5 Ле гава жьн сәре хԝә гьренадә у дӧа дькә йан жи пʹехәмбәртийе дькә, әԝ сәре хԝә беһӧрмәт дькә. Әԝ дьбә мина йәкә пʹорʹкӧрʹкьри. 6 Һәрге жьн сәре хԝә гьренадә, бьра пʹорʹе хԝә жи бьбьрʹә. Ле чьмки бона жьне шәрмә ә кӧ пʹорʹе ԝе бе бьрʹине йан кӧрʹкьрьне, бьра әԝ сәре хԝә гьредә.

7 Мер гәрәке сәре хԝә гьренәдә, чьмки әԝ сурәт у рʹумәта Хԝәде йә, ле жьн рʹумәта мер ә. 8 Чьмки нә кӧ мер жь жьне чебу, ле жьн жь мер чебу. 9 Хенщи ве йәке, нә кӧ мер бона жьне һатә чекьрьне, ле жьн бона мер. 10 Бона ве мәʹнийе у жь бо мәләка, гәрәке жьн сәре хԝә гьредә, ԝәки нишан кә кӧ әԝ бьн һʹӧкӧмда йә.

11 Хенщи ве йәке, щьвата Хӧданда, мер һʹәԝще жьне йә у жьн жи һʹәԝще мер ә. 12 Чьмки чаԝа кӧ жьн жь бәдәна мер һатә әʹфьрандьне, ӧса жи мер жь жьне те буйине, ле һʹәму тьшт Хԝәде әʹфьрандийә. 13 Һун хԝәха бежьн: Ԛә дьбә кӧ жьн сәре хԝә гьренәдә у Хԝәдерʹа дӧа бькә? 14 Нә тʹәбийәт жи ԝә һин дькә, ԝәки бона мер пʹорʹе дьреж беһӧрмәти йә, 15 ле бона жьне пʹорʹе дьреж рʹумәти йә? Пʹорʹ дәԝса сәргьредане ԝерʹа һатийә дайине. 16 Һәрге кәсәк дьхԝазә мьԛабьли ви әʹдәти тьштәки бежә, щаба мьн әв ә, кӧ һьм бал мә у һьм жи бал щьватед Хԝәде әʹдәтәки дьн тʹӧнә йә.

17 Ле гава әз ван рʹебәрийа дьдьмә ԝә, әз пʹайе ԝә надьм. Щьвинед ԝә һе зедә зьраре дьдьнә ԝә, нә кӧ кʹаре. 18 Йа пешьн, әз дьбьһем кӧ гава һун щьватеда тʹоп дьбьн, нав ԝәда дӧтирәти пешда те. У әз баԝәр дькьм ԝәки һьнә тьштед кӧ әз дьбьһем, рʹаст ьн. 19 Әре, нав ԝәда ԝе дӧтирәти* һәбә, у әв йәк ԝе әшкәрә кә, кӧ Хԝәде кʹе ԛәбул дькә.

20 Гава һун щики тʹәвайи тʹоп дьбьн кӧ Шива Хӧдан бьхԝьн, һун ԝе бь щурʹәки нәрʹаст дәрбаз дькьн. 21 Чьмки пешийа дәрбазкьрьна Шива Хӧдан, һьнәк жь ԝә ида шива хԝә дьхԝьн, у ӧса дьбә кӧ йәк бьрʹчи дьминә, йәки дьн жи сәрхԝәш ә. 22 Чьрʹа малед ԝә тʹӧнә нә кӧ һун теда бьхԝьн у вәхԝьн? Йан һун щьвата Хԝәде ньмьз дькьн у дьхԝазьн йед кʹәсиб бьдьнә шәрме? Әз чь ԝәрʹа бежьм? Гәрәке әз пʹайе ԝә бьдьм? Ве йәкеда әз нькарьм пʹайе ԝә бьдьм.

23 Чь жи әз ԝә һин дькьм, әз жь Хӧдан һин бум. Ԝе шәва кӧ Хӧдан Иса һатә нәмамкьрьне, әԝи нан һьлда, 24 у гава шькьри да Хԝәде, нан кәр кьр* у гот: «Әва бәдәна мьн те һʹәсабе, йа кӧ ԝе бона ԝә бе дайине. Ве йәке бона биранина мьн бькьн». 25 Ԝи щурʹәйи пәй шиверʹа әԝи кʹас жи һьлда у гот: «Әв кʹас пәймана ну те һʹәсабе, йа кӧ ԝе сәр һʹиме хуна мьн бона ԝә бе рʹетьне. Һәртʹьм гава һун же вәдьхԝьн, ве йәке бона биранина мьн бькьн». 26 Гава һун жь ви нани дьхԝьн у жь ве кʹаса шәраве вәдьхԝьн, һун бәрдәԝам дькьн мьрьна ԝи әʹлам дькьн, һʹәта һатьна Хӧдан.

27 Ләма жи кʹи бь нәлайиԛи ви нани дьхԝә у кʹаса Хӧдан вәдьхԝә, әԝ мьԛабьли бәдән у хуна Хӧдан гӧнә дькә. 28 Бьра пешийе һәр кәс хԝә рʹьнд бьщерʹьбинә, у тʹәне паше жь ви нани бьхԝә у жь ве кʹаса шәраве вәхԝә. 29 Һәрге кәсәк дьхԝә у вәдьхԝә у фәʹм накә кӧ әв бәдәна Хӧдан те һʹәсабе, әԝ диԝана Хԝәде сәр хԝәда тинә. 30 Ләма гәләк кәс нав ԝәда сьст у нәхԝәш ьн у һьнәк жи мьрьнә.* 31 Ле һәрге мә хԝә рʹьнд бьщерʹьбанда, диԝана мә ԝе нәһата кьрьне. 32 Ле гава диԝана мә те кьрьне, әв те һʹәсабе кӧ Йаһоԝа мә ширәт дькә, ԝәки әм тʹәви дьнйайе нәйенә диԝанкьрьне. 33 Ләма бьрано, гава һун бона Шива Хӧдан тʹәвайи тʹоп дьбьн, һивийа һәвдӧ бьн. 34 Һәрге кәсәк бьрʹчи йә, бьра әԝ мала хԝәда хԝарьне бьхԝә, ԝәки гава һун тʹәвайи тʹоп дьбьн, диԝана ԝә нәйе кьрьне. Ле пьрсед кӧ манә, гава бем әзе һьнге сафи кьм.

12 Бьрано, әз дьхԝазьм кӧ дәрһәԛа пʹешкʹешед Хԝәде занәбуна ԝә һәбә. 2 Һун заньн пешийа һун бьбуна баԝәрмәнд, һун пәй пʹута кʹәтьбун, йед кӧ нькарьн хәбәр дьн. Һун пәй ԝан дьчун, у ԝә анәгори хԝәстьна ԝан дькьр. 3 Әз дьхԝазьм һун бьзаньбьн, ԝәки тʹӧ кәс пе рʹебәрийа рʹӧһʹе Хԝәде ӧса набежә: «Бьра ньфьрʹ ль Иса бә!» У тʹӧ кәс нькарә бежә: «Иса Хӧдан ә!», һәрге пе рʹебәрийа рʹӧһʹе пироз нибә.

4 Щурʹә-щурʹә пʹешкʹешед жь Хԝәде һәнә, ле рʹӧһʹ тʹәне йәк ә. 5 Гәләк щурʹә хьзмәти һәнә, ле Хӧдан тʹәне йәк ә. 6 Щурʹә-щурʹә шьхӧл һәнә, ле Хԝәдайе кӧ ԛәԝате дьдә ԝәки әв шьхӧл бенә кьрьне, йәк ә. 7 Аликʹарийа кӧ рʹӧһʹе пироз дьдә һәр кәси, бона кʹара һʹәмуйа йә. 8 Йәк бь сайа рʹӧһʹ дькарә бь билани хәбәр дә, йәк бь сайа ви рʹӧһʹи дькарә бь занәбуне хәбәр дә. 9 Йәк бь сайа ви рʹӧһʹи баԝәрийе дьстинә, йәки дьн жи пʹешкʹешед ԛәнщкьрьне дьстинә. 10 Йәк бь сайа ви рʹӧһʹи дькарә кʹәрәмәта бькә, йәк дькарә пʹехәмбәртийе бькә, йәк дькарә тедәрхә һәла гьли-готьн жь бина бәр Хԝәде нә йан на, йәк дькарә сәр щурʹә-щурʹә зьмана хәбәр дә, у йәк жи дькарә зьманед дьн тʹәрщьмә кә. 11 Әв һʹәму тьшт бь сайа ви рʹӧһʹи тенә сери. Ль гора рʹебәрийа рʹӧһʹе Хԝәде һәр кәс дькарә тьште кӧ ԝирʹа һатийә дайине, бькә.

12 Чаԝа кӧ бәдән йәк ә, ле әндәмед ԝе гәләк ьн у әԝ һʹәму әндәм һәврʹа бәдәнәк ьн, бәдәна Мәсиһ жи һәма ӧса йә. 13 Әм һʹәму бь рʹӧһʹәки һатьнә ньхӧмандьне* кӧ бьбьнә бәдәнәк. Әм Щьһу бьн, йан Йунан бьн, йан хӧлам бьн, йан жи кәсед аза бьн, мә һʹәмуйа жи әв рʹӧһʹ стандийә.

14 Бәле, бәдән нә тʹәне әндәмәк ә, ле жь гәләк әндәма йә. 15 Һәрге ньг бежә: «Әз пʹарәкә бәдәне ниньм, чьмки әз дәст ниньм», әԝ найе һʹәсабе ԝәки әԝ әндәме бәдәне нинә. 16 У һәрге гӧһ бежә: «Әз пʹарәкә бәдәне ниньм, чьмки әз чʹәʹв ниньм», әԝ найе һʹәсабе ԝәки әԝ әндәме бәдәне нинә. 17 Һәрге тʹәмамийа бәдәне чʹәʹв буйа, ижа мәрьв ԝе чаԝа бьбьһиста? Һәрге тʹәмамийа бәдәне гӧһ буйа, мәрьв ԝе нькарьбуйа бин һьлда. 18 Ле Хԝәде һәр әндәмәки бәдәне ль гора хԝәстьна хԝә щи кьрийә.

19 Һәрге һʹәму әндәм мина һәв буна, гәло әԝ бәдән ԝе чь щурʹәйи буйа? 20 Бәле, гәләк әндәм һәнә, ле бәдән йәк ә. 21 Чʹәʹв нькарә дәстрʹа бежә: «Әз һʹәԝще тә ниньм», у сәри нькарә ньгрʹа бежә: «Әз һʹәԝще тә ниньм». 22 Әндәмед бәдәне, йед кӧ сьст тенә кʹьфше, бь рʹасти лазьм ьн. 23 Әм һе зедә дина хԝә дьдьнә ԝан әндәмед бәдәна хԝә, йед кӧ әм һаԛас фәрз һʹәсаб накьн, бь ви щурʹәйи әм гәләк фәсал дина хԝә дьдьнә әндәмед бәдәна хԝә, кʹижан кӧ гәрәке нәйенә хане. 24 Ле нә һʹәԝщә йә кӧ әм һе зедә дина хԝә бьдьнә әндәмед бәдәнейә бәрбьчʹәʹв. Хԝәде бәдән ӧса чекьрийә, кӧ әндәмед сьстрʹа һе зедә һӧрмәт бе дайине. 25 Әԝи ӧса кьр кӧ бәдәнеда дӧтирәти тʹӧнә бә, ле ԝәки әндәмед бәдәне бона һәвдӧ хәм бькьн. 26 Гава әндәмәки бәдәне еше дькʹьшинә, һʹәму әндәмед дьн жи тʹәви ԝи еше дькʹьшиньн. Ле гава әндәмәки бәдәне те һӧрмәткьрьне, һʹәму әндәмед дьн жи тʹәви ԝи ша дьбьн.

27 Һун бәдәна Мәсиһ нә, у һәр йәк жь ԝә әндәмәки ве бәдәне йә. 28 Хԝәде щьватеда һәр йәк бона тьштәки кʹьфш кьрийә: Йа йәке шанди, йа дӧда пʹехәмбәр, йа сьсийа дәрсдар, паше әԝед кӧ кʹәрәмәта дькьн, паше жи әԝед кӧ пʹешкʹешед ԛәнщкьрьне стандьнә, әԝед кӧ аликʹарийе дьдьн, әԝед кӧ рʹебәрийе дькьн, у әԝед кӧ сәр щурʹә-щурʹә зьмана хәбәр дьдьн. 29 Гәло гьшк шанди нә? Гәло гьшк пʹехәмбәр ьн? Гәло гьшк дәрсдар ьн? Гәло гьшк кʹәрәмәта дькьн? 30 Гәло гьшка пʹешкʹешед ԛәнщкьрьне стандьнә? Гәло гьшк сәр зьманед дьн хәбәр дьдьн? Гәло гьшк дькарьн тʹәрщьмә кьн? 31 Дә хирәт кьн кӧ һун жь Хԝәде пʹешкʹешед дьһа мәзьн бьстиньн. Ле ньһа әзе рʹийа һәрә баш нишани ԝә кьм.

13 Һәрге әз бь зьмане мәрьва у бь зьмане мәләка хәбәр дьдьм, ле һʹәзкьрьна мьн тʹӧнә, әз мина ԝан һащәтед музики мә, йед кӧ дькьнә зьнгин у әʹщьз дькьн. 2 Һәрге мьн жь Хԝәде пʹешкʹеш стандийә кӧ пʹехәмбәртийе бькьм, йан һʹәму сӧрʹед Хԝәде фәʹм кьм, йан һʹәму занәбуне бьзаньбьм, йан баԝәрийа мьн ӧса бә кӧ әз чʹийа щигӧһасти кьм, ле һʹәзкьрьна мьн тʹӧнә йә, әз нә тʹӧ тьшт ьм. 3 Йан һәрге әз бь һʹәму мал-мьлкʹе хԝә али бәләнгаза бькьм, у бәдәна хԝә ча ԛӧрбан бьдьм, ԝәки фьрнаԛ бьм, ле һʹәзкьрьна мьн тʹӧнә бә, тʹӧ кʹара мьн тʹӧнә.

4 Һʹәзкьрьн бь сәбьр ә* у ԛәнщ ә. Һʹәзкьрьн һʹәвсудийе накә, хԝә мәзьн накә у хԝә ԛӧрʹә накә. 5 Һʹәзкьрьн хԝә нәщайиз надә кʹьфше,* кʹара хԝә нагәрʹә, зу һерс накʹәвә у кʹине нажо.* 6 Һʹәзкьрьн хьрабийерʹа* ша набә, ле рʹастийерʹа ша дьбә. 7 Һʹәзкьрьн һәр тьшти сәбьр дькә, һәр тьшти баԝәр дькә, һәр гав хԝәйигӧман ә, у бәр һәр тьшти тәйах дькә.

8 Һʹәзкьрьн тʹӧ щар хьлаз набә. Ле пʹешкʹеша пʹехәмбәртикьрьне у пʹешкʹеша хәбәрдана сәр зьмана* ԝе бәтавәбьн. Пʹешкʹеша занәбуне жи ԝе тʹәви ԝан бәтавәбә. 9 Чьмки занәбуна мә тʹам нинә у пʹехәмбәртийа мә жи тʹам нинә. 10 Ле гава тьште тʹам бе, тьште нәтʹам ԝе хьлаз бә. 11 Гава әз зарʹ бум, мьн мина зарʹа хәбәр дьда, әз мина зарʹа дьфькьрим, у аԛьле мьн жи мина аԛьле зарʹа бу. Ле ньһа әз мәзьн бумә, у тьштед зарʹотийе мьн жь хԝә дур хьстьнә. 12 Ньһа әм зәлал навиньн, әм ча бежи нәйнька һʹәсьнида дьньһерʹьн, ле паше әме зәлал бьвиньн. Ньһа занәбуна мьн тʹам нинә, ле паше әԝе тʹам бә, чаԝа кӧ Хԝәде мьн тʹам нас дькә. 13 Аԝа ньһа чь жи дьминә әԝ һәйә баԝәри, гӧман у һʹәзкьрьн, у жь ԝана йа һәрә мәзьн һʹәзкьрьн ә.

14 Пешийа һәр тьшти бәрдәԝам кьн сәр рʹийа һʹәзкьрьне бьмәшьн, у чь жь дәсте ԝә те бькьн, ԝәки пʹешкʹешед Хԝәде бьстиньн, илаһи пʹешкʹеша кӧ пʹехәмбәртийе бькьн. 2 Әԝе кӧ әв пʹешкʹеш стандийә ԝәки бь зьманәки дьн хәбәр дә, әԝ нә кӧ мәрьварʹа хәбәр дьдә, ле Хԝәдерʹа. Әԝ бь ԛәԝата рʹӧһʹ сӧрʹед пироз әшкәрә дькә, ләма тʹӧ кәс ԝи фәʹм накә. 3 Ле әԝе кӧ пʹехәмбәртийе дькә, әԝ бь гьлийед хԝә дьле мәрьвед дьн ԛәԝи дькә, дьл дьдә бәр ԝан у бәр дьле ԝанда те. 4 Әԝе кӧ бь зьманәки дьн хәбәр дьдә, әԝ дьле хԝә ԛәԝи дькә. Ле йе кӧ пʹехәмбәртийе дькә, әԝ щьвате ԛәԝи дькә. 5 Мьне бьхԝәста ԝәки һун сәр зьманед хәриб хәбәр дьн, ле әз һе зедә дьхԝазьм, ԝәки һун пʹехәмбәртийе бькьн. Һәрге кәсәк сәр зьманед дьн хәбәр дьдә у гьлийед хԝә тʹәрщьмә накә кӧ щьвате ԛәԝи кә, әԝе кӧ пʹехәмбәртийе дькә жь ԝи мәзьнтьр ә. 6 Аԝа бьрано, һәрге әз бемә щәм ԝә у бь зьманед хәриб хәбәр дьм, әзе чь кʹаре бьдьмә ԝә? Һәрге әз әʹйантийе, йан занәбуне, йан пʹехәмбәртийе, йан һинкьрьне ԝәрʹа нәйньм, әзе тʹӧ кʹаре нәдьм.

7 Мәсәлә тьштед нәбинбәр жи, йед кӧ дәнг дәрдьхьн, ча бьлур йан чәнг, гава дәнге ԝан зәлал нибә, мәрьв ԝе чаԝа бьзаньбьн чь мьԛам те лехьстьне? 8 Һәрге дәнге борʹийе зәлал нибә, кʹи ԝе бона шәрʹ һазьр бә? 9 Һәма бь ви щурʹәйи, һәрге һун хәбәред ӧса дьдьнә хәбате, кӧ чәтьн ә фәʹм кьн, гәло кʹи ԝе ԝә фәʹм кә, кӧ һун чь дьбежьн? Хәбәрдана ԝә ԝе бадиһәԝа бә.* 10 Дьнйайеда гәләк щурʹә зьман һәнә, у гьшк жи дькарьн бенә фәʹмкьрьне. 11 Һәрге әз хәбәрдана мәрьве кӧ сәр зьмане хәриб хәбәр дьдә, фәʹм накьм, әз бона ԝи хәриб ьм, у әԝ жи бона мьн хәриб ә. 12 Бона ԝә жи һәма ӧса йә: Һун кӧ дьхԝазьн пʹешкʹешед жь Хԝәде бьстиньн, хирәт кьн ԝәки әԝ пʹешкʹешед кӧ дькарьн щьвате ԛәԝи кьн, бьстиньн.

13 Ләма жи, йе кӧ сәр зьманәки дьн хәбәр дьдә, бьра дӧа бькә кӧ әԝ бькарьбә готьнед хԝә тʹәрщьмә кә. 14 Гава әз сәр зьманәки дьн дӧа дькьм, әз пе пʹешкʹеша кӧ мьн жь Хԝәде стандийә дӧа дькьм, ле һʹьше мьнда тʹӧ тьшт рʹунане. 15 Ижа әз чь бькьм? Әзе бь пʹешкʹеша рʹӧһʹани дӧа бькьм, ле әзе ӧса жи дӧа бькьм, ԝәки фәʹм кьм чь дьбежьм. Әзе бь пʹешкʹеша рʹӧһʹани бь кʹьлама пәсьне Хԝәде бьдьм, ле әзе кʹьлама пәсьндайине жи бь гьлийед кӧ әз фәʹм дькьм, бьстьрем. 16 Һәрге тӧ бь пʹешкʹеша рʹӧһʹани пәсьне Хԝәде дьди, ле мәрьв гьлийед тә фәʹм накә, ижа әԝе чаԝа бона дӧайе тәйи шькьрдайине бежә «Амин»? 17 Әре, тӧ бь щурʹе баш шькьрийе дьди Хԝәде, ле мәрьве дьн жь ԝе кʹаре настинә. 18 Шькьр Хԝәдерʹа кӧ мьн әв пʹешкʹеш стандийә, ԝәки әз жь ԝә һʹәмуйа зедәтьр сәр зьманед дьн хәбәр дьм. 19 Ле дьһа баш ә щьватеда әз бь пенщ хәбәред фәʹмдари хәбәр дьм, сәва кӧ йед дьн һин кьм, нә кӧ бь 10 000 хәбәред нәфәʹмдари.

20 Бьрано, һʹьш-аԛьле хԝәда нәбьн мина зарʹа, ле бона тьштед хьраб бьбьнә мина зарʹед бьчʹук. Һʹьш-аԛьле хԝәда бь тʹәмами гьһишти бьн. 21 Ԛанунеда һатийә ньвисаре: «Йаһоԝа дьбежә: ‹Әзе бь зьман у гьлийед хәриба ве щьмәʹтерʹа хәбәр дьм, ле диса жи әԝе гӧһ нәдьнә мьн›». 22 Әв пʹешкʹеша кӧ кәсәк дькарә бь зьманед дьн хәбәр дә, нә кӧ бона баԝәрмәнда нишан ә, ле бона нәбаԝәрмәнда. Ле пʹехәмбәрти нә кӧ бона нәбаԝәрмәнда йә, ле бона баԝәрмәнда. 23 Һәрге тʹәмамийа щьвате ль һәв тʹоп бә у һәр кәс сәр зьманәки дьн хәбәр дә, у кәсед нәхԝәнди йан нәбаԝәрмәнд бькʹәвьнә һьндӧрʹ, әԝана ԝе бежьн кӧ ԝә һʹьше хԝә ӧнда кьрийә. 24 Ле һәрге һун һʹәму жи пʹехәмбәртийе бькьн, у кәсәки нәбаԝәрмәнд йан нәхԝәнди бькʹәвә һьндӧрʹ, гьлийед ԝә ԝе нишан кьн кӧ әԝ чьда нәрʹаст ә у әԝе дьле хԝә кʹур әʹнәнә кә. 25 Һьнге сӧрʹед дьле ԝи ԝе әшкәрә бьн, у әԝе бькʹәвә сәр чока, Хԝәде бьһʹәбинә у бежә: «Бь рʹасти жи, Хԝәде нав ԝәда йә».

26 Ижа бьрано, һун чь гәрәке бькьн? Гава һун ль һәв тʹоп дьбьн, йәк зәбуре дьстьре, йәк һин дькә, йәк әʹйантийа кӧ жерʹа һатийә дайине гьли дькә, йәк сәр зьманәки дьн хәбәр дьдә, у йәки дьн жи тʹәрщьмә дькә. Ван һʹәму тьшта ӧса бькьн, ԝәки һун һәвдӧ ԛәԝи кьн. 27 Һәрге йед сәр зьмане хәриб хәбәр дьдьн һәнә, бьра дӧдӧ йан лапә зәʹф се кәс хәбәр дьн. Бьра әԝана йәк пәй йәкирʹа хәбәр дьн, у кәсәки дьн жи гьлийед ԝан тʹәрщьмә бькә. 28 Һәрге бона кәсәки тʹәрщьман тʹӧнә бә, бьра әԝ щьватеда дәнге хԝә нәкә у дьле хԝәда Хԝәдерʹа хәбәр дә. 29 Бьра дӧдӧ йан се пʹехәмбәр хәбәр дьн, ле бьра кәсед дьн хирәт кьн ԝәки нета ве фәʹм кьн. 30 Һәрге ԝәʹде щьвине кәсәк алийе Хԝәдеда әʹйантийе бьстинә, бьра йе кӧ хәбәр дьдә хԝә кәрʹ кә. 31 Һун дькарьн йәк пәй йәкерʹа пʹехәмбәртийе бькьн, ԝәки һәр кәс тьштәки һин бә у дьле ԝи ԛәԝи бә. 32 Гава пʹехәмбәр ве пʹешкʹеша Хԝәде бьдьнә хәбате, бьра һаж хԝә һәбьн, кӧ әԝана чаԝа ве йәке дькьн. 33 Чьмки Хԝәде нә кӧ Хԝәдайе бетʹәрбәтийе йә, ле Хԝәдайе әʹдьлайе йә.

Чаԝа кӧ һʹәму щьватед пирозада, 34 жьн гәрәке щьватада дәнге хԝә нәкьн. Изьна ԝан тʹӧнә хәбәр дьн. Чаԝа кӧ Ԛанунеда жи те готьне, әԝана гәрәке гӧһдар бьн. 35 Һәрге жьн дьхԝазьн тьштәки һин бьн, бьра әԝана малда жь меред хԝә бьпьрсьн, чьмки шәрм ә кӧ жьн бәр щьвате хәбәр дә.

36 Гәло хәбәра Хԝәде жь ԝә дәркʹәт? Йан жи тʹәне ԝә әԝ стандийә?

37 Һәрге кәсәк дьфькьрә кӧ әԝ пʹехәмбәр ә, йан пʹешкʹешәк жь Хԝәде стандийә, әԝ гәрәке фәʹм бькә, ԝәки чь жи әз ԝәрʹа дьньвисьм тʹәмийа Хӧдан ә. 38 Һәрге кәсәк ве йәке инкʹар дькә, әԝе бе инкʹаркьрьне.* 39 Ләма жи бьред мьн, хирәт кьн кӧ һун пʹехәмбәртийе бькьн, у рʹийа кәсед дьн нәгьрьн, ԝәки әԝана сәр зьманед дьн хәбәр дьн. 40 Ле бьра һәр тьшт бь щурʹе рʹаст, у тʹәрбәти бә.

15 Бьрано, әз дьхԝазьм мьзгинийа кӧ мьн гиһандьбу ԝә биньм бира ԝә. Ԝә әв мьзгини ԛәбул кьр у баԝәрийа хԝә ле ани. 2 Һәрге һун хԝә ԛайим ль ве мьзгинийе бьгьрьн, һуне бенә хьлазкьрьне. Һәрге на, һун бадиһәԝа бунә баԝәрмәнд.

3 Йәк жь тьштед һәри фәрз, йед кӧ мьн гиһандьнә ԝә у мьн хԝәха жи стандьнә әԝ ә, кӧ Мәсиһ ль гора Ньвисаред Пироз бона гӧнед мә мьр, 4 у һатә дәфьнкьрьне. Бәле, ль гора Ньвисаред Пироз әԝ рʹожа сьсийа жь мьрьне һатә рʹакьрьне, 5 у әԝ Кифасрʹа* хӧйа бу, у паше Донздәһарʹа* жи. 6 Паше, әԝ щарәкерʹа 500 бьрайи* зедәтьррʹа хӧйа бу; жь ԝан гәләк һе нав мәда ньн, ле һьнәк жь ԝан кʹәтьнә хәԝа мьрьне. 7 Паше жи әԝ Аԛубрʹа хӧйа бу, у паше һʹәму шандийарʹа жи. 8 Ахьрийе, әԝ мьнрʹа жи хӧйа бу, чаԝа зарʹәкерʹа, йе кӧ пешийа ԝәʹде хԝә һатийә буйине.

9 Чьмки жь шандийа йе һәри бьчʹук әз ьм. Әз нәһежа мә кӧ сәр мьн шанди бе готьне, чьмки мьн щьвата Хԝәде дьзеранд. 10 Ле бь сайа ԛәнщийа Хԝәдейә мәзьн әз әԝ ьм, чь жи һәмә. У ԛәнщийа ԝийә мәзьн һьндава мьнда бадиһәԝа нибу, чьмки мьн хьзмәтийеда жь һʹәмуйа зәʹфтьр шьхӧл кьр. Ле мьн әв йәк нә кӧ пе ԛәԝата хԝә, ле бь сайа ԛәнщийа Хԝәдейә мәзьн кьр. 11 Әм гьшк жи, фьрԛи тʹӧнә әз йан шандийед дьн, мьзгинике бәла дькьн у ԝә баԝәрийа хԝә ле анийә.

12 Мьзгинийа кӧ әм бәла дькьн әԝ ә, кӧ Мәсиһ жь мьрьне һатә рʹакьрьне. Ижа чьма һьнәк жь ԝә дьбежьн, кӧ рʹабуна мьрийа тʹӧнә? 13 Һәрге рʹабуна мьрийа тʹӧнә, ԝәки ӧса нә Мәсиһ жи жь мьрьне нәһатийә рʹакьрьне. 14 Ле һәрге Мәсиһ жь мьрьне нәһатийә рʹакьрьне, демәк мьзгинийа мә бош-бәтал ә, у баԝәрийа мә жи пʹучʹ ә. 15 Сәрда жи, һәрге йед мьри ԝе бь рʹасти нәйенә рʹакьрьне, ԝәки ӧса нә Хԝәде нә жи Мәсиһ жь мьрьне рʹакьрийә. Демәк, гава әм дьбежьн кӧ әԝи Мәсиһ жь мьрьне рʹакьрийә, әм дәрһәԛа Хԝәде дәрәԝа дькьн. 16 Һәрге йед мьри ԝе нәйенә рʹакьрьне, ԝәки ӧса нә Мәсиһ жи жь мьрьне нәһатийә рʹакьрьне. 17 Һәрге Мәсиһ жь мьрьне нәһатийә рʹакьрьне, ԝәки ӧса нә баԝәрийа ԝә бекер ә, у гӧнед ԝә һе нәһатьнә бахшандьне. 18 У дәрте кӧ шагьртед Мәсиһ жи, йед кӧ хәԝа мьрьнеда ньн, һʹәта-һʹәтайе мьри нә. 19 Һәрге гӧмана мә һьндава Мәсиһ тʹәне бона ве жийине йә, әм жь һʹәму мәрьва бәләнгазтьр ьн.

20 Ле әм заньн кӧ Мәсиһ жь мьрьне һатийә рʹакьрьне. Жь нав һʹәму кәсед кӧ мьрьнә, әԝ бу йе пешьн кӧ жь мьрьне һатә рʹакьрьне. 21 Чаԝа кӧ мьрьн рʹуйе мәрьвәкида һат, ӧса жи бь мәрьвәки ԝе рʹабуна мьрийа һәбә. 22 Чаԝа кӧ һʹәму жь бо Адәм дьмьрьн, һʹәму ԝе бь сайа Мәсиһ бенә сахкьрьне. 23 Ле һәр кәс дора хԝәда: Йе пешьн Мәсиһ бу, паше ԝәʹде һатьна Мәсиһда, әԝед кӧ пʹара ԝи нә ԝе бенә сахкьрьне. 24 Паше ахьри ԝе бе. Һьнге ԝе Мәсиһ кʹока һәр сәрԝертийе, һʹӧкӧмәтийе у ԛәԝате бинә, у Пʹадшатийе бьдә дәсте Бав у Хԝәдайе хԝә. 25 Чьмки әԝ гәрәке пʹадшатийе бькә, һʹәта кӧ Хԝәде һʹәму дьжмьна бькә бьне ньгед ԝи. 26 Һьнге дьжмьне пашьн, демәк мьрьн, ԝе кʹокева бе рʹакьрьне. 27 Ль гора Ньвисаред Пироз, Хԝәде «һәр тьшт кьрә бьн һʹӧкӧме ԝи».* Ле гава те готьне кӧ ‹һәр тьшт кьрә бьн һʹӧкӧме ԝи›, фәʹмдари йә хенщи Хԝәде, йе кӧ һәр тьшт кьрә бьн һʹӧкӧме ԝи. 28 Ле гава Хԝәде һәр тьшти бькә бьн һʹӧкӧме ԝи, һьнге Кӧрʹ ԝе хԝәха нишан кә кӧ әԝ бьн һʹӧкӧме Хԝәдеда йә, йе кӧ һәр тьшт кьрийә бьн һʹӧкӧме ԝи. Бь ви щурʹәйи, Хԝәде ԝе бона һәр кәси бьбә һәр тьшт.

29 Ле әԝед кӧ тенә ньхӧмандьне* сәва кӧ мьри бьн, бона ԝан чь кʹар ә? Һәрге мьри ԝе рʹанәбьн, ида чьрʹа әԝана тенә ньхӧмандьне? 30 Чьма әм жи һәртʹьм хԝә дькьнә бьн хофе? 31 Бьрано, әз бь ԝә шагьртед Хӧдане мә Мәсиһ Иса фьрнаԛ ьм, у бь ве йәке әз сонд дьхԝьм кӧ әз һәр рʹож рʹасти мьрьне тем. 32 Һәрге мьн Әфәседа тʹәви тәрәԝьла шәрʹ кьра мина мәрьвед дьн, ижа кʹара мьн ԝе чь буйа? Һәрге мьри ԝе нәйенә рʹакьрьне, дә «ԝәрен әм бьхԝьн у вәхԝьн, чьмки әме сьбе бьмьрьн». 33 Нәйенә хапандьне! Һәвалед хьраб хәйсәтед баш хьраб дькьн. 34 Сәр һʹьше хԝәда ԝәрен у тьште рʹаст бькьн. Гӧнә нәкьн. Нав ԝәда һьнә кәс бь рʹасти Хԝәде нас накьн. Әз ве йәке дьбежьм, ԝәки һун шәрм бькьн.

35 Ле кәсәк ԝе бьпьрсә: «Мьри ԝе ча рʹабьн? Ԛальбе ԝан ԝе чаԝа бә?» 36 Бефәʹмо! Гава тӧ тʹохьмәки дьчини, әԝ пешийе гәрәке бьмьрә, ԝәки паше шин бә. 37 У гава тӧ дьчини, тӧ шинкайа* кӧ дьгьһижә начини, ле тʹәне тʹохьм дьчини, йан гәньм йан жи тʹохьмәки дьн. 38 Хԝәде ль гора хԝәстьна хԝә ԛальб дьдә һәр шинкайике, у һәр тʹохьмәкирʹа ԛальбе ԝан. 39 Ӧса жи, һʹәму ԛальб мина һәв ниньн. Ԛальбе мерьв башԛә йә у ԛальбе һʹәйԝен башԛә, йе тәйрәда башԛә у йе мәʹсийа жи башԛә йә. 40 Ԛальбед әʹзмани у ԛальбед әʹрди һәнә. Ле рʹумәта ԛальбед әʹзмани щӧдә йә у рʹумәта ԛальбед әʹрди щӧдә йә. 41 Рʹумәта тәʹве башԛә йә, рʹумәта һиве башԛә йә, у рʹумәта стәйрка жи башԛә йә. Бь рʹасти, стәйрк жи бь рʹумәта хԝә жь һәв щӧдә дьбьн.

42 Рʹабуна мьрийа жи һәма ӧса йә. Ԛальбе кӧ дьрʹьзә те дәфьнкьрьне, ле ԛальбе кӧ нарʹьзә те рʹакьрьне. 43 Әԝ берʹумәтийеда те дәфьнкьрьне, у рʹумәтеда те рʹакьрьне. Әԝ һʹаләки сьстда те дәфьнкьрьне, у ԛәԝатеда те рʹакьрьне. 44 Әԝ бь ԛальбе хун у гошт те дәфьнкьрьне, у бь ԛальбе рʹӧһʹани те рʹакьрьне. Һәрге ԛальбе хун у гошт һәйә, ԛальбе рʹӧһʹани жи һәйә. 45 Чаԝа кӧ Ньвисаред Пирозда те готьне: «Мәрьве пешьн Адәм, бу нәфса бинбәр». Ле Адәме пашьн, бу рʹӧһʹәки кӧ жийине дьдә. 46 Ле бәле, мәрьве рʹӧһʹани пешийе нәһат, ле мәрьве бәдәни пешийе һат, у паше йе рʹӧһʹани. 47 Мәрьве пешьн жь әʹрде йә у жь ахе һатә чекьрьне. Мәрьве дӧда жь әʹзмен ә. 48 Әԝед кӧ жь ахе нә, мина ԝи мәрьве пешьн ьн, йе кӧ жь ахе һатә чекьрьне. У әԝед кӧ ль әʹзмен ьн, мина ԝи кәси нә, йе кӧ жь әʹзмен ә. 49 Чаԝа кӧ әм ньһа мина ԝи нә, йе кӧ жь ахе һатә чекьрьне, әме ӧса жи бьбьнә мина йе жь әʹзмен.

50 Бьрано, әз ве йәке ԝәрʹа дьбежьм: Ԛальбед жь хун у гошт нькарьн Пʹадшатийа Хԝәде ԝар бьн. Чь кӧ дьрʹьзә нькарә тьште кӧ нарʹьзә ԝар бә. 51 Ньһа әзе ԝәрʹа сӧрʹәкә пироз вәкьм: Әм һʹәмуйе нәмьрьн, ле әм һʹәмуйе жи бенә гӧһастьне. 52 Гава борʹийа пашьн бе лехьстьне, әв йәк ньшкева, чаԝа кӧ чʹәʹве хԝә бьгьри-вәки, ԝе бьԛәԝьмә. Дәнге борʹийе ԝе бе, у йед мьри ԝе пе ԛальбе кӧ нарʹьзә рʹабьн, у әме бенә гӧһастьне. 53 Ԛальбе кӧ дьрʹьзә ԝе бе гӧһастьне у бьбә ԛальбе кӧ нарʹьзә. У ԛальбе кӧ дьмьрә ԝе бе гӧһастьне у бьбә ԛальбе кӧ тʹӧ щар намьрә.* 54 Ле гава чь кӧ дьрʹьзә бьбә тьште кӧ нарʹьзә, у чь кӧ дьмьрә бьбә тьште кӧ намьрә, һьнге готьнед Ньвисаред Пироз ԝе бенә сери: «Мьрьн сәр һʹәта-һʹәтайе жь кʹокева һатә рʹакьрьне». 55 «Мьрьн, кʹа сәркʹәтьна тә? Мьрьн, кʹа ԛәԝата* тә?» 56 Ԛәԝата кӧ дьбә сәбәбе мьрьне, гӧнә йә. Гӧнә ԛәԝата хԝә жь Ԛануне дьстинә. 57 Ле шькьр Хԝәдерʹа, чьмки әԝ сәркʹәтьне дьдә мә бь сайа Хӧдане мә Иса Мәсиһ!

58 Ләма жи бьред мьнә дәлал, ԛәԝи бьминьн у жь щийе хԝә нәләԛьн. Һәр гав шьхӧле Хӧданда гәләк хирәт бьн. Бир нәкьн кӧ кʹәда ԝәйә бона хьзмәтийа Хӧдан, тʹӧ щар бадиһәԝа нинә.

16 Ле ньһа, дәрһәԛа тʹопкьрьна пʹәра бона пироза, ԝе баш бә кӧ һун ль гора рʹебәрийед кӧ мьн данә щьватед Галатйайе, һәрәкʹәт бькьн. 2 Рʹожа пешьнә һәр һʹәфтийе, бьра һәр йәк жь ԝә чьԛас жь дәсте ԝи те, һьнә пʹәрә башԛә кә, ԝәки чахе әз бем, һьнге пʹәрә нәйе тʹопкьрьне. 3 Гава әз бемә щәм ԝә, әзе ԝан мәрьва дәрһәԛа кʹижана ԝә гот кӧ бь итʹбар ьн, бьшиньм, ԝәки пʹешкʹеша ԝәйә мәрʹдани бьвьнә Оршәлиме. 4 Ле һәрге лазьм бә кӧ әз жи һәрʹьм ԝедәре, әме тʹәвайи һәрʹьн.

5 Гава әз Макәдонйайерʹа дәрбаз бьм, әзе бемә бал ԝә, чьмки әз гәрәке ԝедәрерʹа дәрбаз бьм. 6 Әз дьбәкә һьнә ԝәʹдә щәм ԝә бьминьм, йан жи зьвьстане щәм ԝә дәрбаз кьм. Паше әз һәрʹьм кʹидәре, һун дькарьн мьн һьнәки вәрʹекьн. 7 Әз нахԝазьм ньһа ԝә сәр рʹийа хԝә бьвиньм у һәрʹьм, чьмки әз гӧман ьм кӧ ԝәхтәке щәм ԝә бьминьм, һәрге Йаһоԝа бьхԝазә. 8 Ле һʹәта Щәжьна Пенщийе Һʹәсабе әзе Әфәседа бьминьм, 9 чьмки дәрики фьрә бәр мьн вәбуйә, кӧ әз хьзмәтийа хԝә зедә кьм. Ле гәләк мәрьв мьԛабьли мә нә.

10 Һәрге Тимотʹейо бе бал ԝә, ӧса бькьн кӧ тʹәви ԝи һәвкʹарийе бькьн, ԝәки әԝ бона тʹӧ тьшти бәр хԝә нәкʹәвә һʹәта тʹәви ԝә бә. Әԝ жи шьхӧле Йаһоԝа дькә, чаԝа әз. 11 Бьра тʹӧ кәс хԝә сәр ԝирʹа нәгьрә. Ԝи хер-сьламәт бьшиньн, ԝәки әԝ бе бал мьн. Әз һивийа ԝи мә тʹәви бьред дьн.

12 У ньһа дәрһәԛа бьре мә Аполос: Мьн жь ԝи гәләк һиви кьр кӧ әԝ тʹәви бьред дьн бе бал ԝә. Әԝи сафи кьр ԝәки әԝе нә кӧ ньһа, ле паше гава мәщал бькʹәвә дәсте ԝи, бе бал ԝә.

13 Һʹьшйар бьминьн, баԝәрийеда ԛайим бьн, мерхас у ԛәԝи бьн. 14 Һәр тьшти пе һʹәзкьрьне бькьн.

15 Бьрано, һун заньн кӧ Ахайайеда, Стефанас малбәта хԝәва баԝәрмәндед пешьн бу. Әԝана һәртʹьм һазьр ьн пирозарʹа бәрдәстийе бькьн. 16 Әз жь ԝә һиви дькьм кӧ һун гӧрʹа мәрьвед ӧсада бьн, у ӧса жи гӧрʹа ԝан һʹәмуйада бьн, йед кӧ тʹәви мә һәвкʹарийе дькьн у бь хирәт шьхӧл дькьн. 17 Әз ша дьбьм кӧ Стефанас, Фортунато у Ахайико вьра тʹәви мьн ьн, чьмки әԝана дәԝса ԝә али мьн дькьн. 18 Ԝана һьм дьле мьн, һьм жи дьле ԝә ԛәԝи кьр. Ләма жи мәрьвед ӧса ԛимәт кьн.

19 Щьватед Асйайе ԝә сьлав дькьн. Әкила у Приска тʹәви щьвата кӧ мала ԝанда тʹоп дьбә, чаԝа шагьртед Хӧдан сьлавед дьлгәрм ԝәрʹа дьшиньн. 20 Һʹәму бьред вьра ԝә сьлав дькьн. Пе һʹәзкьрьне* һәвдӧ сьлав кьн.

21 Аԝа әз Паԝлос, сьлавед хԝә бь дәсте хԝә ԝәрʹа дьньвисьм.

22 Һәрге кәсәк Хӧдан һʹәз накә, бьра ньфьрʹ ль ԝи бә. Хӧдане мә, ԝәрә! 23 Бьра кʹәрәма Хӧдан Иса тʹәви ԝә бә. 24 Әз ԝә һʹәмуйарʹа, йед кӧ тʹәви Мәсиһ Иса йәктийеда ньн, һʹәзкьрьна хԝә дьшиньм.