2 КОРЬНТʹИ

1 Әз Паԝлос, йе кӧ бь ԛьрара Хԝәде бумә шандийе Мәсиһ Иса, тʹәви бьре мә Тимотʹейо щьвата Хԝәдейә Корьнтʹерʹа ве нәʹме дьньвисьм. Әв нәʹмә бона ԝан һʹәму пироза йә жи, йед кӧ ль тʹәмамийа Ахайайеда ньн.

2 Бьра кʹәрәма мәзьн у әʹдьлайа жь Баве мә Хԝәде у жь Хӧдан Иса Мәсиһ, сәр ԝә бә!

3 Бьра пәсьн Хԝәдерʹа бе дайине, йе кӧ Бав у Хԝәдайе Хӧдане мә Иса Мәсиһ ә. Әԝ Баве дьлованийе у Хԝәдайе һʹәму бәрдьлийе йә. 4 Әԝ һʹәму тәнгасийед мәда бәрдьлийе дьдә мә,* ԝәки әм жи бькарьбьн ԝәʹде тәнгасийа бәр дьле кәсед дьнда бен, бь ве бәрдьлийе, йа кӧ әм жь Хԝәде дьстиньн. 5 Әм бона Мәсиһ гәләк чәтьнайа дькʹьшиньн, ле әм ӧса жи һе зедә бәрдьлийе бь сайа Мәсиһ дьстиньн. 6 Һәрге әм рʹасти тәнгасийа тен, әв йәк бона бәрдьли у хьлазбуна ԝә йә. У һәрге әм бәрдьлийе дьстиньн, әԝ жи бона бәрдьлийа ԝә йә. Бь аликʹарийа ве бәрдьлийе һун дькарьн бәр ԝан чәтьнайа тәйах кьн, кʹижан кӧ әм жи дькʹьшиньн. 7 Әм бь тʹәмами ԝәда баԝәр ьн, чьмки заньн ԝәки чаԝа һун тʹәви мә чәтьнайа дькʹьшиньн, һуне тʹәви мә дьлрʹьһʹәтийе жи бьстиньн.

8 Бьрано, әм дьхԝазьн кӧ һун һаж ԝе йәке һәбьн, кӧ мә ль Асйайе чь тәʹли-тәнгаси кʹьшандийә. Һʹале мә ӧса гьран бу, кӧ мә пе ԛәԝата хԝә нькарьбу тәйах кьра, у һәла һе жи мә ньзаньбу әме сах бьминьн йан на. 9 Бь рʹасти әм дьфькьрин кӧ әме бьмьрьн. Ле ви һʹалида әм һин бун, ԝәки гӧмана хԝә нә кӧ бьдьнә сәр хԝә, ле сәр Хԝәдайе кӧ мьрийа рʹадькә. 10 Әԝи әм жь мьрьне хьлаз кьрьн, у ԝе диса жи хьлаз кә. У әм гӧмана хԝә дьдьнә сәр ԝи у баԝәр дькьн, ԝәки әԝе ахьрийеда жи мә хьлаз кә. 11 Һун жи дькарьн кʹомәке бьдьнә мә пе дӧа-дьрозгед хԝә. Һәрге гәләк мәрьв бона хатьре мә Хԝәдерʹа дӧа бькьн, әԝе гӧһ бьдә ԝан у али мә бькә, һьнге гәләк мәрьв ԝе шькьрийе бьдьнә Хԝәде.

12 Әм фьрнаԛ дьбьн кӧ исафа мә тʹәмьз ә, чьмки әм һьндава мәрьвед ве дьнйайеда у илаһи һьндава ԝәда, чаԝа кӧ Хԝәде һин дькә бь пирози у һʹәлали хԝә дьдьнә кʹьфше, нә кӧ бь биланийа ве дьнйайе, ле бь кʹәрәма Хԝәдейә мәзьн. 13 Тьштед кӧ һун дькарьн һеса бьхуньн у фәʹм бькьн,* әм ԝәрʹа дьньвисьн. Гӧмана мьн һәйә, кӧ һуне ԝан тьшта жи бь тʹәмами фәʹм кьн. 14 Жь ԝә һьнәка ида фәʹм кьрийә, ԝәки һун дькарьн мәрʹа фьрнаԛ бьн. Һәма бь ви щурʹәйи, әме жи ԝәрʹа фьрнаԛ бьн рʹожа Хӧдане мә Исада.

15 У чьмки әз ве йәкеда баԝәр бум, мьн дьхԝәст щара дӧда бемә бал ԝә, ԝәки һун диса ша бьн. 16 Мьн хԝәрʹа нет данибу, ԝәки чахе бәрбь Макәдонйайе һәрʹьм, сәр рʹийа хԝә сәрики ԝә хьм. У жь Макәдонйайе жи диса вәгәрʹьм бал ԝә, у паше һун мьн бәрбь Щьһустане һьнәки вәрʹекьн. 17 Гава мьн әв йәк сафи кьр, гәло мьн бь сьвькайи сәр ве йәке ньһерʹи? Йан жи мьн ӧса сафи кьр чаԝа бәндә, кӧ пешийе бежьм «Әре», паше жи «На»? 18 Чаԝа кӧ һун дькарьн итʹбарийа хԝә Хԝәде биньн, ӧса жи итʹбарийа хԝә гьлийед мә биньн. Әм ԝәрʹа набежьн «әре», ле паше «на». 19 Чьмки Кӧрʹе Хԝәде Иса Мәсиһ жи, дәрһәԛа кʹижани мә, демәк мьн, Силванус* у Тимотʹейо ԝәрʹа әʹлам кьр, нәбу «әре» у «на», ле гьлийе ԝийә «әре», һәртʹьм «әре» йә. 20 Чьмки чьԛас созед Хԝәде һәбун, әԝ һʹәму бь сайа Иса бунә «әре». Бона ве йәке әм ӧса жи пе ԝи Хԝәдерʹа «Амин» дьбежьн, чь кӧ рʹумәте дьдә Хԝәде. 21 Ле Хԝәде йә, кӧ ԝә дьдә баԝәркьрьне, ԝәки һун у әм пʹара Мәсиһ нә у йе кӧ әм бьжартьнә. 22 Әԝи ӧса жи мора хԝә данийә сәр мә, у рʹӧһʹе пироз чаԝа соз* кьрийә дьле мә, бона тьште кӧ ԝе бе.

23 Хԝәде шәʹдә йә, әз һʹәта ньһа нәһатьмә Корьнтʹе, ԝәки һун һе зедә хәмгин нәбьн. 24 Әв найе һʹәсабе кӧ әм ахайед баԝәрийа ԝә нә, чьмки һун бь сайа баԝәрийа хԝә дьсәкьньн. Әм бона шабуна ԝә һәвалкʹаред ԝә нә.

2 Мьн сафи кьр кӧ гава әз диса бем, ԝә дьлтәнг нәкьм. 2 Чьмки һәрге әз ԝә дьлтәнг кьм, кʹе ԝе дьле мьн ша кә, әԝед кӧ мьн әԝ дьлтәнг кьрьн? 3 Ләма жи мьн ԝәрʹа ньвиси, кӧ чахе әз бем, бона ԝә дьлтәнг нәбьм, ле ша бьм. Чьмки әз баԝәр ьм, ԝәки чь кӧ дьле мьн ша дькә, дьле ԝә жи ша дькә. 4 Мьн бь кʹәсәр, бь еша дьл у һесьра ԝәрʹа ньвиси, нә кӧ ԝәки ԝә дьлтәнг кьм, ле ԝәки һун бьзаньбьн кӧ әз ԝә гәләк һʹәз дькьм.

5 Һәрге кәсәк буйә сәбәбе хәмгинийе, әԝи нә кӧ дьле мьн, ле аликива дьле ԝә һʹәмуйа ешанд. Ле әз нахԝазьм бь гьлийед хԝә сәрт бемә кʹьфше. 6 Әԝ щәза бәси ԝи мәрьви йә, кӧ әԝи жь ԝә гәләка станд. 7 Ньһа гәрәке һун бь дьл у щан бьбахшиньнә ԝи у бәр дьле ԝида бен, ԝәки әԝ нав хәмгинийа хԝәда нәхәньԛә. 8 Ләма жи әз һиви жь ԝә дькьм, ԝи бьдьнә баԝәркьрьне ԝәки һун ԝи һʹәз дькьн. 9 Һәма бона ԝе йәке жи мьн ԝәрʹа ньвисийә, ԝәки әз бьвиньм һәла һун һәр тьштида гӧһдар ьн йан на. 10 Һәрге һун дьбахшиньнә кәсәки, әз жи дьбахшиньм. Бь рʹасти һәр тьште кӧ мьн бахшандийә (һәрге тьштәки бахшандьне һәбуйә), Мәсиһ шәʹдә йә кӧ мьн әв йәк бона хатьре ԝә кьрийә, 11 ԝәки әм алийе Шәйтʹанда нәйенә хапандьне, чьмки әм нетед ԝи заньн.

12 Гава әз бона бәлакьрьна мьзгинийа дәрһәԛа Мәсиһ гьһиштьмә Тройайе у мәщал кʹәтә дәсте мьн,* ԝәки шьхӧле Хӧданда кʹар бькьм, 13 дьле мьн нә рʹьһʹәт бу, чьмки мьн бьре хԝә Тито нәдит. Ләма мьн хатьре хԝә жь ԝана хԝәст у әз чумә Макәдонйайе.

14 Шькьр Хԝәдерʹа, йе кӧ һәртʹьм мәша сәркʹәтьнеда* тʹәви Мәсиһ йәктийеда мә пәй хԝә дьбә, у әԝ бь мә бина хԝәш йа занәбуна дәрһәԛа хԝә бәла дькә. 15 Чьмки әм бона Хԝәде бина Мәсиһә хԝәш ьн, һьм нав кәсед кӧ хьлаз дьбьн, һьм жи нав кәсед кӧ ԛьрʹ дьбьн. 16 Әв бона кәсед кӧ ԝе ԛьрʹ бьн бина мьрьне йә, ле бона кәсед кӧ ԝе хьлаз бьн, бина жийине йә. Ле кʹи лайиԛ ә әве хьзмәтийе бинә сери? 17 Әм, чьмки мина гәләка әм хәбәра Хԝәде нафьрошьн. Ле әм чаԝа алийе Хԝәдеда шанди, йәктийа Мәсиһда, бәр Хԝәде бь һʹәлали хәбәр дьдьн.

3 Гәло әм диса дәстпедькьн пʹайе хԝә бьдьн? Йан мина һьнәка әм һʹәԝще нәʹма нә, кӧ ԝәрʹа бьшиньн, йан жи бьстиньн жь ԝә, кʹидәреда пʹайе мә те дайине? 2 Һун ьн нәʹма кӧ сәр дьле мә һатийә ньвисаре, кʹижан кӧ һʹәму кәс заньн у дьхуньн. 3 Әшкәрә йә кӧ һун нәʹма Мәсиһ нә, йа кӧ алийе мә хьзмәткʹарада һатийә ньвисаре. Әв нәʹмә нә бь һʹӧбьре һатийә ньвисаре, ле бь рʹӧһʹе Хԝәдайе сах, у нә сәр сәлед кәвьр, ле сәр дьла.

4 Әм ве йәкеда бь сайа Мәсиһ Хԝәдеда баԝәр ьн. 5 У әм набежьн кӧ әм ви шьхӧли бь ԛәԝата хԝә дькьн, ле әм бь аликʹарийа Хԝәде дькьн. 6 Бәле, йе кӧ әм кьрьнә хьзмәткʹаред пәймана ну, Хԝәде йә. Әм нә хьзмәткʹаред ԛануна ньвисар ьн, ле әм хьзмәткʹаред рʹӧһʹ ьн. Ԛануна ньвисар щәзайе мьрьне дьдә, ле рʹӧһʹ жийине дьдә.

7 Ԛануна кӧ мьрьне тинә у сәр кәвьра һатьбу ньвисаре, бь рʹумәтәкә ӧса һатьбу дайине, кӧ Исраелийа нькарьбун рʹуйе Муса бьньһерʹийана жь бо рʹумәта рʹуйе ԝи, кʹижан кӧ ԝе бәтал буйа. Һәрге ԛанун бь рʹумәт һатьбу дайине, 8 гәло рʹӧһʹ гәрәке бь рʹумәтәкә һе мәзьн нәйе дайине? 9 Һәрге ԛануна кӧ мәрьв бәрбь диԝане дьбьр бь рʹумәт бу, ле чь кӧ бәрбь рʹастийе дьбә ԝе чьԛас һе зедә рʹумәт бә! 10 Бәле, һәла һе чь кӧ ԝәхтәке хԝәйирʹумәт бу жи, рʹумәта хԝә ӧнда кьр, жь бо ԝе рʹумәта кӧ сәр ԝерʹа бу. 11 Һәрге тьште кӧ гәрәке бәтал буйа, бь рʹумәт бу, ле ижа рʹумәта тьште кӧ ԝе бьминә чьԛас дьһа мәзьн ә!

12 Аԝа чьмки гӧмана мәйә ӧса һәйә, әм бь мерхаси хәбәр дьдьн, 13 у мина Муса накьн, йе кӧ рʹуйе хԝә бь хелийе вәдьшарт, ԝәки Исраели рʹумәта кӧ гәрәке бәтал буйа, нәвиньн. 14 Ле һʹьше ԝан гьрти бу. У һʹәта рʹожа иро, гава пәймана кәвьн те хԝәндьне, хут әԝ хели сәр һʹьше ԝан дьминә, чьмки әԝ тʹәне бь сайа Мәсиһ дькарә бе һьлдане. 15 Әре, һʹәта рʹожа иро, гава ньвисаред Муса тенә хԝәндьне, хели сәр дьле ԝан дьминә. 16 Ле гава кәсәк вәдьгәрʹә щәм Йаһоԝа, әв хели те һьлдане. 17 Йаһоԝа Рʹӧһʹ ә, у рʹӧһʹе Йаһоԝа кʹидәре бә, ԝедәре азайи һәйә. 18 Мә һʹәмуйа хели сәр рʹуйе хԝә һьлдайә у әм мина нәйнька, рʹумәта Йаһоԝа нишан дькьн. Әм тенә гӧһастьне, ԝәки һе зедә бьбьнә мина Хԝәде у рʹумәта ԝи һе рʹьнд нишан кьн, ӧса чаԝа кӧ Йаһоԝа дьхԝазә, йе кӧ Рʹӧһʹ ә.

4 Бона ве йәке кӧ Хԝәде жь рʹәʹма хԝә әв хьзмәти дайә мә, әм наԝәстьн. 2 Мә тʹәрка кьред әʹйбә* вәшарти дайә. Әм фелбазийа накьн у хәбәра Хԝәде нагӧһезьн. Бь ве йәке кӧ әм рʹастийе әшкәрә дькьн, әм бәр Хԝәде бона һәр мәрьвәки дьбьнә мәсәла баш. 3 Һәрге мьзгинийа кӧ әм бәла дькьн вәшарти бә, әԝ бона кәсед кӧ ԛьрʹ дьбьн вәшарти йә. 4 Чьмки хԝәдайе ве дьнйайе һʹьше нәбаԝәрмәнда кор кьрийә, ԝәки рʹонайа мьзгинийа рʹумәт дәрһәԛа Мәсиһ, йе кӧ сурәте Хԝәде йә, сәр ԝан шәԝԛ нәдә. 5 Әм мьзгинийе нә кӧ дәрһәԛа хԝә бәла дькьн, ле дәрһәԛа Иса Мәсиһ кӧ Хӧдан ә, у әм бона хатьре Иса хӧламед ԝә нә. 6 Чьмки Хԝәде хԝәха ӧса гот: «Бьра жь тәʹрийе рʹонайи шәԝԛ бьдә», у әԝи дьле мә бь занәбуна хԝәш дәрһәԛа хԝә, йа кӧ жь рʹуйе Иса шәԝԛ дьдә, рʹонайи кьр.

7 Әв хьзнә нава мә дәрданед һʹәрʹида нә, сәва кӧ әшкәрә бә ԝәки ԛәԝата кӧ жь синоре мәрьва зедәтьр ә, нә кӧ жь мә йә, ле жь Хԝәде йә. 8 Һәр алийава зоре дьдьнә мә, ле һʹале мә ӧса нинә кӧ әм нькарьн бьльпьтьн. Әм тʹәвльһәв ьн, ле бечʹарә ниньн. 9 Мә дьзериньн, ле Хԝәде әм нәһиштьнә. Әм ледайи-кʹәти нә, ле нә ӧндабуйи нә. 10 Мина Иса, әм һәр гав дьчьнә бәр дәве мьрьне, ԝәки жийина Иса бәдәна мәда жи әшкәрә бә. 11 Чьмки әм, йед кӧ дьжин, бона хатьре Иса дьчьнә бәр дәве мьрьне, ԝәки жийина Иса ӧса жи бәдәна мәда йа кӧ дьмьрә, әшкәрә бә. 12 Бәле, әм дьчьнә бәр дәве мьрьне, ле әв йәк бона ԝә рʹийа жийине вәдькә.

13 Һәма баԝәрийа* мә жи ви щурʹәйи йә, чаԝа кӧ һатийә ньвисаре: «Мьн баԝәр кьр, ләма жи мьн хәбәр дьда». Әм жи баԝәр дькьн, ләма хәбәр дьдьн. 14 Чьмки әм заньн Хԝәдайе кӧ Иса жь мьрьне рʹакьр, әԝе мә жи жь мьрьне рʹакә, ԝәки әм тʹәви Иса бьн. 15 Әв һʹәму тьшт бона ԝә йә, ԝәки һе зедә мәрьв кʹәрәма Хԝәдейә мәзьн бьстиньн. Бь ви щурʹәйи һе зедә мәрьв ԝе шькьри у рʹумәте бьдьнә Хԝәде.

16 Ләма жи әм наԝәстьн. Һәрге жи әм рʹува дьчʹьлмьсьн, йәкә дьлда әм рʹож бь рʹож ну дьбьн. 17 Чьмки щәфед мәйә кӧ ԝәʹдәки кьн дькʹьшиньн у сьвьк ьн, мәрʹа рʹумәтәкә ӧса мәзьн тиньн, йа кӧ һʹәта-һʹәтайе йә. 18 Ләма жи әм дина хԝә надьнә тьштед кӧ тенә дитьне, ле әм дина хԝә дьдьнә тьштед кӧ найенә дитьне. Чьмки тьштед кӧ тенә дитьне бона ԝәхтәки нә, ле тьштед кӧ найенә дитьне һʹәта-һʹәтайе нә.

5 Әм заньн ԝәки мала мәйә сәр әʹрде, демәк әв кон, ԝе бе һьлшандьне, әме ль әʹзмана щәм Хԝәде маләкә һʹәта-һʹәтайе бьстиньн, йа нә бь дәста чекьри. 2 Әм мала хԝәйә сәр әʹрдеда дьнальн у һʹьзрәта ве йәке нә, кӧ әм мала хԝәйә тʹәзә йа ль әʹзмен мина кʹьнща ль хԝә кьн. 3 Бь ви аԝайи, гава әм ԝе мале ль хԝә кьн, әме тәʹзи нәминьн. 4 Бь рʹасти, әм йед кӧ ве маледа* ньн, бьн барәки гьранда дьнальн. Нә сәва ве йәке кӧ әм дьхԝазьн ве мале ча кʹьнщ жь хԝә бехьн, ле чьмки әм дьхԝазьн мала әʹзмани бьстиньн, ԝәки дәԝса бәдәна кӧ дьмьрә, жийина һʹәта-һʹәтайе бә. 5 Хԝәде йә, йе кӧ әм бона жийинәкә ӧса һазьр кьрьнә. Әԝи рʹӧһʹе хԝә ча соз* бона кʹәрәмед кӧ ԝе бен, дайә мә.

6 Ләма әм баԝәр ьн у заньн, һʹәта кӧ әм ве бәдәнеда дьжин, әм жь Хӧдан дур ьн. 7 Чьмки әм нә ль гора тьштед кӧ әм дьвиньн, ле ль гора баԝәрийе дьжин. 8 Әре, әм мерхасийа хԝә ӧнда накьн, у дәԝса кӧ әм ве бәдәнеда бьн, хԝәстьна мә әԝ ә кӧ әм тʹәви Хӧдан бьжин. 9 Әм тʹәви ԝи бьжин йан жь ԝи дур бьн жи, нета мә әԝ ә кӧ әм ԝи хԝәш бен. 10 Чьмки әм һʹәму гәрәке бәр тʹәхте диԝана Мәсиһ бьсәкьньн. У һәр кәс ԝе һәԛе хԝә бьстинә анәгори кьред хԝә чахе әԝ һе бәдәнеда бу, йед ԛәнщ йан хьраб.

11 Аԝа әм кӧ заньн тьрса Хӧдан чь йә, әм һәртʹьм мәрьва дьдьнә баԝәркьрьне кӧ гӧһ бьдьнә мә. Ле Хԝәде мә рʹьнд нас дькә, у әз гӧман ьм кӧ һун* жи мә рʹьнд нас дькьн. 12 Әм нахԝазьн диса бәр ԝә пʹайе хԝә бьдьн, ле әм мәщале дьдьнә ԝә, кӧ һун мәрʹа фьрнаԛ бьн. Һьнге һуне бькарьбьн щаба ԝан мәрьва бьдьн, йед кӧ пе тьштед кӧ чʹәʹв дьвинә хԝә ԛӧрʹә дькьн, нә кӧ пе тьштед дьлда. 13 Һәрге мә һʹьше хԝә ӧнда кьрийә, әԝ бона Хԝәде бу. Ле һәрге әм сәр һʹьше хԝә нә, әԝ бона ԝә йә. 14 Һʹәзкьрьна Мәсиһ мә һелан дькә, чьмки мә фәʹм кьрийә, кӧ мәрьвәк бона һʹәмуйа мьр, чьмки һʹәму мьрьбун. 15 Әԝ бона һʹәмуйа мьр, ԝәки кәсед кӧ дьжин ида нә кӧ бона хԝә, ле бона ԝи бьжин, йе кӧ бона ԝан мьр у жь мьрьне һатә рʹакьрьне.

16 Ләма ньһерʹандьна мә сәр мәрьва ида ве йәкева гьредайи нинә, чь кӧ әм дьвиньн. У һәрге жи мә бәре сәр Мәсиһ ви щурʹәйи дьньһерʹи, әм ида ӧса накьн. 17 Жь бо ве йәке, һәрге кәсәк тʹәви Мәсиһ йәктийеда йә, әԝ әʹфринәки тʹәзә йә. Тьштед кәвьн дәрбаз бун, у ва йә тьштед тʹәзә һатьн. 18 Ле һʹәму тьшт жь Хԝәде нә. Әԝи бь Мәсиһ әм кьрьнә достед хԝә у әв хьзмәти дайә мә, ԝәки әм али мәрьва бькьн, кӧ әԝана тʹәви ԝи ль һәв бен. 19 Демәк Хԝәде бь Мәсиһ тʹәви дьнйайе ль һәв һат, гӧнед ԝан һьлнәда һʹәсаб, у Хԝәде әв шьхӧл тʹәсмили мә кьрийә, ԝәки әм хәбәра дәрһәԛа ве льһәвһатьне бәла кьн.

20 Ләма жи, дәԝса Мәсиһ әм ԛасьдед Хԝәде нә, ча бежи Хԝәде пе мә гази мәрьва дькә. Әм бь наве Мәсиһ һиви дькьн: «Тʹәви Хԝәде ль һәв ԝәрен». 21 Хԝәде сәва гӧнед мә кәсе бе гӧнә кьрә ԛӧрбан, ԝәки әм бь сайа ԝи, бәр чʹәʹве Хԝәде рʹаст бенә һʹәсабе.

6 Әм чаԝа һәвалкʹаред Хԝәде, һиви ԝә дькьн, ԝәки һун бир нәкьн бона чь Хԝәде кʹәрәма хԝәйә мәзьн һьндава ԝәда дьдә кʹьфше. 2 Чьмки Хԝәде дьбежә: «Ԝәʹде ԛәбулкьрьне мьн дәнге тә бьһист, у рʹожа хьлазбуне мьн али тә кьр». Ва, ԝәʹде ԛәбулкьрьне ньһа йә! Ва, рʹожа хьлазбуне ньһа йә!

3 Әм тʹӧ тьштида набьнә сәбәбе лькʹӧмандьне, ԝәки хьзмәтийа мәда тʹӧ кемаси нәйе дитьне. 4 Ле әм һәр алийава хԝә ча хьзмәткʹаред Хԝәде дьдьнә кʹьфше, кӧ әм гәләк тәйах дькьн, тәнгасийада, рʹожед зәʹмәтда, 5 леданада, кәлада, тʹәвльһәвбунада, шьхӧлед гьранда, шәвед бехәԝда, бьрʹчибунеда. 6 Әм хԝә ча хьзмәткʹаред Хԝәде дьдьнә кʹьфше ӧса жи тʹәмьзайеда, занәбунеда, сәбьреда, ԛәнщийеда, рʹӧһʹе пирозда, һʹәзкьрьна бедӧрʹутида, 7 готьнед рʹастда, ԛәԝата Хԝәдеда, чʹәкед рʹастийеда йед дәсте рʹасте у чʹәпеда,* 8 һӧрмәтийеда йан беһӧрмәтийеда, наве башда йан наве хьрабда. Мә ча кәсед дәрәԝин һʹәсаб дькьн, ле әм кәсед рʹаст ьн. 9 Мә һʹәсаб дькьн ча кәсед нәнас, ле әм кәсед нас ьн, мә һʹәсаб дькьн ча кәсед мьри,* ле әм кәсед сах ьн, мә һʹәсаб дькьн ча кәсед щәзакьри, ле мә щәзайа мьрьне нәстандийә, 10 мә һʹәсаб дькьн ча кәсед хәмгин, ле әм һәр гав ша нә, мә һʹәсаб дькьн ча кәсед кʹәсиб, ле әм гәләка дәԝләти дькьн, мә һʹәсаб дькьн ча кәсед кӧ тʹӧ тьште ԝан тʹӧнә, ле һәр тьштед мә һәнә.

11 Гәли Корьнтʹийа, мә әшкәрә ԝәрʹа хәбәр дайә, у мә дьле хԝә ԝәрʹа фьрә вәкьрийә. 12 Дьле мә бона ԝә тәнг нәбуйә, ле кʹа һʹәзкьрьна ԝәйә бона мә? 13 Ләма әз ԝәрʹа ча зарʹед хԝәрʹа дьбежьм: Һун жи дьлед хԝә фьрә вәкьн.

14 Тʹәви нәбаԝәра нәкʹәвьнә бьне нирәки. Чь кʹаре һәԛийе тʹәви нәһәԛийе һәйә? Йан чь һәвгьредан һәйә ортʹа рʹонайе у тәʹрийе? 15 Чь йәкти һәйә ортʹа Мәсиһ у Белйарда?* Йан чь һәвгьредан һәйә ортʹа баԝәрмәнд* у нәбаԝәрмәндда? 16 У чь һәвгьредан һәйә ортʹа пʹарьстгәһа Хԝәде у пʹута? Чьмки әм пʹарьстгәһа Хԝәдайе сах ьн. Чаԝа кӧ Хԝәде гот: «Әзе нав ԝанда бьжим, у нав ԝанда бьм. Әзе бьбьмә Хԝәдайе ԝан у әԝана ԝе бьбьнә щьмәʹта мьн». 17 «Йаһоԝа дьбежә: ‹Ләма жь нав ԝан дәркʹәвьн у щӧдә бьн. Дәсте хԝә нәдьнә тьште һʹәрам›, ‹у әзе ԝә ԛәбул кьм›». 18 «‹Әзе ԝәрʹа бьбьмә Бав, ле һуне мьнрʹа бьбьнә кӧрʹ у ԛиз›, Йаһоԝа, Хԝәдайе Һьмзор дьбежә».

7 Дә ижа дәлалед мьн, һәрге әм хԝәйе ван соза нә, ԝәрен әм хԝә жь ԝан һʹәму тьшта паԛьж кьн, чь кӧ бәдәне йан рʹӧһʹ һʹәрам дькә, у әм бь хофа Хԝәде бьгьһижьнә пирозийа кʹамьл.

2 Бьра дьле ԝәда бона мә щи һәбә. Мә нәһәԛи тʹӧ кәси нәкьрийә, мә тʹӧ кәс жь рʹе дәрнәхьстийә, мә тʹӧ кәс бона кʹара хԝә нәдайә хәбате. 3 Әз ве йәке набежьм кӧ ԝә сущдар кьм, нә мьн ида готийә, һәрге әм бьмьрьн йан бьжин жи, һун дьле мәда ньн. 4 Әз дькарьм аза ԝәрʹа хәбәр дьм. Әз ԝәрʹа гәләк фьрнаԛ дьбьм. Дьле мьн рʹьһʹәт буйә. Нав һʹәму тәнгасийед мәда әз бь шабуне тʹьжә мә.

5 Бәле, гава әм гьһиштьнә Макәдонйайе, әм* нәрʹьһʹәт бун, ле мә һʹәму алийава тәʹли-тәнги кʹьшандьн: Дәрва шәрʹ-дәʹԝ, дьлада жи тьрс. 6 Ле Хԝәдайе кӧ бәрдьлийе дьдә кәсед дьлшкәсти, бь һатьна Тито дьле мә рʹьһʹәт кьр. 7 Ле нә кӧ тʹәне бь һатьна ԝи, ле бь ве бәрдьлийе кӧ әԝи бь сайа ԝә стандьбу.

8 Һәрге мьн бь нәʹма хԝә һун хәмгин кьрьн жи, әз пʹошман набьм. Серида әз пʹошман бум жь бо ԝе йәке, кӧ мьн һун хәмгин кьрьн. Әз заньм ԝәки хәмгинийа ԝә дьреж нәкʹьшанд. 9 Ле ньһа әз ша мә. Әз ша мә нә сәва ԝе йәке, ԝәки һун хәмгин бун, ле сәва ԝе йәке, кӧ әве хәмгинийе һун бәрбь тʹобәкьрьне бьрьн. Хәмгинийа ԝә ль гора ԛьрара Хԝәде йә, у бона ве йәке ԝә жь гьлийед мә тʹӧ зийан нәстанд. 10 Чьмки хәмгинийа ль гора ԛьрара Хԝәде рʹе бәр мәрьва вәдькә, ԝәки гӧнед хԝә тʹобә кьн у хьлаз бьн. Ле хәмгинийа ль гора ве дьнйайе мьрьне тинә. 11 Кʹа бьньһерʹьн һәла хәмгинийа ль гора ԛьрара Хԝәде чаԝа сәр ԝә һʹӧкӧм кьрийә: Наве ԝә һатийә тʹәмьзкьрьне, һун жь тьштед хьраб әʹщьз дьбьн, һун Хԝәде дьтьрсьн, һун һазьр бун тʹобә кьн, һун жь дьл Хԝәдерʹа хьзмәт дькьн у ԝә тьштед нәрʹаст рʹаст кьрьн! Ве йәкеда ԝә һʹәму алийава нишан кьр, кӧ һун тʹәмьз ьн.* 12 Әԝ нәʹма кӧ мьн ԝәрʹа ньвиси, нә бона ԝи бу, йе кӧ гӧнә кьр, нә жи бона кәсе кӧ һьндава ԝида нәһәԛи һатә кьрьне. Ле мьн әв нәʹмә ньвиси, сәва кӧ һун бәр Хԝәде нишан кьн, ԝәки һун хирәт дькьн гӧһ бьдьнә мә. 13 Бона ве йәке дьле мә рʹьһʹәт буйә.

Ле әм бона шабуна Тито һе зедә ша нә, чьмки ԝә һʹәмуйа дьле ԝи ԛәԝи кьрьбу. 14 Мьн кӧ Титорʹа гот ԝәки әз ԝәрʹа фьрнаԛ дьбьм, әз бона ве йәке шәрм накьм. Бона чь жи мә бәр ԝи пʹайе ԝә дабу рʹаст дәркʹәт, чаԝа һʹәму тьштед кӧ мә ԝәрʹа готьбу, рʹаст бун. 15 Ӧса жи чахе әԝ тинә бира хԝә гӧһдарийа ԝә һʹәмуйа у чаԝа ԝә әԝ бь ԛәдьрәки* мәзьн ԛәбул кьрийә, һʹәзкьрьна ԝи һьндава ԝәда һе зедә дьбә. 16 Әз ша мә кӧ һәр тьштида дькарьм итʹбарийа хԝә ԝә биньм.

8 Ижа бьрано, әм дьхԝазьн һун дәрһәԛа кʹәрәма Хԝәдейә мәзьн, йа кӧ щьватед Макәдонйайерʹа һатийә дайине, бьзаньбьн. 2 Ԝана нава щерʹьбандьнада тәнгаси дькʹьшанд, ле диса жи шабуна хԝә ӧнда нәдькьрьн, у әԝана чьԛас жи кʹәсиб бун, диса жи дәствәкьри бун. 3 Әз шәʹдәтийа ве йәке дьдьм, кӧ чь жь дәсте ԝан дьһат, ԝана дькьр. Әре, ԝана һәла һе жь ԛәԝата хԝә дәр жи дькьрьн. 4 Ԝана хԝәха жь мә рʹәща дькьр, кӧ әм изьне бьдьнә ԝан, ԝәки әԝана жи кʹомәке бьдьнә пироза. 5 Ԝана һе зедә кьр, нә кӧ чьԛас әм һивийе бун. Бәле, ль гора ԛьрара Хԝәде, ԝана бь дьл у щан Хӧданрʹа хьзмәт кьрийә у кʹомәк данә мә жи. 6 Ләма жи мә Тито һелан кьр, ԝәки ԝи шьхӧле кӧ әԝи бал ԝә дәстпекьрьбу, демәк тʹопкьрьна ԛӧрбанкьрьнед ԝә, тʹәмам кә. 7 Чаԝа кӧ һәр тьштед ԝә тʹер-тʹьжә һәнә: баԝәри, фәрәсәте хәбәрдане, занәбун, хирәт, у һʹәзкьрьна мәйә һьндава ԝәда, бьра ԛӧрбанкьрьнед ԝәйә бь мәрʹдани жи ӧса тʹер-тʹьжә бьн.

8 Бь ван готьнед хԝә әз нә кӧ фәрмане дьдьмә ԝә, ле дьхԝазьм дина ԝә бькʹьшиньмә сәр хирәта кәсед дьн у тедәрхьм һәла һун бь рʹасти кәсед дьн һʹәз дькьн йан на. 9 Һун кʹәрәма мәзьн йа Хӧдане мә Иса Мәсиһ заньн: Чьԛас әԝ дәԝләти бу жи, әԝ бона хатьре ԝә бу кʹәсиб, сәва кӧ һун бь сайа кʹәсибийа ԝи дәԝләти бьн.

10 Әз аһа дьфькьрьм: Бона ԝә ԝе баш бә, ԝәки һун ви шьхӧли тʹәмам кьн, чьмки ида саләк пешда ԝә нә тʹәне әв шьхӧл дәстпекьр, ле ԝә ӧса жи нишан кьр, кӧ һун дьхԝазьн ве йәке бькьн. 11 Ләма жи шьхӧле кӧ ԝә дәстпекьрийә, тʹәмам кьн. Гава һун ль гора ве йәке кӧ чьԛас жь дәсте ԝә те, бьдьн, һуне һазьрбуна хԝә нишан кьн. 12 Тьштед кӧ жь дьл тен, ль Хԝәде хԝәш тен. Чьмки Хԝәде дьхԝазә кӧ мәрьв һаԛаси бьдә, чьԛас дькарә, нә кӧ чьԛас нькарә. 13 Әз нахԝазьм баре кәсед дьн сьвьк кьм, ле баре ԝә гьран кьм. 14 Ле әз дьхԝазьм кӧ зедәйа дәсте ԝәда, кемасийа кәсед дьн тʹьжә кә, у зедәйа кәсед дьн жи, кемасийа ԝә тʹьжә кә, сәва кӧ ԝәкә һәв бә. 15 Чаԝа кӧ һатийә ньвисаре: «Бал кʹе гәләк һәбу, зедә нибу, у бал кʹе һьндьк бу, кем нибу».

16 Шькьр Хԝәдерʹа ԝәки Тито жи мина мә бь дьле сах бона ԝә хәм дькә. 17 У әԝ нә тʹәне һивикьрьна мәрʹа рʹази бу, ле хԝәха жи гәләк дьхԝазә али ԝә бькә, ләма бь рʹәзәдьли те бал ԝә. 18 Әм бьраки дьн жи тʹәви ԝи дьшиньн, йе кӧ һʹәму щьват пʹайе ԝи дьдьн бона тьштед кӧ әԝ сәва бәлакьрьна мьзгинийе дькә. 19 Хенщи ԝе йәке, әв бьра алийе щьватада һатийә бьжартьне, ԝәки бона рʹумәта Хӧдан тʹәви мә әв пʹешкʹеша ԛӧрбанкьри бьгьһинә щи у бәла кә, кӧ бе избаткьрьне, ԝәки әм һазьр ьн али кәсед дьн бькьн. 20 Бь ви аԝайи, тʹӧ кәс нькарә газьна мә бькә бона ве йәке, кӧ әм чаԝа ԝан ԛӧрбанкьрьна бәла дькьн. 21 Чьмки әм ‹хирәт дькьн кӧ һәр тьшти рʹаст у һʹәлал бькьн, нә тʹәне бәр Йаһоԝа, ле бәр мәрьва жи›.

22 Әм тʹәви ԝан ӧса жи бьраки хԝәйи дьн дьшиньн. Мә әԝ гәләк щар щерʹьбандийә, у мә дит кӧ әԝ гәләк тьштада хирәт ә. Ле ньһа әԝ һе зедә хирәт ә, чьмки әԝ баԝәрийа хԝә ԝә тинә. 23 Һәрге пьрсед ԝә дәрһәԛа Тито һәбьн, бьзаньбьн ԝәки әԝ досте мьн у һәвалкʹаре мьн ә, йе кӧ бона кʹара ԝә хьзмәт дькә. У һәрге пьрсед ԝә дәрһәԛа бьред мә һәбьн, бьзаньбьн кӧ әԝана шандийед щьвата нә у рʹумәте дьдьнә Мәсиһ. 24 Ләма жи һʹәзкьрьна хԝә һьндава ԝан бьрада избат кьн, у щьватарʹа нишан кьн кӧ чьрʹа әм пʹайе ԝә дьдьн.

9 Нә һʹәԝщә йә кӧ әз ԝәрʹа дәрһәԛа хьзмәтийа кӧ пирозарʹа те кьрьне, бьньвисьм. 2 Чьмки әз дәрһәԛа рʹәзәдьлийа ԝә заньм у бона ве йәке бәр Макәдонийа пʹайе ԝә дьдьм. Әз ԝанрʹа дьбежьм кӧ Ахайайеда ида саләк ә һун һазьр ьн аликʹарийе бьдьн, у хирәта ԝә һелан да гәләка жь ԝан. 3 Ле әз бьра дьшиньм бал ԝә, ԝәки ӧса нибә кӧ мә бадиһәԝа пʹайе ԝә дайә, у чаԝа кӧ мьн ԝәрʹа готьбу, һун бь рʹасти һазьр бьн. 4 Йан на, һәрге бьред жь Макәдонйайе тʹәви мьн бен у бьвиньн кӧ һун һазьр ниньн, әме жь бо ԝә шәрми бьн, чьмки мә баԝәрийа хԝә ԝә ани, у һуне жи шәрм кьн. 5 Ләма жи әз фькьрим ԝәки лазьм ә бьра һелан кьм, кӧ әԝана пешийа мә бенә бал ԝә у ԛӧрбанкьрьнед кӧ ԝә соз данә у һазьр кьрьнә, тʹоп кьн. Бь ви щурʹәйи, ԝе зәлал бә ԝәки әв ԛӧрбанкьрьн нә кӧ бь мәщбури, ле бь рʹәзәдьли һатьнә дайине.

6 Ле ве йәке бьзаньбьн: Йе кӧ һьндьки дьчинә ԝе һьндьки жи бьдьру, у йе кӧ гәләки дьчинә ԝе гәләки жи бьдьру. 7 Бьра һәр кәс нә кӧ бе дьл йан бь дәсте зоре, ле чаԝа кӧ әԝи дьле хԝәда сафи кьрийә, ӧса бькә, чьмки Хԝәде ԝи һʹәз дькә, йе кӧ бь дьл у әшԛ дьдә.

8 Хенщи ве йәке, Хԝәде дькарә кʹәрәма хԝәйә мәзьн һʹәму алийава сәр ԝәда бьбаринә, ԝәки һун һʹәԝще тʹӧ тьшти нибьн, у бона һәр шьхӧле ԛәнщ һәр тьште ԝә бь зедәйи һәбә. 9 (Чаԝа кӧ һатийә ньвисаре: «Әԝи бь мәрʹдани бәла кьр у да бәләнгаза. Рʹастийа ԝи һʹәта-һʹәтайе дьминә». 10 Хԝәдейе кӧ бь мәрʹдани тʹохьм дьдә щоткʹар у бона хԝарьне нан дьдә, әԝе тʹер-тʹьжә тʹохьме чандьне бьдә ԝә. У әԝе бәре ԝәйә рʹастийе зедә кә.) 11 Хԝәде һәр тьштида рʹьсԛе ԝә зедә дькә, ԝәки һун дәствәкьри бьн, у бь ве йәке кәсед дьн ԝе шькьрийе бьдьнә Хԝәде. 12 Чьмки әв хьзмәти нә тʹәне бона ве йәке йә, кӧ һун бона һʹәԝщед пироза хәм бькьн, ле ӧса жи ԝәки гәләк кәс шькьрийе бьдьнә Хԝәде. 13 Әԝана ԝе шькьрийе бьдьнә Хԝәде, чьмки аликʹарийа ви щурʹәйи избат дькә, ԝәки һун гӧрʹа мьзгинийа дәрһәԛа Мәсиһ дькьн, кʹижане кӧ һун һʹәму щийа бәла дькьн, у чьмки һун дәствәкьри нә һьндава ԝанда у һьндава һʹәмуйада. 14 У әԝана ԝе сәва ԝә дӧа бькьн у ԝә һʹәз бькьн, бона ԝе кʹәрәма Хԝәдейә мәзьн сәр кʹәрәмарʹа, йа кӧ ԝәрʹа һатийә дайине.

15 Шькьр Хԝәдерʹа бона пʹешкʹеша ԝийә мәхсус, йа кӧ әм нькарьн бь гьлийа жи шьровәкьн.

10 Әз Паԝлос, бь шкәстибун* у ԛәнщийа Мәсиһ һиви жь ԝә дькьм. Һьнәк жь ԝә дьбежьн кӧ гава әз тʹәви ԝә мә, әз йәки сьст темә кʹьфше, ле гава әз тʹәви ԝә ниньм, әз йәки мерхас ьм. 2 Ле әз һиви жь ԝә дькьм, кӧ гава әз бемә бал ԝә, ӧса нибә ԝәки әз мәщбур бьм ԝана сәрт ширәт кьм, йед кӧ дьфькьрьн кӧ әм ль гора ньһерʹандьна ве дьнйайе дьжин. 3 Рʹаст ә әм мина мәрьвед дьн дьжин, ле шәрʹе мә нә мина йе ԝан ә. 4 Әм нә кӧ пе чʹәкед мәрьва шәрʹ дькьн, ле пе чʹәкед кӧ Хԝәде данә мә, йед кӧ дькарьн бьрщед ԛәԝи һьлшиньн. 5 Әм инкʹар дькьн һәр фькьрәкә нәрʹаст у тьштед кӧ рʹийа мәрьва дьгьрьн, ԝәки Хԝәде нас кьн. Әм һәр фькьрәке дькьнә дил, кӧ әԝ Мәсиһрʹа гӧһдар бә. 6 Гава һун нишан кьн, ԝәки бь тʹәмами гӧһдар ьн, әме һазьр бьн һәр кәсе нәгӧһдар щәза кьн.

7 Һун бь тьштед рʹува диԝане дькьн. Һәрге кәсәк баԝәр ә кӧ әԝ пʹара Мәсиһ ә, бьра әԝ диса жи сәр ве йәке бьфькьрә: Чаԝа кӧ әԝ пʹара Мәсиһ ә, ӧса жи әм пʹара Мәсиһ нә. 8 Хӧдан һʹӧкӧм дайә мә, ԝәки әм баԝәрийа ԝә ԛәԝи кьн, нә кӧ һьлшиньн. Һәрге мьн бона ве йәке һьнәки зедә пʹайе хԝә бьда жи, ԝе тьштәки шәрми теда тʹӧнә буйа. 9 Нәфькьрьн кӧ әз пе нәʹмед хԝә дьхԝазьм ԝә бьдьмә тьрсандьне. 10 Чьмки һьнә кәс дьбежьн: «Нәʹмед ԝи бь һʹӧкӧм ьн у ԛәԝи нә, ле гава әԝ вьра йә, әԝ ча кәсәки сьст те кʹьфше, у хәбәрдана ԝи нәтьштәк ә». 11 Йе кӧ ӧса дьбежә, бьра бьзаньбә кӧ гава әм бен, әме ль гора тьштед кӧ әм нәʹмада дьньвисьн, бькьн. 12 Әм нахԝазьн хԝә бәрамбәри кәсед кӧ пʹайе хԝә дьдьн, бькьн, йан жи мина ԝан бьн. Әԝана пе һәв хԝә чап дькьн у хԝә бәрамбәри һәв дькьн. Бь ԝе йәке әԝана нишан дькьн, кӧ тьштәки фәʹм накьн.

13 Әм бона шьхӧлед кӧ мә нәкьрьнә, пʹайе хԝә надьн. Ле әм тʹәне бона шьхӧлед кӧ мә жь Хԝәде стандийә пʹайе хԝә дьдьн, у һун жи пʹарәкә ви шьхӧли нә. 14 Гава әм һатьнә щәм ԝә, мә тʹӧ шьхӧле кӧ Хԝәде нәдайә мә, нәкьр. Ле әм кәсед пешьн бун, кӧ мьзгинийа дәрһәԛа Мәсиһ гиһандә ԝә. 15 Әм жь синор дәрнайен у пе шьхӧле кәсед дьн, пʹайе хԝә надьн. Ле гӧмана мә әв ә, кӧ чаԝа баԝәрийа ԝә һе зедә мәзьн дьбә, тьштед кӧ мә нав ԝәда кьрьнә жи, ԝе һе зедә мәзьн бьн. Һьнге әме бькарьбьн һе зедә бькьн, 16 у мьзгинийе бәла кьн ԝан щийа жи, кʹижан кӧ жь ԝә дур ьн. Бь ви щурʹәйи, әме пʹайе хԝә нәдьн бона шьхӧле кӧ йед дьн һәрема хԝәда кьрьнә. 17 «Ле йе кӧ пʹайе хԝә дьдә, бьра бь Йаһоԝа пʹайе хԝә бьдә». 18 Чьмки Йаһоԝа нә кӧ ԝи ԛәбул дькә, йе кӧ пʹайе хԝә дьдә, ле ԝи ԛәбул дькә, пʹайе кʹижани әԝ хԝәха дьдә.

11 Һәрге әз щарна бефәʹм темә кʹьфше жи, әз гӧман ьм һуне ль мьн сәбьр кьн. Ле һун ӧса жи ль мьн сәбьр дькьн. 2 Чаԝа кӧ Хԝәде дьхԝазә ԝә бьпʹарезә, әз жи дьхԝазьм ԝә бьпʹарезьм. Чьмки мьн хԝәха һун Мәсиһрʹа нишан кьрьн, у әз дьхԝазьм ԝә ча ԛизәкә бькʹьр бьдьмә ԝи. 3 Ле тьрса мьн әԝ ә, кӧ чаԝа мәʹр бь фелбази Һеԝа хапанд, ӧса бе сәре ԝә жи у һʹьше ԝә хьраб бә, у һун жь тʹәмьзайи у һʹәлалийа һьндава Мәсиһда дур кʹәвьн. 4 Чьмки чахе йәк те у нә дәрһәԛа ви Исайи гьли дькә, дәрһәԛа кʹижани мә гьли кьрийә, йан жи чахе һун рʹӧһʹәки дьн дьстиньн, кʹижан кӧ ԝә нәстандийә, йан жи чахе ԝәрʹа мьзгиникә дьн бәла дькьн, нә кӧ кʹижан кӧ ԝә ԛәбул кьрийә, һун ԝи мәрьви сәбьр дькьн. 5 Ле әз дьфькьрьм тʹӧ тьштәки ӧса тʹӧнә кӧ избат кә, ԝәки әз жь шандийед ԝәйи «һәри баш» кемтьр ьм. 6 Һәрге әз хәбәрданеда сәр хԝә нибьм жи, занәбуна мьн дәрһәԛа Хԝәде һәйә. Мә әв йәк һʹәму алийава у һәр тьштида ԝәрʹа зәлал кьрийә.

7 Мьн бь дьл у беһәԛ мьзгинийа Хԝәде да ԝә, у мьн хԝә ньмьз кьр, ԝәки һун бьльнд бьн. Гәло мьн бь ве йәке гӧнә кьр? 8 Мьн аликʹари жь щьватед дьн дьстанд, ча бежи мьн әԝ тʹалан кьрьн, сәва кӧ әз ԝәрʹа хьзмәт кьм. 9 Чахе әз бал ԝә бум у бумә һʹәԝще тьштәки, әз тʹӧ кәсирʹа нәбумә баргьрани. Гава бьред жь Макәдонйайе һатьн, ԝана дәсте хԝә дьрежи мьн кьр чьда жи әз һʹәԝщә бум. Бәле, мьн һәр тьштида хирәт кьр, кӧ ԝәрʹа нәбьмә баре гьран, у әзе һәма ӧса жи бәрдәԝам кьм. 10 Һʹәта кӧ әз шагьрте Мәсиһ мә, тʹӧ тьшт ԝе рʹийа мьн нәгьрә, кӧ дәрһәԛа ве йәке һәремед Ахайайеда пʹайе хԝә бьдьм. 11 Чьма мьн хԝә ӧса да кʹьфше? Чьмки әз ԝә һʹәз накьм? Хԝәде занә кӧ әз ԝә һʹәз дькьм.

12 Һьнә кәс пʹайе хԝә дьдьн у дьбежьн, кӧ әԝана жи мина мә шанди нә. Ләма тьште кӧ әз дькьм, әзе бәрдәԝам кьм бькьм, ԝәки тʹӧ мәʹники нәдьмә ԝан кӧ әԝана пʹайе хԝә бьдьн. 13 Чьмки мәрьвед ӧса шандийед ԛәлп ьн, әԝана кәсед дьн дьхапиньн, у хԝә ча шандийед Мәсиһ дьдьнә кʹьфше. 14 Әз ве йәкерʹа әʹщебмайи наминьн, чьмки Шәйтʹан жи хԝә ча мәләке рʹонайе дьдә кʹьфше. 15 Ләма жи әʹщебмайи нинә, кӧ хьзмәткʹаред ԝи жи хԝә ча хьзмәткʹаред рʹастийе дьдьнә кʹьфше. Ле ахьрийа ԝан ԝе ль гора кьред ԝан бә.

16 Әз диса дьбежьм: Бьра тʹӧ кәс нәфькьрә, ԝәки әз йәки бефәʹм ьм. Ле һәрге һун ӧса бьфькьрьн жи, мьн ԛәбул кьн, ԝәки әз жи һьнәки пʹайе хԝә бьдьм. 17 Чь кӧ әз ньһа дьбежьм, ӧса набежьм чаԝа кӧ ԝе Хӧдан бьгота, ле ча йәки бефәʹм дьбежьм, йе кӧ хԝәда баԝәр ә у пʹайе хԝә дьдә. 18 Һәрге гәләк кәс бь тьштед ве дьнйайе пʹайе хԝә дьдьн, әзе жи пʹайе хԝә бьдьм. 19 Рʹаст ә һун ӧса «сәрԝахт» ьн, ле жь дьл кәсед бефәʹм сәбьр дькьн. 20 Һәрге йәк ԝә дькә хӧлам, йан һәбуна ԝә дьхԝә, йан ԝә тʹалан дькә, йан хԝә ль сәр ԝәрʹа дьгьрә, йан рʹуйе ԝә дьхә, һун ԝан тьшта сәбьр дькьн.

21 Чьԛас шәрм ә кӧ әм ӧса дьбежьн, чьмки дькарә ӧса бе кʹьфше, ԝәки әм сьст ьн.

Ле һәрге һьнә кәс шәрм накьн пʹайе хԝә бьдьн, әз жи шәрм накьм пʹайе хԝә бьдьм, һәрге жи кәсәк мьн бефәʹм һʹәсаб кә. 22 Әԝана Ибрани нә? Әз жи Ибрани мә. Әԝана Исраели нә? Әз жи Исраели мә. Әԝана жь зӧрʹәта Бьраһим ьн? Әз жи жь зӧрʹәта Бьраһим ьм. 23 Әԝана хьзмәткʹаред Мәсиһ нә? Әзе мина йәки беаԛьл бежьм: Әз һе зедә ӧса мә. Әз һе зедә хәбьти мә, һе зедә кәледа бумә, һе зедә һатьмә ледане, у әз гәләк щара бәр мьрьне бумә. 24 Мьн алийе Щьһуйада пенщ щара 39 ледан стандийә. 25 Әз се щара бь шьва һатьмә ледане, щарәке әз дамә бәр кәвьра, се щара әз рʹасти гәмиԝәлгәрʹандьне һатьмә, шәв у рʹожәке әз бәʹра вәкьрида мамә. 26 Әз гәләк щара рʹеԝитийеда бумә у кʹәтьмә щурʹә-щурʹә ԛәзийа чʹәмада, жь дәсте ԛачаха, жь дәсте мьләте хԝә у жь дәсте мьләтед дьн, бажерда, бәрʹийеда, сәр бәʹре, жь дәсте бьред ԛәлп. 27 Әз нава шьхӧле гьранда бумә, мьн гәләк шәв бе хәԝ дәрбаз кьрьнә, әз тʹи у бьрʹчи мамә, гәләк щар бе хԝарьн мамә, сәрмеда у бе кʹьнщ* мамә.

28 Хенщи ԝан тьшта, дәрдәки мьн һәйә, кʹижан кӧ һәр рʹож мьн әʹщьз дькә, әв һәйә хәмгинийа мьн бона һʹәму щьвата. 29 Гава кәсәк сьст ә, нә әз жи сьст дьбьм? Гава кәсәки дьлькʹӧминьн, нә әз һерс дькʹәвьм?

30 Һәрге лазьм ә пʹайе хԝә бьдьм, әзе бь тьштед кӧ һʹале мьни сьст дьдьнә кʹьфше, пʹайе хԝә бьдьм. 31 Хԝәде, Баве Хӧдан Иса, йе кӧ һәр у һәр һежайи рʹумәте йә, занә кӧ әз дәрәԝа накьм. 32 Шамеда, ԝәлийе Аретас пʹадша, нобәдар бәр дәргәһед бажер данинә, сәва кӧ мьн бьгьрә. 33 Ле әз пе сәвәте* жь пʹәнщәра диԝаре бажер һатьмә дахьстьне, у әз жь дәсте ԝи хьлаз бум.

12 Әз гәрәке пʹайе хԝә бьдьм. Рʹаст ә кʹара ве йәке тʹӧнә, ле әз дьхԝазьм бәʹса дитьнок у әʹйантийед жь Хӧдан бькьм. 2 Әз мәрьвәки нас дькьм, әԝ шагьртәки Мәсиһ ә.* Чардәһ сал пешда, әԝ мәрьв һʹәта әʹзмане сьсийа һатә һьлдане. Әз ньзаньм әԝ бәдәна хԝәда бу йан на, Хԝәде занә. 3 Әре, әз мәрьвәки ӧса нас дькьм, әԝ һатә һьлдане ль щьнәте. Әз ньзаньм әԝ бәдәна хԝәда бу йан на, Хԝәде занә. 4 У гава әԝ щьнәтеда бу, әԝи гьлийед ӧса бьһистьн, кʹижан кӧ изьн тʹӧнә йә бенә готьне. 5 Әре, әз дьхԝазьм пʹайе мәрьве ӧса бьдьм. Ле әзе пʹайе хԝә нәдьм, әзе тʹәне пе кемасийед хԝә пʹайа бьдьмә хԝә. 6 Һәрге әз пʹайе хԝә бьдьм жи, әз тьштәки бефәʹмти накьм, чьмки әзе рʹастийе бежьм. Ле әз пʹайе хԝә надьм. Ԝә дит кӧ мьн чь кьр у чь гот, ләма бьра тʹӧ кәс нәфькьрә кӧ мьн жь ԝан тьшта зедәтьр кьр, 7 тʹәне бона ве йәке, кӧ тьштед мәхсус мьнрʹа һатьнә әʹйанкьрьне.

У сәва кӧ әз ԛӧрʹә нәбьм, у дәрһәԛа хԝә зедә нәфькьрьм, бәдәна мьнда стьри һатә дайине, у әв мина мьлйакʹәтәки Шәйтʹан ә, кʹижан кӧ тʹьме мьн дьхә. 8 Мьн се щара жь Хӧдан лава кьр, кӧ ве йәке жь мьн дур хә. 9 Ле әԝи ӧса мьнрʹа гот: «Кʹәрәма мьнә мәзьн бәси тә йә, чьмки чахе тӧ сьст и, һьнге ԛәԝата мьн бь тʹәмами әʹйан дьбә». У бона ве йәке әзе бь шабунәкә мәзьн сьстбунед хԝәрʹа фьрнаԛ бьм, ԝәки ԛәԝата Мәсиһ мина кон сәр мьн бьминә. 10 Ләма жи әз бона хатьре Мәсиһ, сьстбунарʹа, беһӧрмәтийарʹа, ԝәʹде зәʹмәтрʹа, зерандьнарʹа у тәнгасийарʹа ша дьбьм. Чьмки гава әз сьст ьм, һьнге әз ԛәԝи мә.

11 Әз бумә йәки бефәʹм. Ԝә әз мәщбур кьрьм, чьмки гәрәке ԝә пʹайе мьн бьда. Әз тʹӧ тьштида жь ԝан шандийед ԝәйә «һәри баш» кемтьр ниньм, ле әз хԝәха жи нә тʹӧ тьшт ьм. 12 Ԝә бь чʹәʹве хԝә избати дитьн кӧ әз шанди мә, ԝә сәбьр, нишан, кʹәрәм у кьред мьнә мәзьн дит. 13 Сәбәбе кӧ һун жь щьватед дьн бьчʹуктьр һатьнә һʹәсабе, тʹәне әв бу кӧ әз ԝәрʹа нәбум барәки гьран. Жь кʹәрәма хԝә бона ве шашийе бьбахшиньнә мьн.

14 Әва щара сьсийа йә кӧ әз хԝә һазьр дькьм, ԝәки бемә бал ԝә, ле әзе ԝәрʹа нәбьмә барәки гьран. Әз нә кӧ мал-мьлкʹе ԝә дьхԝазьм, ле кʹара ԝә дьгәрʹьм. Чьмки гәрәке нә кӧ зарʹ бона де-баве хԝә мал-мьлкʹ тʹоп кьн, ле де-бав бона зарʹед хԝә. 15 Әзе бь шабун бона ԝә һәр тьшти бьдьм, һәла һе әʹмьре хԝә жи. Һәрге әз ԝә ӧса зәʹф һʹәз дькьм, гәло гәрәке һун мьн кем һʹәз бькьн? 16 Чь жи һәбә, әз ԝәрʹа нәбум барәки гьран. Ле диса жи, һун дьбежьн кӧ әз йәки бьнва мә у мьн «бь фелбазийе» һун хапандьнә. 17 Ԛә мьн бь дәсте кәсед кӧ мьн шандьнә щәм ԝә, кʹәда ԝә хԝарийә? 18 Мьн дьле Тито ԛәԝи кьр у бьрак тʹәви ԝи шандә бал ԝә. Ԛә Тито кʹәда ԝә хԝарийә? Нә әм йәктийеда бун? Нә әм рʹекеда дьчун?

19 Һун дьфькьрьн кӧ әм дьхԝазьн хԝә бәр ԝә рʹаст дәрхьн? На, әм мина шагьртед Мәсиһ бәр Хԝәде рʹастийе дьбежьн. Хушк-бьред дәлал, һәр тьшти чь кӧ әм дькьн бона ԛәԝикьрьна ԝә дькьн. 20 Тьрса мьн әԝ ә кӧ гава әз бемә бал ԝә, рʹабун-рʹуньштьна ԝә нә ль гора дьле мьн бә, у дьбәкә рʹабун-рʹуньштьна мьн жи нә ль гора дьле ԝә бә. Чьмки әз дьтьрсьм кӧ нав ԝәда шәрʹ-дәʹԝ, һʹәвсуди, һерс, һәврʹьки, бӧхдан, гәвәзти, кʹӧбар-бабахи у бетʹәрбәти һәбә. 21 Дьбәкә гава әз диса бемә бал ԝә, Хԝәде ԝе бәр ԝә мьн бьдә шәрме, у дьбәкә әз бона гәләка шине бькьм, кʹижана пешда гӧнә кьрьнә, ле тʹобә нәкьрьнә бона мьрʹдарʹи, зьнекʹари* у рʹабун-рʹуньштьна хԝәйә рʹобәти.

13 Әва щара сьсийа йә әз һазьр дьбьм бемә щәм ԝә. «Һәр тьшт гәрәке пе дәве дӧ йан се шәʹда бе избаткьрьне». 2 Рʹаст ә ньһа әз жь ԝә дур ьм, ле гьлийед мьн ӧса ԛәбул кьн ча бежи әз щара дӧда һатьмә щәм ԝә. Һәрге әз диса бем, әз дьхԝазьм ԝанрʹа, йед кӧ бәре гӧнә кьрьнә у ӧса жи һʹәмуйед дьнрʹа, пешда бежьм, кӧ тʹӧ кәс ԝе нькарьбә жь ширәткьрьна мьн бьрʹәвә. 3 Бь ви аԝайи, әзе нишан кьм кӧ Мәсиһ пе мьн хәбәр дьдә. У Мәсиһ һьндава ԝәда сьст нинә, ле әԝ ԛәԝата хԝә нишани ԝә дькә. 4 Рʹаст ә әԝ сәр стуне һатә дардакьрьне гава сьст бу, ле әԝ бь сайа ԛәԝата Хԝәде сах ә. Бәле, әм жи сьст ьн, чаԝа кӧ әԝ сьст бу, ле пе ԛәԝата Хԝәде, йа кӧ сәр мә йә, әме тʹәви ԝи бьжин.

5 Бәрдәԝам кьн тедәрхьн һәла һун нава баԝәрийеда ньн йан на. Һәр гав хԝә бьщерʹьбиньн. Һун фәʹм накьн кӧ Иса Мәсиһ тʹәви ԝә йәктийеда йә? Һәмьки һәрге ԝә ԛәбулкьрьна Хԝәде ӧнда нәкьрийә. 6 Әз бь рʹасти гӧман ьм кӧ һуне фәʹм кьн, ԝәки мә ԛәбулкьрьн ӧнда нәкьрийә.

7 Әм Хԝәдерʹа дӧа дькьн, кӧ һун тьштәки хьраб нәкьн, ле нә сәва ве йәке кӧ әм ԛәбулкьри бенә кʹьфше, ле ԝәки һун тьште ԛәнщ бькьн, һәрге жи әм нәԛәбулкьри бенә кʹьфше. 8 Чьмки әм нькарьн тьштәки мьԛабьли рʹастийе бькьн, ле әм тʹәне дькарьн әве рʹастийе пешда бьвьн. 9 Әм тʹьме ша нә, һәрге жи әм сьст ьн, ле һун ԛәԝи нә. У әм бона ве йәке дӧа дькьн, кӧ һун хԝә рʹаст кьн. 10 Ләма жи пешийа кӧ әз бемә щәм ԝә, әз ван тьшта дьньвисьм, ԝәки гава щәм ԝә бьм, һьндава ԝәда сәрт нибьм, у пе һʹӧкӧме кӧ Хӧдан дайә мьн, нә кӧ ԝә һьлшиньм, ле дьле ԝә ава кьм.

11 Бьрано, хьлазийеда әз ԝәрʹа дьбежьм: Тʹьме ша бьн, һәр гав хԝә рʹаст кьн, бәрдьлийе бьстиньн, сәр нетәке бьн, әʹдьлайеда бьжин, у һьнге Хԝәдайе һʹәзкьрьне у әʹдьлайе ԝе тʹәви ԝә бә. 12 Бь һʹәзкьрьне* һәвдӧ сьлав кьн. 13 Һʹәму кәсед пироз ԝә сьлав дькьн.

14 Бьра кʹәрәма мәзьн йа Хӧдан Иса Мәсиһ, һʹәзкьрьна Хԝәде у кʹәрәмед рʹӧһʹе пироз сәр ԝә һʹәмуйа бә!