НӘʹМА ГАЛАТИЙАРʹА

1 Әз Паԝлос, ча шанди һатьмә бьжартьне, нә кӧ алийе мәрьвада, ле алийе Иса Мәсиһ у Бав Хԝәдеда, йе кӧ Мәсиһ жь мьрьне рʹакьрийә. 2 Әз у һʹәму бьред кӧ тʹәви мьн ьн, щьватед Галатйайерʹа сьлаве дьшиньн:

3 Бьра кʹәрәма мәзьн у әʹдьлайа Хԝәде Баве мә у Хӧдан Иса Мәсиһ сәр ԝә бә. 4 Мәсиһ хԝә бона гӧнед мә кьрә ԛӧрбан, ԝәки мә жь ве дьнйа хьраб хьлаз кә. Әв йәк ль гора ԛьрара Баве мә Хԝәде бу, 5 йе кӧ һʹәта-һʹәтайе һежайи рʹумәте йә. Амин.

6 Әз әʹщебмайи дьминьм кӧ һун ӧса зу жь Хԝәде дур дькʹәвьн, йе кӧ бь кʹәрәма мәзьн йа Мәсиһ гази ԝә кьрийә, у мьзгиникә дьн ԛәбул дькьн. 7 Бь рʹасти, мьзгиникә дьн тʹӧнә йә. Ле мәрьвед ӧса һәнә кӧ ԝә тʹәвльһәв дькьн у дьхԝазьн мьзгинийа дәрһәԛа Мәсиһ бьгӧһезьн. 8 Һәрге кәсәк жь мә йан мәләкәк жь әʹзмана ԝәрʹа мьзгиникә дьн бәла кә, нә кӧ мьзгинийа кӧ мә ԝәрʹа бәла кьрийә, бьра ньфьрʹ ль ԝи бә. 9 Чаԝа мә пешда гот, әз ньһа диса дьбежьм: Һәрге кәсәк хенщи мьзгинийа кӧ ԝә ԛәбул кьрийә, мьзгиникә дьн бәла кә, бьра ньфьрʹ ль ԝи бә.

10 Дә ньһа әз дьхԝазьм мәрьва хԝәш бем йан Хԝәде? Һәрге мьн бьхԝәста мәрьва хԝәш бем, әзе хӧламе Мәсиһ нибума. 11 Бьрано, бьзаньбьн ԝәки мьзгинийа кӧ мьн ԝәрʹа бәла кьрийә, жь мәрьва нинә. 12 Чьмки мьн әв мьзгини нә жь мәрьва стандийә, у нә жи ԝана әз һин кьрьмә, ле мьн әв мьзгини жь Иса Мәсиһ стандийә.

13 Чаԝа һун заньн, бәре гава әз дине Щьһуйада бум, мьн щьвата Хԝәде гәләк дьзеранд у гәләк зийан дьдайе. 14 Әз нав мьләте хԝәда, жь гәләкед ԛаси хԝә дине Щьһуйада дьһа зедә пешдачуйи бум. Чьмки әз алийе хԝәйкьрьна әʹдәтед кал-бавед хԝәда дьһа хирәт бум. 15 Ле Хԝәдайе кӧ изьн да ԝәки әз бемә буйине, бь кʹәрәма хԝәйә мәзьн гази мьн кьр. Әԝи дьхԝәст 16 мьн бьдә хәбате, кӧ әз мьзгинийе бьдьмә мьләтед дьн, ԝәки әԝана Кӧрʹе ԝи нас кьн. Гава әԝи әз бьжартьм кӧ ве йәке бькьм, һьнге мьн шеԝьра хԝә тʹәви тʹӧ кәси нәкьр. 17 У әз нәчумә Оршәлиме щәм кәсед кӧ пешийа мьн бьбунә шанди. Ле әз чум Әʹрәбьстане у паше вәгәрʹийамә Шаме.

18 Паше, се сал шунда, әз һьлкʹьшийамә Оршәлиме, ԝәки Кифас бьвиньм, у әз 15 рʹожа щәм ԝи мам. 19 Ле мьн хенщи Аԛубе бьре Хӧдан, тʹӧ шандийед дьн нәдитьн. 20 Хԝәде шәʹдә йә: Һʹәму тьштед кӧ әз дьньвисьм рʹаст ьн.

21 Паше әз чумә һәремед Сурйайе у Киликйайе. 22 Ле шагьртед Мәсиһ жь щьватед Щьһустане әз бь шәхси нас нәдькьрьм. 23 Ԝана тʹәне әв йәк дьбьһист: «Мәрьве кӧ бәре әм дьзерандьн, ньһа мьзгинийа дәрһәԛа ве баԝәрийе бәла дькә, йа кӧ әԝи бәре дьхԝәст кʹокева рʹакә». 24 Гава ԝана дәрһәԛа мьн бьһист, ԝана дәстпекьр шькьрийе бьдьнә Хԝәде.

2 Паше, 14 сал шунда әз диса һьлкʹьшийамә Оршәлиме тʹәви Барнабас, у мьн Тито жи тʹәви хԝә бьр. 2 Әз чумә ԝедәре, чьмки мьнрʹа әʹйанти һатьбу дайине кӧ һәрʹьм. У мьн дәрһәԛа мьзгинийа кӧ әз нав мьләтед дьнда бәла дькьм, тʹәне бьред хԝәйиԛәдьррʹа гьли кьр, ԝәки пебьһʹәсьм һәла хьзмәтийа мьн бадиһәԝа нинә. 3 У Титойе кӧ тʹәви мьн бу, рʹаст ә Йунан бу, ле тʹӧ кәси зоре ԝи нәдькьр кӧ бе сьнәткьрьне. 4 Әв пьрс рʹуйе бьред ԛәлпда пешда һат, йед кӧ мина щәʹсуса кʹәтьнә нава щьвате. Әԝана дьзива мәщале дьгәрʹьн, ԝәки зьраре бьдьнә азайа мә шагьртед Мәсиһ Иса, у мә бь тʹәмами бькьнә хӧламед ԛануне. 5 Ле мә гӧрʹа ԝан нәкьр у ԛә гӧһ нәда ԝан, ԝәки һун рʹастийа мьзгинийеда бьминьн.

6 Ле йед кӧ гьрәгьр тенә һʹәсабе у хԝәйиԛәдьр ьн, мьнрʹа тьштәки тʹәзә нәготьн. Әре, бона мьн фьрԛи тʹӧнә кӧ бәре әԝана кʹе бун, чьмки Хԝәде фьрԛийе накә нава мәрьва. 7 Ле ԝана дит кӧ мьнрʹа һатә тʹәсмилкьрьне ԝәки мьзгинийе нәсьнәтбуйарʹа бәла кьм, чаԝа кӧ Пәтрусрʹа һатә тʹәсмилкьрьне, ԝәки мьзгинийе сьнәтбуйарʹа бәла кә. 8 Чьмки Хԝәдайе кӧ ԛәԝат да Пәтрус, ԝәки әԝ бона сьнәтбуйа бьбә шанди, ԛәԝат да мьн жи ԝәки әз бона мьләтед дьн бьбьмә шанди. 9 Гава ван мәрьва фәʹм кьр кӧ Хԝәде чаԝа кʹәрәма мәзьн дайә мьн, Аԛуб, Кифас у Йуһʹәнна, йед кӧ стунед щьвате дьһатьнә һʹәсабе, дәсте хԝәйи рʹасте дьрежи мьн у Барнабас кьрьн чаԝа нишана һәвкʹарийе, у готьн: «Һун мьзгинийе бьдьнә мьләтед дьн, ле әме мьзгинийе бьдьнә кәсед сьнәтбуйи». 10 Ԝана тʹәне һиви жь мә кьр, ԝәки әм кʹәсиба бир нәкьн, чаԝа мьн жи хирәт дькьр ве йәке бькьм.

11 Ле гава Кифас һатә Әнтакйайе, мьн рʹастә-рʹаст ԝирʹа гот кӧ әԝ нәһәԛ ә. 12 Чьмки пешийа һатьна чәнд мәрьвед кӧ алийе Аԛубда һатьнә шандьне, Кифас тʹәви кәсед жь мьләтед дьн хԝарьн дьхԝар, ле гава әв мәрьв гьһиштьнә ԝедәре, әԝ тьрса мәрьвед сьнәтбуйи, жь мьләтед дьн дур кʹәт. 13 Щьһуйед дьн жи мина ԝи дӧрʹути кьрьн, у һәла һе Барнабас жи кʹәтә бәр байе ԝан. 14 Ле гава мьн дит кӧ әԝана ль гора рʹастийа мьзгинийе накьн, мьн бәр һʹәмуйа Кифасрʹа гот: «Һәрге тӧ, йе кӧ Щьһу йи, мина Щьһуйа нажийи, ле мина кәсед жь мьләтед дьн дьжийи, ижа тӧ ча зоре мьләтед дьн дьки, ԝәки әԝана ль гора әʹдәтед Щьһуйа бьжин?»

15 Әм жь буйина хԝәда Щьһу нә, нә кӧ гӧнәкʹаред жь мьләтед дьн ьн. 16 Диса жи әм заньн, ԝәки мәрьв нә бь кьред кӧ ԛанун дәʹԝа дькә, рʹаст те һʹәсабе, ле бь сайа баԝәрийа хԝә һьндава Иса Мәсиһ. Мә жи баԝәрийа хԝә Мәсиһ Иса анийә, ԝәки әм нә бь кьред кӧ ԛанун дәʹԝа дькә рʹаст бенә һʹәсабе, ле бь баԝәрийа хԝә һьндава Мәсиһ. Чьмки тʹӧ кәс бь кьред кӧ ԛанун дәʹԝа дькә рʹаст найе һʹәсабе. 17 Әм хирәт дькьн кӧ бь сайа Мәсиһ мәрьвнә рʹаст бенә һʹәсабе, ле мә гӧнәкʹар һʹәсаб дькьн. Ԝәки ӧса нә, Мәсиһ мә бәрбь гӧнә һелан дькә?* Тʹӧ щар на! 18 Һәрге әз тьштед кӧ мьн бәре һьлшандьнә, диса тʹәзәда ава кьм, әзе бьбьмә йәки кӧ ԛануне дьтʹәрʹьбинә. 19 Жь бо ве йәке кӧ мьн хԝә ль ԛануне дьгьрт, әз бона ԛануне мьрьм, ԝәки бона Хԝәде сах бьм. 20 Әз тʹәви Мәсиһ сәр стуне һатьмә мьхкьрьне. Ида йе кӧ дьжи нә әз ьм, ле Иса йә, кӧ нав мьнда дьжи. Әре, әз кӧ ньһа бәдәнеда дьжим, бь баԝәрийа һьндава Кӧрʹе Хԝәде дьжим, йе кӧ әз һʹәз кьрьм у хԝә бона мьн кьрә ԛӧрбан. 21 Әз кʹәрәма Хԝәдейә мәзьн инкʹар накьм, чьмки һәрге мәри пе ԛануне рʹаст те һʹәсабе, ԝәки ӧса нә Мәсиһ бадиһәԝа мьрийә.

3 Галатийед бефәʹм! Кʹе һун хальфандьн? Нә ԝәрʹа зәлал һатийә әʹйанкьрьне, кӧ Иса Мәсиһ стунева һатә мьхкьрьне? 2 Әз дьхԝазьм пьрсәке бьдьмә ԝә: Ԝә рʹӧһʹе пироз станд, чьмки ԝә ԛанун дьани сери, йан чьмки ԝә тьштед кӧ ԝә бьһистьнә баԝәр кьрийә? 3 Һун ӧса бефәʹм ьн? Дәстпекеда һун ль гора рʹӧһʹе пироз дьмәшийан, ле ньһа һун ль гора ньһерʹандьна мәрьва дьмәшьн? 4 Гәло ԝә бадиһәԝа һаԛас тәнгаси кʹьшанд? Әз баԝәр накьм кӧ бадиһәԝа бу! 5 Йе кӧ рʹӧһʹе пироз дьдә ԝә у нав ԝәда кʹәрәмәта дькә, гәло әԝ ве йәке дькә, чьмки һун ԛануне тиньн сери, йан чьмки һун тьштед кӧ ԝә бьһистьнә баԝәр дькьн? 6 Һәла дәрһәԛа Бьраһим бьфькьрьн, йе кӧ «баԝәрийа хԝә Йаһоԝа ани, у йәки рʹаст һатә һʹәсабе».

7 Чаԝа һун заньн, йед кӧ хԝә ль баԝәрийе дьгьрьн, әԝ ьн кӧрʹед Бьраһим. 8 Ньвисаре һе пешда дабу кʹьфше, кӧ Хԝәде ԝе мәрьвед жь мьләтед дьн бь сайа баԝәрийе рʹаст һʹәсаб кә. У һе зудава Бьраһимрʹа әв мьзгини һатә дайине: «Бь сайа тә һʹәму мьләт ԝе бенә кʹәрәмкьрьне». 9 Ләма жи мәрьвед кӧ хԝә ль баԝәрийе дьгьрьн, тенә кʹәрәмкьрьне чаԝа Бьраһим, баԝәрийа кʹижани һәбу.

10 Һʹәму кәсед кӧ гӧмана хԝә дьдьнә сәр кьред кӧ ԛанун дәʹԝа дькә, бьн ньфьрʹда ньн, чьмки ӧса ньвисар ә: «Ньфьрʹ ль һәр кәси бә, йе кӧ нава һʹәму ньвисаред кʹьтеба Ԛанунеда наминә у ԝан найнә сери». 11 Сәрда жи, әшкәрә йә кӧ Хԝәде тʹӧ кәси бь ԛануне рʹаст һʹәсаб накә, чьмки «йе рʹаст ԝе бь сайа баԝәрийа хԝә бьжи». 12 Ԛанун сәр һʹиме баԝәрийе нинә, ле «йе кӧ ван тьшта дькә, ԝе бь сайа ԝан бьжи». 13 Мәсиһ әм кʹьрʹин у жь ньфьрʹе Ԛануне аза кьрьн, бь ве йәке кӧ дәԝса мә кʹәтә бьн ньфьрʹ. Чьмки ӧса ньвисар ә: «Һәр кәсе кӧ сәр стуне дардакьри йә, ньфьрʹ сәр ԝи йә». 14 Әв йәк ӧса бу, ԝәки бь сайа Мәсиһ Иса кʹәрәма кӧ Бьраһимрʹа һатийә создайине, бьгьһижә мьләтед дьн. У бь ве йәке әме бь сайа баԝәрийа хԝә рʹӧһʹе пироз бьстиньн, чь кӧ Хԝәде соз дайә.

15 Бьрано, әз дьхԝазьм жь әʹмьре һәррʹожи ԝәрʹа мәсәләке биньм: Гава пәйманәк ида һатийә гьредане, һәрге жи мәрьвәки ве йәке гьредабә, тʹӧ кәс нькарә ԝе пәймане бәтал кә, йан жи тьштәки дьн сәрда зедә кә. 16 Аԝа Бьраһим у зӧрʹәта ԝирʹа соз һатьнә дайине. Ньвисаред Пирозда найе готьне, «зӧрʹәтед тә», чаԝа бона гәләка. Ле те готьне, «зӧрʹәта тә», демәк бона йәки те готьне, у әв Мәсиһ ә. 17 Һьм жи, әз дьбежьм: Ԛануна кӧ 430 сал шунда һатә дайине, нькарә пәймана кӧ Хԝәде пешда гьредабу, бәтал кә у бь ви щурʹәйи соз пʹучʹ кә. 18 Һәрге мьлкʹ пеканина ԛанунева гьредайи буйа, ԝе ида создайинева гьредайи нибуйа. Ле Хԝәде бь дьловани бь сайа созе хԝә әв мьлкʹ да Бьраһим.

19 Ижа Ԛанун бона чь бу? Әв ԛанун паше һатә дайине бона әшкәрәкьрьна гӧна, һʹәта һатьна зӧрʹәта ԝи, кʹижанирʹа соз дабу. Хԝәде ԛанун да мәләка у ԝана әв ԛанун бь дәсте ортʹәчи гиһандьнә мәрьва. 20 Ле гава пәйман тʹәне кәсәк датинә, ортʹәчи нәлазьм ә, чьмки әв аликива те данине, у әв али, Хԝәде йә. 21 Ижа Ԛанун мьԛабьли созед Хԝәде йә? Һәмьки на! Чьмки һәрге мәрьварʹа ԛанунәкә кӧ жийине дьдә, бьһата дайине, һьнге әԝана ԝе рʹаст бьһатана һʹәсабе һәрге ԛанун бьанийана сери. 22 Ле Ньвисаред Пироз нишан дькьн кӧ һʹәму мәрьв дилтийа гӧнәда ньн, ԝәки әԝед кӧ баԝәр дькьн, кʹәрәма создайи бь сайа баԝәрийа һьндава Иса Мәсиһ, бьстиньн.

23 Ле пешийа кӧ баԝәри пешда бьһата, ԛануне әм дьпʹарастьн. Әм дилтийа ԝеда бун, чахе һивийа ԝе баԝәрийе бун кӧ гәрәке бьһата әшкәрәкьрьне. 24 Бь ви аԝайи, Ԛанун бу дәрсдаре мә у әм бәрбь Мәсиһ дьбьрьн, ԝәки әм бь сайа баԝәрийе мәрьвнә рʹаст бенә һʹәсабе. 25 Ле ньһа, чьмки баԝәри һатийә, әм ида бьн дәсте дәрсдарәкида ниньн.

26 Һун һʹәму, бь сайа баԝәрийа хԝә һьндава Мәсиһ Иса, кӧрʹед Хԝәде нә. 27 Чьмки ԝә һʹәмуйа, йед кӧ бь наве Мәсиһ һатьнә ньхӧмандьне, хәйсәт-һʹӧнӧред Мәсиһ ль хԝә кьрийә.* 28 Ида фьрԛи тʹӧнә кӧ һун Щьһу нә йан Йунан ьн, хӧлам ьн йан аза нә, мер ьн йан жьн ьн, һун һʹәму жи йәк ьн йәктийа Мәсиһ Исада. 29 У һәрге һун пʹара Мәсиһ нә, һун бь рʹасти зӧрʹәта Бьраһим ьн, у ԝаред ԝи сози нә.

4 Аԝа әз дьбежьм, рʹаст ә ԝар хԝәйе һәр тьшти йә, ле һʹәта кӧ әԝ зарʹ ә, жь хӧлам щӧдә набә, 2 чьмки әԝ бьн дәсте рʹебәр у бәрдәстийед маледа йә, һʹәта ԝи ԝәхте кӧ баве кʹьфш кьрийә. 3 Бь ԝи щурʹәйи, гава әм зарʹ бун, әм жи хӧламед ньһерʹандьна ве дьнйайе бун. 4 Ле гава ԝәхте кʹьфшкьри һат, Хԝәде Кӧрʹе хԝә шанд. Әԝ жь кʹӧлфәтәке һатә буйине у бьн ԛанунеда бу, 5 ԝәки кәсед бьн ԛанунеда аза кә, сәва кӧ әм бьбьнә кӧрʹед Хԝәде.

6 Ньһа, чьмки һун кӧрʹед Хԝәде нә, әԝи рʹӧһʹе пироз, кʹижан кӧ Кӧрʹе ԝи стандийә, кьрә дьле мә у әԝ рʹӧһʹ гази дькә: «Абба, Баво!» 7 Ләма тӧ ида хӧлам нини, ле кӧрʹе Хԝәде йи, у һәрге тӧ кӧрʹе Хԝәде йи, ԝәки ӧса нә әԝе тә бькә ԝаре хԝә.

8 Чахе ԝә һе Хԝәде нас нәдькьр, һун хӧламед хӧданед ԛәлп бун. 9 Ле ньһа гава ԝә Хԝәде нас кьрийә, йан рʹаст бежьм, гава Хԝәде һун наскьрьнә, ида һун чьрʹа дьхԝазьн вәгәрʹьн у диса пәй ньһерʹандьна пʹучʹ йа ве дьнйайе һәрʹьн? 10 Һун һур бь һур дина хԝә дьдьнә рʹожа, мәһа, дәмсала у сала, ԝәки щәжьна дәрбаз кьн. 11 Әз дьтьрсьм, кӧ щәфе мьни бона ԝә бадиһәԝа бә.

12 Бьрано, әз һиви жь ԝә дькьм: Бьбьнә мина мьн, чьмки әз жи бәре мина ԝә бум. Ԝә тʹӧ нәһәԛи ль мьн нәкьрийә. 13 Ле һун заньн кӧ жь бо нәхԝәшийа мьн, щара пешьн мәщал кʹәтә дәсте мьн, ԝәки мьзгинийе бьдьмә ԝә. 14 Чьԛас жи нәхԝәшийа мьн бона ԝә щерʹьбандьн бу, ԝә әз беһӧрмәт нәкьрьм у мьрʹдарʹ* һʹәсаб нәкьрьм. Ле ԝә әз мина мәләкәки Хԝәде, мина Мәсиһ Иса ԛәбул кьрьм. 15 Кʹа әԝ шабуна ԝә? Әз баԝәр ьм кӧ һәрге бьһата стандьне, ԝәйе чʹәʹвед хԝә дәрхьста у бьда мьн. 16 Ижа әз бумә дьжмьне ԝә, кӧ рʹастийе ԝәрʹа дьбежьм? 17 Әԝана хирәт дькьн кӧ ԝә бькʹьшиньнә алийе хԝә, ле нета ԝан нәбаш ә. Әԝана дьхԝазьн ԝә жь мьн бьԛәтиньн, ԝәки һун пәй ԝан һәрʹьн. 18 Һәмьки баш ә гава кәсәк бь нета ԛәнщ дькʹәвә һʹәйра ԝә, у нә тʹәне гава әз тʹәви ԝә мә, ле гава тʹәви ԝә ниньм жи. 19 Зарʹед мьн, һʹәта һун нәбьн мина Мәсиһ, әзе бона ԝә диса еша ӧса бькʹьшиньм, кʹижан кӧ мина санщуйе кʹӧлфәта бәр зарʹеда йә. 20 Хԝазьл әз ньһа щәм ԝә бума у мьн щурʹәки дьн тʹәви ԝә хәбәр да, чьмки әз бона ԝә мьталада мә.

21 Һәла мьнрʹа бежьн, һун, йед кӧ дьхԝазьн бьн ԛанунеда бьн, һун набьһен кӧ Ԛанун чь дьбежә? 22 Мәсәлә, Ньвисаред Пирозда ньвисар ә, кӧ дӧ кӧрʹед Бьраһим һәбун: Йәк жь щарийе бу, йәк жь жьна аза бу. 23 Кӧрʹе кӧ жь щарийе бу, мина һʹәму зарʹа һатә буйине, ле кӧрʹе жьна аза, ль гора соз һатә буйине. 24 Мәʹна ве сәрһатийе әԝ ә: Әв һәр дӧ жьн дӧ пәйман тенә һʹәсабе. Йәк жь ԝан жь Чʹийайе Синайе һатә данине, у ԝерʹа зарʹед хӧлам тенә буйине. Әв пәйман Һащәр ә. 25 Һащәр те һʹәсабе чʹийайе Синайе Әʹрәбьстанеда, у әԝ мина Оршәлима иро йә, чьмки Оршәлим тʹәви зарʹед хԝә хӧламтийеда йә. 26 Ле Оршәлима жорьн аза йә, у әԝ дийа мә йә.

27 Чьмки ньвисар ә: «Һәй кʹӧлфәта безӧрʹәт, йа кӧ зарʹ жерʹа набьн, ша бә! Һәй кʹӧлфәта кӧ санщуйе зарʹанине накʹьшинә, бь шабуне бькә ԛирʹин. Чьмки зарʹед кʹӧлфәта кӧ һатийә һиштьне, жь зарʹед кʹӧлфәта кӧ мере ве һәйә, зедәтьр ьн». 28 Ньһа бьрано, һун жи мина Исһаԛ зарʹед ви сози нә. 29 Чаԝа кӧ һьнге кӧрʹе кӧ мина һʹәму зарʹа һатә буйине, дәстпекьр кӧрʹе кӧ бь сайа рʹӧһʹ һатә буйине, бьзеринә, ньһа жи ӧса йә. 30 Ле Ньвисаред Пироз чь дьбежьн? «Әве щарийе тʹәви кӧрʹе ԝе бәриде дәрхә. Чьмки кӧрʹе щарийе тʹӧ щар тʹәви кӧрʹе жьна аза ԝе нәбә ԝар». 31 Аԝа бьрано, әм нә кӧ зарʹед щарийе нә, ле зарʹед йа аза нә.

5 Мәсиһ әм бона азайа ӧса аза кьрьнә. Ләма ԛайим бьсәкьньн у диса нәкʹәвьнә бьне нире хӧламтийе.

2 Әз Паԝлос, ԝәрʹа дьбежьм: Һәрге һун бенә сьнәткьрьне, жь Мәсиһ тʹӧ кʹар ԝе бона ԝә тʹӧнә бә. 3 Әз диса тиньм бира һәр мере кӧ те сьнәткьрьне, ԝәки әԝ борщдар ә хԝә ль тʹәмамийа Ԛануне бьгьрә. 4 Һәрге һун дьхԝазьн бь сайа Ԛануне рʹаст бенә һʹәсабе, ԝәки ӧса нә һун жь Мәсиһ ԛәтийайи нә, у жь кʹәрәма ԝийә мәзьн дур кʹәтьнә. 5 Ле әм пе рʹӧһʹе Хԝәде бь һʹьзрәт һивийа гӧмана рʹастийе нә, йа кӧ жь баԝәрийе те. 6 Чьмки йәктийа Мәсиһ Исада, нә сьнәткьрьн фәрз ә, нә жи нәсьнәткьрьн, ле йа фәрз баԝәри йә, кʹижан кӧ бь һʹәзкьрьне әʹйан дьбә.

7 Һун рʹьнд дьрʹәвийан! Ижа кʹи рʹийа ԝә гьрт ԝәки һун гӧһдарийа рʹастийе нәкьн? 8 Һинкьрьнед ӧса жь ԝи ниньн, йе кӧ гази ԝә дькә. 9 Һьнә һәвиртьрʹшк тʹәмамийа һәвир һьлтинә. 10 Әз баԝәр ьм кӧ һуне, йед кӧ тʹәви Хӧдан йәктийеда ньн, тьштәки дьн нәфькьрьн. Кәсе кӧ ԝәрʹа чәтьнайа пешда тинә, кʹи жи һәбә, әԝе щәзайе хԝә бьстинә. 11 Бьрано, һәрге мьн һʹәта ньһа һин кьра кӧ сьнәт лазьм ә, ԛә әзе бьһатама зерандьне? Ԝәки ӧса йә мьрьна Иса Мәсиһ сәр стуна щәфе, кәвьре лькʹӧмандьне нинә. 12 Хԝазьл меред кӧ дьхԝазьн сәре ԝә тʹәвльһәв кьн, хԝәха хԝә бьхәсандана.*

13 Бьрано, һун бона азайе һатьнә газикьрьне. Ле тʹәне әве азайе ӧса нәдьнә хәбате, кӧ пәй хԝәстьнед хԝәйи бәдәни һәрʹьн, дәԝсе бь һʹәзкьрьн һәвдӧрʹа хӧламтийе бькьн. 14 Чьмки тʹәмамийа Ԛануне бь ве тʹәмийе те сери: «Мәрьва һʹәз бькә чаԝа тӧ хԝә һʹәз дьки». 15 Ле һәрге һун һәвдӧ дьгәзьн у һәвдӧ дьхԝьн, һаж хԝә һәбьн кӧ һун ԛьрʹа һәвдӧ нәйньн.

16 Ле әз дьбежьм: Бәрдәԝам кьн ль гора рʹебәрийа рʹӧһʹе Хԝәде бьмәшьн, у һуне нәһельн кӧ хԝәстьнед бәдәне ԝә зәфт кьн. 17 Чьмки бәдәна гӧнәкʹар жь бо хԝәстьнед хԝәйә бәдәни мьԛабьли рʹӧһʹ ә, у рʹӧһʹ жи мьԛабьли бәдәна гӧнәкʹар ә. Әԝ һәр дӧ мьԛабьли һәв ьн, ләма жи һун ԝан тьшта накьн, чь кӧ дьхԝазьн бькьн. 18 Хенщи ве йәке, һәрге һун ль гора рʹебәрийа Хԝәде дьмәшьн, һун бьн ԛанунеда ниньн.

19 Кьред бәдәна гӧнәкʹар әшкәрә нә: Зьнекʹари, мьрʹдарʹи, рʹабун-рʹуньштьна шәрми, 20 пʹутпʹарьсти, сербази, дьжмьнати, шәрʹ, кʹӧмрʹәши, һерс, һәврʹьки, дӧтирәти, щӧдәти, 21 һʹәвсуди, сәрхԝәши, кʹефкьрьна бесинор у нәщайиз, у тьштед мина ван. Чаԝа мьн һун бәре һʹьшйар кьрьбун, әз ԝә диса һʹьшйар дькьм: Кәсед кӧ тьштед ӧса дькьн ԝе Пʹадшатийа Хԝәде ԝар нәбьн.

22 Ле бәре рʹӧһʹе пироз әв ә: һʹәзкьрьн, шабун, әʹдьлайи, сәбьр, дьловани, ԛәнщи, баԝәри, 23 шкәстибун,* хԝәгьртьн. Мьԛабьли ван тьшта ԛанун тʹӧнә. 24 Ӧса жи кәсед кӧ пʹара Мәсиһ Иса нә, бәдәна хԝәйә гӧнәкʹар тʹәви тәмед ԝейә хьраб у хԝәстьнед ԝе, стунева мьх кьрьнә.

25 Һәрге әм ль гора рʹебәрийа рʹӧһʹе Хԝәде дьжин, ԝәрен әм ӧса жи бәрдәԝам кьн бь тʹәрбәти ль гора рʹебәрийа рʹӧһʹе Хԝәде бьмәшьн. 26 Бьра әм нәбьнә мәрьвнә хԝәһʹәз, һәврʹа нәкʹәвьнә ләще у һʹәвсудийе һәв нәкьн.

6 Бьрано, һәрге кәсәк беһʹәмде хԝә гавәкә шаш бавежә, һун кӧ алийе рʹӧһʹанида гьһишти нә, хирәт кьн ԝәки ԝи бь нәрми вәгәрʹиньн сәр рʹийа рʹаст. Ле һаж хԝә һәбьн, кӧ һун жи нәйенә щерʹьбандьне. 2 Бәрдәԝам кьн баред һәвдӧ һьлгьрьн, у бь ви щурʹәйи һуне ԛануна Мәсиһ биньн сери. 3 Һәрге кәсәк хԝә дәԝса тьштәки датинә, ле хԝәха тʹӧ тьшт нинә, әԝ хԝәха хԝә дьхапинә. 4 Ле бьра һәр кәс дина хԝә бьдә кьред хԝә, у һьнге әԝе хԝәрʹа ша бә, нә кӧ хԝә бәрамбәри кәсәки дьн кә. 5 Чьмки һәр кәс ԝе баре хԝә һьлгьрә.

6 Хенщи ве йәке, бьра һәр кәсе кӧ бь хәбәра Хԝәде те һинкьрьне, һʹәму тьштед ԛәнщ тʹәви дәрсдаре хԝә пʹарәвәкә.

7 Һаж хԝә һәбьн: Нәфькьрьн кӧ һун дькарьн Хԝәде бьхапиньн, чьмки мәрьв чь дьчинә, ԝе әԝе жи бьчьнә. 8 Йе кӧ бона бәдәна хԝәйә гӧнәкʹар дьчинә, әԝе жь бәдәна хԝәйә гӧнәкʹар мьрьне* бьчьнә. Ле йе кӧ бона рʹӧһʹе Хԝәде дьчинә, әԝе жь рʹӧһʹе Хԝәде жийина һʹәта-һʹәтайе бьчьнә. 9 Ԝәрен әм тʹәрка ԛәнщикьрьне нәдьн, чьмки һәрге әм нәԝәстьн, әме ԝәʹдәда бьчьньн. 10 Дә һʹәта мәщала* мә һәйә, ԝәрен әм һʹәмуйарʹа ԛәнщийе бькьн, илаһи хушк-бьред хԝәйә баԝәрмәндрʹа.

11 Һәла бьньһерʹьн, мьн әв нәʹмә пе дәсте хԝә бь һʹәрфед чьԛас гьр ԝәрʹа ньвисийә!

12 Һʹәмуйед кӧ дьхԝазьн мәрьва хԝәш бен, зоре ль ԝә дькьн кӧ һун бенә сьнәткьрьне. Ле әԝана тʹәне бона ве йәке ӧса дькьн, ԝәки сәва Мәсиһ* нәйенә зерандьне. 13 Чьмки һәла һе йед кӧ тенә сьнәткьрьне жи, хԝә ль Ԛануне нагьрьн. Ле әԝана зоре ль ԝә дькьн кӧ һун бенә сьнәткьрьне, ԝәки пе ԝә пʹайе хԝә бьдьн. 14 Ле әз тʹӧ щар пе тьштәки дьн пʹайе хԝә надьм, хенщи пе Хӧдане мә Иса Мәсиһ, йе кӧ сәр стуна щәфе мьр. Бь сайа мьрьна ԝи, дьнйа бона мьн мьр* у әз жи бона дьнйайе мьрьм. 15 Чьмки сьнәтбун тьштәк нинә, нә жи нәсьнәтбун, ле әʹфринәки тʹәзә фәрз ә. 16 Бьра әʹдьлайи у рʹәʹм сәр ԝан һʹәмуйа бә, йед кӧ ль гора ви ԛәйди дьжин, бәле сәр Исраела Хԝәде бә!

17 Бьра жь вьр шунда тʹӧ кәс зәʹмәте нәдә мьн, чьмки сәр бәдәна мьн дәхмә һәнә, йед кӧ нишан дькьн ԝәки әз хӧламе Иса мә.

18 Бьра Хӧдане мә Иса Мәсиһ пе кʹәрәма хԝәйә мәзьн ԝә кʹәрәм кә бона ви рʹӧһʹи, кʹижани һун дьдьнә кʹьфше. Амин.