НӘʹМА ӘФӘСИЙАРʹА

1 Әз Паԝлос, йе кӧ бь ԛьрара Хԝәде бумә шандийе Мәсиһ Иса, ве нәʹме пирозарʹа дьньвисьм, йед кӧ Әфәседа ньн у йәктийа Мәсиһ Исада амьн ьн:

2 Бьра кʹәрәма мәзьн у әʹдьлайа Баве мә Хԝәде у Хӧдане мә Иса Мәсиһ сәр ԝә бә!

3 Шькьр Хԝәдерʹа, Баве Хӧдане мә Иса Мәсиһрʹа, чьмки әԝи әм, шагьртед Мәсиһ, бь һәр кʹәрәмед рʹӧһʹанийә ль әʹзмана, кʹәрәм кьрьнә. 4 Әԝи әм пешийа дәстпека дьнйайе бьжартьнә, ԝәки әм тʹәви Мәсиһ йәктийеда бьн. Әԝи ӧса кьр, ԝәки әм һʹәзкьрьне бьдьнә кʹьфше у бәр ԝи пироз у беләкʹә бьн. 5 Әԝи ль гора ԛьрара хԝә, пешда әм бь сайа Иса Мәсиһ бьжартьнә у әм кьрьнә кӧрʹед хԝә. 6 Хԝәде ӧса кьр, ԝәки мәрьв пәсьне ԝи бьдьн, чьмки әԝи пе Кӧрʹе хԝәйи дәлал кʹәрәма хԝәйә мәзьн да мә. 7 Бь сайа Кӧрʹе ԝи, әм һатьнә кʹьрʹине у хьлазкьрьне. Бәле, Хԝәде жь дәԝләмәндтийа кʹәрәма хԝәйә мәзьн, сәр һʹиме хуна ԝи гӧнед мә бахшандийә.

8 Хԝәде әв кʹәрәма мәзьн сәр мәда барандийә у һʹәму билани у фәʹмкʹари дайә мә, 9 у бь ве йәке әԝи сӧрʹа пироз йа ԛьрара хԝә мәрʹа әшкәрә кьр. Әв сӧрʹ ль гора ԛьрара ԝи йә у нета ԝи әԝ ә, 10 ԝәки хьлазийа ԝәхте бьжарти һʹәму тьштед ль әʹзмана у сәр рʹуйе әʹрде тʹоп кә, кӧ тʹәви Мәсиһ йәктийеда бьн. Бәле, бь сайа ԝи һʹәму тьшт тенә тʹопкьрьне. 11 Ӧса жи әм тʹәви ԝи йәктийеда ньн у ча ԝар һатьнә кʹьфшкьрьне. Хԝәде әм пешда ль гора ԛьрара хԝә бьжартьнә, чьмки әԝ һәр тьшти ль гора ԛьрара хԝә дькә. 12 Бь ви щурʹәйи ԝе бь сайа мә, кʹижан кӧ йед әʹԝльн бун кӧ гӧмана хԝә данә сәр Мәсиһ, Хԝәдерʹа пәсьн у рʹумәт бе дайине. 13 Ле гава ԝә хәбәра рʹастийе бьһист, ԝә жи гӧмана хԝә ԝи ани. Әв мьзгини дәрһәԛа хьлазбуна ԝә йә. Гава ԝә баԝәр кьр, Хԝәде һун бь рʹӧһʹе пирозә создайи мор кьрьн. 14 Әв рʹӧһʹ, созе* мьлкʹе мә йә. Хԝәде әв йәк кьр, ԝәки бь сайа кʹьрʹине щьмәʹта хԝә бона рʹумәта хԝә хьлаз кә.

15 Ләма жи гава мьн бьһист дәрһәԛа баԝәрийа ԝә һьндава Хӧдан Иса у һʹәзкьрьна ԝә һьндава һʹәму пироза, 16 һьнгева мьн тʹьме бона ԝә шькьри дьда Хԝәде. Әз дӧайед хԝәда һәртʹьм ԝә тиньм бира хԝә. 17 Бьра Баве хԝәйирʹумәт, Хԝәдайе Хӧдане мә Иса Мәсиһ, рʹӧһʹе хԝә бьдә ԝә, кӧ һун билан бьн у тьштед кӧ әԝ әшкәрә дькә, фәʹм кьн. У бьра һун бь ви щурʹәйи занәбуна рʹаст дәрһәԛа ԝи бьстиньн. 18 Хԝәде дьле ԝә* вәкьрийә, ԝәки һун фәʹм кьн кӧ әԝи чь гӧман дайә ԝә, ӧса жи чь дәԝләмәндтийа мәзьн ча мьлкʹ бона пироза һазьр кьрийә, 19 у ԛәԝата ԝи, йа кӧ нав мә баԝәрмәндада әʹйан дьбә, чьԛас мәзьн ә. 20 Әԝи әв ԛәԝат да хәбате гава Мәсиһ жь мьрьне рʹакьр у ль әʹзмана алийе мьле хԝәйи рʹасте да рʹуньштандьне. 21 Әԝи әԝ дани сәр һʹәму сәрԝертийа, һʹӧкӧмәтийа, ԛәԝата, сәрока у ӧса жи сәр һʹәму навед кӧ тенә һьлдане, нә кӧ тʹәне ль ве дьнйайе, ле ӧса жи ль дьнйа кӧ ԝе бе. 22 Хԝәде һәр тьшт кьрә бьн һʹӧкӧме Мәсиһ* у әԝ кьрә сәре щьвате. 23 Әв щьват бәдәна Мәсиһ ә у бь ԝи тʹьжә йә, йе кӧ һәр тьшти тʹьжә дькә.

2 Ӧса жи Хԝәде һун сах кьрьн, гава һун мьри бун шаши у гӧнед хԝәда, 2 йед кӧ ԝә бәре дькьр, чьмки ԝә мина мәрьвед ве дьнйайе дьжит. Ԝә гӧрʹа сәрԝере кӧ ԛәԝата ԝи сәр һәԝайе һәйә, дькьр. Әв һәԝа, демәк рʹӧһʹ, ньһа жи сәр мәрьвед нәгӧһдар һʹӧкӧм дькә. 3 Бәре әм һʹәму мина ԝан бун, йед кӧ ль гора хԝәстьнед хԝәйә гӧнәкʹар у фькьред хԝә һәрәкʹәт дькьн. У мина йед дьн, әм жи жь буйина хԝәва һежайи хәзәба Хԝәде бун. 4 Ле Хԝәдайе кӧ хԝәйе рʹәʹмтийа дәԝләмәнд ә, жь һʹәзкьрьна хԝәйә мәзьн 5 әм бь сайа Мәсиһ сах кьрьн, чахе әм һе гӧнед хԝәда мьри бун. (Һун бь кʹәрәма ԝийә мәзьн һатьнә хьлазкьрьне.) 6 Хенщи ве йәке, әԝи әм, йед кӧ тʹәви Мәсиһ Иса йәктийеда ньн, нә тʹәне сах кьрьн, ле ӧса жи ль әʹзмана тʹәви ԝи данә рʹуньштандьне. 7 Хԝәде әв йәк кьр, ԝәки нава дәмед кӧ ԝе бен, бь мәрʹдани дәԝләмәндтийа кʹәрәма хԝәйә мәзьн мәрʹа, йед кӧ тʹәви Мәсиһ Иса йәктийеда ньн, бьдә кʹьфше.

8 Бь сайа ве кʹәрәма мәзьн һун пе баԝәрийе хьлаз бунә, у әв йәк нә жь ԝә йә, ле пʹешкʹеша Хԝәде йә. 9 Бәле, хьлазбун кьрьнава гьредайи нинә, ԝәки мәʹнийа тʹӧ кәси тʹӧнә бә кӧ пʹайе хԝә бьдә. 10 Әм кʹаред дәсте Хԝәде нә у әԝи әм бь йәктийа тʹәви Мәсиһ Иса әʹфьрандьнә, ԝәки әм кьред ԛәнщ бькьн, йед кӧ Хԝәде пешда сафи кьрьбу, кӧ әм бькьн.

11 Ләма жи биньн бира хԝә, ԝәки ԝәхтәке һун, йед кӧ жь мьләтед дьн ьн, нәсьнәткьри дьһатьнә һʹәсабе алийе ԝан кәсада, йед кӧ бь дәсте мәрьва һатьбун сьнәткьрьне. 12 Һьнге һун бе Мәсиһ бун, хәрибед мьләте Исраел бун, у һун нәдькʹәтьнә нава пәйманед сәр һʹиме соз. Һун ве дьнйайеда бе гӧман у бе Хԝәде бун. 13 Ле ньһа һун тʹәви Мәсиһ Иса йәктийеда ньн. Һун, йед кӧ бәре жь Хԝәде дур бун, бь сайа хуна Мәсиһ незики ԝи бун. 14 Чьмки Мәсиһ әʹдьлайа мә йә. Әԝи дӧ кʹом кьрә йәк у диԝаре кӧ әԝана жь һәвдӧ башԛә дькьрьн, һьлшанд. 15 Әԝи бь сайа бәдәна хԝә, кʹока дьжмьнатийе ани, у Ԛануна кӧ жь тʹәми у ԛәйда бу, бәтал кьр. Әԝи әв йәк кьр, ԝәки жь дӧ кʹомед кӧ тʹәви ԝи йәктийеда ньн, щьмәʹтәкә тʹәзә чекә у әʹдьлайе бинә. 16 У әԝи бь сайа стуна щәфайе дӧ кʹом кьрә щьмәʹтәк, ԝәки әԝана тʹәви Хԝәде ль һәв бен, чьмки әԝи бь мьрьна хԝә кʹока дьжмьнатийе ани. 17 У әԝ һат мьзгинийа әʹдьлайе да ԝә, йед кӧ жь Хԝәде дур ьн у йед кӧ незики ԝи нә. 18 Чьмки бь сайа ԝи, әм һʹәму, демәк һәр дӧ кʹом, дькарьн аза бь рʹӧһʹәки незики Бав бьн.

19 Аԝа һун ида хәлԛ у хәриб ниньн, ле һун бажарван ьн чаԝа пирозед дьн, у нәфәред мала Хԝәде нә. 20 Һун сәр һʹиме шандийа у пʹехәмбәра һатьнә авакьрьне, ле кәвьре сәрәкә* йе ви һʹими Мәсиһ Иса йә. 21 Тʹәмамийа авайи, йа кӧ тʹәви ԝи йәктийеда йә, һʹәму пʹаред хԝәва кӧ һәвва рʹьнд гьредайи нә, мәзьн дьбә у дьбә пʹарьстгәһа пироз бона Йаһоԝа. 22 У чьмки һун тʹәви Мәсиһ йәктийеда ньн, һун жи тʹәви йед дьн тенә авакьрьне кӧ бьбьнә әԝ щи, кʹидәре Хԝәде бь рʹӧһʹе хԝә теда йә.

3 Бона ве йәке, әз Паԝлос, йе кӧ жь бо баԝәрийа хԝә һьндава Мәсиһ Исада у жь бо хатьре ԝә, йед кӧ жь мьләтед дьн ьн, гьрти мә . . . 2 Бәле, бе шьк ԝә бьһистийә кӧ әз һатьмә кʹьфшкьрьне, ԝәки али ԝә бькьм, кӧ һун кʹәрәма Хԝәдейә мәзьн бьстиньн. 3 Чаԝа кӧ мьн бәре кьн ԝәрʹа ньвисибу, Хԝәде мьнрʹа сӧрʹа хԝәйә пироз әшкәрә кьр. 4 Ләма гава һун ве нәʹме бьхуньн, һуне бьвиньн кӧ әз сӧрʹа пироз дәрһәԛа Мәсиһ фәʹм дькьм. 5 Әв сӧрʹ ньсьлед бәрерʹа нәһатә әшкәрәкьрьне, ле ньһа бь сайа рʹӧһʹ шандийед ԝийә пирозрʹа у пʹехәмбәрарʹа һатийә әшкәрәкьрьне. 6 Сӧрʹ әв ә: Кәсед жь мьләтед дьн, йед кӧ мьзгинийе ԛәбул кьн у тʹәви Мәсиһ Иса йәктийеда бьн, ԝе тʹәви мә бьбьнә хԝәйиԝар, у һәвпʹаред бәдәне, ӧса жи тьштед кӧ Хԝәде мәрʹа соз данә, ԝе бьстиньн. 7 Әз жь бо кʹәрәма мәзьн, йа кӧ Хԝәде ча пʹешкʹеш дайә, бумә хьзмәткʹаре ве сӧрʹе. Әԝи әв пʹешкʹеш ль гора ԛәԝата хԝә дайә мьн.

8 Мьнрʹа, йе кӧ нава пирозада жь йе һәри бьчʹук кемтьр ьм,* әв кʹәрәма мәзьн һатә дайине. Әв йәк мьнрʹа һатә дайине, ԝәки әз мьзгинийа дәрһәԛа кʹәрәмед беһʹәсаб, йед кӧ жь Мәсиһ тен, бәла кьм. 9 Бь ви щурʹәйи, әз али һʹәму мәрьва дькьм кӧ әԝана бьвиньн, ԝәки Хԝәдайе кӧ һәр тьшт әʹфьрандийә, чаԝа сӧрʹа пироз, йа кӧ әԝи бь ԛьрʹна вәдьшарт, әшкәрә дькә. 10 Әԝ һәр тьшт бона ве йәке бу, ԝәки ньһа бь сайа щьвате сәрԝерти у һʹӧкӧмәтийед ль әʹзманарʹа биланийа Хԝәде гәләк алийава бе әʹйанкьрьне. 11 Әв йәк ль гора ԛьрара ԝийә һʹәта-һʹәтайе йә, йа кӧ Хӧдане мә Мәсиһ Исава гьредайи йә. 12 Бь сайа Мәсиһ әм дькарьн аза* хәбәр дьн, у пе баԝәрийа мә һьндава ԝи, бона мә рʹе вәбуйә, ԝәки әм незики Хԝәде бьн. 13 Ләма жи әз һиви жь ԝә дькьм кӧ һун жь бо тәнгасийед мьн, йед кӧ әз сәва ԝә дькʹьшиньм, алийе рʹӧһʹанида сьст нәбьн, чьмки әԝ бона рʹумәта ԝә нә.

14 Бона ве мәʹнийе, әз бәр Бав дькʹәвьмә сәр чока, 15 бь сайа кʹижани һәр малбәт сәр әʹзмана у сәр әʹрде һәйә.* 16 Әз дӧа дькьм кӧ Хԝәде бь дәԝләмәндтийа рʹумәта хԝә, ԝә бь ԛәԝата рʹӧһʹе хԝәйи пироз ԛәԝи кә. 17 У әз дӧа дькьм ԝәки бь сайа баԝәрийа ԝә, Мәсиһ дьле ԝәда бьжи у дьле ԝә бь һʹәзкьрьне тʹьжә бә. Бьра һун кʹокед хԝә кʹур бәрʹдьн у сәр һʹиме ԛәԝи бьсәкьньн, 18 ԝәки һун тʹәви һʹәму пироза бь тʹәмами бькарьбьн бәрайе, дьрежайе, бьльндайе у кʹурайе фәʹм бькьн. 19 Ӧса жи бьра һун һʹәзкьрьна Мәсиһ, йа кӧ сәр һәр занәбунерʹа йә, бьзаньбьн, у һуне бь һʹәму һʹӧнӧред Хԝәде тʹьжә бьн.

20 Хԝәде пе ԛәԝата хԝәйә кӧ нав мәда әʹйан дьбә, дькарә жь һʹәму тьштед кӧ әм һиви дькьн йан жи дьфькьрьн, һе зедә бькә. 21 Ләма бьра һʹәта-һʹәтайе нава һʹәму ньсьлада ԝирʹа рʹумәт бе дайине пе щьвате у Мәсиһ Иса. Амин.

4 Ләма әз, кӧ жь бо баԝәрийа хԝә һьндава Хӧдан кәледа мә, һиви жь ԝә дькьм, ԝәки һун һежайи газикьрьна хԝә бьжин. 2 Һәр гав мьлук бьн, шкәсти бьн,* бь сәбьр бьн у бь һʹәзкьрьне һәвдӧ тәйах кьн. 3 Бь сайа рʹӧһʹе пироз һун бунә йәк. Ләма жи әʹдьлайеда бьн у хирәт кьн кӧ һун йәктийеда бьминьн. 4 Бәдән йәк ә, рʹӧһʹ йәк ә, у гӧман жи йәк ә, йа кӧ ԝә станд чахе һун һатьнә газикьрьне. 5 Хӧдан йәк ә, баԝәри йәк ә, ньхӧмандьн* йәк ә, 6 Хԝәде йәк ә у Баве һʹәмуйа йә. Әԝ сәр һʹәмуйарʹа йә, пе һʹәмуйа һәрәкʹәт дькә у нав һʹәмуйада йә.

7 Аԝа кʹәрәма мәзьн мә һәр йәкирʹа ӧса һатә дайине, чаԝа Мәсиһ әв бәла кьр. 8 Чьмки те готьне: «Гава әԝ һьлкʹьшийа жоре, әԝи мәрьвед дил тʹәви хԝә бьр, у мәрьв ча пʹешкʹеш дан. 9 Ле әв гьли «әԝ һьлкʹьшийа» чь те һʹәсабе, нә әв те һʹәсабе, ԝәки әԝ пешийе дакʹәтьбу жере сәр әʹрде? 10 Йе кӧ дакʹәтә жере һәма әԝ бу, йе кӧ һьлкʹьшийа жоре у сәр һʹәмуйед ль әʹзманарʹа йә, ԝәки һәр тьшт бь сайа ԝи тʹәмам бә.

11 У әԝи һьнә кәс ча шанди дан, һьнәк ча пʹехәмбәр, һьнәк ча мьзгинван, һьнәк жи ча шьван у дәрсдар. 12 Әԝи ӧса кьр кӧ пироза рʹаст кә,* ԝәки әԝана кәсед дьнрʹа бәрдәстийе бькьн у бәдәна* Мәсиһ ԛәԝи кьн. 13 Әԝана ԝе ӧса бькьн, һʹәта кӧ әм гьшк баԝәрийеда у занәбуна рʹастда йа дәрһәԛа Кӧрʹе Хԝәде, бьбьнә йәк, бьбьнә мәрьвнә гьһишти у ԝәкә Мәсиһ бь тʹәмами гьһишти бьн. 14 Аԝа әм гәрәке ида мина зарʹа нибьн, йед кӧ ча бежи жь пʹелед аве вьрда-ԝеда дькʹәвьн, у бәр байе һәр һинкьрьнәке дькʹәвьн пе дәрәԝед мәрьва, йед кӧ бь фелбази дьхапиньн у дьхальфиньн. 15 Әм гәрәке рʹастийе бежьн у һʹәзкьрьне бьдьнә кʹьфше. Бь ви аԝайи әме һәр алийава гьһишти бьн, у тʹәви Мәсиһ, йе кӧ сәре бәдәне йә, йәктийеда бьмәшьн. 16 Бь сайа ԝи, һʹәму әндәмед бәдәне һәврʹа рʹьнд гьредайи нә у чаԝа лазьм ә пе щурʹә-щурʹә мовька һәвкʹарийе дькьн. Гава һәр әндәме бәдәне рʹаст һәвкʹарийе дькә, бәдән нав һʹәзкьрьнеда рʹьнд мәзьн дьбә.

17 Ләма жи әз бь наве Хӧдан ве йәке ԝәрʹа дьбежьм у тʹәмийе дьдьмә ԝә: Ида ль гора фькьред мьләтед дьнә пʹучʹ у бәтал нәжин. 18 Һʹьше ԝан тәʹрийеда йә у жь жийина кӧ Хԝәде дьдә, дур кʹәтьнә, чьмки нахԝазьн Хԝәде нас кьн у дьле ԝан һʹьшк буйә. 19 Ԝана шәрма рʹуйе хԝә ӧнда кьрийә, хԝә данә рʹабун-рʹуньштьна рʹобәти,* у һәр щурʹә һʹәрамийе дькьн у пе тʹер набьн.

20 Ле һун пеһʹәсийанә кӧ Мәсиһ йәки ӧса нинә, 21 һәмьки һәрге ԝә гӧһ дайә Иса у жь ԝи һин бунә, чьмки рʹасти Исада йә. 22 Һун һин бунә кӧ гәрәке мәрьве кәвьн, кʹижан кӧ ль гора жийина ԝәйә бәре йә у бь хԝәстьнед хапинок те хьрабкьрьне, жь хԝә бехьн. 23 У һун гәрәке һәртʹьм һʹьш-аԛьле* хԝә ну кьн, 24 у мәрьве ну ль хԝә кьн, кʹижан кӧ ль гора ԛьрара Хԝәде, сәр һʹиме рʹастийе у амьнийе һатийә чекьрьне.

25 Ләма жи, гава ԝә тʹәрка дәрәԝийе дайә, һәвдӧрʹа рʹастийе бежьн, чьмки әм әндәмед бәдәнәке нә. 26 Һәрге һун һерс кʹәвьн жи, гӧнә нәкьн. Пешийа кӧ рʹо һәрʹә ава, бьра һерса ԝә дәрбаз бә. 27 Мәщале нәдьнә* Мире-щьна, ԝәки сәр ԝә һʹӧкӧм кә. 28 Бьра йе кӧ дьзийе дькә, ида дьзийе нәкә. Ле бьра әԝ һʹәлал бь дәсте хԝә бьхәбьтә, шьхӧләки ԛәнщ бькә, ԝәки тьштәки ԝи һәбә кӧ бькарьбә бьдә бәләнгаза. 29 Бьра гьлики хьраб жь дәве ԝә дәрнәкʹәвә, ле тʹәне тьштед баш бежьн, кʹижан кӧ ԛәԝи дькьн. Бь ви аԝайи, кәсед кӧ гьлийед ԝә дьбьһен ԝе кʹаре бьстиньн. 30 Ӧса жи рʹӧһʹе Хԝәдейи пироз хәмгин нәкьн, пе кʹижане һун һатьнә моркьрьне, бона рʹожа азабуне бь сайа һәԛе кʹьрʹине.

31 Һәр щурʹә кʹине, һерсе, хәзәбе, ԛарʹә-ԛарʹе, гьлийед беһӧрмәти у һʹәму щурʹә хьрабийе жь хԝә дур хьн. 32 Ле һьндава һәвда ԛәнщ у дьлшәԝат бьн. Чаԝа Хԝәде бь сайа Мәсиһ бь дьл бахшандийә ԝә, һун жи бь дьл бьбахшиньнә һәв.

5 Ләма чʹәʹв бьдьнә Хԝәде, чаԝа зарʹед һʹәзкьри. 2 Һун жи мина Мәсиһ бәрдәԝам кьн сәр рʹийа һʹәзкьрьне бьмәшьн. Әԝи әм* һʹәз кьрьн у әʹмьре хԝә бона мә да чаԝа пʹешкʹеш у ԛӧрбанәкә бинхԝәш Хԝәдерʹа.

3 Бьра бәʹса зьнекʹарийе,* һәр щурʹә мьрʹдарʹийе йан тьмайе нав ԝәда ԛә нәйе кьрьне жи, чьмки әв йәк нә лайиԛи пироза йә. 4 Ӧса жи бьра рʹабун-рʹуньштьна шәрми, хәбәрдана бефәʹми йан жи һʹәнәкед хьраб, нав ԝәда тʹӧнә бьн, ле дәԝсе шькьрийе бьдьнә Хԝәде. 5 Чьмки һун рʹьнд заньн, әре һун рʹьнд фәʹм дькьн, ԝәки йе кӧ зьнекʹарийе дькә, йе кӧ тьштед мьрʹдарʹ дькә, йе чʹәʹвбьрʹчи, демәк пʹутпʹарьст, ԝе Пʹадшатийа Мәсиһ у Хԝәдеда тʹӧ ԝар нәстинә.

6 Бьра тʹӧ кәс пе готьнед пʹучʹ ԝә нәхапинә, чьмки жь бо ԝан тьшта һерса Хԝәде сәр мәрьвед нәгӧһдар рʹадьбә. 7 Ләма бьра кʹаре ԝә тʹәви ԝан тʹӧнә бә. 8 Чьмки бәре һун тәʹристан бун, ле ньһа һун тʹәви Хӧдане мә рʹонайи нә. Дә ижа бәрдәԝам кьн ча зарʹед рʹонайе бьжин. 9 Чьмки бәре рʹонайе һәр щурʹә ԛәнщи, һәԛи у рʹасти йә. 10 Һәртʹьм һаж кьред хԝә һәбьн, һәла әԝ дьле Хӧдан хԝәш тен йан на. 11 Ида тʹәви кьред тәʹрийейә бекер* нәбьн, дәԝсе әшкәрә нишан кьн кӧ әԝана хьраб ьн. 12 Чьмки бона тьштед кӧ әԝана дьзива дькьн, шәрм ә кӧ мәрьв хәбәр дә жи. 13 Аԝа һʹәму тьштед хьраб бь сайа рʹонайе тенә әшкәрәкьрьне, чьмки һәр тьште кӧ тенә әшкәрәкьрьне, рʹонайи йә. 14 Ләма ӧса те готьне: «Һәй кәсе рʹазайи, һʹьшйар бә у жь нав мьрийа рʹабә! У Мәсиһ ԝе сәр тә шәԝԛ бьдә».

15 Дә ижа бьньһерʹьн кӧ һун нәбьнә мина бефәʹма, ле бьбьнә мина билана. 16 Ԝәʹде хԝә бь щурʹе һәри баш бьдьнә хәбате,* чьмки әм рʹожед хьрабда дьжин. 17 Бона ве йәке, ида мина беаԛьла һәрәкʹәт нәкьн, ле бәрдәԝам кьн тедәрхьн һәла чь йә ԛьрара Йаһоԝа. 18 Ӧса жи бь шәраве сәрхԝәш нәбьн, чьмки сәрхԝәшбун мәрьва бәрбь тьштед хьраб дьбә. Ле бәрдәԝам кьн бь рʹӧһʹе Хԝәде тʹьжә бьн. 19 Дьле һәвдӧ ԛәԝи кьн пе зәбура, пе кʹьламед бона пәсьндайина Хԝәде у пе стьранед рʹӧһʹани. Бь тʹәмамийа дьле хԝә* Йаһоԝарʹа бьстьрен. 20 Һәр гав бона һәр тьшти шькьрийе бьдьнә Бав у Хԝәдайе мә, бь наве Хӧдане мә Иса Мәсиһ.

21 Жь бо ԛәдьре мәзьн һьндава Мәсиһ гӧрʹа һәвдӧ бькьн. 22 Бьра жьн гӧрʹа мере хԝәда бә, чаԝа гӧрʹа Хӧданда йә, 23 чьмки мер сәре жьна хԝә йә, чаԝа Мәсиһ сәре щьвате йә, у хьлазкʹаре ве бәдәне йә.* 24 Бәле, чаԝа кӧ щьват гӧрʹа Мәсиһда нә, гәрәке жьн жи һәр тьштида гӧрʹа мере хԝәда бә. 25 Мерно, бәрдәԝам кьн жьнед хԝә һʹәз бькьн, чаԝа Мәсиһ жи щьват һʹәз кьр, у әʹмьре хԝә бона ԝе бәрва да, 26 ԝәки щьвате бь хәбәра Хԝәде чаԝа бь аве бьшо у пироз кә. 27 Әԝи ӧса кьр, ԝәки щьват бәр ԝи бәдәԝ бә, кӧ тʹӧ ләкʹә, ԛәрчʹьмок йан кемасийа ԝе тʹӧнә бә, ле пироз у беԛьсур бә.

28 Бь ви щурʹәйи жи мер гәрәке жьна хԝә һʹәз бькә, чаԝа бәдәна хԝә һʹәз дькә. Мере кӧ жьна хԝә һʹәз дькә, хԝә жи һʹәз дькә, 29 чьмки тʹӧ мер бәдәна хԝә нәфрʹәт накә, ле әԝ тʹер дькә у рʹьнд ле хԝәй дькә, чаԝа Мәсиһ жи щьвате хԝәй дькә, 30 чьмки әм әндәмед бәдәна ԝи нә. 31 «Ләма жи, мер ԝе де у баве хԝә бьһелә у тʹәви жьна хԝә бьжи, у һәр дӧ ԝе бьбьнә йәк».* 32 Әв сӧрʹа пироз мәзьн ә. Әз ньһа дәрһәԛа Мәсиһ у щьвате хәбәр дьдьм. 33 Бәле, һәр йәк жь ԝә гәрәке жьна хԝә ӧса һʹәз бькә чаԝа хԝә һʹәз дькә, ле жьн жи бьра бь дьл ԛәдьре мере хԝә бьгьрә.

6 Зарʹно, гӧрʹа де-баве хԝәда бьн, чьмки әв йәк ль гора ԛьрара Хӧдан ә у рʹаст ә. 2 «Ԛәдьре де у баве хԝә бьгьрә», әва тʹәмийа пешьн ә тʹәви ви сози: 3 «Ԝәки һʹале тә баш бә у сәр рʹуйе әʹрде әʹмьре тә дьреж бә». 4 У һун бавно, зарʹед хԝә һерс нәехьн, ле ль гора ширәткьрьн у рʹебәрийа Йаһоԝа ԝана һин кьн.

5 Хӧламно, чаԝа кӧ һун бь ԛәдьр у тʹәмамийа дьле хԝә гӧрʹа Мәсиһда ньн, гӧрʹа ахайед хԝәда бьн жи. 6 Бьра һун нә жь бо ве йәке гӧһдар бьн кӧ мәрьв ԝә бьвиньн у һун дьле ԝан хԝәш бен, ле бьра һун мина хӧламед Мәсиһ гӧһдар бьн у бь тʹәмамийа дьле хԝә ԛьрара Хԝәде биньн сери. 7 Бь дьл у щан хьзмәт кьн, чаԝа бона Йаһоԝа, нә кӧ бона мәрьва. 8 Чаԝа кӧ һун заньн, фьрԛи тʹӧнә кӧ кәсәк хӧлам бә йан жи аза бә, һәр ԛәнщийа кӧ ԝи кьрьбә, Йаһоԝа ԝе ль ԝи вәгәрʹинә. 9 У һун жи ахано, һьндава хӧламед хԝәда ӧса бьн у тьрса хԝә нәкьнә сәр ԝан, чьмки һун заньн кӧ Ахайе ԝан у йе ԝә ль әʹзмен ә, у әԝ фьрԛийе накә нава мәрьва.

10 Һәйнәсәр, бьра Хӧдан ԝә бь ԛәԝата хԝәйә мәзьн ԛәԝи кә. 11 Һʹәму чʹәкед Хԝәде ль хԝә кьн, ԝәки һун нәкʹәвьнә тʹәлькед Мире-щьна. 12 Чьмки әм нә кӧ мьԛабьли мәрьва* шәрʹ дькьн, ле мьԛабьли сәрԝерти, һʹӧкӧмәти, сәрԝеред ве дьнйа тәʹри, демәк мьԛабьли рʹӧһʹед хьрабә ль әʹзмана. 13 Бона ве йәке, һʹәму чʹәкед Хԝәде ль хԝә кьн, ԝәки һун бькарьбьн ль рʹожа кӧ дьжмьн һʹьщуми сәр ԝә бькә,* мьԛабьли ԝи бьсәкьньн. У гава һун ван һʹәму тьшта бькьн, һуне бькарьбьн ԛәԝи бьсәкьньн.

14 Дә ижа ԛәԝи бьсәкьньн, пьшта хԝә бь ԛайиша рʹастийе гьредьн, зьрьһʹа рʹастийе ль хԝә кьн, 15 солед мьзгинийа әʹдьлайе пʹекьн у һазьр бьн ве мьзгинийе бәла кьн. 16 Хенщи ԝе йәке мәртʹала мәзьн йа баԝәрийе бьгьрьн, ԝәки бькарьбьн һʹәму тиред агьри йед Мире-щьна* бьтәмьриньн. 17 Ӧса жи кʹӧмзьрьһʹа хьлазбуне бькьнә сәре хԝә, у шуре рʹӧһʹ, демәк хәбәра Хԝәде һьлдьн. 18 Бәрдәԝам кьн бь һәр щурʹә дӧа у дьрозга, һәр дәрәщада бьн һʹӧкӧме рʹӧһʹе пирозда дӧа бькьн. Ләма һʹьшйар бьминьн у бона һʹәму пироза Хԝәдерʹа дӧа-дьрозга бькьн. 19 У бона мьн жи дӧа бькьн, ԝәки гава әз дәве хԝә вәкьм, бькарьбьм гьлийед рʹаст бежьм. Бь ви щурʹәйи әзе бькарьбьм бь дьләки ԛәԝи хәбәр дьм у сӧрʹа пирозә мьзгинийе бьдьмә бьһистьне. 20 Хԝәде әз шандьм кӧ ве мьзгинийе бәла кьм, бона чь жи әз бь зьнщира һатьмә гьредане. Дӧа бькьн, ԝәки әз бь дьләки ԛәԝи у бь мерхаси хәбәр дьм, чаԝа кӧ гәрәке бькьм.

21 Сәва һун һаж мьн у һʹале мьн һәбьн, Тьхико, бьраки дәлал у хьзмәткʹаре амьн йе Хӧдан, ԝе һʹәму тьшти ԝәрʹа бежә. 22 Әз ԝи дьшиньм бал ԝә кӧ һун бьзаньбьн һʹале мә чь йә, у ԝәки әԝ бәр дьле ԝәда бе.

23 Бьра әʹдьлайи, һʹәзкьрьн у баԝәрийа жь Баве мә Хԝәде у жь Хӧдан Иса Мәсиһ тʹәви бьра бә! 24 Бьра кʹәрәма мәзьн тʹәви һʹәму кәса бә, йед кӧ бь һʹәзкьрьна кӧ хьлаз набә Хӧдане мә Иса Мәсиһ һʹәз дькьн!