НӘʹМА ФИЛИПИЙАРʹА

1 Әз Паԝлос у Тимотʹейо, хӧламед Мәсиһ Иса, ве нәʹме һʹәму пирозед ль Филипйайерʹа, йед кӧ шагьртед Мәсиһ Иса нә, у һʹәму бәрпьрсийар* у бәрдәстийед щьватерʹа дьньвисьм:

2 Бьра кʹәрәма мәзьн у әʹдьлайа жь Баве мә Хԝәде у жь Хӧдан Иса Мәсиһ сәр ԝә бә!

3 Әз һәр гав шькьрийе дьдьмә Хԝәдайе хԝә, чахе ԝә тиньм бира хԝә 4 һәр дӧа-дьрозгед хԝәда. Әз һәр гав бона ԝә бь шабуне дӧа дькьм, 5 чьмки жь рʹожа кӧ ԝә мьзгини бьһист һʹәта ньһа, һун бона шьхӧле бәлакьрьна мьзгинийе кʹомәке дьдьн. 6 Әз баԝәр ьм ԝәки Хԝәдайе кӧ дәстпекьр шьхӧле ԛәнщ нав ԝәда бькә, ԝе һʹәта рʹожа Мәсиһ Иса ԝи шьхӧли бинә сери. 7 Мәʹнийед мьн һәнә кӧ әз дәрһәԛа ԝә ӧса бьфькьрьм, чьмки һун дьле мьнда ньн. Һун һʹале мьни гьртида пьштгьрийа мьн дькьн, ӧса жи аликʹарийе дьдьн кӧ мьзгини бе пʹарастьне у бь ԛануни изьн бе стандьне кӧ мьзгинийе бәла кьн. Бь ви щурʹәйи һьм әз, һьм жи һун жь кʹәрәма Хԝәдейә мәзьн кʹаре дьстиньн.

8 Хԝәде шәʹдә йә кӧ әз чьԛас дьхԝазьм ԝә һʹәмуйа бьвиньм.* Чаԝа кӧ Мәсиһ Иса ԝә һʹәз дькә, әз жи ԝә ӧса һʹәз дькьм. 9 Әз һәр гав дӧа дькьм кӧ һʹәзкьрьна ԝә тʹәви занәбуна рʹаст у фәʹмкьрьна кʹур һе зедә у зедә бә, 10 ԝәки һун дина хԝә бьдьнә тьштед дьһа фәрз у һʹәта рʹожа Мәсиһ бекемаси бьминьн у нәбьнә сәбәбе лькʹӧмандьна кәсед дьн. 11 Ӧса жи әз дӧа дькьм, кӧ һун бь сайа Иса Мәсиһ бь бәре рʹастийе тʹьжә бьн, бона рʹумәт у пәсьне Хԝәде.

12 Бьрано, әз дьхԝазьм кӧ һун бьзаньбьн, ԝәки чь кӧ һатә сәре мьн, әԝе йәке дьһа кʹар да пешдачуйина мьзгинийе. 13 Чьмки нобәдаред Императоре Рʹоме у һʹәму кәсед дьн жи бьһистьнә, ԝәки әз бона хатьре Мәсиһ һатьмә гьртьне. 14 Ньһа жь бо һʹале мьни гьрти, дьле гәләк бьред кӧ Хӧданрʹа хьзмәт дькьн, дьһа ԛәԝи буйә. У әԝана һе зедә бь мерхаси у бе тьрс дәрһәԛа хәбәра Хԝәде гьли дькьн.

15 Рʹаст ә һьнә кәс мьзгинийа дәрһәԛа Мәсиһ жь бо һʹәвсуди у һәврʹькийе бәла дькьн, ле йед дьн мьзгинийе бь нетәкә баш бәла дькьн. 16 Әԝана дәрһәԛа Мәсиһ жь һʹәзкьрьне хәбәр дьдьн, чьмки заньн кӧ әз бона пʹарастьна мьзгинийе һатьмә кʹьфшкьрьне. 17 Ле кәсед кӧ мьн пешийе бәʹса ԝан кьр, бь нетәкә хьраб мьзгинийе бәла дькьн. Ви һʹале мьни гьртида, әԝана дьхԝазьн тәнгасийед мьн зедә кьн. 18 Ле ахьрийа ве йәке чь йә? Фьрԛи тʹӧнә нет баш ә йан хьраб ә, йәкә хәбәра дәрһәԛа Мәсиһ те бәлакьрьне. Әз ве йәкерʹа ша мә у әзе диса жи ша бьм. 19 Чьмки әз заньм кӧ бь дӧа-дьрозгед ԝә у бь аликʹарийа рʹӧһʹе Иса Мәсиһ, әзе хьлаз бьм. 20 Әз баԝәр ьм у гӧмана мьн һәйә кӧ әзе тʹӧ тьштида шәрми нәбьм, диса бькарьбьм бь мерхаси хәбәр дьм, у ча һәр гав Мәсиһ рʹумәт кьм. Әз бьжим йан бьмьрьм жи, әзе диса жи ԝи рʹумәт кьм.

21 Һәрге әз бьжим, әзе бона Мәсиһ бьжим, у һәрге әз бьмьрьм жи, әв бона кʹара мьн ә. 22 Һәрге әз ве бәдәнеда бәрдәԝам кьм бьжим, хьзмәтийа мьн дькарә һе зедә бәр бьдә. Ле әз әшкәрә накьм кӧ мьне чь бьхԝәста бьжбарта. 23 Әз кʹәтьмә ортʹа дӧ кәвьра, чьмки әз дьхԝазьм жь ве бәдәне аза бьм, ԝәки тʹәви Мәсиһ бьм, чь жи дьһа баш ә, 24 ле бона ԝә дьһа кʹар ә, кӧ әз ве бәдәнеда сах бьминьм. 25 Әз ве йәкеда баԝәр ьм, у заньм кӧ әзе тʹәви ԝә һʹәмуйа бьминьм, ԝәки һун хьзмәтийа Хԝәдеда пешда һәрʹьн у баԝәрийа хԝәда ша бьн. 26 У гава әз диса бемә бал ԝә, шабуна ԝә ԝе һе зедә бә, чьмки һун шагьртед Мәсиһ нә.

27 Бьра рʹабун-рʹуньштьна* ԝә һежайи мьзгинийа дәрһәԛа Мәсиһ бә, ԝәки әз бем йан нәйем жи, дәрһәԛа ԝә тьштед ԛәнщ бьбьһем у бьзаньбьм кӧ һун ԛәԝи сәкьни нә, нета ԝә йәк ә у һун мьл бь мьл тʹәвайи шьхӧл дькьн, ԝәки баԝәрийа хԝәйә һьндава мьзгинийеда хԝәй кьн. 28 Тʹӧ щар дьжмьнед хԝә нәтьрсьн. Әв йәк кӧ һун натьрсьн, избати йә ԝәки әԝана ԝе ԛьрʹ бьн, ле һуне хьлаз бьн. Әв избати жь Хԝәде те. 29 Чьмки ԝә ԛәдьр стандийә, кӧ нә тʹәне баԝәрийа хԝә Мәсиһ биньн, ле ӧса жи бона ԝи щәфе бькʹьшиньн. 30 Һун һәма ԝан тәнгасийа дькʹьшиньн, кʹижан кӧ мьн дькʹьшанд, у чаԝа кӧ һун ньһа заньн, әз һʹәта ньһа жи ԝан тәнгасийа дькʹьшиньм.

2 Чь жь дәсте ԝә те бькьн, ԝәки һун бь сайа Мәсиһ дьле һәв ԛәԝи кьн. Бь һʹәзкьрьне дьл бьдьнә һәв, бона һәв хәм бькьн,* бь дьл һәв һʹәз бькьн у дьлшәԝат бьн. 2 Һәрге һун ӧса бькьн, һуне дьле мьн гәләк ша кьн. Йәктийеда бьжин, һәв һʹәз бькьн, фькьр у кьред хԝәда бь тʹәмами бьбьнә йәк. 3 Тьштәки бь һәврʹькийе нәкьн, у хԝәһʹәз нибьн, ле мьлук бьн у кәсед дьн сәр хԝәрʹа бьгьрьн. 4 Тʹәне кʹара хԝә нәгәрʹьн, ле кʹара кәсед дьн жи бьгәрʹьн.

5 Бьра нет-фькьред ԝә мина йед Мәсиһ Иса бьн: 6 Рʹаст ә әԝ сурәте Хԝәде бу, ле ԛә нәдьфькьри кӧ бьбә ԝәкә Хԝәде. 7 Дәԝсе әԝи тʹәрка һәр тьшти да, һазьр бу бьбә мина хӧлам, у бу мәрьв. 8 Хенщи ԝе йәке, гава әԝ бу мәрьв, әԝи хԝә ньмьз кьр у гӧһдар бу һʹәта мьрьне, бәле һʹәта мьрьна сәр стуна щәфе жи. 9 Бона ве йәке, Хԝәде әԝ һе бьльнд кьр, у навәки кӧ сәр һʹәму наварʹа йә, да ԝи. 10 Хԝәде ӧса кьр, ԝәки бәр наве Иса һәр кәс чок бьдә, һәрге ль әʹзмен бә, сәр рʹуйе әʹрде бә у бьн әʹрде бә. 11 Һәр кәс* гәрәке әшкәрә бежә кӧ Иса Мәсиһ Хӧдан ә, бона рʹумәта Баве мә Хԝәде.

12 Хушк-бьред дәлал, чаԝа кӧ һун һәр гав гӧһдар бунә, нә кӧ тʹәне гава әз бал ԝә мә, ле һәла һе ньһа жи, гава әз бал ԝә ниньм, бәрдәԝам кьн ве йәке бь тьрс у ләрьзандьне бькьн, ԝәки хьлаз бьн. 13 Йе кӧ ԝә ԛәԝи дькә Хԝәде йә, у әԝ һьм хԝәстьн һьм жи ԛәԝате дьдә ԝә, ԝәки һун дьле ԝи ша кьн. 14 Һәр тьшти бе газьн у бе шәрʹ-дәʹԝ бькьн, 15 ԝәки һун бьбьнә зарʹед Хԝәдейә бесущ у һʹәлал. Һәрге һун беләкʹә бьминьн, һуне нав ви ньсьле хьраб у жь рʹийа хԝә дәркʹәти, мина рʹонайикә ԛәԝи шәԝԛ бьдьн. 16 Хԝә ԛайим ль хәбәра жийине бьгьрьн. Һьнге рʹожа Мәсиһда мәʹнийа мьн ԝе һәбә кӧ әз ша бьм, чьмки әзе бьзаньбьм кӧ щәфа у хирәта мьн бадиһәԝа нибу. 17 У һәрге әз мина пʹешкʹеша рʹьжандьне сәр ве ԛӧрбана кӧ һун бона баԝәрийа хԝә тиньн, бемә рʹетьне жи, әз ша мә у тʹәви ԝә һʹәмуйа ша дьбьм. 18 Ӧса жи һун гәрәке ша бьн, тʹәви әшԛа мьн бьн.

19 Әз гӧман ьм кӧ Хӧдан Иса ԝе изьне бьдә, ԝәки әз зутьрәке Тимотʹейо бьшиньмә бал ԝә. Бь ви щурʹәйи ԝе дьле мьн рʹьһʹәт бә, гава әз һʹале ԝә пебьһʹәсьм. 20 Тʹӧ кәсе мьн мина ԝи тʹӧнә, йе кӧ ԝе бь дьл у щан бона ԝә хәм бькә. 21 Чьмки һʹәму кәсед дьн тʹәне кʹара хԝә дьгәрʹьн, нә кӧ кʹара Иса Мәсиһ. 22 Ле һун заньн кӧ Тимотʹейо рʹьнд избат кьр, ԝәки әԝ нә йәки ӧса йә. Чаԝа зарʹ тʹәви баве хԝә, ӧса жи әԝи тʹәви мьн бь дьл у щан хьзмәт дькьр, ԝәки мьзгинийе бәла кә. 23 Ләма әз гӧман ьм кӧ әзе ԝи бьшиньм бал ԝә, гава бьзаньбьм кӧ һʹале мьн ԝе ча бә. 24 Ле әз баԝәр ьм кӧ Хӧдан ԝе изьне бьдә, ԝәки әз хԝәха жи зутьрәке бемә бал ԝә.

25 Ле ньһа лазьм ә кӧ әз Епафродито бьшиньм бал ԝә. Әԝ бьре мьн ә, һәвалкʹаре мьн ә у мина мьн әскәре Мәсиһ ә. Әԝи чаԝа хәбәрбеж у бәрдәсти ԝәрʹа хьзмәт кьрийә, кӧ али ԝә бькә. 26 Әз ԝи дьшиньм, чьмки әԝ гәләк дьхԝазә ԝә гьшка бьвинә. Әԝ гәләк хәмгин ә, чьмки ԝә бьһистьбу кӧ әԝ нәхԝәш кʹәтьбу. 27 Нәхԝәшийа ԝи һаԛас хьраб бу, кӧ һьндьк мабу әԝ бьмьра. Ле Хԝәде нә кӧ тʹәне ль ԝи һатә рʹәʹме, ле ль мьн жи, ԝәки сәр дәрдед мьнда дәрдәки дьн жи зедә нәбә. 28 Ләма әзе ԝи зу бьшиньмә бал ԝә, ԝәки һун бь дитьна ԝи диса ша бьн, у һьнге хәмед мьн ԝе кем бьн. 29 Чаԝа кӧ һун шагьртед Хӧдан ԛәбул дькьн, ԝи жи бь әшԛ у дьл ԛәбул кьн у мәрьвед мина ԝи ԛимәт кьн, 30 чьмки һьндьк мабу әԝ бона шьхӧле Мәсиһ бьмьра. У чьмки һун кʹеләка мьн нибун у ԝә нькарьбу али мьн бькьра, әԝи әʹмьре хԝә бона мьн кьрә бьн хофе.

3 Һәйнәсәр бьрано, бь Хӧдан тʹьме ша бьн. Бона мьн зәʹмәт нинә кӧ әз диса ԝан тьшта ԝәрʹа бьньвисьм, чьмки әв йәк бона бехофийа ԝә йә.

2 Хԝә жь мәрьвед һʹәрам* дур бьгьрьн. Хԝә жь кәсед кӧ зьраре дьдьн, дур бьгьрьн. Хԝә жь кәсед кӧ бәдәне бьриндар дькьн,* дур бьгьрьн. 3 Чьмки йед рʹаст сьнәткьри, әм ьн, йед кӧ бьн рʹебәрийа рʹӧһʹе Хԝәде хьзмәтийа пироз дькьн, у әм пе Мәсиһ Иса фьрнаԛ дьбьн у гӧмана мә сәр бәдәне* нинә, 4 ле рʹаст бежьм мәʹни һәнә, кӧ әз гӧмана хԝә бьдьмә сәр бәдәне.

Һәрге йәк дьфькьрә, кӧ мәʹнийед ԝи һәнә гӧмана хԝә бьдә сәр бәдәне, мәʹнийед мьн һе зедә һәнә. 5 Әз рʹожа һʹәйшта һатьмә сьнәткьрьне. Әз жь мьләте Исраел у жь бәрәка Бьнйамин ьм. Әз Ибрани мә у кӧрʹе Ибранийа мә. Әз Ферьси бум, у мьн һур бь һур хԝә ль Ԛануне дьгьрт. 6 Әз ӧса хирәт бум, кӧ мьн щьват дьзеранд. У әз пеканина рʹастийа Ԛанунеда бекемаси бум. 7 Ле бона хатьре Мәсиһ, әԝ тьштед кӧ бона мьн фәрз бун, ньһа әз беԛимәт* һʹәсаб дькьм. 8 Бь рʹасти гава әз ван һʹәму тьшта бәрамбәри занәбуна ԛимәтә дәрһәԛа Хӧдане мьн Мәсиһ Иса дькьм, әз һʹәму тьштед дьн пʹучʹ у вала* һʹәсаб дькьм. Бона хатьре Мәсиһ, мьн тʹәрка һәр тьшти дайә у әз ԝан тьшта ча гәмар һʹәсаб дькьм, ԝәки тʹәви Мәсиһ йәктийеда бьм, 9 у бьбьмә лайиԛи ԝи. Әз рʹаст темә һʹәсабе, нә бона ве йәке кӧ хԝә ль Ԛануне дьгьрьм, ле бона ве йәке кӧ әз баԝәрийа хԝә Мәсиһ тиньм. Бәле, Хԝәде мә сәр һʹиме баԝәрийе рʹаст һʹәсаб дькә. 10 Нета мьн әв ә кӧ әз Мәсиһ у ԛәԝата кӧ әԝ жь мьрьне рʹакьр, нас бькьм у бьбьмә һәвпʹаре щәфед ԝи. Әз һәла һе жи һазьр ьм кӧ бь мьрьнәкә мина йа ԝи бьмьрьм, 11 сәва кӧ һәрге бе стандьне, әз нав ԝан кәсада бьм, йед кӧ ԝе бәре пешьн жь мьрьне рʹабьн.

12 Мьн әв хәлат һе нәстандийә, у әз һе кʹамьл ниньм. Ле чь жь дәсте мьн те әз дькьм, ԝәки хәлата кӧ Мәсиһ Иса бона мьн бьжартийә, бьстиньм. 13 Бьрано, әз нафькьрьм кӧ мьн әв хәлат ида ԛазанщ кьрийә. Ле ве йәкеда әз баԝәр ьм: Әз тьштед дәрбазбуйи бир дькьм у дина хԝә дьдьмә тьштед пешийа хԝә. 14 Чь жь дәсте мьн те әз дькьм, ԝәки бьгьһижьмә нета хԝә, демәк хәлата жийина әʹзмани бьстиньм, йа кӧ Хԝәде дьдә ԝан мәрьва, гази кʹижана кьрийә бь сайа Мәсиһ Иса. 15 Бәле, ньһерʹандьна мә һʹәмуйа, йед кӧ алийе рʹӧһʹанида гьһишти нә, гәрәке ӧса бә. Һәрге һун бь щурʹәки дьн дьфькьрьн, Хԝәде ԝе ԝәрʹа ньһерʹандьна рʹаст әшкәрә кә. 16 Ле әм бунә мәрьвнә гьһишти, ләма жи ԝәрен әм анәгори ве йәке бәрдәԝам кьн бьмәшьн.

17 Бьрано, ԝе баш бә кӧ һун чʹәʹв бьдьнә мьн у дина хԝә бьдьнә ԝан кәса, йед кӧ анәгори ве мәсәле дьжин, кʹижан кӧ мә ԝәрʹа һиштийә. 18 Чьмки гәләк кәс хԝә дьдьнә кʹьфше ча дьжмьнед стуна щәфе йа Мәсиһ. Бәре мьн гәләк щар бәʹса ԝан дькьр, ле ньһа әз дәрһәԛа ԝан бь һесьр хәбәр дьдьм. 19 Ахьрийа ԝан ԛьрʹбун ә, хԝәдайе ԝан зьке* ԝан ә, әԝана бь кьред хԝәйә шәрми фьрнаԛ дьбьн у тʹәне дәрһәԛа тьштед ве дьнйайе дьфькьрьн. 20 Ле бажарвантийа мә йа әʹзмани йә, у әм гәләк һивийа хьлазкʹаре хԝә, Хӧдан Иса Мәсиһ нә, йе кӧ ль әʹзмана йә. 21 Әԝ ԝе бь ԛәԝата хԝәйә мәзьн, йа кӧ стандийә ԝәки һәр тьшти бькә бьн дәсте хԝә, ԝе бәдәна мәйә сьст бьгӧһезә у бькә мина бәдәна хԝәйә рʹумәт.

4 Бьред мьнә һʹәзкьри, һун шабун у тʹаще сәре мьн ьн, у әз гәләк бира ԝә дькьм. Дәлално, әз жь ԝә рʹәща дькьм, кӧ һун Хӧданрʹа амьн бьминьн.

2 Әз һиви жь Әйодийайе у Синтихайе дькьм, ԝәки хьзмәтийа Хӧданда сәр нетәке бьн. 3 Һәвалкʹаре мьни амьн, әз һиви тә жи дькьм ԝәки тӧ бәрдәԝам ки али ван хушка бьки. Әԝ хушк тʹәви Клемәнс у һәвалкʹаред мьни дьн мьл бь мьл бәлакьрьна мьзгинийеда кʹар дькьрьн. Наве ԝан һʹәмуйа кʹьтеба жийинеда ньвисар ьн.

4 Һәр гав пе Хӧдан* ша бьн. Әз диса дьбежьм: Ша бьн! 5 Бьра сәрԝахтийа ԝә һәр кәсирʹа әшкәрә бә. Бир нәкьн кӧ Хӧдан незик ә. 6 Бона тʹӧ тьшти хәм нәкьн, ле хԝәстьна ԝә бьра бь дӧа-дьрозга, бь рʹазибуне, Хԝәдева әʹйан бә. 7 Һәрге һун ӧса бькьн, әʹдьлайа Хԝәде, йа кӧ сәр фәʹмкьрьна мәрьварʹа йә, ԝе дьл у һʹьше* ԝә бь сайа Мәсиһ Иса бьпʹарезә.

8 Һәйнәсәр бьрано, бәрдәԝам кьн кʹур бьфькьрьн дәрһәԛа ван тьшта чь кӧ рʹаст ьн, фәрз ьн,* бәр чʹәʹве Хԝәде һәԛ ьн, тʹәмьз ьн, һежайи һʹәзкьрьне нә, һежайи һӧрмәте нә, намуси нә у һежайи пәсьндайине нә. 9 Һун жь мьн чь һин бун, ԝә чь станд, чь бьһист у чь дит ԝе йәке бькьн, у һьнге Хԝәдейе әʹдьлайе ԝе тʹәви ԝә бә.

10 Әз гәләк ша мә у шькьрийе дьдьмә Хӧдан, кӧ ԝә диса дәстпекьр бона мьн хәм бькьн. Рʹаст ә ԝә һәр гав бона мьн хәм дькьр, ле мәщала ԝә тʹӧнә бу кӧ һун ве йәке нишан кьн. 11 Готьна мьн әв нинә кӧ әз һʹәԝще тьштәки мә, чьмки әз һин бумә кӧ һʹәму һʹалида бь тьштед кӧ дәсте мьнда һәнә рʹази бьм. 12 Әз тʹӧнәбуне жи заньм, һәбуне жи заньм. Һәр тьштида у һәр һʹалида әз ве сӧрʹе һин бумә, кӧ чаԝа рʹази бьм тʹербунеда йан бьрʹчибунеда, йан һәбунеда йан жи тʹӧнәбунеда. 13 Әз дькарьм бь сайа Хԝәде, йе кӧ ԛәԝате дьдә мьн, һәр тьшти бькьм.

14 Ле диса жи ԝә ԛәнщ кьр, кӧ ԝә тәнгасийед мьнда али мьн кьр. 15 Гәли Филипино, һун хԝәха заньн, кӧ гава ԝә мьзгини бьһист у әз жь Макәдонйайе чум, тʹәне щьвата ԝә кʹомәк дьда мьн. 16 Гава әз Тʹесалоникеда бум, ԝә нә тʹәне щарәке, ле дӧ щара тьштед кӧ әз һʹәԝщә бум, мьнрʹа шандьн. 17 Әз һивийа пʹешкʹеше ниньм. Әз тʹәне дьхԝазьм, ԝәки һун хәлата кӧ жь дайине те, бьстиньн. 18 Ле һʹәму тьштед кӧ мьнрʹа лазьм ьн щәм мьн һәнә, һәла һе зедә жи. Әԝ тьштед кӧ ԝә бь дәсте Епафродито мьнрʹа шандьнә, бәси мьн ьн. Пʹешкʹеша ԝә мина ԛӧрбанәкә бинхԝәш ә, йа кӧ дьле Хԝәде хԝәш те. 19 У Хԝәдайе мьн ԝе жь дәԝләмәндтийа хԝәйә рʹумәт, бь Мәсиһ Иса һәр һʹәԝще ԝә бь тʹәмами рʹази кә. 20 Бав у Хԝәдайе мәрʹа бьра һʹәта-һʹәтайе рʹумәт бе дайине. Амин.

21 Алийе мьнда һʹәму пирозед Хԝәде, йед кӧ йәктийа Мәсиһ Исада ньн, сьлав кьн. Бьред кӧ тʹәви мьн ьн жи ԝә сьлав дькьн. 22 Һʹәму кәсед пироз, илаһи йед жь мала Ԛәйсәр, ԝә сьлав дькьн.

23 Бьрано, бьра кʹәрәма мәзьн йа Хӧдан Иса Мәсиһ сәр ԝә бә, бона рʹӧһʹе кӧ һун дьдьнә кʹьфше. Амин.