НӘʹМА КОЛОСИЙАРʹА

1 Әз Паԝлос, йе кӧ бь ԛьрара Хԝәде бумә шандийе Мәсиһ Иса, тʹәви бьре мә Тимотʹейо 2 ве нәʹме пирозарʹа у бьред амьнрʹа дьньвисьм, йед кӧ йәктийа Мәсиһда ньн у Колосйайеда дьминьн:

Бьра кʹәрәма мәзьн у әʹдьлайа жь Баве мә Хԝәде, сәр ԝә бә!

3 Һәр гав чахе әм бона ԝә дӧа дькьн, әм шькьрийе дьдьнә Хԝәде, Баве Хӧдане мә Иса Мәсиһ. 4 Чьмки мә дәрһәԛа баԝәрийа ԝәйә һьндава Мәсиһ Иса у һʹәзкьрьна ԝә һьндава һʹәму пирозада бьһист. 5 Әв баԝәри у һʹәзкьрьна ԝә һәйә, чьмки гӧмана ԝә һәйә, ԝәки чь кӧ ль әʹзмана бона ԝә те хԝәйкьрьне, һуне бьстиньн. Гава ԝә рʹастийа ве мьзгинийе бьһист, һун дәрһәԛа ве гӧмане пеһʹәсийан. 6 Әԝ мьзгинийа кӧ гьһиштийә ԝә, нав тʹәмамийа дьнйайеда бәла дьбә у бәред баш тинә. Әԝ нав ԝәда жи бәред баш тинә, жь рʹожа кӧ ԝә мьзгини бьһистийә у дәрһәԛа рʹастийа кʹәрәма Хԝәдейә мәзьн пеһʹәсийанә. 7 Әԝе йәке һун пеһʹәсийанә жь һәвал-хӧламе мәйи дәлал Епафрас, йе кӧ бәрдәстийе Мәсиһә амьн ә, у дәԝса мә али ԝә дькә. 8 У әԝи мәрʹа дәрһәԛа һʹәзкьрьна ԝә гьли кьр, йа кӧ бь сайа рʹӧһʹе Хԝәде пешда те.

9 Бона ве йәке, жь рʹожа кӧ мә әв йәк бьһист, мә дәст жь дӧа нәкʹьшандийә. Әм жь Хԝәде һиви дькьн, ԝәки һун занәбуна рʹаст дәрһәԛа ԛьрара ԝи ԛазанщ кьн, ӧса жи һʹәму билани у фәʹмкьрьна рʹӧһʹани. 10 Әм дӧа дькьн кӧ һун ӧса бьжин чаԝа лайиԛи Йаһоԝа йә, у дьле ԝи бь тʹәмами ша кьн, бь ве йәке кӧ һун һәр щурʹә кьред ԛәнщ бькьн у занәбуна хԝә дәрһәԛа Хԝәде зедә кьн. 11 У әм дӧа дькьн, ԝәки Хԝәде пе ԛәԝата хԝәйә мәзьн ԝә ԛәԝи кә, сәва кӧ һун бькарьбьн бь сәбьр у бь шабун тәйах кьн. 12 Бәрдәԝам кьн шькьрийе бьдьнә Бав, йе кӧ һун кьрьнә һежайи ԝар, кʹижан кӧ әԝи пирозарʹа соз дайә, йед кӧ рʹонайеда дьмәшьн.

13 Әԝи әм жь тәʹрийе хьлаз кьрьн у дәрбази пʹадшатийа Кӧрʹе хԝәйи дәлал кьрьн, 14 бь сайа кʹижани әм пе кʹьрʹине һатьнә азакьрьне у гӧнед мә һатьнә бахшандьне. 15 Әԝ сурәте Хԝәде йә, йе кӧ найе дитьне, у ньхӧри йә нав һʹәму әʹфринада. 16 Бь ԝи һʹәму тьштед дьн сәр әʹрде у әʹзмана, йед кӧ тенә дитьне у йед кӧ найенә дитьне, һатьнә әʹфьрандьне: Сәрԝер, сәрок, сәрԝерти йан һʹӧкӧмәти. Һʹәму тьшт бь ԝи у бона ԝи һатьнә әʹфьрандьне. 17 Хенщи ԝе йәке, әԝ пешийа һәр тьшти һәбу у һʹәму тьштед дьн бь ԝи һатьнә әʹфьрандьне. 18 Әԝ сәре бәдәне йә, демәк сәре щьвате. Әԝ дәстпека һәр тьшти йә, у йе пешьн ә кӧ жь мьрьне һатә рʹакьрьне,* ԝәки һәр тьштида бьбә йе пешьн. 19 Хԝәде хԝәш һат кӧ һәр тьшти ԝида тʹәмам кә. 20 У Хԝәде бь ԝи һʹәму тьштед сәр әʹзмана у сәр әʹрде тʹәви хԝә ль һәв анин. Пе хуна Иса, кʹижан кӧ сәр стуна щәфе һатә рʹетьне, әʹдьлайи тʹәви Хԝәде һатә стандьне.

21 Бәре һун жи жь Хԝәде дур бун. Һун дьжмьнед ԝи бун, чьмки фькьред ԝә бь тьштед хьраб тʹьжә бун. 22 Ле ньһа Хԝәде пе мьрьна Исайә бәдәни һун тʹәви хԝә ль һәв анинә. Әԝи әв йәк кьр, ԝәки һун бәр чʹәʹве ԝи ча щьмәʹтәкә пироз, беләкʹә у бесущ бьн. 23 Һәмьки һун гәрәке бәрдәԝам кьн баԝәрийеда һʹимгьрти у ԛәԝи бьминьн. Тʹӧ щара изьне нәдьн, ԝәки гӧмана кӧ ԝә жь бьһистьна мьзгинийе ԛазанщ кьрийә, жь ԝә бе стандьне. Әв мьзгини нав һʹәму мәрьвада һатийә бәлакьрьне, у әз Паԝлос, хьзмәткʹаре ве мьзгинийе мә.

24 Әз ша мә кӧ әз бона ԝә щәфе дькʹьшиньм. Әз заньм кӧ гәрәке диса жи бона бәдәна Мәсиһ, демәк бона щьвате щәфе бькʹьшиньм. 25 Әз ве щьватерʹа хьзмәт дькьм, чьмки Хԝәде бона ԝә әв щабдари дайә мьн, ԝәки әз хәбәра Хԝәде бь дьл у щан бәла кьм, 26 демәк әв сӧрʹа пироз, кʹижан кӧ жь мәрьвед бәре у жь ньсьлед бәре вәшарти бу. Ле ньһа әԝ пирозед Хԝәдерʹа һатийә әшкәрәкьрьне. 27 Хԝәде хԝәст әв сӧрʹа хԝәйә пироз нав мьләтада бьдә әшкәрәкьрьне. Сӧрʹ әԝ ә кӧ Мәсиһ тʹәви ԝә йәктийеда йә у гӧмана ԝә һәйә, кӧ һуне тʹәви ԝи бенә рʹумәткьрьне. 28 Әм дәрһәԛа ԝи мьзгинийе бәла дькьн, рʹебәрийе дьдьнә һәр кәси, биланийа кӧ мә стандийә ԝана һин дькьн, сәва кӧ али һʹәму шагьртед Мәсиһ бькьн, ԝәки әԝана бьбьнә мәрьвнә рʹӧһʹанида гьһишти. 29 Бона ве йәке жи әз гәләк хирәт дькьм, у бәрдәԝам дькьм хԝә бьсперьм ԛәԝата ԝи, йа кӧ нав мьнда әʹйан дьбә.

2 Әз дьхԝазьм ԝәки һун бьзаньбьн кӧ әз зәʹмәтед чьԛас мәзьн дькʹьшиньм бона ԝә у бьред Лаԝдькйайеда, ӧса жи бона һʹәму кәсед дьн, йед кӧ мьн шәхси нас накьн. 2 Әз ве йәке дьбежьм, ԝәки дьле ԝә һʹәмуйа рʹьһʹәт бә у һун һʹәзкьрьнеда незики һәв бьн, у ԝәки баԝәрийа ԝә бь сайа фәʹмкьрьна рʹаст ава бә. Баԝәрикә ӧса кʹәрәма тинә, демәк занәбуна рʹаст дәрһәԛа сӧрʹа пироз йа кӧ Хԝәде дьдә. У әв сӧрʹ Мәсиһ ә. 3 Бь сайа ԝи әм дькарьн һʹәму билани у занәбуна Хԝәде бьвиньн, йед кӧ мина хьзна вәшарти нә. 4 Әз ве йәке дьбежьм, ԝәки тʹӧ кәс бь заре ширьн ԝә нәхальфинә. 5 Рʹаст ә әз бал ԝә ниньм, ле дьле мьн бал ԝә йә. Әз ша мә кӧ нав ԝәда тʹәрбәтийе у баԝәрийа ԛәԝи һьндава Мәсиһда дьвиньм.

6 Аԝа ԝә чаԝа Хӧдан Мәсиһ Иса ԛәбул кьр, ӧса жи бәрдәԝам кьн пәй ԝи һәрʹьн. 7 Кʹокед хԝә кʹур бәрʹдьн, сәр ԝи ава бьн у баԝәрийеда ԛәԝи һʹимгьрти бьн, чаԝа кӧ һун һатьнә һинкьрьне. У һәр гав бона һәр тьшти жь Хԝәде рʹази бьн.

8 Һаж хԝә һәбьн! Бьра тʹӧ кәс бь биланийа ве дьнйайе, йа кӧ сәр һʹиме әʹдәтед мәрьвайә дәрәԝ у пʹучʹ ьн, ԝә нәхапинә. Фькьред ԝан ль гора ньһерʹандьна ве дьнйайе нә, ль гора һинкьрьнед Мәсиһ ниньн. 9 Чьмки Мәсиһ бь тʹәмами хәйсәт-һʹӧнӧред Хԝәдева тʹьжә йә. 10 Һун бь сайа ԝи тʹәмам дьбьн. Әԝ сәр һʹәму сәрԝерти у һʹӧкӧмәтийарʹа йә. 11 У бь ве йәке кӧ һун Мәсиһ баԝәр дькьн, һун һатьнә сьнәткьрьне, ле нә бь дәсте мәрьва. Әв сьнәткьрьн йа Мәсиһ ә, у ԝә жь бәдәна ԝәйә гӧнәкʹар аза дькә. 12 Гава һун мина ԝи һатьнә ньхӧмандьне, һун тʹәви ԝи һатьнә дәфьнкьрьне, чьмки һун тʹәви Мәсиһ йәктийеда ньн у ԝә баԝәрийа хԝә ԛәԝата Хԝәде ани, йе кӧ ԝи жь мьрьне рʹакьр.

13 Хенщи ве йәке, һун бона гӧнед хԝә у бона ве йәке кӧ һун нәсьнәткьри бун, мьри бун, ле Хԝәде һун тʹәви Мәсиһ сах кьрьн. Әԝи бь дьловани һʹәму гӧнед мә бахшандә мә, 14 у ԛануна ньвисар кӧ мьԛабьли мә бу, рʹәсит кьр.* Әԝи әв Ԛанун бь сайа мьрьна Мәсиһә сәр стуна щәфе, бәтал кьр. 15 Әԝи сәрԝерти у һʹӧкӧмәти бьндәст кьр у әшкәрә нишан кьр, кӧ әԝи әԝана бь сайа стуна щәфе бьндәст кьрьнә. Ньһа әԝ ԝана мәша сәркʹәтьнеда дьбә.

16 Ләма бьра тʹӧ кәс ԝәрʹа нәбежә кӧ һун гәрәке чь бьхԝьн йан чь вәхԝьн, йан гәрәке һун хԝә ль щәжьнәке, йан щәжьна һива тʹәзә, йан рʹожа Шәмийе бьгьрьн йан на. 17 Әв һʹәму тьшт сийа ван тьшта нә, йед кӧ ԝе бен у ԝе Мәсиһда бенә сери. 18 Нәһельн ԝәки кәсәки кӧ хԝә мьлук дьдә кʹьфше, йан жи мәләка дьһʹәбинә, хәлата ԝә жь ԝә бьстинә. Кәсе ӧса хԝә тʹәне ль тьштед кӧ әԝи дитьнә дьгьрә, у бь фькьред хԝәйә пʹучʹ пʹайе хԝә дьдә. 19 У әԝ пәй Мәсиһ, йе кӧ сәре мә йә, начә. Мәсиһ әԝ кәс ә, йе кӧ һʹәԝщед тʹәмамийа бәдәне, демәк щьвате рʹази дькә, ԝәки әԝ рʹьнд бьхәбьтә. Бь ԝи тʹәмамийа бәдәне бь пʹәвгьрек у мовька һәвва гьредайи те хԝәйкьрьне у бь ԛәԝата Хԝәде мәзьн дьбә.

20 Һәрге һун тʹәви Мәсиһ мьрьн у жь ньһерʹандьна ве дьнйайе аза бун, ижа һун чьрʹа ӧса дьжин, тебежи һун һе пʹара дьнйайе нә? Һун чьрʹа пәй ԛәйдед дьнйайе дьчьн? Ԛәйдед кӧ ӧса дьбежьн: 21 «Һьлнәдә, тәʹм нәкә, дәсте хԝә нәде!» 22 Әԝа тʹәне тʹәми у һинкьрьнед мәрьва нә дәрһәԛа тьштед кӧ мәри дьхԝьн у вәдьхԝьн, у паше бәтавәдьбьн. 23 Әв ԛәйдә дьбәкә бь билани тенә кʹьфше, у мәрьвед кӧ ль гора ԝан һәрәкʹәт дькьн хԝә ӧса дьдьнә кʹьфше, кӧ йанчь бь мьлукти Хԝәде дьһʹәбиньн. Ле бь рʹасти әԝана дьхԝазьн хԝәха сафи кьн, кӧ чаԝа Хԝәде бьһʹәбиньн. Әԝана бәдәна хԝә щәза дькьн, ле диса жи нькарьн мьԛабьли хԝәстьнед хԝәйә гӧнәкʹар шәрʹ кьн.

3 Аԝа кӧ һун тʹәви Мәсиһ жь мьрьне һатьнә рʹакьрьне, ль тьштед әʹзмани бьгәрʹьн, кʹидәре кӧ Мәсиһ ль мьле Хԝәдейи рʹасте рʹуньшти йә. 2 Бәрдәԝам кьн дәрһәԛа тьштед әʹзмани бьфькьрьн, нә кӧ дәрһәԛа тьштед кӧ сәр әʹрде нә. 3 Чьмки һун мьрьнә, у әʹмьре ԝә Мәсиһрʹа һатийә дайине, йе кӧ тʹәви Хԝәде йәктийеда йә. 4 Гава Мәсиһ, йе кӧ әʹмьре мә йә, рʹумәта хԝә әʹйан кә,* һьнге һуне жи тʹәви ԝи рʹумәтеда әʹйан бьн.

5 Ләма жи һʹәму хԝәстьнед хьраб бькӧжьн: Зьнекʹарийе,* һʹәрамийе, тәме хьраб, хԝәстьнед зьрар, у тьмайе, чь кӧ пʹутпʹарьсти йә. 6 Жь бо ван тьшта хәзәба Хԝәде те. 7 Ԝә жи ԝәхтәке әԝ тьшт дькьрьн у ӧса дьжит. 8 Ле ньһа гәрәке һун тʹәрка ван һʹәму тьшта бьдьн: Хәзәб, һерс, хьраби, гьлийед беһӧрмәти у хәбәрдана нәщайиз. 9 Һәвдӧ нәхапиньн, мәрьве кәвьн кьред ԝива жь хԝә бехьн, 10 у мәрьве ну ль хԝә кьн, кʹижан кӧ бь сайа занәбуна рʹаст те нукьрьне, ԝәки һе зедә бьбә мина Әʹфьрандаре хԝә. 11 Фьрԛи тʹӧнә мәрьв Йунан йан Щьһу бә, сьнәткьри йан нәсьнәткьри бә, хәриб бә, Искит* бә, хӧлам йан жи аза бә, ле Мәсиһ йә һәр тьшт у әԝ һʹәмуйада йә.

12 Аԝа чаԝа бьжартийед Хԝәдейә пироз у һʹәзкьри, һун дьлшәԝатийе, ԛәнщийе, мьлуктийе, нәрмийе у сәбьре ль хԝә кьн. 13 Һәр гав һәвдӧ сәбьр кьн у бь дьл бьбахшиньнә һәв, һәрге жи мәʹнийа ԝәйә газьнкьрьне һәйә. Чаԝа кӧ Йаһоԝа бь дьл бахшандә ԝә, гәрәке һун жи ӧса бьбахшиньнә һәв. 14 Хенщи ван һʹәму тьшта, һʹәзкьрьне ль хԝә кьн, чьмки һʹәзкьрьн мәрьва дькә йәк.

15 Ӧса жи, бьра әʹдьлайа Мәсиһ рʹебәрийе дьле ԝә бькә, чьмки һун чаԝа әндәмед бәдәнәке бона ве әʹдьлайе һатьнә газикьрьне. Тʹьме шекьрдар бьн. 16 Бьра һинкьрьна Мәсиһ дьле ԝә бь тʹәмами тʹьжә кә у биланийе бьдә ԝә. Бәрдәԝам кьн һин кьн у һәвдӧ ԛәԝи кьн бь зәбура, бь пәсьндайина Хԝәдерʹа у бь стьранед шькьрдарийе. Бь тʹәмамийа дьле хԝә* Йаһоԝарʹа бьстьрен. 17 Һәр тьште кӧ һун дькьн у дьбежьн, бь наве Хӧдан Иса бькьн, у бь сайа ԝи шькьрийе бьдьнә Баве мә Хԝәде.

18 Кʹӧлфәтно, гӧрʹа меред хԝәда бьн, чьмки Хӧдан ве йәке дьхԝазә. 19 Мерно, һәр гав жьнед хԝә һʹәз бькьн у һьндава ԝанда сәрт нибьн.* 20 Зарʹно, һәр гав гӧрʹа де-баве хԝәда бьн, чьмки әв йәк дьле Хӧдан хԝәш те. 21 Бавно, һерса зарʹед хԝә рʹанәкьн, ԝәки әԝана бәр хԝә нәкʹәвьн. 22 Хӧламно, һәр гав гӧрʹа ахайед хԝәда бьн, нә кӧ тʹәне бәр чʹәʹве ԝан, ԝәки һун дьле мәрьва хԝәш бен, ле бь дьле сах у бь хофа Йаһоԝа гӧһдар бьн. 23 У һун чь жи бькьн, бь дьл у щан бькьн чаԝа бона Йаһоԝа, нә кӧ бона мәрьва. 24 Ве йәке бькьн, чьмки һун заньн кӧ һуне жь Йаһоԝа ԝар бьстиньн чаԝа хәлат. Ахайе мәзьнрʹа, демәк Мәсиһрʹа хӧламтийе бькьн. 25 Бир нәкьн, кәсе кӧ хьрабийе дькә, ԝе бона кьред хԝә бе щәзакьрьне, чьмки Хԝәде фьрԛийе накә ортʹа мәрьва.

4 Ахано, һун заньн кӧ Ахайе ԝә жи һәйә ль әʹзмен, ләма хӧламед хԝәрʹа һʹәйф у һәԛ бьн.

2 Һәртʹьм дӧа бькьн, ве йәкеда һʹьшйар бьминьн у шькьрийе бьдьнә Хԝәде. 3 Сәва мә жи дӧа бькьн кӧ Хԝәде бона хәбәра хԝә дәри вәкә, ԝәки әм сӧрʹа пироз дәрһәԛа Мәсиһ гьли кьн, бона чь жи әз кәледа мә. 4 Дӧа бькьн ԝәки чаԝа кӧ лазьм ә, әз бь зәлали ве хәбәре бәла кьм.

5 Һьндава нәбаԝәрмәндада сәрԝахт бьн, у ԝәʹде* хԝә бь щурʹе һәри баш бьдьнә хәбате. 6 Бьра гьлийед ԝә тʹьме хԝәш бьн, ча хԝарьнәкә хԝекьри, ԝәки һун бьзаньбьн чаԝа щаба һәр кәси бьдьн.

7 Бьре мьни дәлал Тьхико, йе кӧ хьзмәткʹарәки амьн ә у мина мә хӧламе Хӧдан ә, ԝе дәрһәԛа мьн һʹәму тьшти ԝәрʹа гьли кә. 8 Әз ԝи дьшиньм бал ԝә кӧ һун һаж мә һәбьн у ԝәки әԝ дьле ԝә рʹьһʹәт кә. 9 Әԝ тʹәви бьре мьни дәлал у амьн, Онисимо, те, йе кӧ йәк жь ԝә йә. Әԝе ԝәрʹа гьли кә һʹәму тьштед кӧ вьра дьԛәԝьмьн.

10 Әристархо, йе кӧ тʹәви мьн кәледа йә, ԝә сьлав дькә, у ӧса жи Маркос, мәрьве* Барнабас (дәрһәԛа кʹижани ԝә рʹебәри станд, кӧ һәрге әԝ бе бал ԝә, һун ԝи ԛәбул кьн), 11 у Исайе кӧ жерʹа Йусто дьбежьн, ԝә сьлав дькьн. Әԝана жь кәсед сьнәткьри нә. Шьхӧле Пʹадшатийа Хԝәдеда тʹәне әԝана һәвалкʹаред мьн ьн, у ԝана дьлбинийа мәзьн* дайә мьн. 12 Епафрас, йе кӧ хӧламе Мәсиһ ә у йәк жь ԝә йә, сьлавед хԝә ԝәрʹа дьшинә. Әԝ һәртʹьм бь дьл у щан бона ԝә дӧа дькә, ԝәки һун ча мәрьвнә рʹӧһʹанида гьһишти ԛәԝи бьминьн, у баԝәрийа хԝә ԝан һәр тьшта биньн, чь кӧ ԛьрара Хԝәдева гьредайи йә. 13 Әз шәʹде ве йәке мә, кӧ әԝ һьм бона кʹара ԝә, һьм жи бона кʹара кәсед ль Лаԝдькйа у Һираполисе гәләк щәфе дькʹьшинә.

14 Һʹәкиме дәлал Луԛа у Димас жи сьлавед хԝә ԝәрʹа дьшиньн. 15 Сьлавед мьн бьгьһиньн бьред ль Лаԝдькйайе, хушка мә Нимфайе у щьвата кӧ мала ԝеда тʹоп дьбә. 16 У чахе әԝ нәʹмә нав ԝәда бе хԝәндьне, ԝе бьшиньн щьвата Лаԝдькйайе, ԝәки ԝедәре жи бе хԝәндьне. Ле нәʹма кӧ мьн Лаԝдькйайерʹа шанд, бьра нав ԝәда жи бе хԝәндьне. 17 Архипорʹа бежьн: «Һаж хԝә һәбә ԝәки хьзмәтийа кӧ тә жь Хӧдан стандийә, бини сери».

18 Әз Паԝлос, сьлавед хԝә бь дәсте хԝә дьньвисьм. Бир нәкьн кӧ әз бь зьнщира гьредайи мә. Бьра кʹәрәма Хԝәдейә мәзьн сәр ԝә бә!