НӘʹМА ПЕШЬН ТʹЕСАЛОНИКИЙАРʹА

1 Әз Паԝлос, Силванус* у Тимотʹейо ве нәʹме щьвата Тʹесалоникийарʹа дьньвисьн, йа кӧ тʹәви Баве мә Хԝәде у Хӧдан Иса Мәсиһ йәктийеда йә:

Бьра кʹәрәма мәзьн у әʹдьлайи сәр ԝә бә!

2 Гава әм дӧайед хԝәда ԝә бир тиньн, әм һәр гав бона ԝә һʹәмуйа рʹазибуна хԝә дьдьнә Хԝәде. 3 Чьмки әм бәр Баве мә Хԝәде тʹӧ щар бир накьн шьхӧлед ԝәйи бь баԝәрийе у кьред ԝәйи бь һʹәзкьрьне. Әм ӧса жи бир накьн, кӧ ԝә бь сайа гӧмана һьндава Хӧдане мә Иса Мәсиһ тәнгасийада сәбьр дькьр. 4 Гәли бьред кӧ һʹәзкьрийед Хԝәде нә, әм заньн кӧ әԝи һун бьжартьнә. 5 Чьмки гава мә мьзгини ԝәрʹа бәла кьр, мә нә тʹәне бь гьлийа, ле бь ԛәԝат, бь рʹӧһʹе пироз у бь баԝәрийа ԛәԝи гиһандә ԝә. Һун заньн кӧ әм нав ԝәда бона хатьре ԝә бунә мәрьвнә чь щурʹәйи. 6 Ԝә нава гәләк тәнгасийада хәбәра Хԝәде бь шабуне, кʹижан кӧ рʹӧһʹе пироз дьдә, ԛәбул кьр. Ве йәкеда ԝә чʹәʹв да мә у Хӧдан. 7 Бь ви щурʹәйи, һун бона һʹәму баԝәрмәндед Макәдонйайеда у Ахайайеда бунә мәсәлә.

8 Бь ԝә хәбәра Йаһоԝа нә тʹәне Макәдонйайеда у Ахайайеда һатә бьһистьне, ле һʹәму дәра. У бь ви щурʹәйи, мәрьва дәрһәԛа баԝәрийа ԝәйә һьндава Хԝәде бьһист, у ида нәлазьм ә кӧ әм тьштәки бежьн. 9 Чьмки әԝана хԝәха гьли дькьн, кӧ мә ча щара пешьн һәвдӧ дит у ча ԝә тʹәрка пʹутед хԝә дайә, ԝәки Хԝәдайе рʹаст у сах бьһʹәбиньн, 10 у жь әʹзмана һивийа һатьна Кӧрʹе ԝи бьн, демәк Исайе кӧ әԝи жь мьрьне рʹакьр. Бәле, Иса ԝе мә хьлаз кә жь хәзәба кӧ те.

2 Бьрано, һун рʹьнд заньн кӧ һатьна мәйә бал ԝә бадиһәԝа нибу. 2 Чаԝа кӧ һун заньн, мә Филипйайеда щәфа кʹьшанд у әм һатьнә беһӧрмәткьрьне, ле бь сайа Хԝәдайе хԝә мерхас бунә, ԝәки нава зерандьнәкә мәзьнда мьзгинийа Хԝәде бьгьһиньнә ԝә. 3 Гьлийед мә жь ньһерʹандьна шаш йан жь нета хьраб ниньн, у нав гьлийед мәда тʹӧ фелбази тʹӧнә. 4 Ле чаԝа кӧ Хԝәде әм ԛәбул кьрьнә у әв мьзгини тʹәсмили мә кьрийә, әм нә кӧ ль гора хԝәстьна мәрьва, ле ль гора хԝәстьна Хԝәде хәбәр дьдьн, йе кӧ дьла дьвинә.

5 Һун хԝәха заньн кӧ мә һун тʹӧ щара бь гьлийед ширьн нәхапандьнә, мә нә жи ӧса дькьр кӧ ча мәрьвнә баш бенә кʹьфше, ԝәки тьштәки жь ԝә ԛазанщ кьн. Хԝәде шәʹдә йә! 6 Әм дькарьбун алийе хәрщада ԝәрʹа бьбуна баргьрани, чьмки әм шандийед Мәсиһ нә. Ле әм нахԝазьн кӧ мәрьв, демәк нә һун у нә жи кәсәки дьн, бь щурʹәки мәхсус дина хԝә бьдьнә мә. 7 Әм һьндава ԝәда бь һʹәзкьрьн у һʹәйф бун, чаԝа кӧ дайика дәстдәргуш, бь дьлшәԝати зарʹед хԝәрʹа дьрʹьщьфә. 8 У чьмки әм ԝә гәләк һʹәз дькьн, мә дьхԝәст нә тʹәне мьзгинийа Хԝәде бьгиһанда ԝә, ле һазьр бун әʹмьре хԝә жи бьдьнә ԝә, ԝәки али ԝә бькьн.

9 Бьрано, һәмьки те бира ԝә, ԝәки мә чьԛас щәфа кʹьшанд. Гава мә мьзгинийа Хԝәде ԝәрʹа бәла дькьр, әм шәв у рʹож дьхәбьтин, ԝәки алийе хәрщада тʹӧ кәсирʹа нәбьнә баргьрани. 10 Һун хԝәха шәʹдә нә, ӧса жи Хԝәде шәʹдә йә, кӧ әм һьндава ԝә баԝәрмәнда амьн бун, у рʹабун-рʹуньштьна мә рʹаст у беԛьсур бу. 11 Һун рʹьнд заньн, ԝәки мә тʹьме һәр йәк жь ԝә һелан дькьр, дьлбини дьда ԝә у ширәт дькьр ӧса, чаԝа бав зарʹед хԝә. 12 Мә әв йәк дькьр ԝәки һун ль гора хԝәстьна Хԝәде, йе кӧ гази ԝә дькә, бьжин, сәва кӧ бькʹәвьнә Пʹадшатийа ԝи у рʹумәте бьстиньн.

13 Бона ве йәке әм һәртʹьм шькьрийе дьдьнә Хԝәде, чьмки гава ԝә хәбәра Хԝәде жь мә бьһист, ԝә әԝ нә кӧ ча хәбәра мәрьва, ле ча хәбәра Хԝәде ԛәбул кьр. Чьмки әԝ бь рʹасти жи хәбәра Хԝәде йә у сәр ԝә баԝәрмәнда һʹӧкӧм дькә. 14 Бьрано, һун жи мина щьватед Хԝәде йед ль Щьһустане, кӧ тʹәви Мәсиһ Иса йәктийеда ньн, рʹасти тәнгасийа һатьн. Чаԝа кӧ әԝан бьра жь дәсте Щьһуйа щәфа кʹьшандьн, ԝә жи жь дәсте мьләте хԝә щәфед ӧса кʹьшанд. 15 Ԝан Щьһуйа һьм Хӧдан Иса, һьм жи пʹехәмбәр кӧштьн у әм зерандьн. Хенщи ԝе йәке әԝана дьле Хԝәде ша накьн, у кьред ԝан зьраре дьдьнә һʹәму мәрьва. 16 Чьмки әԝана рʹийа мә дьгьрьн, ԝәки әм мьзгинийа кӧ дькарә мәрьва хьлаз кә, нав мьләтед дьнда бәла нәкьн. Бь ви аԝайи әԝана гӧнед хԝә зедә дькьн. Ле ахьрийа-ахьрийе хәзәба Хԝәде сәр ԝанда һатийә.

17 Бьрано, гава әм сәр ԝәхтәки кьн жь ԝә башԛә бун (рʹаст ә мә һун нәдьдитьн, ле һун дьле мәда бун), мә гәләк дьхԝәст ԝә бьвиньн у бона ве йәке чь жь дәсте мә дьһат, мә дькьр. 18 Бәле, мә гәләк дьхԝәст бьһатана бал ԝә у һун бьдитана. У мьн Паԝлос, нә тʹәне щарәке, ле дӧ щара хирәт дькьр бемә бал ԝә. Ле Шәйтʹан рʹийа мә дьгьрт. 19 Кʹи йә гӧмана мә, йан жи шабун, йан әԝ тʹащ пе кʹижани әм фьрнаԛ дьбьн бәр Хӧдане мә Иса, ԝәʹде һатьна ԝи? Нә һун ьн? 20 Бәле, рʹумәт у шабуна мә һун ьн.

3 Мә ида нькарьбу сәбьр кьра, ләма жи мә сафи кьр ԝәки ԝе дьһа баш бә әм Атʹинайеда бьминьн, 2 у бьре хԝә, хьзмәткʹаре* Хԝәде Тимотʹейо, йе кӧ мьзгинийа дәрһәԛа Мәсиһ бәла дькә, бьшиньн бал ԝә, ԝәки әԝ ԝә бьшьдинә у бәрдьлийе бьдә ԝә. Бь ви щурʹәйи әԝе баԝәрийа ԝә ԛәԝи кә, 3 ԝәки жь бо ԝан тәнгасийа тʹӧ кәс жь ԝә сьст нәбә. Чьмки һун хԝәха заньн, ԝәки әм нькарьн жь тәнгасийед ӧса бьрʹәвьн. 4 Гава әм тʹәви ԝә бун, мә пешда ԝәрʹа дьгот, кӧ әме рʹасти тәнгасийа бен, у ӧса жи ԛәԝьми, чаԝа һун хԝәха жи заньн. 5 Ләма гава мьн ида нькарьбу сәбьр кьра, мьн Тимотʹейо шандә бал ԝә, ԝәки дәрһәԛа амьнийа ԝә бьбьһем. Әз дьтьрсийам кӧ Йе Дьщерʹьбинә, дьбәкә һун кьрьнә нава гӧнә у щәфе мә бадиһәԝа буйа.

6 Ле ньһа Тимотʹейо жь ԝә вәгәрʹийа у һатә бал мә у дәрһәԛа амьни у һʹәзкьрьна ԝә, тьштед баш мәрʹа гьли кьр. Әԝи гот кӧ һун мә һәр гав тиньн бира хԝә у һʹьзрәта дитьна мә нә, чаԝа әм жи һʹьзрәта дитьна ԝә нә. 7 Ләма жи бьрано, жь бо амьнийа ԝә кӧ һун дьдьнә кʹьфше, мә нава һʹәму щәфа у тәнгасийада бәрдьли станд. 8 Ньһа кӧ әм заньн, ԝәки һун рʹийа Хӧданда ԛәԝи дьсәкьньн, дьле мә рʹьһʹәт ә.* 9 Бь рʹасти әм шькьрийе дьдьнә Хԝәде сәва ԝә, чьмки ԝә дьле мә гәләк ша кьр. 10 Әм шәв у рʹож бь дьл у щан дӧа дькьн, кӧ ԝә бьвиньн у аликʹарийа лазьм бьдьнә ԝә, ԝәки баԝәрийа ԝә дьһа ԛәԝи кьн.

11 Бьра Баве мә Хԝәде у Хӧдане мә Иса, рʹийа мә рʹаст кьн, ԝәки әм бькарьбьн бенә бал ԝә. 12 Ӧса жи бьра Хӧдан али ԝә бькә, ԝәки һун һе зедә һәвдӧ у һʹәмуйа һʹәз бькьн, чаԝа кӧ әм ԝә һʹәз дькьн. 13 Бь ви щурʹәйи, әԝ ԝе дьле ԝә ԛәԝи кә, беԛьсур кә у пироз кә бәр Баве мә Хԝәде, ԝәʹде һатьна Хӧдане мә Иса тʹәви һʹәму пирозед хԝә.

4 Бьрано, ԝә жь мә рʹебәри станд кӧ һун гәрәке чаԝа бьжин, ԝәки дьле Хԝәде хԝәш бен, у һун һәма ӧса жи дькьн. Ле ньһа әм бь наве Хӧдан Иса жь ԝә һиви дькьн, ԝәки һун ве йәкеда һе зедә пешда һәрʹьн. 2 Чьмки һун заньн кӧ мә бь сайа Хӧдан Иса чь рʹебәри данә ԝә.

3 Ԛьрара Хԝәде әв ә кӧ һун пироз бьн у хԝә жь зьнекʹарийе* дур бьгьрьн. 4 Һәр кәс жь ԝә гәрәке бьзаньбә кӧ чаԝа бәдәна хԝә зәфт кә, ԝәки пирозийеда у намусийеда хԝәй кә. 5 Һун гәрәке пәй ԝан мьләта нәчьн, йед кӧ Хԝәде нас накьн у дькʹәвьнә пәй тәме хьраб, пе чь жи тʹер набьн. 6 Тʹӧ кәс гәрәке алийе намусийеда жь синора дәрнәкʹәвә у ве йәкеда зьраре нәдә бьре хԝә. Чаԝа мә бәре тʹәми дайә ԝә, Йаһоԝа кәсед кӧ ван тьшта дькьн, щәза дькә. 7 Бәле, Хԝәде гази мә кьрийә, ԝәки әм нә кӧ бь жийинәкә һʹәрам бьжин, ле бь пирозийе бьжин. 8 Ижа кәсе кӧ ве йәке инкʹар дькә, әԝ нә кӧ мәрьва инкʹар дькә, ле Хԝәдайе кӧ рʹӧһʹе хԝәйи пироз дьдә ԝә.

9 Ле дәрһәԛа бьраһʹәзийе нәлазьм ә әм ԝәрʹа тьштәки бьньвисьн, чьмки һун алийе Хԝәдеда һатьнә һинкьрьне, ԝәки һәвдӧ һʹәз бькьн. 10 Бь рʹасти һун ида бьред ль тʹәмамийа Макәдонйайе һʹәз дькьн. Ле бьрано, әм һиви ԝә дькьн кӧ һун ве йәкеда һе зедә пешда һәрʹьн. 11 Хирәт кьн кӧ һун бь жийинәкә рʹьһʹәт бьжин у позе хԝә нәкьнә нав шьхӧлед хәлԛе, у чаԝа кӧ мә тʹәми дайә ԝә, хԝәха бьхәбьтьн. 12 Һәрге һун ӧса бькьн, мәрьв ԝе ԛәдьре ԝә бьгьрьн у һуне һʹәԝще тьштәки нибьн.

13 Бьрано, әм дьхԝазьн ԝәки һун бьзаньбьн кӧ чь һивийа ԝан мәрьва йә, йед кӧ хәԝа мьрьнеда ньн, ԝәки һун мина кәсед кӧ гӧмана ԝан тʹӧнә йә, дьлтәнг нәбьн. 14 Чьмки һәрге әм баԝәр дькьн кӧ Иса мьр у жь мьрьне һатә рʹакьрьне, әм ӧса жи баԝәр дькьн кӧ Хԝәде ԝе шагьртед Иса, йед кӧ кʹәтьнә хәԝа мьрьне, жь мьрьне рʹакә, ԝәки әԝана тʹәви ԝи бьн.* 15 Әм ве йәке сәр һʹиме хәбәра Йаһоԝа ԝәрʹа дьбежьн: Әме, йед кӧ һʹәта ԝәхте һатьна Хӧдан сах бьминьн, тʹӧ щар пешийа мьрийа нәкʹәвьн. 16 Чьмки Хӧдан хԝәха ԝе жь әʹзмана дакʹәвә жер у борʹийа Хԝәде ԝе дәсте ԝида бә, әԝе борʹийе хә, у фәрмана ԝи ԝе бь дәнге сәроке мәләка бе бьһистьне. Һьнге шагьртед ԝийә мьри ԝе пешийе рʹабьн. 17 Паше әме, йед кӧ сах бьминьн, тʹәви ԝан әʹԝрава бенә һьлдане, ԝәки ль әʹзмана рʹасти Хӧдан бен. У әме һәртʹьм тʹәви Хӧдан бьн. 18 Ләма бь ван готьна һәр гав бәр дьле һәвдӧда ԝәрен.

5 Бьрано, һʹәԝщә нинә кӧ әм дәрһәԛа ԝәхт у зәмана тьштәки ԝәрʹа бьньвисьн. 2 Чьмки һун хԝәха рʹьнд заньн, кӧ рʹожа Йаһоԝа ԝе мина дьзе шәве бе. 3 Гава мәрьв бежьн: «Әʹдьлайи у бехофи йә!», һьнге ньшкева чаԝа санщуйе кʹӧлфәта һʹәмлә дәстпедьбә, ԝе ԛьрʹа ԝан бе, у әԝана ԝе нькарьбьн хьлаз бьн. 4 Ле һун бьрано, тәʹрийеда ниньн, ләма жи әԝ рʹож ԝе мина дьза ньшкева сәр ԝәда нәйе. 5 Чьмки һун һʹәму кӧрʹед рʹонайе у кӧрʹед рʹоже нә. Әм нә пʹара шәве нә, у нә жи пʹара тәʹрийе нә.

6 Дә ԝәрә әм мина кәсед дьн рʹанәзен, ле һʹьшйар бьминьн у сәр һʹьше хԝә бьн. 7 Кәсед кӧ рʹадьзен, шәв рʹадьзен, у кәсед кӧ сәрхԝәш дьбьн, шәв сәрхԝәш дьбьн. 8 Ле әм кӧ пʹара рʹоже нә, ԝәрә әм сәр һʹьше хԝә бьминьн у зьрьһʹе баԝәрийе у һʹәзкьрьне ль хԝә кьн у кʹӧмзьрьһʹе гӧмана хьлазбуне жи бьдьнә сәре хԝә. 9 Чьмки Хԝәде әм нә бона хәзәбе бьжартьнә, ле бона ве йәке кӧ әм бь сайа Хӧдане мә Иса Мәсиһ хьлаз бьн. 10 Әԝ бона мә мьр, ԝәки әм, дьхԝази һʹьшйар бьн йан жи рʹазайи* бьн, тʹәви ԝи бьжин. 11 Ләма жи бәрдәԝам кьн дьл бьдьнә һәв у һәвдӧ ԛәԝи кьн, чаԝа кӧ һун ньһа дькьн.

12 Ньһа жи бьрано, әм һиви жь ԝә дькьн, ԝәки һун ԛәдьре ԝан кәса бьгьрьн, йед кӧ нав ԝәда бь хирәт шьхӧл дькьн, хьзмәтийа Хӧданда рʹебәрийе ԝә дькьн у ԝә ширәт дькьн. 13 Ԝана гәләк ԛимәт кьн у һʹәз кьн бона шьхӧле ԝан. Һәврʹа әʹдьлайеда бьн. 14 Ӧса жи әм һиви жь ԝә дькьн, бьрано, кӧ һун кәсед нәгӧһдар ширәт кьн, бәр дьле дьлшкәстийада бен, аликʹарийе бьдьнә сьста, у һьндава һʹәмуйада бь сәбьр бьн. 15 Бьра тʹӧ кәс бәр хьрабийева тʹӧ кәсирʹа хьрабийе нәкә, ле һәр гав һәвдӧрʹа у һʹәмуйед дьнрʹа ԛәнщийе бькьн.

16 Тʹьме ша бьн. 17 Һәр гав дӧа бькьн. 18 Бона һәр тьшти шекьрдар бьн. Чьмки Хԝәде жь шагьртед Иса Мәсиһ ве йәке дьхԝазә. 19 Агьре рʹӧһʹе пироз нәтәмьриньн. 20 Пʹехәмбәртийа беһӧрмәт нәкьн. 21 Һәр тьшти бьщерʹьбиньн, тедәрхьн чь ԛәнщ ә у хԝә ԛайим ль ве бьгьрьн. 22 Хԝә жь һәр щурʹә хьрабийе дур бьгьрьн.

23 Бьра Хԝәдайе әʹдьлайе ԝә бь тʹәмами пироз кә. У бьра рʹӧһʹ, нәфс* у бәдәна ԝә, бьрано, һʹәта ԝәʹде һатьна Хӧдане мә Иса Мәсиһ, һʹәму алийава сахләм у беԛьсур бьминә. 24 Йе кӧ гази ԝә дькә амьн ә, у әԝе әʹсәйи ве йәке бькә.

25 Бьрано, һәр гав бона мә дӧа бькьн.

26 Бь һʹәзкьрьне* сьлаве бьдьнә һʹәму бьра.

27 Әз бь наве Хӧдан тʹәмийе дьдьмә ԝә, кӧ һун ве нәʹме һʹәму бьрарʹа бьхуньн.

28 Бьра кʹәрәма мәзьн йа Хӧдане мә Иса Мәсиһ сәр ԝә бә!