НӘʹМА ДӦДА ТʹЕСАЛОНИКИЙАРʹА

1 Әз Паԝлос, Силванус* у Тимотʹейо, ве нәʹме щьвата Тʹесалоникийарʹа дьньвисьн, кʹижан кӧ тʹәви Баве мә Хԝәде у Хӧдан Иса Мәсиһ йәктийеда йә:

2 Бьра кʹәрәма мәзьн у әʹдьлайа жь Баве мә Хԝәде у Хӧдан Иса Мәсиһ сәр ԝә бә!

3 Бьрано, әм һәр гав бона ԝә шькьрийе дьдьнә Хԝәде. У һун һежа нә, чьмки баԝәрийа ԝә рʹож бь рʹож ԛәԝи дьбә у һʹәзкьрьна ԝә һьндава һәвда дьһа зедә дьбә. 4 Ләма әм ԝәрʹа фьрнаԛ дьбьн у нав щьватед Хԝәдеда дәрһәԛа ԝә гьли дькьн. Әм гьли дькьн, кӧ һун чаԝа бәр һʹәму зерандьн у чәтьнайа тәйах дькьн у баԝәрийа хԝә дьдьнә кʹьфше. 5 Әв йәк избат дькә кӧ диԝана Хԝәде һәԛ ә, у һуне ча кәсед һежа бенә һʹәсабе, ԝәки бькʹәвьнә Пʹадшатийа Хԝәде, сәва чь жи һун дьчәрчьрьн.

6 Жь бо ве йәке кӧ Хԝәде һәԛ ә, әԝе мәрьвед кӧ тәнгасийе дьдьнә ԝә, щәза кә. 7 Ле һуне, йед кӧ тәнгасийа дькʹьшиньн, тʹәви мә ԝәʹде һатьна* Хӧдан Иса, жь ван тәнгасийа хьлаз бьн. Әԝе жь әʹзмана тʹәви мәләкед хԝәйи ԛәԝи, 8 у бь агьрәки гӧрʹ бе. Һьнге әԝе һʹәйфе жь ԝан һьлдә, йед кӧ Хԝәде нас накьн у гӧрʹа мьзгинийа дәрһәԛа Хӧдане мә Иса накьн. 9 Әԝана ԝе бенә диԝанкьрьне у щәзайа ԝан ԝе әԝ бә, кӧ сәр һʹәта-һʹәтайе бенә ԛьрʹкьрьне. Әԝана ԝе бәр чʹәʹве Хӧдан ӧнда бьн у ԛәԝата ԝийә мәзьн нәвиньн. 10 Һьнге гава Хӧдан бе, ԝәки тʹәви пирозед хԝә бе рʹумәткьрьне, һʹәму кәсед кӧ ԝи баԝәр дькьн, ԝе жь ԝи һʹәйр-һʹӧжмәкʹар бьн. У чьмки ԝә баԝәрийа хԝә тьштед кӧ мә ԝәрʹа готьбун, анийә, һуне жи нав ван мәрьвада бьн.

11 Ләма әм тʹьме бона ԝә дӧа дькьн у рʹәща дькьн, кӧ Хԝәде ԝә һежайи жийине һʹәсаб кә. Хԝәде бона ве жийине гази ԝә кьрийә. Бьра әԝ бь ԛәԝата хԝә һʹәму кьред ԛәнщ ль гора хԝәстьна хԝә бинә сери у али ԝә бькә, ԝәки һун бь кьред хԝә, йед кӧ һун бь баԝәрийе дькьн, сәркʹәвьн. 12 Һьнге ԝе наве Хӧдан Иса Мәсиһ бь ԝә бе рʹумәткьрьне у һуне жи кӧ тʹәви ԝи йәктийеда ньн, бенә рʹумәткьрьне бь сайа кʹәрәма мәзьн йа Хԝәдайе мә у Хӧдан Иса Мәсиһ.

2 Дә ижа бьрано, дәрһәԛа һатьна Хӧдане мә Иса Мәсиһ у дәрһәԛа ве йәке, кӧ әме бенә тʹопкьрьне ԝәки тʹәви ԝи бьн, әм жь ԝә рʹәща дькьн: 2 Һәрге кәсәк ԝәрʹа бежә, ԝәки рʹожа Йаһоԝа ида һатийә, һун фькьре хԝәда зу шаш нәбьн у хԝә ӧнда нәкьн, һәла һе жи һәрге ԝәрʹа бежьн, кӧ әв хәбәр жь Хԝәде йә, йан жи нәʹмәкеда ньвисар ә, кʹижан кӧ йанчь жь мә йә.

3 Нәһельн кәсәк ԝә бьхапинә,* чьмки әв рʹож ԝе нәйе һʹәта рʹабәрибун пешда нәйе у мәрьве беԛанун, демәк кӧрʹе ԛьрʹбуне әшкәрә нәбә. 4 Әԝ мьԛабьли һәр тьштед кӧ хԝәде тенә һʹәсабе, йан жи тенә һʹәбандьне, дьсәкьнә, әԝ һәла һе пʹарьстгәһа Хԝәдеда жи рʹудьне у хԝә дәԝса хԝәде дьдә кʹьфше. 5 Гәло найе бира ԝә кӧ гава әз бал ԝә бум, мьн әв тьшт ԝәрʹа дьготьн?

6 Ньһа һун заньн кӧ кʹи рʹе бәр ԝи мәрьве беԛанун дьгьрә, ԝәки әԝ пешийа ԝәʹде хԝә әшкәрә һәрәкʹәт нәкә. 7 Бәле, әԝе беԛанун дьзива һәрәкʹәт дькә, ле кьред ԝи ԝе вәшарти бьминьн, һʹәта йе кӧ рʹе бәр ԝи дьгьрә, һәрʹә. 8 У һьнге йе беԛанун ԝе әшкәрә бә. Хӧдан Иса ԝе ԝәʹде һатьна хԝәда,* бь ԛәԝата гьлийед хԝә* ԝи бькӧжә у бьдә һьлдане. 9 Шәйтʹан али йе беԛанун дькә, ԝәки кьред мәзьн, нишанед дәрәԝ у кʹәрәмәта бькә, 10 у йед кӧ бәрбь ԛьрʹбуне дьчьн, бь һәр щурʹә нәһәԛийа бьхапинә. Әԝана ԛьрʹ дьбьн, чьмки ԝана рʹасти һʹәз нәкьр у ԛәбул нәкьр кӧ хьлаз бьн. 11 Ләма Хԝәде дьһелә, ԝәки әԝана бьн һʹӧкӧме дәрәԝийеда бенә хапандьне у ве дәрәԝийе баԝәр бькьн. 12 Бь ви щурʹәйи, һʹәму кәсед кӧ баԝәрийа хԝә рʹастийе нәанинә у нәһәԛи һʹәз кьрьнә, ԝе бенә диԝанкьрьне.

13 Ле әм гәрәке тʹьме бона ԝә, бьред жь алийе Йаһоԝада һʹәзкьри, шькьрийе бьдьнә Хԝәде, чьмки әԝи сәре серида һун бьжартьнә, ԝәки хьлаз бьн. У әԝи һун бь рʹӧһʹе хԝә пироз кьрьнә, бона баԝәрийа ԝәйә һьндава рʹастийе. 14 Хԝәде гази ԝә кьрийә пе мьзгинийа кӧ әм бәла дькьн, ԝәки һун бьгьһижьнә рʹумәта Хӧдане мә Иса Мәсиһ. 15 Ижа бьрано, ԛайим бьсәкьньн у хԝә ль ԝан тьшта бьгьрьн, кʹижан кӧ һун жь готьнед мә йан жи жь нәʹмед мә һин бунә. 16 Бьра Хӧдане мә Иса Мәсиһ у Баве мә Хԝәде, йе кӧ әм һʹәз кьрьн, у бь кʹәрәма хԝәйә мәзьн дьлрʹьһʹәтийа һʹәта-һʹәтайе у гӧманәкә хԝәш дайә мә, 17 дьле ԝә рʹьһʹәт кьн у ԝә һәр шьхӧл у готьнед ԛәнщда ԛәԝи кьн.

3 Һәйнәсәр бьрано, һәртʹьм бона мә дӧа бькьн, ԝәки хәбәра Йаһоԝа зу бәла бә. У чаԝа кӧ хәбәра ԝи нав ԝәда рʹумәт дьбә, бьра нав кәсед дьнда жи рʹумәт бә. 2 Ӧса жи дӧа бькьн ԝәки әм жь дәсте мәрьвед хьраб у зордар хьлаз бьн, чьмки гьшк баԝәр накьн. 3 Ле Хӧдан амьн ә, әԝе дьле ԝә ԛәԝи кә у ԝә жь Шәйтʹан* бьпʹарезә. 4 Хенщи ԝе йәке, әм ча шагьртед Хӧдан дӧдьли набьн, ԝәки чь кӧ әм ԝәрʹа дьбежьн, һун дькьн у һуне бәрдәԝам кьн бькьн. 5 Бьра Хӧдан диса жи рʹебәрийе дьле ԝә бькә, ԝәки һун Хԝәде һʹәз кьн у тәйах кьн, сәва кӧ бәрдәԝам кьн пәй Мәсиһ һәрʹьн.

6 Ижа бьрано, әм бь наве Хӧдане мә Иса Мәсиһ тʹәмийа дьдьнә ԝә, кӧ һун хԝә дур бьгьрьн жь һәр бьре кӧ бетʹәрбәт ә у ль гора ве рʹебәрийа кӧ ԝә жь мә стандийә, һәрәкʹәт накә. 7 Һун хԝәха заньн кӧ чаԝа гәрәке чʹәʹв бьдьнә мә, чьмки рʹабун-рʹуньштьна мә нав ԝәда бетʹәрбәти нибу. 8 Мә нане тʹӧ кәси бе һәԛ нәдьхԝар, ле әм бь щәфа шәв у рʹож дьхәбьтин, ԝәки бона тʹӧ кәси нәбьнә баргьрани. 9 Изьна мә һәбу кӧ әм аликʹарийе жь ԝә бьхԝазьн, ле мә дьхԝәст ԝәрʹа бьбьнә мәсәлә, ԝәки һун чʹәʹв бьдьнә мә. 10 Гава әм тʹәви ԝә бун, мә диса у диса әв тʹәми дьда ԝә: «Кәсе кӧ нахԝазә бьхәбьтә, бьра нәхԝә жи». 11 Әм дьбьһен кӧ нав ԝәда һьнә кәс бетʹәрбәт ьн, ԛә нахәбьтьн у дькʹәвьнә нав шьхӧле хәлԛе. 12 Әм бь наве Хӧдан Иса Мәсиһ тʹәмийе дьдьнә кәсед ӧса, ԝәки әԝана бь жийинәкә рʹьһʹәт бьжин у бьхәбьтьн кӧ әʹбура хԝә бькьн.

13 Ле һун, бьрано, жь ԛәнщикьрьне нәԝәстьн. 14 Ле һәрге кәсәк гӧһ нәдә рʹебәрийа кӧ ве нәʹмеда йә, бьра чʹәʹве ԝә сәр ԝи бә у ида тʹәви ԝи һәвалтийе нәкьн, ԝәки әԝ шәрм бькә. 15 Ле ԝи кәси ча дьжмьн һʹәсаб нәкьн, ле бәрдәԝам кьн ԝи ча бьре хԝә ширәт кьн.

16 Бьра Хӧдане әʹдьлайе һәр гав у һәр алийава әʹдьлайе бьдә ԝә. Бьра Хӧдан тʹәви ԝә һʹәмуйа бә.

17 Әз Паԝлос, сьлавед хԝә бь дәсте хԝә дьньвисьм. Әз һәртʹьм нәʹмед хԝә ӧса дьньвисьм, ԝәки һун бьзаньбьн кӧ мьн әв нәʹмә ньвисийә.

18 Бьра кʹәрәма мәзьн йа Хӧдане мә Иса Мәсиһ сәр ԝә һʹәмуйа бә!