НӘʹМА ПЕШЬН ТИМОТʹЕЙОРʹА

1 Әз Паԝлос, ль гора тʹәмийа Хьлазкʹаре мә Хԝәде у Мәсиһ Иса, йе кӧ гӧмана мә йә, бумә шандийе Мәсиһ Иса. 2 Әз ве нәʹме Тимотʹейорʹа* дьньвисьм, йе кӧ баԝәрийеда ча кӧрʹе мьни һʹәлал ә:

Бьра кʹәрәма мәзьн, рʹәʹм у әʹдьлайа Баве мә Хԝәде у Хӧдане мә Мәсиһ Иса, сәр тә бә!

3 Пешийа кӧ әз бьчума Макәдонйайе, мьн тӧ һелан кьри, ԝәки Әфәседа бьмини. У әз ньһа жи һиви тә дькьм, кӧ тӧ тʹәмийе бьди һьнәка, ԝәки әԝана һинкьрьна ԛәлп бәла нәкьн, 4 гӧһ нәдьнә чʹирока у пәй лекʹолина дәрһәԛа рʹькʹьнийата нәкʹәвьн. Тьштед ӧса бекер ьн, әԝ тʹәне пьрсед зедә пешда тиньн, у ԛә һәвгьредана ԝан тʹәви тьштед кӧ Хԝәде бона ԛәԝикьрьна баԝәрийе дьдә, тʹӧнә. 5 Бь рʹасти әв тʹәми* бона ве йәке йә, ԝәки һәр кәс һʹәзкьрьне бьдә кʹьфше, кӧ жь дьле тʹәмьз, жь исафа тʹәмьз у жь баԝәрийа бедӧрʹути пешда те. 6 Һьнәка тʹәрка ван тьшта данә у кʹәтьнә пәй хәбәрданед пʹучʹ. 7 Әԝана дьхԝазьн бьбьнә дәрсдаред ԛануне, ле хԝәха жи ньзаньн чь дьбежьн, нә жи ԝан тьштед кӧ дьдьнә зора хԝә, фәʹм дькьн.

8 Әм заньн кӧ Ԛанун* ԛәнщ ә, ле мәрьв гәрәке Ԛануне бь щурʹе рʹаст бинә сери. 9 У әм заньн ԝәки ԛанун нә кӧ бона мәрьвед рʹаст һатийә дайине, ле бона беԛануна, мьԛабьла, йед нәхԝәдехоф, гӧнәкʹара, нәамьна, йед кӧ тьштед пироз инкʹар дькьн, йед кӧ де-баве хԝә у мәрьвед дьн дькӧжьн, 10 зьнекʹара,* меред кӧ тʹәви мера сәре хԝә датиньн, йед кӧ мәрьва дьдьзьн, дәрәԝина, йед кӧ бь дәрәԝ сонд дьхԝьн, у йед кӧ мьԛабьли һинкьрьна рʹаст* рʹадьбьн. 11 Әв һинкьрьн сәр һʹиме мьзгинийа рʹумәт ә, йа кӧ жь Хԝәдайе бәхтәԝар те у йа кӧ әԝи тʹәсмили мьн кьрийә.

12 Шькьр Хӧдане мә Мәсиһ Исарʹа, йе кӧ ԛәԝат дайә мьн, чьмки әԝи әз амьн һʹәсаб кьрьм у әв хьзмәти тʹәсмили мьн кьр. 13 Бәре мьн кʹьфьри дькьр, щьмәʹта Хԝәде дьзеранд у әз мәрьвәки бәрзәԛ бум. Ле диса жи рʹәʹм ль мьн һатә кьрьне, чьмки мьн бь нәзанийа хԝә у бе баԝәрийа рʹаст һәрәкʹәт дькьр. 14 Ле кʹәрәма мәзьн йа Хӧдане мә сәр мьнда бари, у мьн жь Мәсиһ Иса баԝәри у һʹәзкьрьн станд. 15 Әв гьли рʹаст ьн у һежайи баԝәркьрьне нә: Мәсиһ Иса һатә дьнйайе, ԝәки гӧнәкʹара хьлаз кә. У нав гӧнәкʹарада, йе һәри гӧнәкʹар, әз ьм. 16 Ле диса жи рʹәʹм ль мьн һатә дайине, ԝәки Мәсиһ Иса сәбьра хԝә бь тʹәмами һьндава мьн, йе һәри гӧнәкʹарда, бьдә кʹьфше. Бь ви щурʹәйи, әԝи әз кьрьмә мәсәлә бона ԝан мәрьва, йед кӧ ԝе баԝәрийа хԝә ԝи биньн, ԝәки жийина һʹәта-һʹәтайе ԛазанщ кьн.

17 Аԝа бьра Пʹадше һʹәта-һʹәтайерʹа, нәмьри у нәхӧйарʹа, Хԝәдайе тʹәкрʹа, һӧрмәт у рʹумәт һʹәта-һʹәтайе бе дайине! Амин.

18 Кӧрʹе мьн Тимотʹейо, әв рʹебәрийа кӧ әз дьдьмә тә, анәгори пʹехәмбәртийед дәрһәԛа тә йә. Әв гьли ԝе дьле тә ԛәԝи кьн, ԝәки тӧ бәрдәԝам ки мина әскәрәки баш шәрʹ бьки, 19 баԝәри у исафа хԝәйә тʹәмьз бьпʹарези. Һьнәка гӧһ нәданә исафа хԝә у бона ве йәке баԝәрийа ԝан мина гәмийе нӧԛ бу. 20 Һимәнайо у Скәндәр нав ԝан кәсада ньн, у мьн әԝ данә дәсте Шәйтʹан, ԝәки әв щәзакьрьн ԝана һин кә, кӧ кʹьфьрийа нәкьн.

2 Пешийа һәр тьшти әз һиви ԝә дькьм, ԝәки һун бона һәр щурʹә мәрьва жь дьл Хԝәдерʹа дӧа кьн, лава кьн у рʹазибуне бьдьнә кʹьфше. 2 Ӧса жи бона пʹадша у һʹәму сәрԝера дӧа кьн, ԝәки әм бькарьбьн һәр тьштида Хԝәдерʹа амьн бьминьн у бь жийинәкә маԛул, әʹдьл у рʹьһʹәт бьжин. 3 Әв йәк бәр чʹәʹве Хьлазкʹаре мә, Хԝәде, ԛәнщ у рʹаст ә. 4 Әԝ дьхԝазә ԝәки һʹәму щурʹә мәрьв хьлаз бьн у бьгьһижьнә рʹастийе.* 5 Хԝәде йәк ә, у ортʹа Хԝәде у мәрьвада тʹәне ортʹәчик һәйә, әв Мәсиһ Иса йә, 6 йе кӧ әʹмьре хԝә чаԝа һәԛе лайиԛ да, чь кӧ лазьм бу ԝәки һʹәму мәрьв жь гӧнә бенә азакьрьне. Шәʹдәтийа ве йәке ԝе ԝәʹдәда бе дайине. 7 У бона ве йәке Хԝәде әз ча мьзгинван у шанди кʹьфш кьрьмә. Бь ви щурʹәйи әз дькарьм мьләтед дьн дәрһәԛа баԝәрийе у рʹастийе һин кьм. (Әз рʹастийе дьбежьм у дәрәԝа накьм.)

8 Ләма әз дьхԝазьм кӧ һәр дәра, кʹидәре кӧ һун тʹоп дьбьн, меред кӧ дӧа дькьн, бьра бь амьни,* бе һерс у бе шәрʹ-дәʹԝ дӧа бькьн. 9 Ӧса жи бьра кʹӧлфәт бь кʹьнщед лайиԛ, бь мьлукти у маԛули хԝә бьхәмьлиньн. Бьра әԝана нә кӧ бь вәгьртьна пʹорʹед хԝә, бь зерʹ, бь морийа* у бь кʹьнщед гәләк бьһа хԝә бьхәмьлиньн, 10 ле бь кьред ԛәнщ, кʹижан кӧ лайиԛи хьзмәткʹаред Хԝәде нә.

11 Бьра кʹӧлфәт кәрʹә-кәрʹ һин бә, бь тʹәмами гӧһдар бә. 12 Әз изьне надьм, ԝәки кʹӧлфәт һин кә, йан жи сәрԝертийе сәр мера бькә, бьра әԝ дәнге хԝә нәкә. 13 Чьмки Хԝәде пешийе Адәм әʹфьранд, паше Һеԝа. 14 У Адәм нәһатә хапандьне, ле кʹӧлфәт һатә хапандьне у гӧнә кьр. 15 Ле кʹӧлфәт ԝе бь зарʹанине бе пʹарастьне, һәрге әԝ нава баԝәрийеда, һʹәзкьрьнеда, пирозийеда у маԛулийеда бьминә.

3 Чь кӧ әзе ньһа бежьм, рʹаст ә: Һәрге кәсәк хирәт дькә кӧ бьбә бәрпьрсийар, әԝ шьхӧләки ԛәнщ дьхԝазә. 2 Бәрпьрсийар гәрәке ӧса бьжи, ԝәки тʹӧ кәс нькарьбә ԝи нәһәԛ дәрхә. Гәрәке әԝ тʹәне мере жьнәке бә, һәр тьштида хԝәгьрти бә, аԛьлда гьран бә, тʹәрбәт бә, меванһʹәз бә у һинкьрьнеда жи сәрхԝә бә. 3 Әԝ гәрәке зедә вәнәхԝә, зордар нибә, ле маԛул бә, шәрʹуд нибә у пʹәрәһʹәз нибә. 4 Әԝ гәрәке малхетийа малбәта хԝә рʹьнд бькә, у зарʹед ԝи гәрәке гӧһдар у маԛул бьн 5 (чьмки һәрге кәсәк ньзанә чаԝа малхетийе мала хԝә бькә, ижа әԝе чаԝа бона щьвата Хԝәде хәм бькә?). 6 Әԝ гәрәке нә жи әԝ кәс бә, йе кӧ тʹәзә һатийә сәр рʹийа рʹастийе, ԝәки ԛӧрʹә нәбә у мина Мире-щьна нәйе диԝанкьрьне. 7 Хенщи ԝе йәке, гәрәке наве ԝи бал мәрьвед жь щьвате дәр жи баш бә, ԝәки лома ль ԝи нәйе кьрьне, у әԝ нәкʹәвә тʹәлька Мире-щьна.

8 Бәрдәстийед щьвате жи гәрәке маԛул бьн, хәбәрданеда дӧрʹутийе нәкьн, шәраве зедә вәнәхԝьн у бь тьмайи пәй кʹәда һʹәрам нәкʹәвьн, 9 ле гәрәке бь исафа тʹәмьз хԝә ль сӧрʹа пирозә баԝәрийе бьгьрьн.

10 Пешийе әԝана гәрәке бенә щерʹьбандьне, һәла дькарьн ве хьзмәтийе бькьн йан на. У һәрге тʹӧ суще ԝан тʹӧнә бә, бьра әԝана бьбьнә бәрдәстийед щьвате.

11 Гәрәке кʹӧлфәт жи маԛул бьн, бӧхданбеж нибьн, хԝәгьрти бьн у һәр тьштида амьн бьн.

12 Бәрдәстийе щьвате гәрәке тʹәне мере жьнәке бә, у рʹьнд хԝәйитийе зарʹед хԝә у мала хԝә бькә. 13 Чьмки кәсед кӧ хьзмәтийа хԝә рʹьнд тиньн сери, навәки баш ԛазанщ дькьн у дькарьн бь сәрбәсти* дәрһәԛа баԝәрийа хԝәйә һьндава Мәсиһ Иса, хәбәр дьн.

14 Гӧмана мьн һәйә кӧ әзе зутьрәке бемә щәм тә, ле диса жи әз ван тьшта тәрʹа дьньвисьм. 15 Бь ви щурʹәйи, һәрге әз дәрәнги кʹәвьм жи, тӧйе бьзаньби кӧ рʹабун-рʹуньштьна тә гәрәке мала Хԝәдеда чаԝа бә. Әв мал щьвата Хԝәдайе сах ә, стун у бьнгәһа рʹастийе йә. 16 Бәле, сӧрʹа пироз, йа кӧ амьнийа мәйә һьндава Хԝәдева гьредайи йә, мәзьн ә: ‹Әԝ* бу мәрьв, у йәки рʹаст һатә һʹәсабе гава диса бу рʹӧһʹ. Әԝ мәләкарʹа хӧйа бу, у нав мьләтада дәрһәԛа ԝи гьли дькьрьн. Дьнйайеда мәрьва баԝәрийа хԝә ԝи анин, у әԝ рʹумәтеда һатә һьлкʹьшандьн ль жор.

4 Готьнед жь бина бәр Хԝәде зәлал дьбежьн, ԝәки ԝәхт ԝе бе, кӧ һьнәке тʹәрка баԝәрийе бьдьн. Әԝана ԝе гӧһ бьдьнә хәбәред дәрәԝ, йед кӧ йанчь жь Хԝәде нә, ӧса жи ԝе гӧһ бьдьнә һинкьрьнед щьна. 2 Һьм жи әԝана ԝе гӧһ бьдьнә дәрәԝед мәрьвед дӧрʹу, исафа кʹижана дах буйә.* 3 Әԝана ԛәдәхә дькьн кӧ мәрьв бьзәԝьщьн йан мер кьн, у тʹәмийе дьдьн кӧ һьнә хԝарьна нәхԝьн. Ле Хԝәде әв хԝарьн чекьрьнә, ԝәки кәсед кӧ баԝәри у занәбуна ԝанә рʹаст һәйә, бьхԝьн у шькьрийе бьдьнә Хԝәде. 4 Һәр тьште кӧ Хԝәде әʹфьрандийә ԛәнщ ә, у дәԝса кӧ әԝ бенә инкʹаркьрьне, гәрәке бь рʹазибуне бенә ԛәбулкьрьне. 5 Чьмки әԝана бь хәбәра Хԝәде у бь дӧа һатьнә пирозкьрьне.

6 Гава тӧ ван ширәта бьди бьра, тӧйе нишан ки кӧ тӧ хьзмәткʹаре Мәсиһ Иса йе ԛәнщ и, демәк, йе кӧ хԝә бь готьнед баԝәрийе тʹер дькә у хԝә һур бь һур ль һинкьрьнед Хԝәде дьгьрә. 7 Гӧһ нәдә чʹирʹокед пира, кʹижан кӧ Хԝәде беһӧрмәт дькьн. Дәԝсе, бьра нета тә әв бә, кӧ хьзмәтийа хԝәйә амьнда пешда һәрʹи. 8 Чьмки кʹара мәшԛа* кӧ мәрьв дькә, ԝәки бәдәна хԝә ԛәԝи кә, гәләк нинә. Ле кʹара хьзмәтийа амьн һәр тьштида һәйә, чьмки мәрьв жь ве һьм ньһа кʹәрәма дьстинә, һьм жи ахьрийеда ԝе бьстинә. 9 Әв гьли рʹаст ьн у һежа нә мәрьв ԝан баԝәр кьн. 10 Ләма әм бь щәфа у хирәтәкә мәзьн шьхӧл дькьн, чьмки әм гӧмана хԝә дьдьнә сәр Хԝәдайе сах, йе кӧ Хьлазкʹаре һʹәму щурʹә мәрьва йә, илаһи кәсед кӧ ԝирʹа амьн ьн.

11 Бәрдәԝам кә ван тʹәмийа бьдә у һин кә. 12 Тʹӧ щар нәһелә кӧ кәсәк жь бо щаһьлтийа тә хԝә сәр тәрʹа бьгьрә. Дәԝсе бона кәсед амьн бьбә мәсәлә, хәбәрданеда, рʹабун-рʹуньштьнеда, һʹәзкьрьнеда, баԝәрийеда у тʹәмьзайеда.* 13 Һʹәта һатьна мьн, бәрдәԝам кә бь хирәт щьмәʹтерʹа бьхунә, ширәт кә* у һин кә. 14 Тʹәрка ве пʹешкʹеше нәдә, йа кӧ бь сайа пʹехәмбәртийе тәрʹа һатийә дайине, гава кʹома рʹуспийа дәсте хԝә данинә сәр тә. 15 Сәр ван тьшта кʹур бьфькьрә у бь тʹәмами дина хԝә бьдә ван, ԝәки пешдачуйина тә һʹәмуйарʹа әʹйан бә. 16 Һаж хԝә у һинкьрьна хԝә һәбә. Бәрдәԝам кә хԝә ль ван тьшта бьгьрә, чьмки һәрге тӧ ӧса бьки, тӧйе һьм хԝә һьм жи кәсед кӧ гӧһ дьдьнә тә, хьлаз ки.

5 Меред әʹмьрда мәзьнрʹа сәрт хәбәр нәдә, ле ԝана чаԝа бавед хԝә һʹәсаб кә у хорта чаԝа бьред хԝә, 2 кʹӧлфәтед әʹмьрда мәзьн чаԝа дайикед хԝә һʹәсаб кә у кʹӧлфәтед щаһьл жи бь дьле тʹәмьз чаԝа хушкед хԝә.

3 Бона жьнәбийед кӧ бь рʹасти һʹәԝще аликʹарийе нә, хәм бькә.* 4 Ле һәрге зарʹ йан нәбийед жьнәбике һәнә, бьра әԝана һин бьн пешийе малбәта хԝәда бьдьнә кʹьфше кӧ Хԝәдерʹа амьн ьн. У бьра әԝана борщдарийа хԝә бәр де-баве хԝә у кальк-пирькед хԝә биньн сери, чьмки әв йәк Хԝәде хԝәш те. 5 Жьнәбийа кӧ бь рʹасти һʹәԝще аликʹарийе йә у бе кʹомәк майә, әԝ гӧмана хԝә дьдә сәр Хԝәде, у шәв-рʹож дӧа-дьрозга дькә. 6 Ле жьнәбийа кӧ тʹәне пәй кʹефа дьле хԝә дьчә,* рʹаст ә әԝ дьжи, ле мьри йә. 7 Ләма жи бәрдәԝам кә ван тʹәмийа бьдә ԝан, ԝәки әԝана нәйенә сущдаркьрьне. 8 Бәле, һәрге кәсәк мәрьвед хԝә, илаһи нәфәред мала хԝә набә хԝәйи, әԝи тʹәрка баԝәрийе дайә у жь кәсе нәбаԝәрмәнд хьрабтьр ә.

9 Ве жьнәбийе бькьнә дәфтʹәра аликʹарийе, йа кӧ 60 сали кемтьр нинә у жьна мерәки бу,* 10 пе кьред хԝәйә ԛәнщ те наскьрьне, зарʹ мәзьн кьрьнә, меванһʹәзи дьда кʹьфше, ньгед пироза дьшушт, кʹомәк дьда кәсед дәсттәнг у һәртʹьм хирәт дькьр ԛәнщийе бькә.

11 Ле жьнәбийед щаһьл нәкьнә дәфтʹәра аликʹарийе, чьмки чахе әԝана дәԝса кӧ Мәсиһрʹа хьзмәт кьн, дькʹәвьнә пәй хԝәстьнед хԝәйә бәдәни,* дьхԝазьн мер кьн. 12 У әԝана ԝе диԝане сәр хԝәда биньн, чьмки созе хԝәйи пешьн хԝәй нәкьрьн.* 13 Хенщи ԝе йәке, әԝана хԝәрʹа дькьнә хәйсәт ԝәʹде хԝә бош-бәтал дәрбаз кьн у мал бь мал бьгәрʹьн. Әԝана нә тʹәне ԝәʹде хԝә бош-бәтал дәрбаз дькьн, ле гәвәзтийе жи дькьн, дькʹәвьнә нава шьхӧлед хәлԛе, у дәрһәԛа тьштед кӧ нә ише ԝан ә, хәбәр дьдьн. 14 Ләма жи әз дьхԝазьм кӧ жьнәбийед щаһьл мер кьн, зарʹа биньн, шьхӧлед малева мьжул бьн у мәщале нәдьнә нәйара кӧ ломә ль мә бькьн. 15 Һьнәк ида жь рʹийа рʹаст дәркʹәтьнә у пәй Шәйтʹан чунә. 16 Һәрге нава мәрьвед кʹӧлфәтәкә баԝәрмәндда жьнәби һәнә, бьра әԝ кʹомәке бьдә ԝан, кӧ баре щьвате гьран нәбә. Һьнге ида щьват дькарә кʹомәке бьдә жьнәбийед кӧ бь рʹасти һʹәԝще аликʹарийе нә.

17 Рʹуспийед кӧ рʹьнд рʹебәрийа щьвате дькьн, илаһи әԝед кӧ хәбәрдан у һинкьрьнеда хирәт ьн, дӧщар зедә һежайи ԛәдьр ьн. 18 Чьмки Ньвисаред Пирозда те готьне: «Дәве гайе кӧ бедәреда* дьхәбьтә, гьренәдә», у «Хәбаткʹар һежайи һәԛе хԝә йә». 19 Гӧһ нәдә сущдаркьрьна һьндава рʹуспики, һʹәта кӧ дӧ йан се шәʹдә тʹӧнә бьн. 20 Кәсед кӧ гӧнә дькьн, бәр чʹәʹве һʹәмуйа шашийа ԝан бьдә рʹуйе ԝан, ԝәки бона йед дьн бьбә дәрс.* 21 Әз бәр Хԝәде, бәр Мәсиһ Иса у бәр мәләкед бьжарти тʹәмийе дьдьмә тә, ԝәки тӧ ван рʹебәрийа бини сери, ӧса кӧ нәди хатьра у фьрԛийе нәки ортʹа мәрьва.

22 Тʹӧ щар ләз нәкʹәвә кӧ дәсте хԝә дайни сәр кәсәки,* нә жи тʹәви гӧнед йед майин бә. Хԝә тʹәмьз хԝәй кә.

23 Жь вьр шунда тʹәне аве вәнәхԝә, ле һьнәки шәраве жи вәхԝә, сәва зьке* тә нәешә, чьмки тӧ тʹьме нәхԝәш дькʹәви.

24 Гӧнед һьнә мәрьва әшкәрә нә, у дәрберʹа бәрбь сущдаркьрьне дьбьн. Ле гӧнед һьнәка паше әшкәрә дьбьн. 25 Бь ви щурʹәйи, кьред ԛәнщ әшкәрә нә, у йед кӧ әшкәрә ниньн жи, ԝе вәшарти нәминьн.

6 Бьра хӧлам бь дьл у щан ԛәдьре ахайед хԝә бьгьрьн, кӧ тʹӧ кәс бь хьраби дәрһәԛа наве Хԝәде у һинкьрьна ԝи хәбәр нәдә. 2 Хенщи ԝе йәке, бьра хӧлам ахайед хԝәйә баԝәрмәнд беһӧрмәт нәкьн, чьмки әԝана бьред һәв ьн. Ләма бьра хӧлам һе зедә бь хирәт ахайед хԝәрʹа хьзмәт бькьн, чьмки йед кӧ жь хьзмәтийа ԝан кʹаре дьстиньн, кәсед баԝәрмәнд у бьред ԝанә дәлал ьн.

Бәрдәԝам кә ль гора ван тьшта һин кә у ԝан ширәта бьдә. 3 Һәрге кәсәк тьштәки дьн һин дькә у һинкьрьна рʹаст* йа Хӧдане мә Иса Мәсиһ, ԛәбул накә, йан жи һинкьрьнед кӧ нишан дькьн, ԝәки әм гәрәке Хԝәдерʹа хьзмәт кьн, 4 әԝ ԛӧрʹә йә у тʹӧ тьшти фәʹм накә. Әԝ нәхԝаше шәрʹ-дәʹԝа йә у жь бо хәбәра шәрʹа пешда тинә. Әв тьшт дьбьнә сәбәб кӧ чʹәʹвнәбари, шәрʹ,* бӧхдан, шькед хьраб 5 у шәрʹ-дәʹԝед бона тьштед бьчʹук пешда тен. Тьштед ӧса жь ԝан мәрьва пешда тен, һʹьше кʹижана хьраб буйә у жь рʹастийе дур кʹәтьнә, у йед кӧ дьфькьрьн ԝәки дькарьн жь хьзмәтийа Хԝәдерʹа тьштәки ԛазанщ кьн. 6 Һәмьки әме гәләк кʹәрәма бьстиньн, һәрге бь амьни Хԝәдерʹа хьзмәт кьн у рʹази бьн бь тьштед кӧ дәсте мәда һәнә. 7 Мә тьштәк нәанийә ве дьнйайе у әм нә жи дькарьн тьштәки жь ве дьнйайе хԝәрʹа бьвьн. 8 Ләма һәрге хԝарьн у кʹьнщед мә һәнә,* әм бь ԝан рʹази бьн.

9 Ле кәсед кӧ дьхԝазьн дәԝләти бьн, тенә щерʹьбандьне у дькʹәвьнә тʹәльке. Әԝана дькʹәвьн бәр байе хԝәстьнед ахмах у зийанкʹар, кʹижан кӧ мәрьва дьбьнә бәрбь ԛьрʹбуне у ԝеранбуне. 10 Чьмки пʹәрәһʹәзи кʹока һәр щурʹә хьрабийе йә. Һьнә мәрьв жь бо пʹәрәһʹәзийе жь рʹастийе дур кʹәтьнә у гәләк бәла анинә сәре хԝә.

11 Ле тӧ, хьзмәткʹаре Хԝәде,* жь ван тьшта бьрʹәвә у пәй рʹастийе, хьзмәтийа амьн, баԝәрийе, һʹәзкьрьне, сәбьре у мьлуктийе һәрʹә. 12 Бона баԝәрийе рʹьнд шәрʹ бькә у хԝә ԛәԝи ль гӧмана жийина һʹәта-һʹәтайе бьгьрә, чьмки тӧ бона ве гӧмане һати газикьрьне, у тә бәр гәләк шәʹда дәрһәԛа ве гӧмане әшкәрә хәбәр дайә.

13 Бәр Хԝәдайе кӧ жийине дьдә һәр тьшти у бәр Мәсиһ Иса, йе кӧ бәр Понтийо Пилато шәʹдәтикә ԛәнщ да, әз тʹәмийе дьдьмә тә: 14 Тӧ ве рʹебәрийе бь щурʹе беԛьсур бинә сери, кӧ тʹӧ кәс нькарьбә тә нәһәԛ дәрхә, һʹәта Хӧдане мә Иса Мәсиһ, 15 йе кӧ бәхтәԝар ә у Хԝәйиһʹӧкӧме мәзьн ә, ԝәхте хԝәда хӧйа бә. Әԝ Пʹадше пʹадшайа йә у Хӧдане хӧдана йә. 16 Тʹәне әԝ ә нәмьри, йе кӧ рʹонайикә ӧсада йә, кӧ тʹӧ кәс нькарә незик бә. У тʹӧ мәрьви әԝ нәдитийә у нькарә ԝи бьвинә. Бьра һӧрмәт у ԛәԝата һʹәта-һʹәтайе ԝирʹа бә. Амин.

17 Тʹәмийе бьдә кәсед кӧ ве дьнйайеда дәԝләти нә, ԝәки әԝана бабах нәбьн у гӧмана хԝә нәдьнә сәр һәбуке, кӧ иро һәйә, сьбе тʹӧнә йә. Ле бьра әԝана гӧмана хԝә бьдьнә сәр Хԝәде, йе кӧ бь мәрʹдани һʹәму тьшти дьдә мә, ԝәки әм ләзәте бьстиньн. 18 Ԝана һелан кә, ԝәки ԛәнщийе бькьн, бь кьред ԛәнщ дәԝләти бьн, мәрʹд бьн у пʹарәвәкьрьнерʹа жи һазьр бьн. 19 Бь ве йәке әԝана ԝе хԝәрʹа хьзне тʹоп кьн, демәк бона ахьрийе һʹиме баш дайньн. У ӧса ԝе бькарьбьн хԝә ԛәԝи ль жийина рʹаст бьгьрьн.

20 Тимотʹейойе мьни дәлал, чь кӧ тәрʹа һатийә тʹәсмилкьрьне, хԝәй кә. Хԝә дур бьгьрә жь хәбәрданед пʹучʹ, йед кӧ Хԝәде беһӧрмәт дькьн у жь дәрәԝед мьԛабьли рʹастийе, кʹижанарʹа «занәбун» те готьне. 21 Һьнә кәсед кӧ кʹәтьнә пәй занәбуна ӧса, тʹәрка баԝәрийа хԝә данә.

Бьра кʹәрәма Хԝәдейә мәзьн тʹәви ԝә бә!