НӘʹМА ДӦДА ТИМОТʹЕЙОРʹА

1 Әз, Паԝлос, йе кӧ бь ԛьрара Хԝәде у ль гора созе жийина кӧ бь сайа Мәсиһ Иса йә, бумә шандийе Мәсиһ Иса, 2 Тимотʹейорʹа, кӧрʹе хԝәйи дәлалрʹа дьньвисьм:

Бьра кʹәрәма Хԝәдейә мәзьн, амьни у әʹдьлайа Баве мә Хԝәде у Хӧдане мә Мәсиһ Иса тʹәви тә бә!

3 Шькьр Хԝәдерʹа, кʹижанирʹа әз мина кал-бавед хԝә хьзмәтийа пироз дькьм, у ве йәке бь исафа тʹәмьз дькьм. Әз шәв у рʹож дӧа-дьрозгед хԝәда тә бир тиньм. 4 Әз һесьред чʹәʹвед тә тиньм бира хԝә у һʹьзрәта ве йәке мә кӧ тә бьвиньм, ԝәки дьле мьн бь шабуне тʹьжә бә. 5 Әз баԝәрийа тәйә жь дьл* тиньм бира хԝә. Баԝәрийа ӧса пешийе бал пирька тә Лойисе у дийа тә Әйньке һәбу, у әз баԝәр ьм кӧ һʹәта ньһа әв баԝәрийа тә һәйә.

6 Ләма әз тиньм бира тә, ԝәки тӧ пʹешкʹеша Хԝәде мина агьр гӧрʹ ки, кʹижан кӧ тә станд, гава мьн дәсте хԝә дани сәр сәре тә. 7 Чьмки рʹӧһʹе пироз кӧ Хԝәде дьдә мә, нә кӧ тьрсе нав мәда пешда тинә, ле ԛәԝате, һʹәзкьрьне у сәрԝахтийе. 8 Ләма жи шәрм нәкә кӧ тӧ бона Хӧдане мә шәʹдәтийе дьди. У нә жи бона мьн шәрм кә, кӧ әз сәва хатьре Хӧдане мә кәледа мә. Ле һазьр бә бона мьзгинийе тәнгасийе бькʹьшини, у ве йәкеда хԝә бьсперә ԛәԝата Хԝәде. 9 Хԝәде әм хьлаз кьрьн у гази мә кьр, ԝәки әм бьбьнә кәсед пироз. Әԝи нә кӧ бона кьред мә, ле бона ԛьрар у кʹәрәма хԝәйә мәзьн гази мә кьрийә. Әв кʹәрәма мәзьн бь Мәсиһ Иса бәреда мәрʹа һатийә дайине. 10 Ле ньһа әв кʹәрәма мәзьн пе ве йәке һатә кʹьфше, кӧ Хьлазкʹаре мә Мәсиһ Иса әшкәрә буйә. Иса мьрьн кʹокева рʹакьр у бь сайа мьзгинийе мәрʹа әшкәрә кьр, ԝәки әм ча дькарьн жийине у бәдәна кӧ нарʹьзә, бьстиньн. 11 Бона ве мьзгинийе, әз ча мьзгинван, шанди у дәрсдар һатьмә кʹьфшкьрьне.

12 Ләма жи әз тәнгасийа дькʹьшиньм, ле әз шәрм накьм, чьмки әз Ԝи нас дькьм, баԝәрийа хԝә кʹижани тиньм. У әз баԝәр ьм ԝәки чь кӧ мьн тʹәсмили ԝи кьрийә, әԝ дькарә һʹәта Рʹожа Диԝане хԝәй кә. 13 Тӧ хԝә ль мәсәла* хәбәред сахләм бьгьрә, йед кӧ тә жь мьн бьһистьнә. У ве баԝәрийе у һʹәзкьрьна кӧ тә бь сайа йәктийа тʹәви Мәсиһ Иса ԛазанщ кьрийә, бьдә кʹьфше. 14 Бь аликʹарийа рʹӧһʹе пироз, кӧ нава мәда йә, ван тьштед ԛимәт хԝәй кә, йед кӧ тәрʹа һатьнә тʹәсмилкьрьне.

15 Тӧ зани, ԝәки һʹәму кәсед ль һәрема Асйайе пьшта хԝә данә мьн, ӧса жи Фугәло у Һермохенис. 16 Бьра Хӧдан рʹәʹма хԝә ль мала Онисифоро бинә, әԝи гәләк щара дьле мьн ԛәԝи кьр у шәрм нәдькьр кӧ әз гьрти бум. 17 У гава әз ль Рʹоме бум, әԝи бь хирәт әз дьгәрʹийам һʹәта әз дитьм. 18 Бьра Хӧдан Йаһоԝа Рʹожа Диԝане ль Онисифоро бе рʹәʹме. Тӧ рʹьнд зани кӧ әԝи ль Әфәсе бона мьн чьԛас тьшт кьрийә.

2 Кӧрʹе мьн, бәрдәԝам кә ԛәԝате бьстинә жь кʹәрәма мәзьн, йа кӧ Иса Мәсиһ һьндава тәда дьдә кʹьфше. 2 У тьштед кӧ тә бәр гәләк шәʹда жь мьн бьһистьнә, мәрьвед амьн һин кә, кӧ әԝана жи бькарьбьн ван тьшта кәсед дьн һин кьн. 3 Мина әскәрәки Мәсиһ Исайи ԛәнщ, бона тәнгасийед кӧ ԝе бенә сәре тә, һазьр бә. 4 Әскәре кӧ дьхԝазә дьле ԝи кәси рʹази кә, йе кӧ әԝ кьрийә әскәр, ԝе тʹӧ щар пәй шьхӧләки дьн нәкʹәвә, ԝәки пʹәра ԛазанщ кә. 5 Ләщеда тʹӧ кәс ԝе хәлате* нәстинә, һәрге ԛәйдед ләще хԝәй нәкә. 6 Щоткʹаре кӧ бь хирәт дьхәбьтә, бәре әʹрд гәрәке әԝ пешийе бьхԝә. 7 Тʹьме сәр гьлийед мьн бьфькьрә, у Хӧдан ԝе али тә бькә һәр тьшти фәʹм бьки.*

8 Бир нәкә ԝәки ль гора мьзгинийа кӧ әз бәла дькьм, Иса Мәсиһ жь мьрьне һатә рʹакьрьне у әԝ жь зӧрʹәта Даԝьд бу. 9 Бона ве мьзгинийе әз щәфе дькʹьшиньм у мина ԛачахәки пе зьнщира һатьмә гьредане. Ле хәбәра Хԝәде нькарә пе зьнщира бе гьредане. 10 Ләма жи әз бона хатьре йед бьжарти һәр тьшти тәйах дькьм, ԝәки әԝана жи бь йәктийа тʹәви Мәсиһ Иса хьлаз бьн у рʹумәта һәр-һәйи бьстиньн. 11 Әв гьли бь итʹбар ьн: Һәрге әм тʹәви ԝи мьрьнә, әме тʹәви ԝи бьжин жи. 12 Һәрге әм бәрдәԝам кьн тәйах кьн, әме тʹәви ԝи чаԝа пʹадша сәрԝертийе бькьн. Һәрге әм ԝи инкʹар кьн, әԝе жи мә инкʹар кә. 13 Һәрге әм амьн нәминьн жи, Хԝәде ԝе амьн бьминә, чьмки әԝ нькарә мьԛабьли хԝә һәрʹә.

14 Тʹьме ван тьшта бинә бира ԝан у бәр Хԝәде ԝана ширәт кә, ԝәки бона хәбәра һәврʹа нәкʹәвьнә дәʹԝе, чьмки кʹара ве йәке тʹӧнә у тʹәне зьраре дьдә гӧһдара. 15 Чь жь дәсте тә те бькә, кӧ Хԝәде жь тә рʹази бә, у бьби хәбаткʹарәки ӧса, йе кӧ тʹӧ мәʹнийа ԝи тʹӧнә шәрм бькә, у йе кӧ хәбәра Хԝәде* рʹаст һин дькә. 16 Хԝә жь хәбәрданед пʹучʹ, йед кӧ Хԝәде беһӧрмәт дькьн, дур бьгьрә, чьмки рʹуйе ве йәкеда хьраби һе зедә дьбә. 17 Хәбәрдана ӧса ԝе мина гангрене бәла бә. Һимәнайо у Фьлито жи нав ԝан мәрьвада ньн, йед кӧ ван хәбәрдана бәла дькьн. 18 Әԝ мәрьв жь рʹастийе дур кʹәтьнә у дьбежьн кӧ рʹабуна мьрийа ида буйә. Әԝана дьбьнә сәбәб, кӧ һьнә мәрьв баԝәрийа хԝә ӧнда дькьн. 19 Ле һʹиме кӧ Хԝәде данийә, ԛайим дьсәкьнә у әв мор сәр ә: «Йаһоԝа ԝан кәса нас дькә, йед кӧ пʹара ԝи нә», у «Бьра һәр кәсе кӧ гази наве Йаһоԝа дькә, хԝә жь нәһәԛийе дур бьгьрә».

20 Мала мәзьнда нә тʹәне фьраԛед* жь зерʹ у зив һәнә, ле фьраԛед жь дар у һʹәрʹийе жи һәнә. Һьнә фьраԛ бона дәрәщед мәхсус* тенә хәбьтандьне, ле һьнәк жи бона дәрәщед нәрʹумәти. 21 Һәрге кәсәк хԝә жь фьраԛед кӧ бона дәрәщед нәрʹумәти тенә хәбьтандьне, дур бьгьрә, әԝе бьбә мина фьраԛәкә кӧ бона дәрәщед мәхсус те хәбьтандьне. Әԝе бе пирозкьрьне, хԝәйе хԝәрʹа кʹаре бинә у бона һәр шьхӧле ԛәнщ һазьр бә. 22 Ләма жи, жь хԝәстьнед щаһьлтийе бьрʹәвә у тʹәви кәсед кӧ бь дьле тʹәмьз гази Хӧдан дькьн, пәй рʹастийе, баԝәрийе, һʹәзкьрьне у әʹдьлайе кʹәвә.

23 Ӧса жи хԝә жь дәʹԝ-дозед бекер у ахмах дур бьгьрә, чьмки тӧ зани кӧ әв йәк шәрʹ-дәʹԝа пешда тинә. 24 Хӧламе Хӧдан гәрәке шәрʹа нәкә, ле һьндава һʹәмуйада ԛәнщ бә* у һинкьрьнеда сәр хԝә бә. Хенщи ве йәке, гава хьраби ль ԝи те кьрьне, әԝ гәрәке хԝәгьртьне бьдә кʹьфше, 25 у бь нәрми йед мьԛабьл ширәт кә. Дьбәкә Хԝәде мәщале бьдә ԝан, кӧ тʹобә кьн у бьгьһижьнә занәбуна рʹаст дәрһәԛа рʹастийе. 26 Дьԛәԝьмә һьнге әԝана бенә сәр һʹьше хԝә у хьлаз бьн жь тʹәлька Мире-щьна, йе кӧ сахә-сах әԝана гьртьнә, ԝәки хԝәстьна ԝи биньн сери.

3 Ле ве йәке бьзаньбә кӧ рʹожед хьлазийеда* зәманед хьраб ԝе бен. 2 Чьмки мәрьв ԝе бьбьнә хԝәһʹәз, пʹәрәһʹәз, пʹайидар,* кʹӧбар, кʹьфьр, нә гӧрʹа де-бавада, бешекьр, нәамьн, 3 дьлсар, ԝе нәхԝазьн тʹәви кәсед дьн әʹдьлайеда бьн, бӧхданбеж, бе хԝәгьртьн, зӧлмкʹар, ԝе ԛәнщийе һʹәз нәкьн, 4 нәмам бьн, сәрһʹьшк, ԛӧрʹә, рʹьһʹәтиһʹәз, нә кӧ Хԝәдеһʹәз, 5 ԝе бьдьнә кʹьфше кӧ Хԝәдерʹа амьн ьн, ле кьред ԝан ԝе избат кьн, ԝәки әԝана амьн ниньн. Хԝә жь кәсед аһа дур бьгьрә. 6 Жь ԝана һьнәк бь фелбази дькʹәвьнә мала у зәфт дькьн жьнед сьст, йед кӧ бьн баре гӧнәда ньн, у пәй щурʹә-щурʹә хԝәстьна дькʹәвьн. 7 Әԝ жьн һәр гав һин дьбьн, ле диса жи тʹӧ щар нагьһижьнә занәбуна рʹастийе.

8 Чаԝа кӧ Йанис у Йамбрис мьԛабьли Муса рʹабун, ӧса жи әв мәрьв мьԛабьли рʹастийе рʹадьбьн. Һʹьше мәрьвед ӧса хьраб буйә, у Хԝәде ԝана ԛәбул накә, чьмки әԝана ль гора рʹастийе нажин. 9 Ле әԝана ԝе пешда нәчьн, чьмки бефәʹмтийа ԝан ԝе һʹәму мәрьварʹа әʹйан бә, чаԝа йа ԝан дӧ мера. 10 Ле тә хԝә ль һинкьрьна мьн, рʹабун-рʹуньштьн у нета мьн гьртийә, ӧса жи тә чʹәʹв дайә баԝәри, сәбьр, һʹәзкьрьн у тәйаха мьн. 11 Тӧ рʹьнд зани кӧ әз ль Әнтакйайе, Конйайе у Листрайе рʹасти чь зерандьн у щәфа һатьм. Мьн нава ван тәнгасийада сәбьр кьр, у Хӧдан әз жь ԝан һʹәму тьшта хьлаз кьрьм. 12 Бәле, һʹәму шагьртед Мәсиһ Иса, йед кӧ дьхԝазьн Хԝәдерʹа бь амьни хьзмәт кьн, ԝе бенә зерандьне. 13 Ле мәрьвед хьраб у хапинок ԝе хьрабийеда һе пешда һәрʹьн, мәрьва бьхальфиньн у хԝәха жи бьхальфьн.

14 Ле тӧ бәрдәԝам кә нава ван тьштада бьминә, чь кӧ тӧ һин буйи у чьда избат буйи. Чьмки тӧ зани жь кʹе һин буйи, 15 у тӧ жь зарʹотийа хԝәда Ньвисаред Пироз зани, йед кӧ дькарьн тә билан кьн, ԝәки бь сайа баԝәрийа хԝәйә һьндава Мәсиһ Иса хьлаз би. 16 Тʹәмамийа Ньвисаред Пироз жь бина бәр Хԝәде һатьнә ньвисаре у керһати нә бона һинкьрьне, леһьлатьне, рʹасткьрьне у ширәткьрьна рʹийа рʹастийеда, 17 ԝәки хьзмәткʹаре Хԝәде бона һәр шьхӧле ԛәнщ бь тʹәмами һʹәму алийава һазьр бә.

4 Гава Мәсиһ Иса хӧйа бә у Пʹадшатийа хԝәда сәрԝертийе бькә, әԝе диԝана саха у мьрийа бькә. Әз бәр Хԝәде у бәр Мәсиһ Иса тʹәмийе дьдьмә тә: 2 Хәбәра Хԝәде әʹлам кә. Ве йәке тӧ бь хирәт бькә һьм рʹожед башда, һьм жи рʹожед чәтьнда. Бь тʹәмамийа сәбьре у ча дәрсдарәки баш мәрьва рʹаст кә, шашийед ԝан бьдә рʹуйе ԝан у һелана бьдә ԝан. 3 Чьмки ԝәхт ԝе бе кӧ мәрьв һинкьрьна рʹаст* ԛәбул нәкьн, ле ԝе хԝәстьнед дьле хԝәрʹа дәрсдаред ӧса бьщьвиньн, йед кӧ тьштед ль гӧһе ԝан хԝәш тен, һин кьн. 4 Әԝана ԝе ида гӧһ нәдьнә рʹастийе у бькʹәвьнә пәй чʹирʹока. 5 Ле тӧ һәр тьштида сәр һʹьше хԝә бьминә, тәйах кә, мьзгинийе бәла кә* у хьзмәтийа хԝә рʹьнд бинә сери.

6 Чьмки әз мина пʹешкʹеша рʹьжандьне сәр ԛӧрбангәһе темә рʹетьне, у ԝәʹде чуйина мьн гәләк незик ә. 7 Мьн рʹьнд шәрʹ кьр, рʹәва хԝә хьлаз кьр, у баԝәрийа хԝә хԝәй кьр. 8 Хӧдан, йе кӧ һʹакьме һәԛ ә, ида һазьр ә тʹащ бьдә мьн. Әв тʹащ бона кәсед рʹаст ә. У Хӧдан ԝе әви тʹащи рʹожа диԝанеда чаԝа хәлат бьдә мьн. Әԝе ве хәлате нә тʹәне бьдә мьн, ле ԝе ӧса жи бьдә һʹәму кәсед кӧ һʹьзрәта хӧйабуна ԝи нә.

9 Чь жь дәсте тә те бькә, ԝәки зу бейи щәм мьн. 10 Чьмки Димас әв дьнйа һʹәз кьр у әз һиштьм чу Тʹесалонике. Кьрәскис чу Галатйайе, Тито жи чу Далмәтйайе. 11 Тʹәне Луԛа щәм мьн ә. Маркос тʹәви хԝә бинә, чьмки әԝ хьзмәтийеда кери мьн те. 12 Мьн Тьхико шандә Әфәсе. 13 Гава тӧ бейи, тʹәви хԝә пʹоте* мьн бинә, кʹижан кӧ мьн Тройайеда бал Карпос һиштьбу. Ӧса жи кʹьтебед гӧломәтккьри, илаһи йед чʹәрм, хԝәрʹа бинә.

14 Скәндәре сьфьркәр мьнрʹа гәләк хьраби кьр. Йаһоԝа ԝе ԝәкә кьред ԝи бинә пешийа ԝи. 15 Тӧ жи хԝә жь ԝи бьпʹарезә, чьмки әԝ гәләк мьԛабьли готьнед мә рʹабу.

16 Щара пешьн, гава мьн хԝә дьпʹараст, кәсәки пьшта мьн нәгьрт, һʹәмуйа әз һиштьм чун. Бьра әв йәк ԝанрʹа гӧнә нәйе һʹәсабе! 17 Ле Хӧдан кʹеләка мьн дьсәкьни у ԛәԝат дьда мьн, кӧ әз бькарьбьм хьзмәтийа хԝә бь тʹәмами биньм сери, ԝәки һʹәму мьләт мьзгинийе бьбьһен. У Хӧдан әз жь дәве шер хьлаз кьрьм. 18 Әԝе мьн жь һәр тьште хьраб аза кә у ԝе мьн бона Пʹадшатийа хԝәйә әʹзмани хьлаз кә. Бьра һʹәта-һʹәтайе ԝирʹа рʹумәт бе дайине. Амин.

19 Алийе мьнда Прискайе у Әкила, ӧса жи мала Онисифоро сьлав кә.

20 Ерасто Корьнтʹеда ма. У мьн Трофимо Миләтоседа һишт, чьмки әԝ нәхԝәш бу. 21 Чь жь дәсте тә те бькә, ԝәки тӧ пешийа зьвьстане бейи бал мьн.

Әйбуло тә сьлав дькә. Ӧса жи Пудес, Линос, Клаԝдийа у һʹәму бьра жи тә сьлав дькьн.

22 Бьра Хӧдан тʹәви тә бә бона ви рʹӧһʹи, кʹижани тӧ дьди кʹьфше. У бьра кʹәрәма ԝийә мәзьн сәр тә бә.