НӘʹМА ТИТОРʹА

1 Әз Паԝлос, хӧламе Хԝәде у шандийе Иса Мәсиһ мә. Баԝәри у хьзмәтийа мьн ль гора баԝәрийа бьжартийед Хԝәде йә. Һьм жи баԝәри у хьзмәтийа мьн ль гора занәбуна рʹаст ә, кӧ амьнийа һьндава Хԝәдева гьредайи йә 2 у сәр һʹиме гӧмана жийина һʹәта-һʹәтайе йә. Хԝәдайе кӧ нькарә дәрәԝа бькә, һе дәԝред бәреда әв гӧман соз дайә. 3 (Ле әԝи ԝәʹде хԝәйи кʹьфшкьрида, хәбәра хԝә бь сайа бәлакьрьна мьзгинийе әʹйан кьрийә, мьзгинийа кӧ әԝи тʹәсмили мьн кьрийә. Әв йәк ль гора тʹәмийа Хьлазкʹаре мә Хԝәде бу.) 4 Әз ве нәʹме Титорʹа дьньвисьм, йе кӧ һәвал-баԝәрмәнде мьн ә у ча кӧрʹе мьни һʹәлал ә:

Бьра кʹәрәма мәзьн у әʹдьлайа Баве мә Хԝәде у Хьлазкʹаре мә Мәсиһ Иса сәр тә бә!

5 Мьн тӧ Кьретайеда һишти, ԝәки тьштед кӧ гәрәке бенә рʹасткьрьне, рʹаст ки у чаԝа мьн тʹәми ль тә кьрьбу, һәр бажарәкида рʹуспийа кʹьфш ки. 6 Рʹуспи гәрәке йәки ӧса бә, кӧ тʹӧ кәс нькарьбә ԝи нәһәԛ дәрхә, у тʹәне мере жьнәке бә. Ӧса жи зарʹед ԝи гәрәке баԝәрмәнд бьн у ча кәсед бь рʹабун-рʹуньштьна нәщайиз у мьԛабьл нәйенә нәһәԛкьрьне. 7 Чьмки бәрпьрсийар чаԝа хьзмәткʹаре Хԝәде, гәрәке йәки ӧса бә кӧ тʹӧ кәс нькарьбә ԝи нәһәԛ дәрхә. Әԝ гәрәке сәрһʹьшк* нибә, зу һерс нәкʹәвә, бь зедәйи ичкә вәнәхԝә, зордар нибә* у пәй кʹәда һʹәрам нәкʹәвә. 8 Ле әԝ гәрәке меванһʹәз бә, ԛәнщийе һʹәз бькә, аԛьлда гьран бә, мәрьвәки рʹаст бә, амьн бә у хԝәгьрти бә. 9 Гава әԝ һин дькә, гәрәке хԝә ль хәбәра Хԝәде бьгьрә, ԝәки бькарьбә бь сайа һинкьрьна рʹаст* һьм дьл бьдә, һьм жи шашийед мьԛабьла бьдә рʹуйе ԝан.

10 Чьмки гәләк кәс мьԛабьл, зьмандьреж у дәрәԝин ьн, илаһи әԝед кӧ пьштгьред сьнәткьрьне нә. 11 Мәрьвед ӧса гәрәке бьдьнә кәрʹкьрьне, чьмки әԝана мала хьраб дькьн, тьштед кӧ гәрәке нәйенә һинкьрьне, һин дькьн, у ве йәке бона кʹара хԝәйә һʹәрам дькьн. 12 Мәрьвәки Кьрети, йе кӧ хут пʹехәмбәрәки ԝан бу, ӧса гот: «Кьрети һәр гав дәрәԝа дькьн, әԝана мина һʹәйԝанед бәйанийә хоф ьн у пʹьрʹхӧред тʹәмбәл ьн».

13 Әв гьли рʹаст ьн. Ләма жи сәрт ԝана ширәт кә, ԝәки баԝәрийеда сахләм бьн, 14 у гӧһ нәдьнә чʹирʹокед Щьһуйа у тʹәмийед ԝан мәрьва, йед кӧ пьшта хԝә дьдьнә рʹастийе. 15 Бона мәрьвед паԛьж һәр тьшт паԛьж ә. Ле бона мәрьвед нәпаԛьж у бебаԝәр, тʹӧ тьшт паԛьж нинә, чьмки һьм һʹьше ԝан, һьм жи исафа ԝан һʹәрʹьми йә. 16 Әԝана бәр мәрьва дьбежьн кӧ Хԝәде нас дькьн, ле бь кьред хԝә, ԝи инкʹар дькьн, чьмки әԝана һʹәрам у нәгӧһдар ьн, у һәр кьрьнәкә ԛәнщрʹа бекер ьн.

2 Ле тӧ бәрдәԝам кә ль гора һинкьрьна рʹаст* хәбәр дә. 2 Бьра меред әʹмьрда мәзьн һәр тьштида хԝәгьрти, маԛул, аԛьлда гьран, баԝәрийеда ԛәԝи, бь сәбьр у бь һʹәзкьрьне бьн. 3 Бь ԝи щурʹәйи, бьра рʹабун-рʹуньштьна жьнед әʹмьрда мәзьн жи лайиԛ бә, бӧхданбеж нибьн у пәй шәраве нәкʹәвьн,* ле бьра тьштед ԛәнщ һин кьн, 4 ԝәки жьнед щаһьл ширәт кьн, кӧ әԝана меред хԝә у зарʹед хԝә һʹәз бькьн, 5 аԛьлда гьран бьн, нав-намус бьн, шьхӧлед мале бькьн, һʹәйф бьн у гӧрʹа мере хԝәда бьн, ԝәки хәбәра Хԝәде нәйе беһӧрмәткьрьне.

6 Ӧса жи хорта ширәт кә, ԝәки аԛьлда гьран бьн, 7 у тӧ бь кьред хԝәйә ԛәнщ һәр тьштида бьбә мәсәләкә баш. Бь һʹәлалийе у маԛулийе һин кә.* 8 Бьра хәбәрдана тә керһати бә,* ԝәки ломә ле нәйе кьрьне. Һьнге кәсед кӧ мьԛабьли мә рʹадьбьн ԝе шәрми бьн, чьмки ԝе нькарьбьн тьштәки хьраб сәр мә бежьн. 9 Бьра хӧлам һәр тьштида гӧрʹа ахайед хԝәда бьн, хирәт кьн кӧ ԝана хԝәш бен, мьԛабьли готьнед ԝан рʹанәбьн 10 у тʹӧ тьшти жь ԝан нәдьзьн, ле ԝанрʹа бьдьнә кʹьфше кӧ әԝана бь рʹасти кәсед бь итʹбар ьн. Бь ви щурʹәйи, әԝана ԝе һинкьрьнед Хьлазкʹаре мә Хԝәде һәр алийава бьхәмьлиньн.

11 Чьмки кʹәрәма Хԝәдейә мәзьн бона хьлазбуна һʹәму мәрьва хӧйа бу. 12 Әв кʹәрәма ԝийә мәзьн мә һин дькә, кӧ әм хьрабийе у хԝәстьнед ве дьнйайе инкʹар кьн, ве дьнйайеда аԛьлда гьран бьн, мәрьвнә рʹаст бьн у хьзмәтийа Хԝәдеда амьн бьминьн. 13 У әм һивийа ве йәке нә, кӧ гӧмана мәйә пʹьрʹ баш бе сери, у Хԝәдайе мәйи мәзьн у Хьлазкʹаре мә Иса Мәсиһ рʹумәтеда хӧйа бьн. 14 Мәсиһ әʹмьре хԝә бона мә да, ԝәки мә жь һәр щурʹә нәһәԛийе хьлаз кә у бона хԝә щьмәʹтәке паԛьж кә, кӧ бьбә йа ԝи. Әв щьмәʹта ԝийә мәхсус ә, кʹижан кӧ бь дьл у щан ԛәнщийе дькә.

15 Һәр гав ван тьшта һин кә, ширәт кә у тʹәмийа бьдә, у ве йәке ль гора һʹӧкӧме кӧ тәрʹа һатийә дайине, бькә. Бьра тʹӧ кәс хԝә сәр тәрʹа нәгьрә.

3 Бәрдәԝам кә бькә бира хушк-бьра кӧ гӧрʹа сәрԝер у һʹӧкӧмәтада бьн, гӧһдарийа ԝан бькьн у бона һәр шьхӧле ԛәнщ һазьр бьн. 2 Бьра әԝана сәр тʹӧ кәси хьраб хәбәр нәдьн у шәрʹуд нибьн, ле бьра маԛул бьн у тʹәви һʹәму мәрьва нәрм бьн. 3 Чьмки бәре әм жи бефәʹм у нәгӧһдар бун, дьһатьнә хапандьне у әм хӧламед щурʹә-щурʹә кʹеф у хԝәстьна бун. Ӧса жи мә хьраби у һʹәвсуди дькьр, әм мәрьвнә мьрʹдарʹ бун у мә һәвдӧ нәфрʹәт дькьр.

4 Ле Хьлазкʹаре мә Хԝәде инсанәтерʹа ԛәнщи у һʹәзкьрьна хԝә нишан кьрийә. 5 Әԝи әм хьлаз кьрьн, нә кӧ бона кьред мәйи рʹаст, ле жь бо рʹәʹма хԝә. Әԝи әм паԛьж кьрьн, ԝәки әм жийина ну бьстиньн, у әԝи әм бь сайа рʹӧһʹе хԝәйи пироз ну кьрьн, бь ви щурʹәйи әм хьлаз кьрьн. 6 Әԝи пе Хьлазкʹаре мә Иса Мәсиһ, әв рʹӧһʹ бь мәрʹдани сәр мәда баранд, 7 ԝәки әм пе кʹәрәма ԝийә мәзьн рʹаст бенә һʹәсабе у паше ль гора гӧмана жийина һʹәта-һʹәтайе бьбьнә хԝәйе ԝар.

8 Әв готьн бь итʹбар ьн, у әз дьхԝазьм кӧ тӧ һәр гав бәʹса ван бьки, ԝәки кәсед кӧ баԝәрийа хԝә Хԝәде анинә, һʹьш-аԛьле хԝә бьдьнә сәр ве йәке кӧ кьред ԛәнщ бькьн. Әв тьшт бона мәрьва ԛәнщ у керһати нә.

9 Ле тӧ хԝә жь дәʹԝ-дозед бефәʹми, жь лекʹолина дәрһәԛа рʹькʹьнйата, жь һәврʹькийе у жь шәрʹ-дәʹԝед дәрһәԛа Ԛануне дур бьгьрә, чьмки әԝ пʹучʹ у вала нә. 10 Мәрьве кӧ һинкьрьнед ԛәлп бәла дькә, щарәке ширәт кә, щара дӧда жи, у һәрге әԝ гӧһ нәдә тә паше ԝи инкʹар кә. 11 Чьмки тӧ зани ԝәки йе ӧса жь рʹийа рʹаст дәркʹәтийә, гӧнә дькә, у әԝ хԝәха диԝане сәр хԝәда тинә.

12 Гава әз Артәмас у Тьхико бьшиньм бал тә, һәр тьшти бькә, ԝәки бейи Никополисе бал мьн, чьмки мьн сафи кьрийә кӧ әз зьвьстане ԝедәре дәрбаз кьм. 13 Зенасе ԛанунзанрʹа у Аполосрʹа чь лазьм ә бьдә ԝан, ԝәки рʹеԝитийа хԝәда кемасийа тьштәки нәвиньн. 14 Бьра бьред мә жи һин бьн ԛәнщийе бькьн у гава һʹәԝщәтийа мәзьн һәбә, аликʹарийе бьдьн, ԝәки хьзмәтийа ԝан бебәр нибә.

15 Һʹәмуйед кӧ тʹәви мьн ьн, тә сьлав дькьн. Алийе мьнда кәсед кӧ мә һʹәз дькьн у баԝәрийеда ньн, сьлав кә.

Бьра кʹәрәма мәзьн сәр ԝә һʹәмуйа бә!