НӘʹМА ИБРАНИЙАРʹА

1 Ԝәʹде бәре Хԝәде гәләк щара у бь гәләк щурʹа, пе пʹехәмбәра кал-бавед мәрʹа хәбәр дьда. 2 Ле ньһа хьлазийа ԝан рʹожада, әԝи пе Кӧрʹе хԝә тʹәви мә хәбәр да, бь кʹижани һәр тьштед ль әʹзмен у сәр рʹуйе әʹрде чекьрийә, у әԝ кьрийә ԝаре һәр тьшти. 3 Әв Кӧрʹ шәԝԛа рʹумәта Хԝәде йә у сурәте ԝи йә, әԝ бь ԛәԝата хәбәра Хԝәде һәр тьшти дьгьрә. У чахе әԝи әм жь гӧнед мә паԛьж кьрьн, ль әʹзмен алийе мьле рʹасте йе Хԝәдайе Мәзьн рʹуньшт. 4 Бь ви щурʹәйи әԝ жь мәләка бьльндтьр буйә, чьмки наве кӧ әԝи ча ԝар стандийә, сәр наве мәләкарʹа йә.

5 Мәсәлә, Хԝәде ԛә кʹәнге мәләкәкирʹа готийә: «Тӧ кӧрʹе мьн и; иро әз бумә баве тә»? Йан жи: «Әзе бьбьмә баве ԝи, у әԝе бьбә кӧрʹе мьн»? 6 Ле дәрһәԛа ԝи ԝәхти, чахе әԝ диса Ньхӧрийе хԝә бьшинә сәр әʹрде, әԝ дьбежә: «Бьра һʹәму мәләкед Хԝәде сәре хԝә бәр ԝи дайньн».

7 Хԝәде дәрһәԛа мәләка ӧса дьбежә: «Әԝ мәләкед хԝә дькә рʹӧһʹед ԛәԝи, у хьзмәткʹаред хԝә дькә алава агьр». 8 Ле дәрһәԛа Кӧрʹ әԝ дьбежә: «Хԝәде ԛәԝате дьдә дәсте тә,* ԝәки тӧ һʹәта-һʹәтайе пʹадшатийе бьки, у пʹадшатийа тә ԝе бь һәԛи сәрԝертийе бькә. 9 Тә рʹасти һʹәз кьр у беԛануни нәфрʹәт кьр. Ләма жи Хԝәде, Хԝәдайе тә, рʹуне шабуне һе зедә рʹетә сәр тә, нә кӧ сәр пʹадшед дьн». 10 У ӧса жи те готьне: «Йа Хӧдан, дәстпекеда тә һʹиме әʹрде дани, у әʹзман кьред дәстед тә нә. 11 Әԝана ԝе бәтавәбьн, ле тӧйе бьмини, у әԝана ԝе мина кʹьнщ бьмашьн. 12 Тӧйе ԝана мина пʹот* ль һәв бьпʹечʹи, у мина кʹьнща бьгӧһези. Ле тӧ диса әԝ и, у салед тә ԝе ԛә хьлаз нәбьн».

13 Ле Хԝәде ԛә кʹәнге мәләкәкирʹа готийә: «Алийе мьле мьни рʹасте рʹуне, һʹәта кӧ әз дьжмьнед тә бькьмә бьн пʹийед тә»? 14 Һʹәму мәләк рʹӧһʹ ьн у Хԝәдерʹа хьзмәт дькьн. Хԝәде ԝана дьшинә, ԝәки әԝана ԝанрʹа хьзмәт кьн, йед кӧ ԝе хьлаз бьн.

2 Ләма жи әм гәрәке һе зедә дина хԝә бьдьнә тьштед кӧ мә бьһистьнә, сәва кӧ әм тʹӧ щар жь рʹе дәрнәкʹәвьн. 2 Чьмки хәбәра кӧ бь мәләка һатьбу дайине, сахләм бу, у һәр кәсе кӧ хԝә ль ԛануне нәдьгьрт у гӧһдар нибу, бь һәԛи щәзайе хԝә дьстанд. 3 Ижа әме чаԝа хьлаз бьн, һәрге әм әв хьлазбуна мәзьн бәр тьштәки һʹәсаб нәкьн? Чьмки Хӧдане мә дәстпекеда дәрһәԛа ве хьлазбуне дьгот, у гьлийед ԝи жь алийе кәсед кӧ ԝи бьһистьн, һатьнә избаткьрьне. 4 У Хԝәде жи шәʹдәтийа ве йәке да бь нишан, кʹәрәмәт, щурʹә-щурʹә кьред ԛәԝи у бь ԝе йәке кӧ әԝи рʹӧһʹе пироз ль гора ԛьрара хԝә бәла кьр.

5 Хԝәде сәрԝертийа сәр әʹрде, йа кӧ ахьрийеда ԝе бе у дәрһәԛа кʹижане әм гьли дькьн, нәда дәсте мәләка. 6 Ле щарәке шәʹдәки ӧса гот: «Мәрьв чь йә, ԝәки тӧ ԝи тини бира хԝә, йан кӧрʹе инсен чь йә, кӧ тӧ бона ԝи хәм дьки? 7 Тә әԝ жь мәләка һьнәки ньмьзтьр кьр. Тә тʹаще һӧрмәт у рʹумәте дани сәр сәре ԝи, у тә кьред дәсте хԝә тʹәсмили ԝи кьр. 8 Тә һәр тьшт кьрә бьн һʹӧкӧме ԝи».* Гава Хԝәде һәр тьшт кьрә бьн һʹӧкӧме ԝи, ида тʹӧ тьшт нәма кӧ бькә бьн һʹӧкӧме ԝи. Бәле әм һе навиньн, кӧ һәр тьшт бьн һʹӧкӧме ԝида нә. 9 Ле әм дьвиньн ԝәки Исайе кӧ һьнәки жь мәләка ньмьзтьр бу, ньһа тʹаще һӧрмәт у рʹумәте сәр сәре ԝи йә, чьмки әԝи щәфа кʹьшанд у мьр. Әԝ бь кʹәрәма Хԝәдейә мәзьн, бона һʹәмуйа мьр.*

10 Һʹәму тьшт бона Хԝәде йә у бь сайа ԝи һәнә. У сәва кӧ әԝ гәләк кӧрʹед хԝә бәрбь рʹумәте бьвә, әԝи рʹаст һʹәсаб кьр, ԝәки Сәроке хьлазбуна ԝан бь щәфакʹьшандьне бькә йәки кʹамьл. 11 Йе кӧ пироз дькә* у йед кӧ тенә пирозкьрьне, баве ԝан йәк ә. Бона ве йәке әԝ шәрм накә ԝанрʹа бежә «бьред мьн». 12 У әԝ дьбежә: «Әзе бьред хԝәрʹа дәрһәԛа наве тә гьли кьм. Әзе нав щьватеда пе кʹьлама пәсьне тә бьдьм». 13 Әԝ ӧса жи дьбежә: «Әзе баԝәрийа хԝә ԝи биньм». У диса дьбежә: «Ва әз у зарʹед кӧ Йаһоԝа данә мьн».

14 Чаԝа кӧ «зарʹ» мәрьв ьн,* Иса жи бу мәрьв, ԝәки бь сайа мьрьна хԝә, ԝи кәси кʹӧта кә, йе кӧ мьрьн ани дьнйайе, демәк Мире-щьна, 15 сәва кӧ һʹәму кәсед кӧ жь тьрса мьрьне тʹәмамийа әʹмьре хԝә хӧлам бун, аза кә. 16 Чьмки әԝ нәһат кӧ али мәләка бькә, ле әԝ һат ԝәки али зӧрʹәта Бьраһим бькә. 17 Ләма жи лазьм бу кӧ әԝ һәр тьштида бьбуйа мина «бьред» хԝә, сәва кӧ хьзмәтийа Хԝәдеда бьбуйа кʹаһине мәзьн йе рʹәʹм у амьн. У бь ви щурʹәйи әԝи ԝе бькарьбуйа бона гӧнед щьмәʹте ԛӧрбанәке бьдә, ԝәки тʹәви Хԝәде ль һәв бен. 18 У чьмки әԝ хԝәха һатә щерʹьбандьне у щәфа кʹьшанд, әԝ дькарә аликʹарийе бьдә кәсед кӧ тенә щерʹьбандьне.

3 Ләма жи, һун, бьред пироз кӧ һатьнә газикьрьне* ԝәки һәрʹьн сәр әʹзмана, бьфькьрьн дәрһәԛа шанди у кʹаһине мәзьн, демәк Иса, кʹижани әм ԛәбул дькьн. 2 Чаԝа Муса амьн бу, гава мала Хԝәдеда хьзмәт дькьр, Иса жи Хԝәдерʹа, йе кӧ әԝ кʹьфш кьр, амьн бу. 3 Ле Иса жь Муса зедәтьр һежайи рʹумәте йә, чьмки йе кӧ мале ава дькә, жь ве мале зедәтьр һежайи рʹумәте йә. 4 Һәмьки һәр мал бь дәсте кәсәки те авакьрьне, ле йе кӧ һәр тьшт чекьрийә,* Хԝәде йә. 5 Муса мала Хԝәдеда хьзмәткʹарәки амьн бу. Хьзмәтийа ԝи шәʹдәти да бона тьштед кӧ ԝе паше әшкәрә бенә готьне. 6 Ле Мәсиһ кӧрʹе амьн бу, йе кӧ сәр мала Хԝәдерʹа һатьбу кʹьфшкьрьне. Һәрге әм бәрдәԝам кьн бь мерхаси хәбәр дьн у һʹәта хьлазийе хԝә ԛайим ль гӧмане бьгьрьн, әм мала Хԝәде нә.

7 Ләма жи рʹӧһʹе пироз дьбежә: «Иро, һәрге һун дәнге ԝи бьбьһен, 8 дьле хԝә һʹьшк нәкьн, чаԝа кал-бавед ԝә гәләк һерса мьн рʹакьрьн, ль рʹожа кӧ бәрʹийеда әз щерʹьбандьм. 9 Ԝана 40 сали кьред мьн дьдит, ле йәкә ԝедәре әз дьщерʹьбандьм. 10 Бона ве йәке әв ньсьл бәр чʹәʹве мьн һʹәрам бу у мьн гот: ‹Әԝана тʹьме дьле хԝәда жь мьн дур дькʹәвьн, у ԝана рʹийед мьн нас нәкьрьнә›. 11 Ләма жи мьн жь һерсе сонд хԝар: ‹Әԝана ԝе нәкʹәвьнә нав рʹьһʹәтийа мьн›».

12 Бьрано, һаж хԝә һәбьн, ԝәки ӧса нәбә кӧ нава ԝәда дьләки хьраб у нәбаԝәр һәбә, кӧ пьшта хԝә бьдә Хԝәдейе сах. 13 Ле һун бәрдәԝам кьн һәр рʹож дьл бьдьнә һәв, һʹәта кӧ әԝ ԝәʹдә һе һәйә, кʹижанерʹа «Иро» те готьне, ԝәки тʹӧ кәс жь ԝә сәрһʹьшк нәбә жь бо гӧне кӧ дькарә ԝә бьхапинә. 14 Һәрге әм чаԝа дәстпекеда, һʹәта хьлазийе хԝә ԛәԝи ль ԝе баԝәрийе бьгьрьн, тʹәне һьнге әме бьбьнә һәвпʹаред Мәсиһ. 15 Чаԝа кӧ һатийә готьне: «Иро, һәрге һун дәнге ԝи бьбьһен, дьле хԝә һʹьшк нәкьн, чаԝа кал-бавед ԝә гәләк һерса мьн рʹакьрьн».

16 Әԝ кʹи бун кӧ дәнге Хԝәде бьһистьн у диса жи һерса ԝи рʹакьрьн? Әԝ һʹәму нибун, йед кӧ бь рʹебәрийа Муса жь Мьсьре дәркʹәтьбун? 17 У кʹи 40 сали бәр чʹәʹве Хԝәде һʹәрам бу? Нә әԝ бун, йед кӧ гӧнә дькьрьн у бәрʹийеда мьрьн? 18 У әԝи кʹерʹа сонд хԝар кӧ әԝана ԝе нәкʹәвьнә нав рʹьһʹәтийа ԝи? Нә әԝи нәгӧһдарарʹа сонд хԝар? 19 Дә ижа әм дьвиньн кӧ әԝана жь бо нәбаԝәрийа хԝә нькарьбун бькʹәтана нав рʹьһʹәтийа ԝи.

4 Һʹәта кӧ созе дәрһәԛа кʹәтьна нав рʹьһʹәтийа Хԝәде һе ԛәԝатеда нә, ԝәрен әм һаж хԝә һәбьн,* кӧ тʹӧ кәс жь мә ви сози ӧнда нәкә. 2 Чьмки чаԝа кӧ ԝанрʹа мьзгини һатьбу дайине, мәрʹа жи һатийә дайине. Ле бәле, готьнед кӧ ԝана бьһист бона ԝан бекер бун, чьмки баԝәрийа ԝан, нә мина баԝәрийа мәрьвед гӧһдар бу. 3 Ле әм, йед кӧ баԝәр дькьн, дькʹәвьнә нав рʹьһʹәтийа ԝи. Ле дәрһәԛа кәсед нәгӧһдар Хԝәде ӧса гот: «Ләма мьн жь һерсе сонд хԝар: ‹Әԝана ԝе нәкʹәвьнә нав рʹьһʹәтийа мьн›». Рʹаст ә кьред Хԝәде жь ԝәхте әʹфьрандьна дьнйайе хьлаз бьбун, ле йәкә әԝи әв йәк гот. 4 Ньвисарада дәрһәԛа рʹожа һʹәфта әԝи ӧса гот: «У Хԝәде рʹожа һʹәфтада жь һʹәму шьхӧлед хԝә рʹьһʹәт бу». 5 У диса әԝ дьбежә: «Әԝана ԝе нәкʹәвьнә нав рʹьһʹәтийа мьн».

6 Кʹижанарʹа мьзгини пешийе һатьбу бәлакьрьне, нәкʹәтьнә нав рʹьһʹәтийа Хԝәде, чьмки нәгӧһдар бун. Ле һьнә кәс һе дькарьн бькʹәвьнә нав рʹьһʹәтийа ԝи. 7 Пәй гәләк ԝәхтрʹа бона ве йәке Хԝәде диса рʹожәкә дьн кʹьфш дькә, кӧ зәбура Даԝьдда дьбежә «Иро». Чаԝа кӧ бәре ве нәʹмеда һатийә готьне: «Иро, гава һун дәнге ԝи бьбьһен, дьле хԝә һʹьшк нәкьн». 8 Һәрге Йешу әԝана бьвьрана бәрбь ве рʹьһʹәтийе, һьнге Хԝәде ԝе бәʹса рʹожәкә дьн нәкьра. 9 Ләма жи бона щьмәʹта Хԝәде, рʹьһʹәтийа рʹожа Шәмийе* һе ԛәԝатеда дьминә. 10 Кәсе кӧ дькʹәвә нава рʹьһʹәтийа Хԝәде, әԝ жи жь шьхӧлед хԝә рʹьһʹәт дьбә, чаԝа кӧ Хԝәде жь шьхӧлед хԝә.

11 Ләма ԝәрен чь жь дәсте мә те әм бькьн, кӧ бькʹәвьнә нава рʹьһʹәтийа Хԝәде, ԝәки тʹӧ кәс жь мә нәкʹәвә сәр рʹийа нәгӧһдарийе. 12 Хәбәра Хԝәде сах у зор ә, у жь һәр шуре дӧдәви тужтьр ә. Әԝ һәла һе жи дькʹәвә нава щан у рʹӧһʹ, мовьк у мәжийе һәстийа у ԝана жь һәв вәдьԛәтинә, у дькарә фькьр у нетед дьла тедәрхә. 13 Тʹӧ кәс у тʹӧ тьшт бәр чʹәʹве Хԝәде вәшарти нинә. Ле һәр тьшт бәр чʹәʹве ԝи вәкьри у әшкәрә йә, бәр кʹижани әме щаба хԝә бьдьн.

14 Чьмки кʹаһине мәйи мәзьн у бьльнд, Иса, Кӧрʹе Хԝәде йә у әԝ чу әʹзмана, ләма жи ԝәрен әм бәрдәԝам кьн дәрһәԛа баԝәрийа хԝәйә һьндава ԝида гьли кьн. 15 Кʹаһине мәйи мәзьн кемасийед мә фәʹм дькә, чьмки әԝ жи мина мә һʹәму алийава һатә щерʹьбандьне, ле әԝи гӧнә нәкьр. 16 Дә ԝәрен әм незики тʹәхте кʹәрәма мәзьн бьн, у ԝирʹа бе тьрс дӧа бькьн. Бь ви щурʹәйи, гава әм һʹәԝще аликʹарийе бьн, әме рʹәʹм у кʹәрәма ԝийә мәзьн бьстиньн.

5 Һәр кʹаһинәки мәзьн жь нав мәрьва те бьжартьне бона хьзмәтийа Хԝәде у бона кʹара мәрьва, ԝәки әԝ сәва гӧнед ԝан пʹешкʹеш у ԛӧрбана бьдә. 2 Әԝ дькарә һьндава кәсед кӧ бь нәзанийе гӧнә дькьн, дьлшәԝат бә,* чьмки әԝ хԝәха жи сьст ә. 3 Сәва ве йәке, әԝ гәрәке бона гӧнед хԝә жи ԛӧрбана бькә, чаԝа кӧ бона гӧнед мәрьва ԛӧрбана дькә.

4 Мәрьв нькарә хԝәха хԝә ча кʹаһине мәзьн бьжберә. Тʹәне Хԝәде дькарә ԝи бьжберә, чаԝа Һарун бьжартьбу. 5 Мәсиһ жи хԝә ча кʹаһине мәзьн нәбьжарт. Әԝи хԝә рʹумәт нәкьр, ле Хԝәде әԝ рʹумәт кьр у ԝирʹа гот: «Тӧ кӧрʹе мьн и; иро әз бумә баве тә». 6 Щики дьнда жи әԝи аһа готийә: «Тӧ кʹаһин и мина Мәлкисәдәк* у тӧйе һʹәта-һʹәтайе кʹаһин би».

7 Гава Мәсиһ сәр әʹрде бу, әԝи бь лавайа, бь һәԝар-гази у бь һесьра, дӧа-дьрозгә гиһандә ԝи, йе кӧ дькарьбу ԝи жь мьрьне хьлаз кә. У дӧайед ԝи һатьнә бьһистьне, чьмки әԝ Хԝәде дьтьрсийа. 8 Рʹаст ә әԝ кӧрʹе ԝи бу, ле диса жи пе щәфе кӧ әԝи кʹьшанд, һин бу гӧһдар бә. 9 У паши ԝе йәке кӧ әԝ гӧһдарикьрьнеда гьһиштә кʹамьлийе, һʹәму мәрьвед кӧ гӧһдарийа ԝи дькьн, дькарьн бь сайа ԝи хьлазбуна һʹәта-һʹәтайе бьстиньн. 10 Чьмки Хԝәде әԝ ча кʹаһине мәзьн кʹьфш кьрийә, мина Мәлкисәдәк.

11 Гәләк тьшт һәнә кӧ әм дәрһәԛа ԝи ԝәрʹа бежьн, ле чәтьн ә шьровәкьн, чьмки һун гӧһада гьран бунә. 12 У рʹаст ә һун гәрәке ида бьбуна дәрсдар, ле һʹәԝщәдарийа ԝә һәйә кӧ кәсәк тьштед сәрәкә, йед кӧ һун жь хәбәра Хԝәде һин бунә, диса серида ԝә һин кә. Һун һәла һе һʹәԝще шир ьн, нә кӧ хԝарьна гьран. 13 Кәсе кӧ бәрдәԝам дькә хԝә пе шир тʹер кә, хәбәра Хԝәдейә рʹаст нас накә, чьмки әԝ зарʹ ә. 14 Ле хԝарьна гьран бона мәрьвед гьһишти йә. Әԝана һин бунә бьфькьрьн у тедәрхьн чь ԛәнщ ә у чь хьраб ә.

6 Аԝа әм һинкьрьнед пешьн дәрһәԛа Мәсиһ алики бьһельн, у ԝәрә әм алийе рʹӧһʹанида пешда һәрʹьн, кӧ бьбьнә мәрьвнә гьһишти. Ԝәрә әм диса вәнәгәрʹьн сәр һинкьрьнед пешьн, демәк тʹобәкьрьна кьред пʹучʹ,* баԝәрийа һьндава Хԝәде, 2 һинкьрьна дәрһәԛа ньхӧмандьне, дәстданина сәр сәрийа, рʹабуна мьрийа у диԝана һʹәта-һʹәтайе. 3 У әме бьбьнә мәрьвнә гьһишти бь аликʹарийа Хԝәде.

4 Әԝед кӧ алийе Хԝәдеда һатьбунә рʹонайикьрьне, пʹешкʹеша әʹзмани тәʹм кьрьнә, у бунә һәвпʹаред рʹӧһʹе пироз, 5 у хәбәра Хԝәде у кʹәрәмед дьнйа кӧ ԝе бе, тәʹм кьрьнә, 6 ле паше жь рʹийа рʹастийе дәркʹәтьнә. Ида набә кӧ әԝана диса вәгәрʹьнә бәрбь тʹобәкьрьне, чьмки әԝана Кӧрʹе Хԝәде диса сәр стуне мьх дькьн у бәр һәр кәси дькьнә сосрәт. 7 Мәсәлә, Хԝәде әʹрде кʹәрәм дькә, гава гәләк баран сәр әʹрде дьбарә, әʹрд ава хԝә һьлдьдә у бәре баш дьдә ԝан, йед кӧ әʹрд бещәр кьрьнә. 8 Ле һәрге әв стьри у дьрʹийа бьдә, әԝ беԛимәт дьбә у зутьрәке ԝе ньфьрʹ ле бә, у ахьрийеда әԝе бе шәԝьтандьне.

9 Хушк-бьред дәлал, һәрге әм ӧса хәбәр дьдьн жи, әм баԝәр ьн кӧ һун һʹаләки дьһа башда ньн у тьштед ӧса дькьн, чь кӧ ԝә бәрбь хьлазбуне дьбә. 10 Хԝәде һәԛ ә, у әԝ кьред ԝә у һʹәзкьрьна кӧ ԝә бона хатьре наве ԝи дайә кʹьфше, бир накә. Бәле, әԝ бир накә хьзмәтийа кӧ ԝә пирозарʹа кьрийә у һун һʹәта ньһа жи дькьн. 11 Ле әм дьхԝазьн кӧ һәр йәк жь ԝә бәрдәԝам кә хирәта хԝә бьдә кʹьфше, чаԝа дәстпекеда, ԝәки гӧмана ԝә һʹәта хьлазийе бе пʹарастьне. 12 Тʹәмбәл нәбьн, ле чʹәʹв бьдьнә ԝан, йед кӧ бь баԝәрийе у бь сәбьр созед Хԝәде* стандьнә.

13 Гава Хԝәде соз да Бьраһим, ԝәки ԝе ԝи кʹәрәм кә, әԝи бь наве хԝә сонд хԝар, чьмки жь Хԝәде мәзьнтьр тʹӧ кәс тʹӧнә. 14 Әԝи гот: «Әзе тә әʹсәйи кʹәрәм кьм, у әзе зӧрʹәта тә зедә кьм». 15 У паши ԝе йәке гава Бьраһим сәбьр кьр, әԝи әв соз станд. 16 Мәрьв пе наве кәсе жь хԝә мәзьнтьр сонд дьхԝьн, у әв йәк рʹийа шәрʹ-дәʹԝа дьгьрә, чьмки сонда ԝан избат дькә кӧ готьна ԝан рʹаст ә. 17 Бь ви щурʹәйи гава Хԝәде сафи кьр, ԝәки ԝаред ви созирʹа зәлал нишан кә, кӧ нета ԝи найе гӧһастьне, әԝи бь сондәке избат кьр кӧ әԝе созе хԝә бинә сери. 18 Әв соз у сонда ԝи найенә гӧһастьне, чьмки Хԝәде нькарә дәрәԝа бькә. Әв тьшт дьле мә, демәк дьле йед кӧ Хԝәде кьрьнә сьтʹаргәһа хԝә, ԛәԝи дькьн у али мә дькьн, ԝәки әм хԝә ль гӧмана кӧ пешийа мә йә, ԛәԝи бьгьрьн. 19 Әв гӧмана мә бона жийина мә мина ләнгәре йә. Әв гӧман һьм сахләм ә, һьм жи ԛәԝи йә у мә дьбә пьшт пʹәрʹде. 20 Иса пешийа мә кʹәтә ԝедәре, рʹе бона мә вәкьр у һазьр кьр. Әԝ мина Мәлкисәдәк буйә кʹаһине мәзьн у һʹәта-һʹәтайе кʹаһине мәзьн ә.

7 Әв Мәлкисәдәк пʹадше Шәлиме у кʹаһине Хԝәдайе Һәри Жорьн бу. Гава Бьраһим паши ԛьрʹкьрьна пʹадшайа вәдьгәрʹийа, Мәлкисәдәк пешийа ԝида чу у дӧа ль ԝи кьр. 2 Бьраһим жь һәр тьшти дәһәк да ԝи. Наве ԝи те ԝәлгәрʹандьне ча «Пʹадше Рʹастийе». Әԝ ӧса жи пʹадше Шәлиме бу, чь кӧ те һʹәсабе «Пʹадше Әʹдьлайе». 3 Әʹйан нинә кӧ баве ԝи у дийа ԝи кʹе бун, у навед кал-бавед ԝи нәһатьнә ньвисаре. Хенщи ԝе йәке, нәһатийә ньвисаре кӧ әԝ кʹәнге һатийә буйине йан кʹәнге мьрийә.* У чьмки әԝ ве йәкеда мина Кӧрʹе Хԝәде бу, әԝе һʹәта-һʹәтайе кʹаһин бьминә.

4 Бьньһерʹьн әв мәрьв чьԛас мәзьн бу, кӧ бавәʹшире мә Бьраһим тьштед һәри баш жь тʹалан, дәһәк да ԝи. 5 Ль гора Ԛануне, кӧрʹед Леԝирʹа, йед кӧ һатьнә кʹьфшкьрьне ча кʹаһин, тʹәми һатийә дайине кӧ жь щьмәʹте, демәк жь бьред хԝә, йед кӧ рʹаст ә зӧрʹәта Бьраһим ьн, дәһәке тʹоп кьн. 6 Ле ви мәрьви, йе кӧ нә жь малбәта Леԝи бу, жь Бьраһим дәһәк станд у дӧа ль ԝи кьр, йе кӧ созед Хԝәде стандьбу. 7 Әв йәк фәʹмдари йә, ԝәки йе мәзьн дӧа ль йе бьчʹук дькә. 8 Мәрьвед жь бәрәка Леԝи дәһәк дьстандьн, у әԝ мәрьв дьмьрьн. Ле Ньвисаред Пирозда те готьне кӧ мәрьве дьн, йе кӧ дәһәк станд, сах ә. 9 Әм дькарьн бежьн, ԝәки Леԝийе кӧ дәһәк дьстинә жи, бь дәсте Бьраһим дәһәк да. 10 Чьмки гава Мәлкисәдәк рʹасти Бьраһим һат, Леԝийе кӧ жь зӧрʹәта Бьраһим бу, һе нәһатьбу дьнйайе.

11 Ль гора Ԛануна Муса, йа кӧ Исраелийарʹа һатьбу дайине, кʹаһин жь бәрәка Леԝи дьһатьнә кʹьфшкьрьне. Һәрге кʹаһинед жь нав бәрәка Леԝи бькарьбуна әм бьгиһандана беԛьсуртийе, ида кʹаһинәки мина Мәлкисәдәк ԝе мәрʹа лазьм буйа? Кʹаһинәки мина Һарун бәс нибу? 12 Ле чьмки кʹаһинти те гӧһастьне, гәрәке Ԛанун жи бе гӧһастьне. 13 Чьмки әв мәрьв дәрһәԛа кʹижани те гьликьрьне, жь бәрәка дьн бу. У жь ве бәрәке тʹӧ кәси бәр ԛӧрбангәһе хьзмәт нәкьрийә. 14 Әшкәрә йә кӧ Хӧдане мә жь бәрәка Щьһуда һат. Ле Муса нәготийә кӧ жь ве бәрәке кʹаһин ԝе дәркʹәвьн.

15 У әв йәк дьһа зәлал дьбә, гава кʹаһинәки дьн әʹйан дьбә, йе кӧ мина Мәлкисәдәк кʹаһин ә. 16 Әԝ нә жь бо ԝе йәке буйә кʹаһин, кӧ жь ве бәрәке бу, кʹижан кӧ ль гора Ԛануне дькарьн кʹаһинтийе бькьн, ле бь сайа ԛәԝата кӧ жийине дьдә ԝи, йа кӧ тʹӧ кәс нькарә кʹӧта кә. 17 Чьмки сәр ԝи ӧса те готьне: «Тӧ кʹаһин и мина Мәлкисәдәк у тӧйе һʹәта-һʹәтайе кʹаһин би».

18 Аԝа чьмки тʹәмийа бәре сьст у бекер бу, әԝ һатә бәталкьрьне. 19 Чьмки Ԛануне тʹӧ тьшт нәгиһандә беԛьсуртийе, ле Хԝәде гӧманәкә дьһа баш дайә мә, йа кӧ һәр тьшти дьгьһинә беԛьсуртийе. Бь сайа ве гӧмане әм незики Хԝәде дьбьн. 20 Жь бо ԝе йәке кӧ Иса бь сонда Хԝәде ча кʹаһин һатә кʹьфшкьрьне 21 (әре, мәрьв һәнә, йед кӧ бе сонд бунә кʹаһин, ле Иса бь сайа сонда ԝи, бу кʹаһин, йе кӧ ӧса готийә: «Йаһоԝа сонд хԝар, у әԝе фькьра хԝә нәгӧһезә,* ‹Тӧ һʹәта-һʹәтайе кʹаһин и›»), 22 әԝ хԝәха бу избатийа ве йәке, кӧ пәйманәкә дьһа баш ԝе бе сери. 23 Хенщи ԝе йәке, гәләк мәрьв пәй һәв дьбунә кʹаһин, чьмки мьрьне нәһишт кӧ әԝана хьзмәтийа хԝә бәрдәԝам кьн. 24 Ле Иса һʹәта-һʹәтайе дьжи, ләма жи хьзмәтийа ԝийә кʹаһинти хьлаз набә. 25 У бона ве йәке жи, әԝ дькарә кәсед кӧ бь наве ԝи Хԝәдерʹа дӧа дькьн, хьлаз кә, чьмки әԝ һʹәта-һʹәтайе дьжи у дькарә бона ԝан һиви жь Хԝәде бькә, ԝәки әԝ али ԝан бькә.

26 Мәрʹа лазьм ә кӧ кʹаһине мәйи мәзьн һәма йәки ӧса бә. Әԝ амьн ә, бесущ ә у беләкʹә йә, мина мәрьвед гӧнәкʹар нинә, у һʹәта әʹзмана һатийә бьльндкьрьне. 27 Нәлазьм ә кӧ әԝ мина кʹаһинед мәзьнә дьн һәр рʹож пешийе бона гӧнед хԝә у паше жи бона гӧнед мәрьвед дьн ԛӧрбана бьдә, чьмки әԝи щарәке хԝә кьрә ԛӧрбан бона һәртʹьм. 28 Ль гора Ԛануне, мәрьв кӧ шашийед ԝан һәнә, ча кʹаһинед мәзьн тенә кʹьфшкьрьне. Ле ль гора сонда кӧ пәй Ԛануне һатьбу дайине, Кӧрʹе кӧ һʹәта-һʹәтайе кʹамьл ә, һатийә кʹьфшкьрьне.

8 Жь һʹәму тьштед кӧ мә готьн, фькьра сәрәкә әв ә: Кʹаһине мәйи мәзьн йәки ӧса йә, у әԝ ль әʹзмана алийе тʹәхте Хԝәдейи рʹасте рʹуньштийә. 2 Әԝ хьзмәт дькә щийе пирозда у коне рʹастда. Әв кон Йаһоԝа данийә, нә кӧ мерьв. 3 Һәр кʹаһинәки мәзьн те кʹьфшкьрьне, ԝәки пʹешкʹеша у ԛӧрбана бьдә. Ләма лазьм бу, ԝәки әԝи жи тьштәк ԛӧрбан кьра. 4 Һәрге әԝ сәр әʹрде буйа, әԝе нәбуйа кʹаһин, чьмки вьра ида мәрьвед ӧса һәнә, йед кӧ ль гора Ԛануне пʹешкʹеша ԛӧрбан дькьн. 5 Хьзмәтийа ԝан, си у сурәте ԝан тьштед әʹзмен ә, чаԝа алийе Хԝәдеда Мусарʹа тʹәми һатьбу дайине, гава әԝи гәрәке кон чекьра: «Дина хԝә бьде, ԝәки һәр тьшти ԝи щурʹәйи бьки, чаԝа сәре чʹийе мьн нишани тә кьр». 6 Ле хьзмәтийа кӧ Иса стандийә дьһа бьльнд ә, чьмки әԝ ортʹәчийе пәйманәкә дьһа баш ә. У әв пәйман бь щурʹәки ԛануни сәр һʹиме созед дьһа баш һатийә данине.

7 Һәрге пәймана пешьн бекемаси буйа, һьнге пәймана дӧда ԝе нәлазьм буйа. 8 Чьмки Хԝәде кемасийед щьмәʹте дьвинә у дьбежә: «‹Ва йә, әв рʹож тен›, Йаһоԝа дьбежә: ‹кӧ әз тʹәви мала Исраел у тʹәви мала Щьһуда пәйманәкә ну гьредьм. 9 Әв пәйман ԝе нә мина ԝе пәймане бә, йа кӧ мьн тʹәви кал-бавед ԝә гьредабу. Рʹожа кӧ мьн дәсте ԝан гьрт у әԝана жь Мьсьре дәрхьстьн, мьн әв пәйман тʹәви ԝан гьреда. Ле чьмки ԝана пәймана мьн пьшт гӧһе хԝәва авит, мьн ида бона ԝан хәм нәдькьр›, Йаһоԝа дьбежә.

10 ‹Паши ԝан рʹожа, пәймана кӧ әзе тʹәви мала Исраел гьредьм, әв ә›, Йаһоԝа дьбежә: ‹Әзе ԛанунед хԝә бькьмә һʹьше ԝан у сәр дьле ԝан бьньвисьм. Әзе бьбьмә Хԝәдайе ԝан у әԝе бьбьнә щьмәʹта мьн.

11 Ида тʹӧ кәс ԝе һәмбажарване хԝә у бьре хԝә һин нәкә у нәбежә: «Йаһоԝа нас кә!» Чьмки әԝана һʹәму жи, жь бьчʹука һʹәта мәзьна,* ԝе мьн нас кьн. 12 Әзе һьндава кьред ԝанә нәрʹаст рʹәʹм бьм, у әзе гӧнед ԝан ида нәйньм бира хԝә›».

13 Гава Хԝәде бәʹса «пәймана ну» дькә, әԝ нишан дькә кӧ пәймана бәре ида кәвьн буйә. У тьште кӧ кәвьн буйә у машийа йә, ԝе зутьрәке бәтавәбә.

9 Пәймана бәреда ԛанун һәбун. Әв ԛанун гьредайи бун тʹәви һʹәбандьне у щийе пироз сәр әʹрде. 2 Кон бь дӧ пʹара һатьбу чекьрьне. Пʹара пешьнрʹа Щийе Пироз дьһатә готьне у теда шәмданк, сьфрә у сәр сьфре нане пʹешкʹешкьрьне һәбу. 3 Пʹара дьнрʹа Щийе Һәри Пироз дьһатә готьне, у әв пʹар пьшт пʹәрʹда дӧда бу. 4 Ԝедәре агьрданкәкә зерʹин у сьндоԛа пәймане һәбу, йа кӧ жь һәр алийава зерʹкьри бу. Һьндӧрʹе сьндоԛеда фьраԛәкә зерʹин бь мана, шьвдара Һарунә гӧлдайи у сәлед пәймане һәбун. 5 Сәр сьндоԛе херубед рʹумәт һәбун у сийа ԝан дькʹәтә сәр ԛалпʹахе* сьндоԛе. Ле ньһа ԝәхт нинә, кӧ дәрһәԛа ван тьшта һур бь һур хәбәр дьн.

6 Паши ве йәке ча әв тьшт бь ви щурʹәйи һатьнә чекьрьне, кʹаһин һәр щар дькʹәвьнә Щийе Пироз, ԝәки хьзмәтийа пироз биньн сери. 7 Ле сале щарәке, тʹәне кʹаһине мәзьн дькʹәвә һьндӧрʹе Щийе Һәри Пироз. Әԝ гәрәке хуне тʹәви хԝә бьвә һьндӧрʹ, ԝәки ве хуне бона хԝә у бона гӧнед щьмәʹте бьдә, йед кӧ ԝана бь нәзанийа хԝә кьрьнә. 8 Бь ви щурʹәйи, рʹӧһʹе пироз зәлал әʹйан дькә, ԝәки һʹәта коне пешьн* һәбу, рʹийа кӧ дьчә бәрбь щийе пироз* һе нәһатьбу әшкәрәкьрьне. 9 Әв кон мәсәла ве йәке йә, чь кӧ ньһа һәйә, у бона ве йәке, һʹәта ньһа Хԝәдерʹа пʹешкʹеш у ԛӧрбан тенә дайине. Ле әв тьшт нькарьн исафа мәрьве кӧ хьзмәтийа пироз дькә, паԛьж кьн. 10 Әԝ тʹәне бона хԝарьн, вәхԝарьн у әʹдәтед шуштьне нә. Әԝ пе ԛануне дьһатьнә дәʹԝакьрьне, у тьштед бәдәнива гьредайи бун у гәрәке ԛәԝатеда бьмана, һʹәта кӧ ԝәхте рʹасткьрьна һʹәму тьшти бьһата.

11 Ле гава Мәсиһ һат, әԝ бу кʹаһине мәзьн, йе кӧ гәрәке кʹәрәм бьанийана, у мә әв кʹәрәм ида стандьнә. Әԝ кʹәтә коне һе мәзьн у һе кʹамьл, йе кӧ нә бь дәсте мәрьва һатийә чекьрьне у нә жь ве дьнйайе йә. 12 Мәсиһ нә кӧ бь хуна нерийа у щанәга кʹәтә һьндӧрʹе щийе пироз, ле бь хуна хԝә. Әԝи әв йәк тʹәне щарәке кьр у сәр һʹәта-һʹәтайе әм хьлаз кьрьн.* 13 Һәрге кʹаһин хуна нерийа, хуна га у кʹозийа* чʹеләка, сәр кәсед кӧ һатьбун һʹәрамкьрьне, дьрʹәшиньн, у бь ви щурʹәйи әв кәс бәр чʹәʹве Хԝәде паԛьж дьбьн, 14 ле ԛимәта хуна Мәсиһ чьԛас һе мәзьн ә. Бь сайа рʹебәрийа рʹӧһʹе* һʹәта-һʹәтайе, әԝи хԝә ча ԛӧрбанәкә беләкʹә да Хԝәде. Хуна ԝи исафа мә жь кьред пʹучʹ* паԛьж дькә, ԝәки әм бькарьбьн Хԝәдайе сахрʹа хьзмәтийа пироз бькьн.

15 Бона ве йәке, әԝ ортʹәчийе пәймана ну йә, ԝәки кәсед кӧ алийе Хԝәдева һатьнә газикьрьне, созе бона кʹәрәмед һʹәта-һʹәтайе бьстиньн. Әв һʹәму тьшт бь сайа мьрьна ԝи һатә стандьне, чьмки һәԛе кʹьрʹине кӧ әԝи да, жь сущед кӧ ԝана бьн пәймана бәреда кьрьбун, аза кьрьн. 16 Гава пәйманәк те гьредане, гәрәке кәсе кӧ әв пәйман гьреда, бьмьрә. 17 Чьмки пәйман пе мьрьна кәсе кӧ әв пәйман гьреда, ԛәԝатеда нә. Һʹәта кӧ әв мәрьв сах ә, пәйман ԛәԝатеда нинә. 18 Ләма пәймана бәре жи пе рʹетьна хуне кʹәтә ԛәԝате. 19 Паши ԝе йәке кӧ Муса һәр тʹәмикә Ԛануне щьмәʹтерʹа әʹлам кьр, әԝи хуна щанәга у хуна нерийа тʹәви аве хьст, һьрийа сор у дарәк* һьлда, хуна ԝан сәр кʹьтебе* у сәр һʹәму щьмәʹте рʹәшанд. 20 У әԝи гот: «Әв хуна пәймане йә, йа кӧ Хԝәде тʹәми дайә кӧ һун хԝә ле бьгьрьн». 21 Анәгори ве йәке әԝи хун сәр кон у һʹәму фьраԛед кӧ бона хьзмәтийа пироз дьһатьнә хәбьтандьне, рʹәшанд. 22 Бәле, ль гора Ԛануне һʹәчʹи зәʹф тьшт бь хуне тенә паԛьжкьрьне. Һʹәта кӧ хун нәйе рʹетьне, бахшандьн набә.

23 Ләма чь кӧ сурәте тьштед әʹзмани нә, гәрәке бь хуна һʹәйԝана бьһатана паԛьжкьрьне, ле тьштед әʹзмани һʹәԝще ԛӧрбанед дьһа баш ьн. 24 Чьмки Мәсиһ нәкʹәтә ви щийе пироз йа кӧ бь дәста һатийә чекьрьне, кʹижан кӧ сурәте тьште рʹаст ә, ле әԝ кʹәтә нав әʹзмана, ԝәки бона мә бәр Хԝәде бьсәкьнә. 25 Кʹаһине мәзьн сале щарәке нә кӧ бь хуна хԝә дькʹәвә щийе пироз, ле бь хуна һʹәйԝана. Ле Мәсиһрʹа нәлазьм ә кӧ әԝ гәләк щара хԝә бькә ԛӧрбан. 26 Һәрге ӧса буйа, әԝи гәрәке жь ԝәхте әʹфьрандьна дьнйайе гәләк щара щәфа бькʹьшанда. Ле ньһа, хьлазийа ван ԝәхтада, әԝи хԝә тʹәне щарәке әʹйан кьр, ԝәки хԝә бькә ԛӧрбан, сәва кӧ гӧнә бьдә һьлдане. 27 У чаԝа кӧ мәрьв тʹәне щарәке дьмьрьн у паши ве йәке бәр диԝане дьсәкьньн, 28 Мәсиһ жи тʹәне щарәке бона һәртʹьм хԝә ԛӧрбан кьр, сәва кӧ гӧнед гәләка һьлдә. У гава әԝ щара дӧда бе, ԝе бона гӧнәһьлдане нәйе, ле әԝе ԝан мәрьварʹа хӧйа бә, йед кӧ гәләк һивийа ԝи нә, ԝәки әԝ ԝана хьлаз кә.

10 Ԛанун нә кӧ кʹәрәм ьн, ле сийа ван кʹәрәма нә, йед кӧ ԝе бен. Ләма Ԛанун нькарә бь ԛӧрбанед кӧ сал бь сал тенә дайине, кәсед кӧ незики Хԝәде дьбьн, беԛьсур кә. 2 Һәрге ван ԛӧрбана әԝ беԛьсур бькьрана, гәло ԝе лазьм буйа кӧ әԝ тʹьме бьһатана дайине? Чьмки хьзмәткʹаред Хԝәде, йед кӧ щарәке һатьнә паԛьжкьрьне, ԝе хԝә ида ча кәсед гӧнәкʹар һʹәсаб нәкьрана. 3 Ле әв ԛӧрбан сал бь сал тиньн бира мәрьва, кӧ әԝана гӧнәкʹар ьн. 4 Чьмки хуна га у хуна нерийа нькарә гӧна бьдә һьлдане.

5 Ләма, гава Мәсиһ һатә дьнйайе әԝи Хԝәдерʹа гот: «Тә ԛӧрбан у пʹешкʹеш нәхԝәстьн, ле тә бәдәнәк бона мьн һазьр кьр. 6 Тӧ рʹази нәбуйи жь ԛӧрбанед шәԝьтандьне, нә жи жь ԛӧрбанед бона гӧнә. 7 Һьнге мьн гот: ‹Ва йә, әз һатьм, йа Хԝәде, (чаԝа кӧ кʹьтебеда* дәрһәԛа мьн ньвисар ә) ԝәки ԛьрара тә биньм сери›». 8 Әԝи пешийе гот: «Тә ԛӧрбан, пʹешкʹеш, ԛӧрбанед шәԝьтандьне у ԛӧрбанед бона гӧнә нәхԝәстьн у тӧ жь ван рʹази нәбуйи». (Әв ԛӧрбан ль гора Ԛануне тенә дайине.) 9 Паше дьбежә: «Ва йә! Әз һатьм ԛьрара тә биньм сери». Әԝ йа пешьн* һьлдьдә, ԝәки йа дӧда* дайнә. 10 Ль гора ве «ԛьраре», әм һатьнә пирозкьрьне бь сайа ве йәке, кӧ Иса Мәсиһ бәдәна хԝә кьрә ԛӧрбан щарәке бона һәртʹьм.

11 Һәр кʹаһин рʹож бь рʹож ль щийе хԝә дьсәкьнә, ԝәки хьзмәтийа пироз бинә сери. Әԝ гәләк щара хут ԝан ԛӧрбана дьдә, кʹижан кӧ нькарьн бь тʹәмами гӧна бьдьнә һьлдане. 12 Ле Мәсиһ тʹәне щарәке бона гӧна ԛӧрбан да, у пәй ве йәкерʹа, әԝ ль мьле Хԝәдейи рʹасте рʹуньшт. 13 Һьнгеда әԝ һивийе йә һʹәта һʹәму дьжмьнед ԝи бьн пʹийед ԝида бенә данине. 14 Чьмки әԝи бь ԛӧрбанәке, кәсед пироз сәр һʹәта-һʹәтайе беԛьсур кьрьн. 15 Хенщи ԝе йәке, рʹӧһʹе пироз шәʹдәтийе дьдә у дьбежә: 16 «‹Пәй ԝан рʹожарʹа, пәймана кӧ әзе тʹәви ԝан гьредьм, әв ә›, Йаһоԝа дьбежә. ‹Әзе ԛанунед хԝә бькьмә дьле ԝан у һʹьше ԝанда бьньвисьм›». 17 Паше әԝ дьбежә: «Әзе гӧнә у шашийед ԝан ида нәйньм бира хԝә». 18 У гава гӧнә тенә бахшандьне, ида нәлазьм ә ԝәки ԛӧрбан бона гӧнә бе дайине.

19 Ләма жи бьрано, әм пе хуна Иса дькарьн бе тьрс бькʹәвьнә щийе пироз 20 рʹекә тʹәзәрʹа, йа кӧ бәрбь жийине дьбә. Әв рʹийа тʹәзә әԝи бона мә вәкьр чахе пʹәрʹдерʹа дәрбаз бу, кʹижан кӧ бәдәна ԝи йә. 21 Аԝа чьмки сәр мала Хԝәдерʹа кʹаһинәки мәйи мәзьн һәйә, 22 ԝәрен әм бь дьләки сах у баԝәрикә ԛәԝи незики Хԝәде бьн. Дьл у исафа мә тʹәмьз бунә у бәдәна мә бь ава тʹәмьз һатийә шуштьне. 23 Ԝәрен әм бәрдәԝам кьн дәрһәԛа гӧмана хԝә гьли кьн у ԛайим бьсәкьньн,* чьмки Хԝәдайе кӧ соз дайә, амьн ә. 24 У ԝәрен әм һаж һәв һәбьн,* ԝәки һʹәзкьрьнеда у ԛәнщикьрьнеда һелана бьдьнә һәв. 25 Ԝәрен әм щьвинед хԝә бәрʹнәдьн, чаԝа кӧ һьнәка хԝәрʹа кьрьнә хәйсәт, ле дьле һәв ԛәԝи кьн. У чьԛас әм дьвиньн кӧ рʹожа Хԝәде* незик дьбә, ԝәрен әм ван һʹәму тьшта һе зедә бь хирәт бькьн.

26 Һәрге әм паши ԝе йәке, кӧ гьһиштьнә занәбуна рʹаст дәрһәԛа рʹастийе, бь һʹәмде хԝә гӧнә дькьн, ида тʹӧ ԛӧрбан бона гӧнед мә тʹӧнә, 27 ле тʹәне дьминә кӧ әм бь тьрс һивийа диԝане у хәзәба Хԝәде бьн, йа кӧ мина агьр дьшәԝьтинә у ԝе дьжмьна кʹӧта кә. 28 Кәсәки кӧ Ԛануна Муса пьшт гӧһе хԝәва давит, бь шәʹдәтийа дӧ йан се кәса берʹәʹмти дьһатә кӧштьне. 29 Ижа һун ча дьфькьрьн? Кәсе кӧ Кӧрʹе Хԝәде пʹепәс кьрийә у хуна пәймане, йа кӧ әԝ пе һатийә пирозкьрьне, беԛимәт һʹәсаб кьрийә, у рʹӧһʹе Хԝәдейе кӧ кʹәрәма мәзьн дьдә, беһӧрмәт кьрийә, гәло һежайи щәзаки дьһа гьран нинә? 30 Чьмки әм ԝи Хԝәдейи нас дькьн, йе кӧ готийә: «Һʹәйфһьлдан йа мьн ә; әзе һʹәйфе һьлдьм». У әԝ ӧса жи дьбежә: «Йаһоԝа ԝе диԝана щьмәʹта хԝә бькә». 31 Тьштәки чьԛас тьрс ә, кӧ мәрьв бькʹәвә дәсте Хԝәдайе сах!

32 Ле бәле, биньн бира хԝә ԝан рʹожед бәре, паши ԝе йәке кӧ һун һатьнә рʹонайикьрьне, ԝә бәр тәнгасикә мәзьн у бәр гәләк щәфа тәйах кьр. 33 Щарна һун бәр чʹәʹве мәрьва* дьһатьнә беһӧрмәткьрьне у тәнгаси дьданә ԝә. Щарна жи һун тʹәви ԝан мәрьва бун, йед кӧ рʹасти чәтьнайед ӧса дьһатьн. 34 Һун дьлшәԝат бун һьндава кәсед кӧ кәледа бун. У гава һәбука ԝә жь ԝә дьһатә стандьне, ԝә шабуна хԝә ӧнда нәдькьр, чьмки ԝә заньбу кӧ һәбука ԝәйә дьһа баш у һәртʹьм һәйә.

35 Ләма бәрдәԝам кьн бь мерхаси хәбәр дьн, у һуне бь мәрʹдани бенә хәлаткьрьне. 36 Һун гәрәке тәйах кьн, ԝәки ԛьрара Хԝәде биньн сери у тьштед кӧ әԝи соз данә, бьстиньн. 37 Чьмки ида «һьнәк ԝәхт майә», у «йе кӧ те, ԝе бе у ԝе дәрәнги нәкʹәвә». 38 «Ле хьзмәткʹаре мьни рʹаст ԝе бь сайа баԝәрийа хԝә бьжи», у «һәрге әԝ хԝә паш хә, әзе жь ԝи рʹази нибьм». 39 Әм нә жь ԝан мәрьва нә, йед кӧ хԝә паш дьхьн у ԛьрʹ дьбьн. Ле әм жь ԝан мәрьва нә, баԝәрийа кʹижана һәйә у ӧса жийина хԝә хьлаз дькьн.

11 Баԝәри әв ә кӧ мәрьв дӧдьли набә, ԝәки гӧмана ԝи ԝе бе сери, у избатийа ве йәке йә, ԝәки чь кӧ найенә дитьне бь рʹасти һәнә. 2 Һәма бь сайа баԝәрийе мәрьвед кӧ ԝәʹде бәреда дьжитьн* ль Хԝәде хԝәш һатьн.

3 Бь сайа баԝәрийе әм фәʹм дькьн кӧ һәр тьште ль әʹзмен у сәр рʹуйе әʹрде, ль гора хәбәра Хԝәде һатьнә чекьрьне. Тьштед кӧ әм дьвиньн, пешда һатьнә жь тьштед кӧ әм навиньн.

4 Бь сайа баԝәрийе Һабил ԛӧрбанәкә кӧ жь йа Ԛайин ԛимәттьр бу, пʹешкʹеши Хԝәде кьр. Бь ԝе баԝәрийе әԝ чаԝа йәки рʹаст һатә һʹәсабе, чьмки Хԝәде пʹешкʹешед ԝи ԛәбул кьр. У рʹаст ә Һабил мьр, ле йәкә бь баԝәрийа хԝә әԝ һе хәбәр дьдә.*

5 Бь сайа баԝәрийе Һәнох алийе Хԝәдеда һатә һьлдане, ԝәки мьрьне нәвинә. Әԝ тʹӧ щийа нәһатә дитьне, чьмки Хԝәде әԝ һьлдабу. Пешийа кӧ Хԝәде Һәнох һьлда, Хԝәде да кʹьфше, ԝәки әԝ жь ԝи рʹази йә. 6 Хенщи ԝе йәке, бе баԝәри набә кӧ кәсәк Хԝәде хԝәш бе. Чьмки һәр кәсе кӧ незики Хԝәде дьбә, ԝәки ԝи бьһʹәбинә, гәрәке баԝәр бькә кӧ Хԝәде һәйә у ԝәки әԝ хәлат дькә ԝан, йед кӧ бь дьл у щан ԝи дьгәрʹьн.

7 Бь сайа баԝәрийе, гава Нӧһ фәрман жь Хԝәде станд дәрһәԛа тьштед кӧ һе нәһатьбун дитьне, хԝәдехофи да кʹьфше у гәмик чекьр, ԝәки малбәта хԝә хьлаз кә. Бь сайа ве баԝәрийе әԝи диԝана дьнйайе кьр, у бь сайа баԝәрийа хԝә әԝ йәки рʹаст һатә һʹәсабе.

8 Бь сайа баԝәрийе, гава Бьраһимрʹа һатә готьне кӧ әԝ гәрәке рʹе кʹәвә у һәрʹә ԝи щийе кӧ әԝе ча мьлкʹ бьстинә, әԝи гӧрʹа Хԝәде кьр. Әԝ жь ԝәлате хԝә дәркʹәт, ле ньзаньбу дьчә кʹӧ. 9 Бь сайа баԝәрийе, әԝи әʹрде создайида ча хәриб дьжит, у чадьрада тʹәви Исһаԛ у Аԛуб, йед кӧ ԝаред ԝи сози бун, дьма. 10 Чьмки әԝ һивийа ԝи бажари бу, һʹиме кʹижани ԛәԝи йә, у әʹфьрандар у авакʹаре кʹижани Хԝәде йә.

11 Рʹаст ә Сәраһ әʹмьрда мәзьн бу, ле бь сайа баԝәрийе әԝе ԛәԝат станд у һʹәмлә дәркʹәт.* Әԝе баԝәр дькьр кӧ Хԝәде ԝе созе хԝә бинә сери.* 12 Ләма жи, жь Бьраһим, жь мәрьве кӧ ида кал бу, зарʹ дьне кʹәтьн. Һәжмара зарʹед ԝи мина стәйркед әʹзмен у мина ԛума ль бәр дәве бәʹре, беһʹәсаб бу.

13 Әв һʹәму мәрьв мьрьн, у рʹаст ә ԝана пеканина созед кӧ ԝанрʹа һатьбун дайине, нәдит, йәкә баԝәрийа хԝә ӧнда нәкьрьн, әв соз дурва дитьн у перʹа ша бун. У ԝана әшкәрә әʹлам дькьр, ԝәки әԝана хәриб ьн у ԝәʹдәлу сәр ԝи әʹрди дьжин. 14 Чьмки йед кӧ тьштед ӧса дьбежьн, зәлал дьдьнә кʹьфше, ԝәки әԝана бь дьл у щан щики дьгәрʹьн, кӧ бьбә мала ԝан. 15 У һәрге әԝана һәртʹьм щийе кӧ әԝана же дәркʹәтьбун бьанийана бира хԝә, ԝе мәщал бьдитана ԝәки вәгәрʹьн. 16 Ле ньһа әԝана хирәт дькьн кӧ бьгьһижьнә щики дьһа баш, демәк щики кӧ лайиԛи әʹзмана йә. Ләма Хԝәде шәрм накә, кӧ әԝана ԝи һʹәсаб дькьн Хԝәдайе хԝә, чьмки әԝи бажарәк ԝанрʹа һазьр кьрийә.

17 Бь баԝәрийе Бьраһим, гава һатә щерʹьбандьне, һьндьк мабу Исһаԛ бькьра ԛӧрбан. Бьраһим ша бу кӧ жерʹа соз һатьбунә дайине, у һазьр бу кӧрʹе хԝәйи тайе тʹәне бькә ԛӧрбан, 18 дәрһәԛа кʹижани Хԝәде жерʹа готьбу: «Зӧрʹәта тә ԝе жь Исһаԛ бә», 19 ле әԝ баԝәр бу кӧ Хԝәде дькарә кӧрʹе ԝи жь мьрьне рʹакә, у әԝи кӧрʹе хԝә ӧса станд, ча бежи жь мьрьне һатьбу рʹакьрьне. У әве йәке нишан кьр, кӧ ахьрийеда ԝе чь бьԛәԝьмә.

20 Бь сайа баԝәрийе, Исһаԛ дӧа ль Аԛуб у Әсаԝ кьр бона тьштед кӧ ԝе бьԛәԝьмийана.

21 Бь сайа баԝәрийе, гава Аԛуб бәр мьрьне бу, дӧа ль һәр дӧ кӧрʹед Усьв кьр. Әԝи хԝә ль гопале хԝә гьрт у сәре хԝә бәр Хԝәде дани.

22 Бь сайа баԝәрийе, гава Усьв бәр мьрьне бу, гот ԝәки кӧрʹед Исраел ԝе жь Мьсьре дәркʹәвьн, у әԝи тʹәми да ԝан кӧ әԝана һәстийед ԝи жь Мьсьре дәрхьн.*

23 Бь сайа баԝәрийе, гава Муса һатә буйине, бь дәсте де-баве хԝә се мәһа һатә вәшартьне, чьмки ԝана дит кӧ әԝ зарʹәкә бәдәԝ ә, у әԝана жь фәрмана пʹадша нәтьрсийан. 24 Бь сайа баԝәрийе гава Муса мәзьн бу, әԝи нәхԝәст ԝәки жерʹа кӧрʹе ԛиза Фьрәԝьн бе готьне. 25 Әԝ фькьри кӧ һе ԛәнщ ә тʹәви щьмәʹта Хԝәде бьчәрчьрә, нә кӧ ԝәʹдәлу нава кʹефа гӧнада дәрбаз кә. 26 Әԝи ча йе бьжарти,* беһӧрмәти һәбунәкә дьһа мәзьн һʹәсаб кьр, нә кӧ хьзнед Мьсьре, чьмки чʹәʹве ԝи сәр һәԛе хәлате бу. 27 Бь сайа баԝәрийе әԝ жь Мьсьре дәркʹәт у жь һерса пʹадша нәтьрсийа. Чьмки әԝи бь сәбьр тәйах дькьр, ча бежи әԝи Хԝәдайе кӧ тʹӧ кәс нькарә бьвинә, дьдит. 28 Бь сайа баԝәрийе, әԝи Щәжьна Дәрбазбуне дәрбаз кьр у хун рʹәшандә сәр рʹәхдәрийа, ԝәки мәләке Хԝәде ньхӧрийед Исраелийа нәкӧжә.

29 Бь сайа баԝәрийе, әԝана Бәʹра Соррʹа, ча сәр әʹрде зьһарʹа дәрбаз бун. Ле гава Мьсьрийа жи хԝәст дәрбаз бьн, әԝана аведа хәньԛин.

30 Бь сайа баԝәрийе, гава щьмәʹта Исраел һʹәфт рʹожа дора диԝаред Әриһайе зьвьрʹин, диԝар һьлшийан. 31 Бь сайа баԝәрийе, Рʹәхаба ԛав тʹәви йед нәгӧһдар нәһатә кӧштьне, чьмки әԝе бь әʹдьлайи щәʹсус мала хԝәда ԛәбул кьрьн.

32 Әз диса чь бежьм? Һәрге әз дәрһәԛа Гидәйон, Барак, Шьмшон, Йәфтаһ, Даԝьд, Самуйел йан пʹехәмбәред дьн гьли кьм, ԝәхт ԝе тʹере нәкә. 33 Бь сайа баԝәрийе, әԝана мьԛабьли пʹадша сәрдькʹәтьн, рʹасти дьпʹарастьн, жь Хԝәде соз дьстандьн, дәве шера дьгьртьн, 34 ԛәԝата агьр сәр ԝан һʹӧкӧм нәдькьр у жь дәве шур хьлаз дьбун. Гава әԝана сьст дьбун, ԛәԝат дьстандьн, шәрʹда ԛәԝи дьбун, у дьжмьнед хԝә жь һәв бәла дькьрьн. 35 Һьнә кʹӧлфәта мьрийед хԝә бь сайа рʹабуна мьрийа диса дитьн. Һьнә кәсед амьн һʹәта мьрьне һатьнә чәрчьрандьне, чьмки ԛәбул нәкьрьн бенә азакьрьне, сәва кӧ бьгьһижьнә рʹабуна мьрийа йа дьһа баш. 36 Һьнәкед майин жи бәр ԛамчийа, бәр ԛәрфа, һәла һе жи ԛәйд-зьнщирада у кәлада дьһатьнә зерандьне. 37 Әԝана дьданә бәр кәвьра, әԝана дьһатьнә щерʹьбандьне, бь бьрʹәке дьһатьнә бьрʹине, бь дәве шур дьһатьнә кӧштьне, бь пʹосте пез у бьзьна дьгәрʹийан, ԝана нава һʹәԝщәтийеда сәбьр дькьр, тәнгаси у щәфа дькʹьшандьн. 38 Дьнйа нәһежайи ԝан бу. Әԝана бәрʹийада, чʹийада, шкәфтада у ԛӧлед бьн әʹрдеда дьгәрʹийан.

39 Рʹаст ә әв һʹәму мәрьв бона баԝәрийа хԝә избати стандьн кӧ Хԝәде жь ԝан рʹази йә, йәкә ԝана нәдит кӧ чаԝа әԝ созед кӧ ԝанрʹа һатьбун дайине, һатьнә сери, 40 чьмки Хԝәде тьштәки дьһа баш бона мә һазьр кьрийә, ԝәки әԝана бейи мә нәгьһижьнә кʹамьлийе.

12 Ижа һәрге әʹԝре шәʹдайә ӧса мәзьн дәр-доре мә һәйә, ԝәрен әм һʹәму баре гьран жь хԝә бавежьн, ӧса жи гӧнә кӧ һеса дькарә рʹийа мә бьгьрә, у ԝәрен бь сәбьр ләщмәйданеда, йа кӧ пешийа мә йә, бьрʹәвьн. 2 У ԝәрә әм дина хԝә бьдьнә Исайе кӧ Сәроке мә йә у баԝәрийа мә кʹамьл дькә. Әԝи бона шабуна кӧ һивийа ԝи бу, бәр стуна щәфе сәбьр кьр, у шәрм бәр тьштәки һʹәсаб нәкьр. У ньһа әԝ алийе Хԝәдейи рʹасте рʹуньштийә. 3 Бәле, сәва кӧ һун ԛьдум нәкʹәвьн у сьст нәбьн, бьфькьрьн дәрһәԛа ԝи, йе кӧ бәр гьлийед гӧнәкʹарайә беһӧрмәти тәйах кьр. Ԝан кәсед гӧнәкʹар бь ве йәке хԝәха зьрар дьданә хԝә.

4 Һун шәрʹе хԝәйи мьԛабьли гӧнәда һе нәгьһиштьнә ве йәке, кӧ хуна ԝә бе рʹетьне. 5 Ӧса жи ԝә бир кьрийә ширәта кӧ Хԝәде ԝәрʹа ча кӧрʹед хԝәрʹа дайә: «Кӧрʹе мьн, ширәта Йаһоԝа пьшт гӧһе хԝәва нәвежә, у гава әԝ тә рʹаст дькә, сьст нәбә. 6 Чьмки Йаһоԝа кʹе һʹәз дькә, ԝана ширәт дькә, у кʹе чаԝа кӧрʹе хԝә ԛәбул дькә, ԝана щәза дькә».*

7 Һун гәрәке бәр тәнгасийа тәйах кьн, чьмки әв пʹарәкә ширәткьрьна* ԝә йә. Хԝәде һьндава ԝәда ӧса нә, чаԝа һьндава кӧрʹед хԝәда. Гәло кʹижан кӧрʹ алийе баве хԝәда найе ширәткьрьне? 8 Ле һәрге Хԝәде ԝә ширәт нәкә, ԝәки ӧса нә, һун зарʹед һʹәлал ниньн, ле кӧрʹед беԛануни нә. 9 Бавед мә әм ширәт дькьрьн, у мә жи ԛәдьре ԝан дьгьрт. Ижа гәло нәлазьм ә кӧ әм һе зедә бь һазьрбун гӧһ бьдьнә Баве хԝәйи әʹзмани, йе кӧ бь рʹӧһʹе пироз рʹебәрийе мә дькә ԝәки әм бьжин? 10 Бавед мә ԝәʹдәки кьн әм ширәт кьрьнә, у ӧса чаԝа кӧ ԝана рʹаст һʹәсаб дькьр. Ле Баве мәйи әʹзмани бона кʹара мә, мә ширәт дькә, ԝәки әм мина ԝи пироз бьн. 11 Рʹаст ә гава әм тенә ширәткьрьне, пешийе әв йәк мә хԝәш найе у дьле мә дешинә, ле паше, һәрге әм ширәте ԛәбул дькьн, әв йәк бәре әʹдьлайе у рʹастийе пешда тинә.

12 Ләма жи дәстед ԝәстийайи у чокед сьст ԛәԝи кьн, 13 у бәрдәԝам кьн рʹийа рʹастда һәрʹьн, ԝәки ньге кӧ дькӧлә, жь мовьке щи дәрнәйе, ле ԛәнщ бә. 14 Хирәт кьн кӧ тʹәви һʹәму мәрьва әʹдьлайеда бьн у бь жийинәкә пироз бьжин,* чьмки бейи пирозийе әм нькарьн Хӧдан бьвиньн. 15 Һаж хԝә һәбьн, нәбә кӧ йәк жь ԝә кʹәрәма Хԝәдейә мәзьн ӧнда кә, у кʹока жәʹрдадайи нав ԝәда шин бә, кʹижан кӧ ԝе зьраре бьдә у гәләка һʹәрам кә. 16 Һаж хԝә һәбьн кӧ нав ԝәда йәки ӧса тʹӧнә бә кӧ зьнекʹарийе дькә* йан жи тьштед пироз ԛимәт накә мина Әсаԝ, йе кӧ бона хԝарьнәке ньхӧртийа хԝә фьрот. 17 Һун заньн, паше, гава әԝи дьхԝәст кʹәрәме бьстинә, әԝ һатә инкʹаркьрьне. Рʹаст ә әԝи бь һесьра лавайа баве хԝә дькьр, ԝәки әԝ сафикьрьна хԝә бьгӧһезә, ле әв йәк бадиһәԝа бу.

18 Чьмки һун незики ԝи чʹийайи нәбунә, кʹижан кӧ мәрьв дькарә дәсте хԝә бьде, у йе кӧ бь егьр дьшәԝьтә, нә жи незики әʹԝред тәʹри, нә жи незики тәʹристанийе у нә жи незики байе мәзьн бун, 19 нә жи һун незики дәнге борʹийе бун у нә жи дәнге кӧ хәбәр дьдә. Гава щьмәʹте әв дәнг бьһист, лава кьр кӧ зедә тьштәки дьн ԝанрʹа нәйе готьне, 20 чьмки әԝана жь ве тʹәмийе тьрсийан: «Һәрге һʹәйԝанәк жи гавәке бавежә сәр ви чʹийайи, гәрәке ԝи бьдьнә бәр кәвьра». 21 Хӧйабуна ԝан тьшта ӧса тьрс бу, кӧ Муса гот: «Әз дьтьрсьм у дьләрьзьм». 22 Ле һун незики Чʹийайе Сийоне у бажаре Хԝәдайе сах бунә, демәк Оршәлима әʹзмани. Һун ӧса жи незики бь дәһа һʹәзара мәләкед 23 щьвийайи бунә у незики щьвата ньхӧрийа, наве кʹижана ль әʹзмана һатийә ньвисаре. У һун незики ԝи Хԝәдейи бунә, кʹижан кӧ Һʹакьме һәр тьшти йә, у незики жийина рʹӧһʹанийә кәсед рʹаст бунә, йед кӧ гьһиштьнә кʹамьлийе. 24 Ӧса жи һун незики Иса, ортʹәчийе пәймана ну у хуна ԝийә рʹәшанди, бунә. Әв хун жь хуна Һабил четьр хәбәр дьдә.

25 Һаж хԝә һәбьн кӧ һун инкʹар нәкьн бьбьһен ԝи кәси, йе кӧ ԝәрʹа хәбәр дьдә. Ԝәʹде бәре, мәрьвед сәр әʹрде гӧһ нәданә тьштед кӧ Хԝәде әʹлам кьрьн,* у һатьнә щәзакьрьне. Ижа һәрге әм гӧһ нәдьнә дәнге йе кӧ жь әʹзмана хәбәр дьдә, әме һе зедә бенә щәзакьрьне. 26 Һьнге дәнге ԝи әʹрд һʹәжанд, ле ньһа әԝи соз дайә: «Әзе щарәкә дьн жи бьһʹәжиньм, нә кӧ тʹәне әʹрде, ле әʹзмана жи». 27 Әв гьли «щарәкә дьн жи» нишан дькә, ԝәки Хԝәде ԝе кʹокева рʹакә тьштед кӧ тенә һʹәжандьне, демәк тьштед кӧ әԝи ченәкьрьнә, ԝәки тьштед кӧ найенә һʹәжандьне, бьминьн. 28 Ләма жи, чьмки әм заньн, ԝәки әме Пʹадшатикә кӧ нькарә бе һʹәжандьне, бьстиньн, ԝәрен бәрдәԝам кьн кʹәрәма Хԝәдейә мәзьн бьстиньн, бь сайа кʹижани әм дькарьн ль гора дьле Хԝәде бь тьрс у хоф хьзмәтийа пироз биньн сери. 29 Чьмки Хԝәдайе мә мина агьр ә, йе кӧ һәр тьшти кʹӧта дькә.

13 Бәрдәԝам кьн чаԝа бьра һәв һʹәз бькьн. 2 Меванһʹәзийе* бир нәкьн, чьмки бь ве йәке һьнәка мәләк ча меван ԛәбул кьрьбун, ле ньзаньбун. 3 Кәсед кӧ кәледа ньн биньн бира хԝә, ча бежи һун жи тʹәви ԝан гьрти нә. Ӧса жи кәсед кӧ хьраби ль ԝан те кьрьне биньн бира хԝә, ча бежи һун жи мина ԝан рʹасти хьрабийе тен.* 4 Бьра һәр кәс ԛәдьре зәԝаще бьгьрә, у бьра жьн у мер һәвдӧрʹа амьн бьминьн.* Чьмки Хԝәде ԝе диԝана зьнекʹара у ԛава бькә. 5 Пʹәрәһʹәз нибьн, ле дәсте ԝәда чьԛас һәйә, рʹази бьн, чьмки Хԝәде готийә: «Әзе тʹӧ щар тә нәһельм, у әзе тʹӧ щар тә бәрʹнәдьм». 6 Ләма әм дькарьн бе шьк бежьн: «Йаһоԝа пьштоване мьн ә, әзе нәтьрсьм. Мәрьве чь ль мьн бькә?»

7 Кәсед кӧ нав ԝәда рʹебәрийе ԝә дькьн, йед кӧ хәбәра Хԝәде ԝәрʹа готьнә, биньн бира хԝә. Дина хԝә бьдьнә ахьрийа кьред ԝан у чʹәʹв бьдьнә баԝәрийа ԝан.

8 Иса Мәсиһ дӧһӧ, иро у һʹәта-һʹәтайе йәк ә.

9 Бьра щурʹә-щурʹә һинкьрьнед хәриб ԝә жь рʹе дәрнәхьн. Бьра әм дьле хԝә бь һʹәзкьрьна Хԝәде ԛәԝи кьн, нә кӧ бь хԝарьне,* чьмки әв хԝарьн кʹаре надә ԝан мәрьва, йед кӧ бь зедәйи хԝарьне фәрз һʹәсаб дькьн.

10 Ԛӧрбангәһәкә мә һәйә, у изьна кәсед кӧ конда хьзмәтийа пироз дькьн, тʹӧнә йә, ԝәки тьштед кӧ сәр тенә ԛӧрбанкьрьне, бьхԝьн. 11 Чьмки кʹаһине мәзьн хуна һʹәйԝана дьбә щийе пироз,* чаԝа пʹешкʹеша сәва гӧнә, ле щәндәке ԝан жь зоме дәр тенә дәрхьстьне у шәԝьтандьне. 12 Ләма Иса жи жь бажер дәр* щәфа кʹьшанд, сәва кӧ бь хуна хԝә щьмәʹте пироз кә. 13 Дә ԝәрен әм жь зоме дәр һәрʹьн бал ԝи, у мина ԝи бенә беһӧрмәткьрьне. 14 Чьмки вьра бажарәки мә, йе кӧ ԝе тʹьме бьминә, тʹӧнә йә. Ле әм һʹьзрәта ви бажари нә, йе кӧ ԝе бе. 15 Ԝәрен әм бь сайа Иса һәртʹьм пәсьне Хԝәде бьдьн. Ԛӧрбана мә бона Хԝәде әԝ ә, кӧ әм бь дәве хԝә мәрьвед дьнрʹа бәʹса наве ԝи дькьн. 16 Хенщи ԝе йәке, бир нәкьн ԛәнщийе бькьн у тьштед кӧ бал ԝә һәнә, тʹәви мәрьвед дьн пʹарәвәкьн, чьмки ԛӧрбанед ӧса ль Хԝәде хԝәш тен.

17 Гӧһ бьдьнә кәсед кӧ нав ԝәда рʹебәрийе һьлдьдьн сәр хԝә, у гӧрʹа ԝанда бьн. Чьмки әԝана һәртʹьм бона ԝә хәм дькьн, у ԝе бона ԝә һʹәсаб бьдьн. Ӧса бькьн кӧ әԝана ве йәке нә бь офә-офе, ле бь шабун бькьн. Һәрге һун ӧса нәкьн, әв йәк ԝе зийане бьдә ԝә.

18 Һәртʹьм бона мә дӧа бькьн. Чьмки әм заньн кӧ исафа мә тʹәмьз ә,* у әм дьхԝазьн һәр тьштида рʹаст у һʹәлал бьн. 19 Ле илаһи жь ԝә рʹәща дькьм кӧ һун дӧа бькьн, ԝәки әз һе зу вәгәрʹьм бал ԝә.

20 Бьра Хԝәдайе әʹдьлайе, йе кӧ шьване мәзьни пез, демәк Хӧдане мә Иса, тʹәви хуна пәймана һәр-һәйи жь мьрьне рʹакьрийә, 21 һәр тьште кӧ ԝәрʹа лазьм ә, бьдә ԝә, ԝәки һун ԛьрара ԝи биньн сери. Әԝ пе Иса Мәсиһ дьле мә ԛәԝи дькә, ԝәки тьштед кӧ ль ԝи хԝәш тен, әм бькьн. Бьра Хԝәдерʹа һʹәта-һʹәтайе рʹумәт бе дайине! Амин.

22 Ижа бьрано, әз жь ԝә рʹәща дькьм кӧ һун бь сәбьр гӧһ бьдьнә ван гьлийа, кʹижан кӧ дьла ԛәԝи дькьн, чьмки мьн ԝәрʹа нәʹмәкә кьн ньвиси. 23 Әз дьхԝазьм һун бьзаньбьн ԝәки бьре мә Тимотʹейо һатийә бәрʹдане. Һәрге әԝ зутьрәке бе, әме тʹәвайи бенә бал ԝә.

24 Сьлавед мьн бьдьнә ԝан һʹәмуйа, йед кӧ нав ԝәда рʹебәрийе һьлдьдьнә сәр хԝә, у һʹәму пироза. Бьред жь Италйайе ԝә сьлав дькьн.

25 Бьра кʹәрәма мәзьн тʹәви ԝә һʹәмуйа бә.