НӘʹМА АԚУБ

1 Әз Аԛуб, хӧламе Хԝәде у Хӧдан Иса Мәсиһ, 12 бәрәкед кӧ һʹәму дәра бәла бунә, сьлав дькьм!

2 Бьред мьни дәлал, гава һун рʹасти гәләк щерʹьбандьна тен, ве йәке ча шабунәкә мәзьн һʹәсаб кьн, 3 чьмки һун заньн кӧ чахе баԝәрийа ԝә ви щурʹәйи те щерʹьбандьне, һун һин дьбьн тәйах кьн. 4 У һәрге һун бәрдәԝам кьн тәйах кьн, һуне хԝә бь тʹәмами һин кьн кӧ һәр алида гьһишти бьн, у ԝе тʹӧ кемасийед ԝә тʹӧнә бьн.

5 Һәрге биланийа йәки жь ԝә кем ә, бьра бәрдәԝам кә жь Хԝәде бьхԝазә, у ԝирʹа ԝе бе дайине. Чьмки Хԝәде бь мәрʹдани дьдә һәр кәси, у әʹщьз набә жь кәсед кӧ жь ԝи дьхԝазьн. 6 Ле бьра әв кәс бь баԝәри бьхԝазә у ԛә дӧдьли нәбә. Чьмки кәсе кӧ дӧдьли йә, мина пʹела бәʹре йә, йе кӧ ба ле дьхә у вьрда ԝеда дьбә-тинә. 7 Бьра кәсе ӧса нәфькьрә, кӧ әԝе жь Йаһоԝа тьштәки бьстинә; 8 әԝ мәрьвәки дӧдьли йә, у һʹәму кьред хԝәда дьԛьлԛьлә.

9 Бьре бәләнгаз бьра ша бә, чьмки Хԝәде ԝи бьльнд дькә. 10 У бьре дәԝләти бьра ша бә, ԝәки Хԝәде ле һин кьрийә кӧ мьлук бә. Чьмки йе дәԝләти ԝе мина кӧлиркәкә дәште һʹьшк бә һәрʹә. 11 Гава рʹо һьлте у бь гәрма хԝә шинкайе һʹьшк дькә, кӧлирк дьчʹьлмьсә у бәдәԝийа шинкайе наминә. Бь ви щурʹәйи, йе дәԝләти жи кӧ пәй һәбуке дькʹәвә, ԝе бәтавәбә.

12 Чьԛас бәхтәԝар ә мәрьве кӧ щерʹьбандьнада тәйах дькә, чьмки гава Хԝәде жь ԝи рʹази бә, әԝе хәлата жийине* бьстинә. Йаһоԝа соз дайә, ԝәки ԝе хәлате бьдә кәсед кӧ ԝи һәртʹьм һʹәз дькьн. 13 Гава кәсәк те щерʹьбандьне, бьра әԝ нәбежә: «Хԝәде мьн дьщерʹьбинә». Чьмки Хԝәде тʹӧ кәси пе тьштед хьраб нащерʹьбинә, у тʹӧ кәс нькарә Хԝәде пе тьштед хьраб бьщерʹьбинә. 14 Ле һәр кәс те щерʹьбандьне бь ве йәке, кӧ хԝәстьна ԝи ле дькʹьшинә у дьхапинә. 15 Гава әԝ хԝәстьн гәләк ԛәԝи дьбә, мәрьв гӧнә дькә, у гӧнә жи бәрбь мьрьне дьбә.

16 Бьред мьнә дәлал, нәйенә хапандьне. 17 Һәр дайина ԛәнщ у һәр пʹешкʹеша кʹамьл жь әʹзмен те. Әв тьшт жь жор, жь Баве мә тен, йе кӧ тәʹв, һив у стәйрк әʹфьрандьнә, у йе кӧ найе гӧһастьне мина сийа кӧ те гӧһастьне. 18 Әԝи ль гора хԝәстьна хԝә бь сайа хәбәра рʹастийе жийин дайә мә, ԝәки әм жь нав кәсед кӧ әԝи әʹфьрандьнә бьбьнә кәсед пешьн, кʹижан кӧ әԝи бьжартьнә.

19 Бьред мьни дәлал, ве йәке бир нәкьн: Бьра һәр кәс һазьр бә гӧһ бьдә. Пешийа кӧ әԝ хәбәр дә, бьра рʹьнд бьфькьрә у зу һерс нәкʹәвә. 20 Чьмки мәрьве кӧ һерс дькʹәвә, ль гора рʹастийа Хԝәде һәрәкʹәт накә. 21 Ләма жи һʹәму мьрʹдарʹийе у һәр хьрабийе жь дьле хԝә дәрхьн. Бь мьлукти изьне бьдьнә Хԝәде, кӧ әԝ хәбәред хԝә, йед кӧ дькарьн ԝә хьлаз кьн, дьле ԝәда бьчинә.

22 Нә тʹәне гӧһ бьдьнә хәбәра Хԝәде, ле ӧса жи ль гора ԝе һәрәкʹәт бькьн. Хԝә пе фькьред шаш нәхапиньн у нәфькьрьн, ԝәки бәс ә кӧ һун тʹәне гӧһ бьдьнә хәбәра Хԝәде. 23 Һәрге кәсәк гӧһ дьдә хәбәра Хԝәде, ле найнә сери, әԝ мина ԝи мәрьви йә, йе кӧ нәйнькеда ль рʹуйе хԝә дьньһерʹә, 24 у гава хԝә дьньһерʹә, дьчә у дәрберʹа бир дькә кӧ әԝ йәки чаԝа йә. 25 Кәсе кӧ ль ԛануна Хԝәде,* йа кӧ азайе тинә, рʹьнд дьньһерʹә у тинә сери, әԝ нә йәки ӧса йә кӧ гӧһ дьдә у бир дькә, ле әԝ йәки ӧса йә кӧ ль гора ԛануна Хԝәде һәрәкʹәт дькә, у әԝе бәхтәԝар бә, чьмки әԝ ӧса дькә.

26 Һәрге кәсәк дьфькьрә кӧ әԝ рʹаст Хԝәде дьһʹәбинә, ле зьмане хԝә нькарә, әԝ дьле хԝә дьхапинә, у һʹәбандьна ԝи пʹучʹ ә. 27 Һʹәбандьна паԛьж* у беләкʹә бәр чʹәʹве Баве мә Хԝәде, әԝ ә: бона етʹим у жьнәбийед кӧ тәʹли-тәнгийада ньн, хәм бькьн, ӧса жи хԝә жь рʹийед хьрабә ве дьнйайе дур бьгьрьн.

2 Бьрано, ԛә әԝ рʹаст ә кӧ һун Хӧдане мә Иса Мәсиһ баԝәр дькьн, һьм жи фьрԛийе дькьнә нава мәрьва? 2 Һәрге дӧ мәрьв тенә щьвата ԝә, йәк бь гӧстилкед зерʹ у бь кʹьнщед бьһа, ле йе дьн бәләнгаз у бь кʹьнщед ԛьреж, 3 гәло һуне ԛәдьре йе бь кʹьнщед бьһа бьгьрьн у бежьне: «Кʹәрәм кә, ль ви щийе баш рʹуне!», ле йе бәләнгазрʹа бежьн: «Тӧ бьсәкьнә!», йан «Бәр ньгед мьн рʹуне»? 4 Һәрге һун ӧса бькьн, нә дәрте һун фьрԛийе дькьнә нав мәрьва? Нә һун дьбьнә һʹакьмед кӧ сафикьрьнед хьраб дькьн?

5 Бьбьһен бьред мьни дәлал: Нә Хԝәде кәсед кӧ бәр чʹәʹве дьнйайе бәләнгаз ьн, бьжартийә, ԝәки әԝана баԝәрийеда дәԝләмәнд бьн? Әре, әԝи әԝана бьжартьн, кӧ бьбьнә ԝаред Пʹадшатийа ԝи, чь кӧ әԝи соз дайә ԝан мәрьва, йед кӧ ԝи һʹәз дькьн. 6 Ле һун кәсед бәләнгаз беһӧрмәт дькьн. Нә йед дәԝләмәнд зоре ль ԝә дькьн у ԝә дьбьнә бәр диԝана? 7 Хԝәде навәки рʹумәт дайә ԝә. Ижа йед кӧ кʹьфьрийа ԝи нави дькьн, нә әԝана нә? 8 Ньвисаред Пирозда те готьне: «Мәрьва һʹәз бькә чаԝа тӧ хԝә һʹәз дьки». Һәрге һун ль гора ве ԛануна пʹадшатийе дькьн, һун ԛәнщ дькьн. 9 Ле һәрге һун фьрԛийе дькьнә нава мәрьва, һьнге һун гӧнә дькьн, у ль гора ԛануне дьбьнә мина кәсед кӧ ԛануне дьтʹәрʹьбиньн.

10 Чьмки һәрге кәсәк тʹәмамийа Ԛануне хԝәй дькә, ле тʹәмике найнә сери, әԝ тʹәмамийа Ԛануне дьтʹәрʹьбинә. 11 Хԝәде дьбежә: «Ԛавийе нәкә», әԝ ӧса жи дьбежә: «Нәкӧжә». Һәрге тӧ ԛавийе нәки, ле бькӧжи, тӧ ԛануне дьтʹәрʹьбини. 12 Һәр гав хәбәрдан у рʹабун-рʹуньштьна хԝәда мина ԝан мәрьва бьн, йед кӧ ԝе бенә диԝанкьрьне бь ԛануна кӧ азайе дьдә. 13 Чьмки кʹи кӧ рʹәʹмтийе надә кʹьфше, ԝе берʹәʹмти бе диԝанкьрьне. Рʹәʹмти һьмбәри диԝане сәр дькʹәвә.

14 Бьрано, һәрге кәсәк дьбежә кӧ әԝ Хԝәде баԝәр дькә, ле пе кьред хԝә надә кʹьфше, кʹара ве йәке чь йә? Ԛә баԝәрийа ӧса дькарә ԝи хьлаз кә? 15 Һәрге хушк йан бьра бе кʹьнщ* бьн, йан һʹәԝще нане рʹоже бьн, 16 ле йәк жь ԝә ԝанрʹа бежә: «Бь хер у сьламәт һәрʹьн, хԝә гәрм кьн у хԝә тʹер кьн», ле тьштед кӧ әԝана һʹәԝщә нә нәдә ԝан, кʹара ве йәке чь йә? 17 Баԝәри жи ӧса йә, һәрге кьред ԝе тʹӧнә бьн, әԝ мьри йә.

18 Ле диса жи кәсәк ԝе бежә: «Щәм тә баԝәри һәйә, ле щәм мьн, кьред мьн һәнә. Дә тӧ баԝәрийа хԝә бе кьра нишани мьн бькә, ле әзе баԝәрийа хԝә пе кьра нишани тә бькьм». 19 Тӧ баԝәр дьки кӧ Хԝәде йәк ә, ӧса нинә? Гәләк баш ә. Щьн жи ве йәке баԝәр дькьн у жь тьрса дьләрьзьн. 20 Һәй беһʹьшо! Тӧ ньзани кӧ баԝәри бе кьра бекер ә? 21 Нә баве мә Бьраһим пе кьред хԝә йәки рʹаст һатә һʹәсабе, гава кӧрʹе хԝә Исһаԛ дани сәр ԛӧрбангәһе ԝәки бькә ԛӧрбан? 22 Тӧ дьвини кӧ баԝәрийа ԝи пе кьред ԝи әшкәрә бу, у пе кьред ԝи баԝәрийа ԝи кʹамьл бу. 23 Бь ви щурʹәйи, әв готьнед Ньвисаред Пироз һатьнә сери: «Бьраһим баԝәрийа хԝә Йаһоԝа ани, у йәки рʹаст һатә һʹәсабе», у жерʹа досте Йаһоԝа һатә готьне.

24 Һун дьвиньн кӧ мәрьв пе кьред хԝә йәки рʹаст те һʹәсабе, нә кӧ тʹәне пе баԝәрийа хԝә. 25 Нә һәма ԝи щурʹәйи Рʹәхаба ԛав жи пе кьред хԝә йәкә рʹаст һатә һʹәсабе, гава щәʹсус мала хԝәда ԛәбул кьрьн у паше рʹекә дьнрʹа шандьн? 26 Әре, чаԝа бәдән бе рʹӧһʹ мьри йә, ӧса жи баԝәри бе кьра мьри йә.

3 Бьрано, гәләк жь ԝә бьра нәбьнә дәрсдар, чьмки һун заньн ԝе диԝана мә дәрсдара һе гьран бә. 2 Әм гьшк жи гәләк щара шашийа дькьн. Һәрге кәсәк бь зьмане хԝә шашийа накә, әԝ мәрьвәки беԛьсур ә у дькарә тʹәмамийа бәдәна хԝә жи зәфт кә. 3 Гава әм гәме давежьнә дәве һәспе, ԝәки әԝ тʹәсмили мә бә, әм сәрԝертийе тʹәмамийа бәдәна һәспе дькьн. 4 Һәла дәрһәԛа гәмийа жи бьфькьрьн: Гәми чьԛас мәзьн ьн у бь байед ԛайим тенә кʹьшандьне жи, йәкә гәмиван пе берькед бьчʹук гәмийе дьбә ԝедәре, кʹидәре дьхԝазә.

5 Ӧса жи зьман, рʹаст ә әԝ әндәмәки бәдәнейә бьчʹук ә, ле бь готьнед мәзьн пʹайе хԝә дьдә. Бьфькьрьн кӧ агьрәки чьԛас бьчʹук жи дькарә мешәки мәзьн бьшәԝьтинә! 6 Зьман жи мина агьр ә. Әԝ нав әндәмед бәдәна мәда, канийа хьрабийе йә, чьмки әԝ тʹәмамийа бәдәне мьрʹдарʹ дькә у тʹәмамийа жийина мәрьв дьшәԝьтинә, у агьре ԝе жь Геһенайе йә.* 7 Һʹәму щурʹә һʹәйԝанед чоле, тәйрәдә, шулькийед әʹрде у һʹәйԝанед бәʹре дькарьн бенә зәфткьрьне у алийе мәрьвада тенә зәфткьрьне. 8 Ле зьман, тʹӧ мәрьв нькарә зәфт кә. Тʹӧ кәс зьмане хԝә нькарә, әв зьраре дьдә у бь жәʹра мьрьне тʹьжә йә. 9 Әм бь зьмане хԝә пәсьне Баве хԝә Йаһоԝа дьдьн, у һәма бь ви зьмани жи әм ньфьрʹа ԝан мәрьва дькьн, йед кӧ «сурәте Хԝәдеда» һатьнә әʹфьрандьне. 10 Һәма жь ви дәви һьм дӧа, һьм жи ньфьрʹ дәрдькʹәвә.

Бьрано, гәрәке ӧса нибә. 11 Гәло ԛә жь канике һьм ава ширьн, һьм жи ава тәʹл дәрдькʹәвә? 12 Бьрано, ԛә дара һежире дькарә зәйтʹуна бьдә, йан жи кʹола тьрийе һежира бьдә? Йан жи, ԛә жь канийа ава шорʹ, ава ширьн дькарә дәркʹәвә?

13 Нав ԝәда кʹи билан у фәʹмкʹар ә? Бьра әԝ бь рʹабун-рʹуньштьна хԝәйә баш бьдә кʹьфше, кӧ әԝ һәр тьшти бь мьлукти* дькә, чь кӧ жь биланийе те. 14 Ле һәрге дьле ԝәда һʹәвсуди у һәврʹьки һәйә,* ида пе биланийа хԝә пʹайе хԝә нәдьн у дәрәԝа нәкьн.* 15 Биланийа ӧса нә кӧ жь Хԝәде те, ле жь дьнйайе, жь кәсед кӧ ль гора бәдәна хԝә һәрәкʹәт дькьн, у жь щьна те. 16 Кʹидәре һʹәвсуди у һәврʹьки һәбә, ԝедәре бетʹәрбәти у һʹәму щурʹә хьраби һәйә.

17 Ле биланийа жь Хԝәде бәре пешьн паԛьж ә, паше әʹдьлайиһʹәз ә, бәрбьһер ә, бона гӧһдарикьрьне һазьр ә, бь дьлрʹәмийе у кьред ԛәнщ* тʹьжә йә, фьрԛийе накә у дӧрʹу нинә. 18 Хенщи ве йәке, чахе тʹохьме рʹастийе те чандьне ԝедәре кʹидәре әʹдьлайи һәйә, әԝ ԝанрʹа бәр тинә, йед кӧ әʹдьлайе чедькьн.

4 Гәло шәрʹ-дәʹԝед нав ԝәда жь кʹӧ тен? Нә әԝана жь хԝәстьнед бәдәне тен, йед кӧ дьле ԝәда шәрʹ дькьн? 2 Һун дьхԝазьн, ле настиньн. Һун дькӧжьн у чʹәʹвнәбарийе дькьн, ле нькарьн бьстиньн. Һун дькʹәвьнә һʹӧщәте, шәрʹ дькьн, у тьштәки настиньн, чьмки һун жь Хԝәде нахԝазьн. 3 Ле гава һун дьхԝазьн, настиньн, чьмки һун бь нетәкә хьраб дьхԝазьн, ԝәки бькарьбьн хԝәстьнед хԝәйә бәдәни тʹер кьн.

4 Һәй кәсед нәамьн,* чьрʹа һун ньзаньн кӧ һәвалтийа тʹәви дьнйайе те һʹәсабе дьжмьнатийа тʹәви Хԝәде? Ләма жи кʹи дьхԝазә бьбә һәвале дьнйайе, әԝ хԝә дькә дьжмьне Хԝәде. 5 Йан һун дьфькьрьн кӧ Ньвисаред Пирозда бадиһәԝа ӧса те готьне: «Дьле мә, мә бәрбь һʹәвсудийе дькʹьшинә, ләма жи әм һәртʹьм щурʹә-щурʹә тьшта дьхԝазьн»? 6 Ле кʹәрәма мәзьн кӧ Хԝәде дьдә мә, жь ве һʹәвсудийе мәзьнтьр ә. Ләма Ньвисаред Пирозда те готьне: «Хԝәде мьԛабьли кʹӧбар-бабаха йә, ле кʹәрәма хԝәйә мәзьн дьдә мьлука».

7 Ләма жи гӧрʹа Хԝәдеда бьн, мьԛабьли Мире-щьна бьсәкьньн, у әԝе жь ԝә бьрʹәвә. 8 Незики Хԝәде бьн, у әԝе жи незики ԝә бә. Гӧнәкʹарно, хԝә жь кьред хԝәйә хьраб паԛьж кьн. Дӧдьлино, дьлед хԝә паԛьж кьн. 9 Бьгьрин у шине бькьн. Бьра кʹәне ԝә бьбә шин, у бьра шайа ԝә бьбә дәрд. 10 Хԝә бәр чʹәʹве Йаһоԝа мьлук кьн, у әԝе ԝә бьльнд кә.

11 Бьрано, бәс ә мьԛабьли һәв хәбәр дьн. Кәсе кӧ мьԛабьли бьре хԝә хәбәр дьдә, йан жи ԝи сущдар дькә, әԝ мьԛабьли ԛануне хәбәр дьдә у ԛануне сущдар дькә. Һәрге тӧ ԛануне сущдар дьки, тӧ ԛануне найни сери, ле тӧ хԝә дьки һʹакьм. 12 Тʹәне Хԝәде Ԛанундар у Һʹакьм ә, у тʹәне әԝ дькарә хьлаз кә, йан жи ԛьрʹ кә. Ле тӧ кʹи йи кӧ мәрьва сущдар дьки?

13 Һьнәк жь ԝә ӧса дьбежьн: «Иро йан сьбе әме һәрʹьн фьлан йан беван бажари, саләке ԝедәре бьминьн, шьхӧләки бькьн у пʹәра ԛазанщ кьн». 14 Ле һун ньзаньн сьбе чь ԝе бе сәре ԝә. Чьмки жийина ԝә мина һӧлмәке йә, йа кӧ дәмәкә кьн хӧйа дьбә у паше ӧнда дьбә. 15 Дәԝсе, һун гәрәке һа бежьн: «Һәрге Йаһоԝа бьхԝазә, әме бьжин у фьлан йан беван тьшти бькьн». 16 Ле һун ԛӧрʹә-ԛӧрʹә пʹайе хԝә дьдьн. Һʹәму пʹайидайинед ӧса гәләк хьраб ьн. 17 Ләма жи һәрге кәсәк занә чь рʹаст ә у накә, әԝ гӧнә дькә.

5 Һәй һун, дәԝләмәндно, бона бәлайед кӧ ԝе бенә сәре ԝә, бьгьрин у бькьнә зарә-зар. 2 Һәбука ԝә рʹьзийа йә, у бьзузе кʹьнщед ԝә хԝарийә. 3 Зерʹ у зивед ԝә жәнг гьртьнә. Әв жәнг ԝе бьбә избатийа шашийед ԝә у ԝе бәдәна ԝә бьхԝә. Тьштед кӧ ԝә хԝәрʹа тʹоп кьрьнә, ԝе рʹожед пашьнда бьбьнә мина агьр. 4 Пʹалед кӧ зәвийед ԝәда шьхӧле дьруне кьрьнә, дькьнә зарин, чьмки ԝә һәԛе ԝана нәдайе. Һәԝара ԝан гьһиштийә гӧһе Йаһоԝа, Хԝәдайе ордийа. 5 Ԝә дәԝләмәндтийеда у ль гора хԝәстьнед дьле хԝә дьжит. Ԝә дьлед хԝә бона рʹожа сәржекьрьне кʹози кьрийә. 6 Ԝә диԝана мәрьве рʹаст кьр у әԝ кӧшт. Ләма әԝ мьԛабьли ԝә дәрдькʹәвә.

7 Аԝа бьрано, һʹәта һатьна Хӧдан сәбьр кьн. Һәла бьфькьрьн: Щоткʹар бь сәбьр һивийа бәре зәвийейә ԛимәт дьсәкьнә, у һивийе йә һʹәта барана бьһаре у йа пайизе бьбарә. 8 Һун жи сәбьр кьн. Дьлед хԝә ԛәԝи кьн, чьмки һатьна Хӧдан незик ә.

9 Бьрано, газьна һәв нәкьн,* ԝәки диԝана ԝә нәйе кьрьне. Ва йә, Һʹакьм бәр дәри сәкьнийә. 10 Бьрано, алийе тәʹли-тәнгасийада у сәбьреда чʹәʹв бьдьнә ԝан пʹехәмбәра, йед кӧ бь наве Йаһоԝа хәбәр данә. 11 Әм дәрһәԛа кәсед кӧ сәбьр кьрьнә, дьбежьн: «Әԝана мәрьвнә бәхтәԝар ьн».* Ԝә бьһистийә кӧ Ибо чаԝа тәйах кьр у Йаһоԝа чаԝа хьлазийеда әԝ кʹәрәм кьр. Бь ве йәке ԝә дит кӧ Йаһоԝа рʹәʹм ә у бь һʹәзкьрьне тʹьжә йә.*

12 Бьрано, йа фәрз әв ә кӧ һун ида сонд нәхԝьн, нә бь әʹзмен, нә бь әʹрде, нә жи бь тьштәки дьн. Ле бьра хәбәра ԝә «Әре», әре бә, у «На», на бә, сәва кӧ Хԝәде диԝана ԝә нәкә.

13 Һәрге кәсәк нав ԝәда тәʹли-тәнгасийада нә, бьра бәрдәԝам кә дӧа бькә. Һәрге кәсәк ша йә, бьра зәбура бьстьре кӧ пәсьне Хԝәде бьдә. 14 Һәрге кәсәк нав ԝәда нәхԝәш ә,* бьра гази рʹуспийед щьвате бькә, у бьра рʹуспи бона ԝи дӧа бькьн у бь наве Йаһоԝа ԝи рʹун кьн.* 15 Дӧайе бь баԝәрийе ԝе кәсе нәхԝәш* ԛәнщ кә, у Йаһоԝа ԝе ԝи рʹакә сәр ньга. У һәрге әԝи гӧнә кьрьбә жи, Хԝәде ԝе бьбахшинә ԝи.

16 Ләма бәр һәв гӧнед хԝә бьдьнә рʹуйе хԝә у бона һәв дӧа бькьн, ԝәки һун ԛәнщ бьн. Ԛәԝата дӧайе кәсе рʹаст гәләк мәзьн ә. 17 Елйас мәрьвәки мина мә бу.* Ле гава әԝи жь дьл дӧа кьр кӧ баран нәбарә, баран се сал у шәш мәһа нәбари. 18 Паше әԝи диса дӧа кьр, баран бари у әʹрде бәр да.

19 Бьрано, һәрге жь ԝә кәсәк жь рʹийа рʹаст дур кʹәтийә у кәсәки дьн ԝи вәгәрʹинә сәр рʹийа рʹаст, 20 ве йәке бьзаньбьн: Кәсе кӧ али гӧнәкʹарәки дькә, ԝәки әԝ жь рʹийа хԝәйә шаш вәгәрʹә, әԝе ԝи жь мьрьне хьлаз кә у ԝе гәләк гӧнед йе гӧнәкʹар бенә бахшандьне.