НӘʹМА ПЕШЬН ЙА ПӘТРУС

1 Әз Пәтрус, шандийе Иса Мәсиһ, ве нәʹме дьньвисьм бьнәлийед ԝәʹдәлурʹа, йед кӧ бәлабуйи нә ль һәремед Понтосе, Галатйайе, Кәпәдокйайе, Асйайе у Битенйайе. 2 Хԝәде, Баве мә, һун ль гора ԛьрара хԝә пешда бьжартьн, у пе рʹӧһʹ һун пироз кьрьн, ԝәки һун гӧһдарийа ԝи бькьн у бь сайа хуна Иса Мәсиһ бенә паԛьжкьрьне.

Дә бьра кʹәрәма мәзьн у әʹдьлайи ль ԝә һе зедә бә.

3 Бьра Хԝәдерʹа, Баве Хӧдане мә Мәсиһрʹа пәсьн бе дайине! Чьмки әм бь рʹәʹма ԝийә мәзьн тʹәзәда һатьнә буйине, ԝәки бь сайа рʹабуна Иса Мәсиһ жь мьрьне, әм бьбьнә хԝәйе гӧманәкә сах. 4 Хԝәде мьлкʹәки кӧ нарʹьзә йан наһʹәрьмә у начʹьлмьсә дайә мә. Әԝи әв мьлкʹ бона ԝә ль әʹзмана хԝәй кьрийә. 5 Әре, бона ԝә, кʹижана Хԝәде бь ԛәԝата хԝә дьпʹарезә, чьмки баԝәрийа ԝә һәйә. Әԝе ԝә бона хьлазбуна кӧ ԝәʹде ахьрийеда әшкәрә бә, бьпʹарезә. 6 Рʹаст ә һун бона ве йәке гәләк ша нә, ле дьбәкә һун ԝәʹдәки кьн жь бо щурʹә-щурʹә щерʹьбандьна бьчәрчьрьн. 7 Әв сәва ве йәке лазьм ә, ԝәки баԝәрийа ԝәйә щерʹьбанди, ԝәрʹа пәсьн, рʹумәт у һӧрмәте бинә, гава Иса Мәсиһ әʹйан бә. Баԝәрийа ӧса жь зерʹе кӧ агьрда те тʹәмьзкьрьне,* ле паше хьраб дьбә, ԛимәттьр ә. 8 Рʹаст ә ԝә тʹӧ щар Мәсиһ нәдитийә, ле диса жи һун ԝи һʹәз дькьн. Рʹаст ә һун ньһа жи ԝи навиньн, ле диса жи һун баԝәрийа хԝә ԝи тиньн, у һуне бь шабунәкә мәзьн, йа кӧ пе зар-зьман найе готьне, 9 хәлата баԝәрийа хԝә бьстиньн, демәк хьлазбуне.

10 Пʹехәмбәред кӧ дәрһәԛа кʹәрәма Хԝәдейә мәзьн, кʹижан кӧ бона ԝә йә, пʹехәмбәрти дькьрьн, бь хирәт у һур бь һур дәрһәԛа ве хьлазбуне лекʹолин дькьрьн. 11 Хԝәде бәреда бь рʹӧһʹе пироз ԝан пʹехәмбәрарʹа готьбу, ԝәки Мәсиһ ԝе щәфе бькʹьшинә у паше бе рʹумәткьрьне. Бона ве йәке ԝана хирәт дькьр тедәрхьн, һәла чь ԝе бе сәре Мәсиһ, у әв тьшт ԝе кʹәнге бьԛәԝьмьн. 12 Хԝәде пʹехәмбәрарʹа әшкәрә кьр, ԝәки ԝана нә кӧ хԝәрʹа, ле ԝәрʹа хьзмәт дькьр. Чь кӧ ԝана ньвиси, ԝә жь ԝана бьһист, йед кӧ әв мьзгини бь рʹӧһʹе пироз кӧ жь әʹзмана һатә шандьне, ԝәрʹа әʹлам кьрьн. Мәләк жи гәләк дьхԝазьн һәма ван тьшта бьзаньбьн.

13 Һʹьше хԝә бона шьхӧл һазьр кьн у тʹьме һәр тьштида сәр һʹьше хԝә бьн. Гӧмана хԝә бьдьнә сәр кʹәрәма Хԝәдейә мәзьн, йа кӧ ԝәʹде әʹйанбуна Иса Мәсиһ ԝе ԝәрʹа бе дайине. 14 Ньһа һун зарʹед Хԝәде нә, йед кӧ гӧрʹа ԝи дькьн. Ләма жи ида ль гора хԝәстьнед хԝәйи нәрʹаст, йед кӧ ԝә бәре жь бо нәзанийе дькьр, һәрәкʹәт нәкьн. 15 Һун жи һʹәму рʹабун-рʹуньштьна хԝәда пироз бьн, мина ԝи йе кӧ гази ԝә кьрийә. 16 Чьмки ӧса ньвисар ә: «Пироз бьн, чьмки әз пироз ьм».

17 Һәрге һун Баврʹа дӧа дькьн, йе кӧ бе фьрԛи диԝана һәр кәси дькә анәгори кьред ԝан, дә чаԝа бьнәлийед ве дьнйайе йед ԝәʹдәлу, бь рʹабун-рʹуньштьна хԝә бьдьнә кʹьфше кӧ һун Хԝәде дьтьрсьн. 18 Чьмки һун заньн кӧ һун жь әʹмьре хԝәйи пʹучʹ, йа кӧ ԝә жь кал-бавед хԝә стандийә,* аза бунә,* нә кӧ бь тьштед кӧ дьрʹьзьн, йан жи бь зерʹ у зив, 19 ле бь хуна Мәсиһә ԛимәт, кʹижан кӧ мина хуна бәрхәкә бесущ у беләкʹә йә. 20 Рʹаст ә Хԝәде һе пешийа әʹфьрандьна дьнйайе Мәсиһ бьжартьбу, ле әԝ хьлазийа зәманада бона кʹара ԝә хӧйа бу. 21 Бь сайа Мәсиһ һун Хԝәде баԝәр дькьн. Хԝәде әԝ жь мьрьне рʹакьр у рʹумәт да ԝи, ԝәки баԝәри у гӧмана ԝә һьндава Хԝәдеда һәбә.

22 Жь бо ве йәке кӧ һун гӧрʹа һинкьрьна рʹаст дькьн у ԝә хԝә паԛьж кьрийә, ԝә чаԝа бьра бе дӧрʹути һәв һʹәз кьрийә, у ләма ньһа бь дьл ԛайим һәвдӧ һʹәз бькьн. 23 Һун тʹәзәда һатьнә буйине нә кӧ жь тʹохьме кӧ дьрʹьзә, ле жь тʹохьме кӧ нарʹьзә, пе хәбәра Хԝәдайе сах у һʹәта-һʹәтайе. 24 Чаԝа ньвисар ә: «Һʹәму мәрьв мина гиһе нә, у тʹәмамийа рʹумәта ԝан мина кӧлирка дәште йә. Гиһа һʹьшк дьбә у кӧлирк дьчʹьлмьсә, 25 ле хәбәра Йаһоԝа һʹәта-һʹәтайе дьминә». У әв «хәбәр» мьзгини йә, кʹижан кӧ ԝәрʹа һатийә дайине.

2 Дә хԝә жь һʹәму хьрабийе, дәрәԝийе, дӧрʹутийе, чʹәʹвнәбарийе у һәр щурʹә бӧхдана дур бьгьрьн. 2 Чаԝа кӧ зарʹед тʹәзәбуйи һʹәйра шире дайика хԝә нә, һун жи хԝәстьна хԝә һьндава шире тʹәмьзә хәбәра Хԝәде зедә кьн, сәва кӧ бьбьнә мәрьвнә гьһишти у хьлаз бьн. 3 Чьмки ԝә тәʹм кьрийә* кӧ Хӧдан ԛәнщ ә.

4 Мәрьва кәвьре сах инкʹар кьрьн, ле Хԝәде әԝ бьжарт у ԝи ԛимәт һʹәсаб дькә. Гава һун незики ԝи дьбьн, 5 һун жи мина кәвьред сах бона маләкә рʹӧһʹани тенә авакьрьне. Ӧса һун дьбьнә кʹаһинед пироз, ԝәки бь Иса Мәсиһ ԛӧрбанед рʹӧһʹани пʹешкʹеш кьн, йед кӧ ль Хԝәде хԝәш тен. 6 Чьмки Ньвисаред Пирозда те готьне: «Ва йә, әз ль Сийоне кәвьре бьжарти, демәк кәвьре һʹим йе ԛимәт у сәрәкә,* датиньм. У кәсе кӧ баԝәрийа хԝә ԝи тинә, ԝе тʹӧ щар дьлтәнг нәбә».*

7 Һун ԝи баԝәр дькьн, ләма жи әв кәвьр бона ԝә ԛимәт ә. Ле бона кәсед кӧ ԝи баԝәр накьн, әв кәвьр ԛимәт нинә. Ньвисаред Пирозда ӧса те готьне: «Кәвьре кӧ авакʹара инкʹар кьр, буйә кәвьре сәрәкә» 8 у «кәвьре кӧ ԝе бьбә сәбәбе кʹәтьна мәрьва у зьнаре кӧ ԝана әʹщьз бькә». Әԝана дькʹәвьн, чьмки гӧрʹа хәбәра Хԝәде накьн. Ахьрийа ӧса һивийа ԝан ә. 9 Ле һун «щьмәʹтәкә бьжарти, кʹаһинед кӧ ча пʹадша хьзмәт дькьн, мьләтәки пироз у мьлкʹе ԝийи мәхсус ьн, сәва кӧ һʹәму дәра дәрһәԛа һʹӧнӧред Хԝәдейә баш гьли кьн», йе кӧ һун жь тәʹрийе гази рʹонайа хԝәйә һʹӧжмәкʹар кьрьнә. 10 Бәре һун щьмәʹта Хԝәде нибун, ле ньһа һун щьмәʹта ԝи нә. Бәре һун бе рʹәʹма Хԝәде бун, ле ньһа ԝә рʹәʹм дитийә.

11 Бьред дәлал, һун ве дьнйайеда мина кәсед хәриб у меван ьн. Әз жь ԝә рʹәща дькьм кӧ һун хԝә дур бьгьрьн жь хԝәстьнед бәдәни, йед кӧ мьԛабьли ԝә шәрʹ дькьн. 12 Бьра рʹабун-рʹуньштьна ԝә нав мьләтада ԛәнщ бә. Һәрге жи әԝана мьԛабьли ԝә хәбәр дьн у бежьн кӧ һун тьштед хьраб дькьн, ԝе кьред ԝәйи ԛәнщ бьвиньн у Хԝәде рʹумәт кьн гава әԝ бе кӧ бьщерʹьбинә.

13 Бона хатьре Хӧдан, гӧрʹа йед хԝәйиһʹӧкӧм бькьн. Фьрԛи тʹӧнә әԝ пʹадша бә, йе кӧ сәр һʹәмуйарʹа йә, 14 йан ԝәли бә, йе кӧ алийе пʹадшада һатийә кʹьфшкьрьне, ԝәки ԝан мәрьва щәза кә, йед кӧ хьрабийе дькьн, у пʹайе ԝан бьдә, йед кӧ ԛәнщийе дькьн. 15 Чьмки Хԝәде дьхԝазә кӧ һун бь кьред ԛәнщ дәве ԝан бьгьрьн, йед кӧ бь нәзани хәбәр дьдьн у сәрԝахт ниньн. 16 Мина мәрьвед аза бьжин, ле азайа хԝә бона хьрабийе нәдьнә хәбате, ле чаԝа хӧламед Хԝәде бьжин. 17 Ԛәдьре һʹәму мәрьва бьгьрьн, һʹәму хушк-бьра* һʹәз бькьн, Хԝәде бьтьрсьн, һӧрмәте бьдьнә пʹадша.

18 Бьра хӧлам ԛәдьре ахайед хԝә бьгьрьн у гӧрʹа ԝан бькьн. Бьра әԝана һьм гӧрʹа ахайед һʹәйф у сәрԝахт бькьн, һьм жи гӧрʹа ԝан ахада бьн, кʹижана чәтьн ә рʹази кьн. 19 Чьмки кәсе кӧ дьхԝазә исафа ԝи бәр Хԝәде тʹәмьз бә у бона ве йәке бәр чәтьнайа тәйах дькә у бь нәһәԛи щәфа дькʹьшинә, Хԝәде жь ԝи рʹази йә. 20 Һәрге һун бона гӧнәкьрьне тенә ледане у тәйах дькьн, ижа кʹара ве йәке чь йә? Ле һәрге һун щәфа дькʹьшиньн у тәйах дькьн жь бо ԝе йәке кӧ ԛәнщийе дькьн, Хԝәде жь ԝә рʹази йә.

21 Әре, бона ве йәке Хԝәде һун бьжартьн, чьмки Мәсиһ жи бона ԝә щәфа дькʹьшанд у ԝәрʹа мәсәлә һишт, сәва кӧ һун һәр тьштида пʹегәһа ԝида һәрʹьн. 22 Әԝи ԛә гӧнә нәкьр, у тʹӧ хәбәрәкә дәрәԝ жь дәве ԝи дәрнәкʹәт. 23 Гава мәрьва әԝ беһӧрмәт дькьрьн, әԝи әԝана беһӧрмәт нәдькьрьн. Гава әԝи щәфа дькʹьшанд, гәф ль кәсәки нәдьхԝар, ле әԝи хԝә дьспартә ԝи, йе кӧ бь һәԛи диԝане дькә. 24 Гава Мәсиһ сәр стуне* һатә мьхкьрьне, әԝи бь бәдәна хԝә гӧнед мә һьлгьрт, сәва кӧ әм жь гӧна хьлаз бьн у бона рʹастийе бьжин. У «һун пе бьринед ԝи һатьнә ԛәнщкьрьне». 25 Чьмки һун мина пәзед ӧндабуйи бун, ле ньһа һун вәгәрʹийанә бал шьван у нобәдаре жийина хԝә.

3 Анәгори ве йәке һун жи, кʹӧлфәтно гӧрʹа мере хԝәда бьн. Һьнге кәсед кӧ гӧрʹа хәбәра Хԝәде накьн жи, дьбәкә нә пе готьне, ле пе рʹабун-рʹуньштьна ԝә бьбьнә баԝәрмәнд, 2 чьмки әԝана рʹабун-рʹуньштьна ԝәйә ԛәнщ у ԛәдьргьртьна ԝә дьвиньн. 3 Бьра хәмла ԝә нә бь тьштед бәрбьчʹәʹв бә, демәк нә бь гӧливәгьртьне бә, нә бь зерʹа, нә жи бь кʹьнщед бьһа бә, 4 ле бьра хәмла ԝә ве йәкеда бә, чь кӧ дьле ԝәда нә. Бона ве йәке, хԝә бь рʹӧһʹәки мьлук у шкәсти* бьхәмьлиньн. Хәмла ӧса нарʹьзә, чьмки әԝ бәр чʹәʹве Хԝәде гәләк ԛимәт ә. 5 Ԝәʹде бәреда жи жьнед пироз, йед кӧ баԝәрийа хԝә Хԝәде дьанин, хԝә ӧса дьхәмьландьн. Әԝана гӧрʹа меред хԝәда бун. 6 Мәсәлә, Сәрайе гӧрʹа Бьраһим дькьр у ԝирʹа дьгот «Ахайе мьн». Һун жи һәрге бәрдәԝам кьн ԛәнщийе бькьн у нәтьрсьн, һун зарʹед ԝе нә.

7 Ӧса жи һун, мерно ль гора занәбуна кӧ ԝә стандийә, бәрдәԝам кьн тʹәви жьнед хԝә бьжин. Ԛәдьре ԝан бьгьрьн, чьмки әԝана сьст ьн мина фьраԛәкә назьк, у тʹәви ԝә хԝәйиԝаред пʹешкʹеша жийине нә. Һәрге һун ӧса нәкьн, Хԝәде ԝе дӧайед ԝә ԛәбул нәкә.

8 Хушк-бьрано, һун гьшк сәр фькьрәке бьн, дьлшәԝат бьн, һәвдӧ һʹәз бькьн, дьлрʹәʹм бьн у мьлук бьн. 9 Гава мәрьв хьрабийе ль ԝә дькьн, һун хьрабийе ль ԝан нәкьн. Гава мәрьв ԝә беһӧрмәт дькьн, һун ԝана беһӧрмәт нәкьн. Ле дәԝсе, ԛәнщийе бькьн, чьмки Хԝәде бона ве йәке гази ԝә кьрийә, у әԝе ԝә кʹәрәм кә.

10 Чьмки ньвисар ә: «Йе кӧ жийине һʹәз дькә у дьхԝазә рʹожед хԝәш бьвинә, гәрәке һаж хԝә һәбә кӧ зьмане ԝи тьштәки хьраб нәбежә у хәбәрәкә дәрәԝ жь дәве ԝи дәрнәкʹәвә. 11 Бьра әԝ хԝә жь хьрабийе дур бьгьрә у ԛәнщийе бькә. Бьра әԝ әʹдьлайе бьгәрʹә у пәй ԝе кʹәвә. 12 Чьмки чʹәʹвед Йаһоԝа сәр кәсед рʹаст ьн, у гӧһед ԝи дӧа-дьрозгед ԝан дьбьһен. Ле кәсед кӧ хьрабийе дькьн, Йаһоԝа ԝана нәфрʹәт дькә».

13 Һәрге һун бь хирәт ԛәнщийе бькьн, кʹи ԝе зьраре бьдә ԝә? 14 Ле һәрге һун сәва рʹастийе щәфе бькʹьшиньн жи, һун бәхтәԝар ьн. Жь тьштед кӧ әԝана дьтьрсьн,* һун нәтьрсьн у бәр хԝә нәкʹәвьн. 15 Ле дьле хԝәда Мәсиһ мина Хӧдан пироз кьн. Һәртʹьм һазьр бьн, ԝәки бәр кәсед кӧ пьрса дьдьнә ԝә, гӧмана хԝә бьпʹарезьн. Ле ве йәке бь нәрми у бь ԛәдьрәки мәзьн бькьн.

16 Исафа хԝә тʹәмьз хԝәй кьн, кӧ һәрге кәсәк мьԛабьли ԝә тьштәки хьраб бежә, әԝе шәрми бә жь бо рʹабун-рʹуньштьна ԝәйә ԛәнщ ча шагьртед Мәсиһ. 17 Дьһа баш ә кӧ һун нә кӧ жь бо кьред хьраб, ле жь бо кьред ԛәнщ щәфе бькʹьшиньн, һәрге ԛьрара Хԝәде бә. 18 Чьмки кәсе рʹаст, демәк Мәсиһ, бона кәсед нәрʹаст щарәке бона һʹәта-һʹәтайе мьр, ԝәки ԝана жь гӧна аза кә. Әԝи ӧса кьр кӧ һун тʹәви Хԝәде ль һәв бен. Әԝ ча мәрьв һатә кӧштьне, ле ча рʹӧһʹ жь мьрьне һатә рʹакьрьне. 19 У паше чу, кӧ әʹламәтийа диԝане бьдә ԝан рʹӧһʹед* кәледа, 20 йед кӧ рʹожед Нӧһда нәгӧһдар бун. Ԝан рʹожада, гава гәмийа Нӧһ дьһатә авакьрьне, Хԝәде бь сәбьр һивийе бу, у ԝе гәмийеда тʹәне чәнд кәс, демәк һʹәйшт кәс жь аве хьлаз бун.

21 Тьштед кӧ ԝан рʹожада ԛәԝьмин, әм дькарьн бәрамбәри ньхӧмандьне* бькьн, йа кӧ ньһа мә бь сайа рʹабуна Иса Мәсиһ жь мьрьне, хьлаз дькә. (Ньхӧмандьн ԛьрежа бәдәне паԛьж накә, ле әԝ һивикьрьн ә бәр Хԝәде бона исафа тʹәмьз.) 22 Гава Мәсиһ һьлкʹьшийа әʹзмана, әԝ алийе Хԝәдейи рʹасте рʹуньшт. У Хԝәде мәләк, һʹӧкӧмәти у ԛәԝат да дәсте ԝи.

4 Мәсиһ ча мәрьв щәфа кʹьшанд, бьра һʹьш-аԛьле ԝә жи мина йе Мәсиһ бә. Чьмки кәсе кӧ щәфе дькʹьшинә, дьдә кʹьфше кӧ әԝи тʹәрка гӧна дайә, 2 ԝәки ԝәʹде майи кӧ әԝ сәр әʹрде бьжи, нә кӧ бона хԝәстьнед бәдәни бьжи, ле сәва кӧ ԛьрара Хԝәде бинә сери. 3 Ида бәс ә кӧ бәре ԝә чьԛас мина мәрьвед ве дьнйайе дькьр. Мәсәлә, рʹабун-рʹуньштьна ԝә рʹобәти* бу, һун дькʹәтьнә пәй тәмхԝәстьнед хьраб, ԝә бь зедәйи вәдьхԝар, бесинор у беәʹдәб кʹеф дькьр, сәрхԝәш дьбун у мьԛабьли ԛануне дькʹәтьнә нава пʹутпʹарьстийе. 4 Мәрьвед ве дьнйайе фәʹм накьн, кӧ чьрʹа һун ида тʹәви ԝан рʹийа бенамусида начьн, ләма жи әԝана ԝә беһӧрмәт дькьн. 5 Ле әԝана ԝе ль бәр Мәсиһ щаба хԝә бьдьн, йе кӧ ԝе диԝана кәсед сах у мьри бькә. 6 Ләма мьзгини мьрийарʹа жи һатә дайине, сәва кӧ әԝана бәр чʹәʹве Хԝәде алийе рʹӧһʹанида сах бьн, чьԛас жи мәрьв бь дитьна чʹәʹва диԝана ԝан дькьн.

7 Ле хьлазийа һәр тьшти незик буйә. Ләма жи сәрԝахт бьн у һәртʹьм һазьр бьн дӧа бькьн. 8 Бәри һәр тьшти һәвдӧ гәләк һʹәз бькьн, чьмки йе кӧ һʹәз дькә, һәртʹьм һазьр ә бьбахшинә кәсед дьн.* 9 Һьндава һәвда меванһʹәз бьн у ве йәке һʹәсаб нәкьн ча баре гьран.* 10 Һәр йәк жь ԝә чьԛас пʹешкʹеш жь Хԝәде стандийә, бьдьнә хәбате кӧ һәвдӧрʹа хьзмәт кьн, чаԝа бәрдәстийед кӧ али кәсед дьн дькьн, ԝәки әԝана жь кʹәрәма Хԝәдейә мәзьн, йа кӧ бь гәләк щурʹа әшкәрә дьбә, кʹаре бьстиньн. 11 Һәрге кәсәк хәбәр дьдә, бьра әԝ ӧса хәбәр дә кӧ зәлал бе кʹьфше, ԝәки әԝ гьлийед Хԝәде әʹлам дькә. Һәрге кәсәк хьзмәт дькә, бьра әԝ хԝә бьсперә ԛәԝата кӧ Хԝәде дьдә, ԝәки Хԝәде бь сайа Иса Мәсиһ һәр тьштида бе рʹумәткьрьне. Әԝ һʹәта-һʹәтайе һежайи рʹумәт у ԛәԝате йә. Амин.

12 Бьред дәлал, гава һун тәнгасийед гьран* дькʹьшиньн, әʹщебмайи нәминьн у нәфькьрьн, кӧ тьштәки әʹщеб те сәре ԝә. 13 Ле ша бьн кӧ һун һәвалпʹаред щәфед Мәсиһ нә, сәва кӧ чахе рʹумәта ԝи хӧйа бә, һун һьнге жи бькарьбьн ша бьн. 14 Һәрге бона хатьре наве Мәсиһ ԝә беһӧрмәт дькьн, һун бәхтәԝар ьн, чьмки әв йәк нишан дькә, кӧ рʹӧһʹе рʹумәте, демәк рʹӧһʹе Хԝәде сәр ԝә йә.

15 Ле әз нахԝазьм кӧ кәсәк жь ԝә тәнгасийа бькʹьшинә чаԝа меркӧж, йан дьз, йан йе кӧ хьрабийе дькә, йан жи йе кӧ дькʹәвә нав шьхӧлед хәлԛе. 16 Һәрге кәсәк жь бо ве йәке кӧ әԝ шагьрте Мәсиһ ә щәфе бькʹьшинә, бьра шәрм нәкә, ле бьра бәрдәԝам кә ль гора ви нави бьжи, у ӧса рʹумәте бьдә Хԝәде. 17 Чьмки ньһа йә ԝәхте диԝане кӧ Хԝәде кʹьфш кьрийә, у әве жь мала Хԝәде дәстпебә. Ле һәрге диԝан жь мә дәстпедьбә, гәло чь ԝе бе сәре ԝан кәса, йед кӧ гӧрʹа мьзгинийа Хԝәде накьн? 18 «У һәрге мәрьве рʹаст ԝе анщах хьлаз бә, ижа чь ԝе бе сәре йе гӧнәкʹар у йе кӧ Хԝәде натьрсә?» 19 Ләма жи кәсед кӧ щәфе дькʹьшиньн жь бо ԝе йәке кӧ әԝана ԛьрара Хԝәде тиньн сери, бьра хԝә* тʹәсмили Әʹфьрандаре амьн бькьн, у бәрдәԝам кьн ԛәнщийе бькьн.

5 Жь бо ве йәке кӧ әз жи рʹуспи мә, у мьн щәфед Мәсиһ пе чʹәʹвед хԝә дитьнә, у әз һәвалпʹаре ԝе рʹумәте мә, йа кӧ ԝе бе әшкәрәкьрьне, әз жь рʹуспийед нав ԝәда һиви дькьм: 2 Чаԝа бәрпьрсийар шьвантийа кәрийе Хԝәде бькьн, йе кӧ әԝи тʹәсмили ԝә кьрийә. Ле нә кӧ бь мәщбури, ле бь рʹәзәдьли чаԝа Хԝәде дьхԝазә, нә кӧ бона кʹара хԝә, ле бь дьл у щан. 3 Нәбьнә ахайед ԝан, йед кӧ пʹара Хԝәде нә, ле бона кәри бьбьнә мәсәлә. 4 У гава сәроке шьвана хӧйа бә, һуне хәлата рʹумәте* бьстиньн, йа кӧ ԛә ӧнда набә.

5 Мина ве йәке, һун, бьред щаһьл, гӧрʹа ԝан бьра бькьн, йед кӧ жь ԝә мәзьнтьр ьн.* Ле һун һʹәму һьндава һәвда мьлук бьн,* чьмки Хԝәде мьԛабьли кәсед бабах ә, ле кʹәрәма хԝәйә мәзьн дьдә мәрьвед мьлук.

6 Ләма жи бь мьлукти хԝә бькьнә бьн дәсте Хԝәдайе ԛәԝи, ԝәки әԝ ԝәʹде рʹастда ԝә бьльнд кә. 7 Һʹәму хәмед хԝә бьдьнә дәсте ԝи,* чьмки әԝ бона ԝә хәм дькә. 8 Сәрԝахт бьн у һʹьшйар бьн! Дьжмьне ԝә Мире-щьна мина шерәки кӧ мьрʹә-мьрʹа ԝи йә, дьгәрʹә һәла кʹе һʹуфи хԝә кә. 9 Ле һун бь баԝәрийа ԛәԝи мьԛабьли Мире-щьна бьсәкьньн, чьмки һун заньн ԝәки һʹәму бьред ԝә нав тʹәмамийа дьнйайеда щәфед ӧса дькʹьшиньн. 10 Хԝәдайе кӧ хԝәйе кʹәрәма мәзьн ә, гази ԝә кьрийә, ԝәки һун тʹәви Мәсиһ йәктийеда бьн у һʹәта-һʹәтайе бенә рʹумәткьрьне. Хԝәде ԝе хԝәха пәй һьнәк щәфед ԝәрʹа, һинкьрьна ԝә тʹәмам кә. Әԝе ԝә ԛәԝи кә, али ԝә бькә кӧ һун амьн бьминьн у ԝә бьшьдинә. 11 Ԛәԝат һʹәта-һʹәтайе йа ԝи йә. Амин.

12 Мьн әв нәʹма бьчʹук бь аликʹарийа Силванус,* кʹижани әз һʹәсаб дькьм бьраки амьн, ԝәрʹа ньвиси, сәва кӧ әз дьле ԝә ԛәԝи кьм у ԝәрʹа бьдьмә кʹьфше, кӧ Хԝәде бь рʹасти кʹәрәма хԝәйә мәзьн ль ԝә кьрийә. Хԝә ԛәԝи ль ве йәке бьгьрьн. 13 Йа* кӧ Бабилонеда йә у мина ԝә алийе Хԝәдеда һатийә бьжартьне, ԝә сьлав дькә, у кӧрʹе мьн Маркос жи ԝә сьлав дькә. 14 Бь һʹәзкьрьне* һәвдӧ сьлав кьн.

Бьра һʹәмуйед кӧ тʹәви Мәсиһ йәктийеда ньн, әʹдьлайеда бьн.