НӘʹМА ДӦДА ЙА ПӘТРУС

1 Әз Шьмһʹун Пәтрус, хӧлам у шандийе Иса Мәсиһ, ве нәʹме дьньвисьм ԝанрʹа, йед кӧ бь сайа рʹастийа Хԝәдайе мә у Хьлазкʹаре мә Иса Мәсиһ мина мә бунә хԝәйе ве баԝәрийа ԛимәт:

2 Бьра кʹәрәма мәзьн у әʹдьлайи ль ԝә зедә бә бь сайа занәбуна рʹаст дәрһәԛа Хԝәде у Хӧдане мә Иса. 3 Пе ԛәԝата Хԝәде мәрʹа һатә дайине әв һʹәму тьшт, чь кӧ лазьм ә, ԝәки ӧса бьжин кӧ Хԝәдерʹа амьн бьн, чьмки мә занәбуна рʹаст ԛазанщ кьрийә дәрһәԛа ԝи, кʹи кӧ бь рʹумәт у ԛәнщийа хԝә гази мә кьрийә. 4 Хԝәде ль гора рʹумәт у ԛәнщийа хԝә, созед ԛимәт у мәзьн ча пʹешкʹеш данә мә, ԝәки әм бьбьнә һәвпʹаред һʹӧнӧред ԝи у мина ԝи бьбьнә рʹӧһʹ, чьмки әм жь хьрабийа ве дьнйайе, йа кӧ жь хԝәстьнед хьраб те, дур кʹәтьнә.

5 Бона ве йәке, чь жь дәсте ԝә те бькьн, ԝәки баԝәрийа ԝә һәбә у һун тьштед ԛәнщ* бькьн, ӧса жи хирәт кьн кӧ занәбуна ԝә һәбә 6 у хԝәгьртьна ԝә һәбә, ԝәки һун тәйах кьн у Хԝәдерʹа амьн бьн. 7 Чь жь дәсте ԝә те бькьн, кӧ һун һʹәму бьратийе у һәр кәси һʹәз бькьн. 8 Чьмки һәрге һун хԝәйе ван һʹӧнӧра бьн у әԝ нав ԝәда зедә бьн, һуне ль гора занәбуна рʹаст дәрһәԛа Хӧдане мә Иса Мәсиһ һәрәкʹәт бькьн у бе бәр нәминьн.

9 Ле кәсе кӧ хԝәйе ԝан һʹӧнӧра нинә, әԝ кор ә, чьмки әԝ чʹәʹве хԝә дьгьрә кӧ рʹонайе нәвинә.* У әԝ бир дькә кӧ гӧнед ԝийә бәре һатьнә бахшандьне. 10 Ләма бьрано, чь жь дәсте ԝә те бькьн, ԝәки һун ви ԛәдьре хԝә кӧ һун һатьнә газикьрьне у бьжартьне, хԝәй кьн. Һәрге һун ван тьшта һәртʹьм бькьн, һуне тʹӧ щара жь рʹе дәрнәкʹәвьн. 11 Әре, һуне тʹер-тʹьжә кʹәрәма бьстиньн у бькʹәвьнә Пʹадшатийа һʹәта-һʹәтайе йа Хӧдан у Хьлазкʹаре мә Иса Мәсиһ.

12 Ләма жи, рʹаст ә һун ван тьшта заньн у һинкьрьнед рʹастда жи ԛәԝи нә, әз дьхԝазьм һәр гав ван тьшта биньм бира ԝә. 13 Әз ве йәке ча борще хԝә һʹәсаб дькьм, ԝәки һʹәта әз ве бәдәнеда* ньм, ԝан тьшта биньм бира ԝә. 14 Чьмки чаԝа кӧ Хӧдане мә Иса Мәсиһ мьнрʹа әшкәрә кьрийә, әз заньм кӧ әзе тʹәне ԝәʹдәки кьн ве бәдәнеда бьминьм. 15 Әзе һәртʹьм чь жь дәсте мьн те бькьм, кӧ һун пәй чуйина мьнрʹа бькарьбьн ван һʹәму тьшта биньн бира хԝә.

16 Гава мә ԝәрʹа дәрһәԛа ԛәԝат у һатьна Хӧдане мә Иса Мәсиһ гот, гьлийед мә сәр һʹиме чʹирокед мәрьва нибун, ле сәр һʹиме ве йәке бун, кӧ мә мәзьнайа ԝи бь чʹәʹве хԝә дит. 17 Әԝи жь Баве мә Хԝәде һӧрмәт у рʹумәт станд, гава Хԝәдайе рʹумәте ԝирʹа ӧса гот: «Әв ә Кӧрʹе мьни дәлал, йе кӧ дьле мьн ша дькә». 18 Әре, гава әм тʹәви ԝи сәр чʹийайе пироз бун, мә әв гьли жь әʹзмен бьһист.

19 Ләма әм һе зедә баԝәрийа хԝә ве йәке тиньн, ԝәки һʹәму тьштед кӧ Хԝәде готьнә, ԝе бенә сери. Рʹьнд дина хԝә бьдьнә ван һʹәму тьшта. Бьра әв готьн дьле ԝәда бьбьнә мина чʹьрайе, кӧ щики тәʹрида шәԝԛ дьдә (һʹәта кӧ сьбәһ зәлал дьбә у стәйрка сьбәһе дәрдькʹәвә). 20 Һун заньн кӧ тʹӧ пʹехәмбәртийа Ньвисаред Пироз сәр һʹиме фькьред мәрьва нинә. 21 Чьмки тʹӧ пʹехәмбәрти алийе мәрьвада нәһатийә дайине, ле мәрьва бь рʹебәрийа рʹӧһʹе пироз гьлийед Хԝәде дьготьн.

2 Чаԝа кӧ нав щьмәʹта Исраелда пʹехәмбәред ԛәлп һәбун, нав ԝәда жи дәрсдаред ԛәлп ԝе һәбьн. Әԝана ԝе дьзикава һинкьрьнед ԛәлп* кӧ баԝәрийе ԝеран дькьн, бькьнә навда. Әԝана ԝе һәла һе жи хԝәйе кӧ әԝ кʹьрʹинә, инкʹар кьн, у ԝе зутьрәке ԛьрʹа ԝан бе. 2 Хенщи ве йәке, гәләк кәс ԝе чʹәʹв бьдьнә рʹабун-рʹуньштьна ԝанә рʹобәти,* у рʹуйе ԝанда мәрьв ԝе кʹьфьрийа рʹийа рʹастийе бькьн. 3 У әԝана ԝе жь бо тьмайа хԝә пе гьлийед хапинок ԝә бона кʹара хԝә бьдьнә хәбате. Щәзайе ԝан кӧ ида бәреда һатийә ԛьраркьрьне, ԝе дәрәнги нәкʹәвә, у бе шьк әԝана ԝе бенә ԛьрʹкьрьне.

4 Хԝәде нәбахшандә мәләкед кӧ гӧнә кьрьбун, ле әԝи әԝана щәза кьрьн у авитьнә Тартаросе. Әԝи әԝана бь зьнщира гьредан,* ԝәки кʹурайа тәʹристанийеда бьн, һʹәта ԝәʹде диԝанкьрьна ԝан бе. 5 Хԝәде нә жи бахшандә дьнйа бәре, ле тʹәне Нӧһ, мьзгинване рʹастийе, тʹәви һʹәфт кәсед дьн хьлаз кьр, гава тофан* ани сәр дьнйа мәрьвед бехԝәде. 6 Хԝәде диԝана бажаред Содом у Гоморайе кьр у әԝ кьрьнә хԝәли. Бь ви щурʹәйи Хԝәде да кʹьфше, кӧ чь ԝе бе сәре нәһәԛа. 7 У әԝи мәрьве рʹаст Лут, йе кӧ жь бо рʹабун-рʹуньштьна рʹобәти йа мәрьвед хьраб гәләк хәмгин дьбу, хьлаз кьр. 8 Чьмки әв мәрьве рʹаст нав ԝан мәрьвед хьрабда дьжит, у һәр рʹож жь бо тьштед кӧ әԝи дьдит у дьбьһист, дьле ԝи гәләк дешийа. 9 Әре, Йаһоԝа занә чаԝа кәсед кӧ ԝирʹа амьн ьн, жь щерʹьбандьне хьлаз кә. У әԝ занә кӧ чаԝа мәрьвед нәһәԛ бона рʹожа диԝане хԝәй кә, 10 илаһи мәрьвед кӧ дьхԝазьн бәдәна кәсед дьн бьһʹәрʹьминьн у мәрьвед кӧ сәрԝертийе бәр тьштәки һʹәсаб накьн.

Әв дәрсдаред ԛәлп бешәрм у ԛӧрʹә нә, у натьрсьн ԝәки дәрһәԛа мәрьвед кӧ жь Хԝәде рʹумәт стандьнә, хьраб хәбәр дьн. 11 Рʹаст ә мәләк пе ԛәԝат у зорайе жь мәрьва зедәтьр ьн, ле диса жи әԝана жь бо ве йәке кӧ ԛәдьре Йаһоԝа дьгьрьн, мәрьва нәһәԛ накьн у ԝана сущдар накьн. 12 Ле әԝ мәрьв кʹьфьрийа ԝан тьшта дькьн, чь кӧ фәʹм накьн. Әԝана ԝе ль гора рʹийа хԝәйә хьраб бенә ԛьрʹкьрьне, мина һʹәйԝанед бефәʹм, йед кӧ бона гьртьне у кӧштьне дьне дькʹәвьн. 13 Әԝана ԝе бона кьред хԝәйә хьраб бенә щәзакьрьне.

Әԝана һәла һе рʹож жи ләзәте дьстиньн жь кʹефа бесинор у жь жийина дәԝләмәнд.* Әԝана ләкʹә нә, у һʹәрам ьн, кʹижанарʹа һʹәԝас ә бь һинкьрьнед ԛәлп бьхапиньн, гава тʹәви ԝә кʹеф дькьн. 14 Чʹәʹвед ԝан жь ԛавийе тʹер набьн, әԝана нькарьн тʹәрка гӧнә бьдьн, у мәрьвед кӧ баԝәрийеда сьст ьн, дьхапиньн. Дьле ԝан һини чʹәʹвбьрʹчитийе буйә. Әԝана зарʹед ньфьрʹкьри нә. 15 Ԝана рʹийа рʹаст һишт у же дур кʹәтьн. Әԝана рʹийа Бьламе кӧрʹе Бәйорда чун, йе кӧ һʹьзрәт бу бона кьред хԝәйә хьраб хәлате бьстинә. 16 Ле әԝ бона гӧне хԝә һатә рʹасткьрьне. Кʹәре бе зар-зьман бь дәнге мәрьва хәбәр да у рʹе бәр пʹехәмбәр гьрт, ԝәки әԝ тьштед беаԛьлайи нәкә.

17 Әԝана канийед бе ав ьн у әʹԝред кӧ ль бәр ба дьчьн. Тәʹристанийа шәвәрʹәш һивийа ԝан ә. 18 Әԝана гьлийед гьринг дьбежьн, кʹижан кӧ пʹучʹ у вала нә. Әԝана бь хԝәстьнед хԝәйә гӧнәкʹар у бь рʹабун-рʹуньштьна рʹобәти, ԝан мәрьва дьхапиньн, йед кӧ тʹәзә жь ван тьштед хьраб дур кʹәтьнә. 19 Әв дәрсдаред ԛәлп мәрьвед дьнрʹа соз дьдьн, кӧ ԝе аза бьн, ле хԝәха әԝана хӧламед гӧнә нә, чьмки мәрьв дьбә хӧламе кәсе кӧ ԝи бьндәст дькә. 20 Һәрге ԝана занәбуна рʹастә дәрһәԛа Хӧдан у Хьлазкʹар Иса Мәсиһ стандийә, у тʹәрка кьред хьрабә ве дьнйайе данә, ле паше диса вәгәрʹийанә у кʹәтьнә нав ван тьшта, һьнге һʹале ԝан жь ԝәхте кӧ ԝана һинкьрьнед рʹаст ньзаньбун, хьрабтьр ә. 21 Бона ԝан ԝе дьһа баш буйа, кӧ ԛә әв рʹийа рʹастийе нас нәкьрана, нә кӧ паши наскьрьне пьшта хԝә бьдана ве тʹәмийа пироз, йа кӧ ԝанрʹа һатийә дайине. 22 Сәр ԝан әв гьли-готьн һатийә сери: «Кучʹьк вәгәрʹийа сәр вәрʹәшандьна хԝә, у хьнзире* шушти диса хԝә һʹәрʹийе дьхә».

3 Бьред дәлал, әв ида нәʹма мьнә дӧда йә кӧ әз ԝәрʹа дьньвисьм. Чаԝа нәʹма пешьнда, әз дьхԝазьм ве нәʹмеда жи тьштед кӧ һун хԝәха заньн, биньм бира ԝә, сәва кӧ ԝә һʹьшйар кьм, ԝәки һун зәлал бьфькьрьн. 2 Әв йәк ԝе али ԝә бькә кӧ һун гьлийед пʹехәмбәред амьн у тʹәмийа Хӧдан у Хьлазкʹаре мә, йед кӧ бь сайа шандийа ԝәрʹа һатьнә дайине, биньн бира хԝә. 3 Һун гәрәке ве йәке бьзаньбьн: Рʹожед хьлазийеда* мәрьв ԝе сәр тьштед ԛәнщ бькʹәньн у ль гора хԝәстьнед хԝә хьрабийе бькьн, 4 у ԝе ӧса бежьн: «Әԝи соз да кӧ ԝе бе, ле кʹа? Жь ԝәхте кӧ кал-бавед мә мьрьн, һәр тьшт чаԝа кӧ дәстпека дьнйайеда бу, һәма ӧса дьминә».

5 Ле әԝана бь һʹәмде хԝә пьшт гӧһе хԝәва давежьн ве йәке, кӧ бәреда әʹрд у әʹзман һәбун, у ԝәки әʹрд бь готьна Хԝәде жь нав аве дәркʹәт у нава аведа ԛәԝи сәкьни, 6 у паше гава тʹәмамийа әʹрде диса кʹәтә бьн аве, мәрьвед һьнге ԛьрʹ бун. 7 Ле әʹрд у әʹзманед кӧ ньһа һәнә, диса бь ве готьне бона ԛьрʹкьрьна бь агьр тенә хԝәйкьрьне, у тенә һиштьне һʹәта рʹожа диԝане у ԛьрʹкьрьна мәрьвед кӧ Хԝәде натьрсьн.

8 Ле диса жи, бьред дәлал, ве йәке бир нәкьн: Бона Йаһоԝа рʹожәк мина һʹәзар сали йә у һʹәзар сал мина рʹожәке йә. 9 Һьнә кәс дьфькьрьн кӧ Йаһоԝа пеканина созе хԝә дәрәнги дьхә, ле ӧса нинә. Әԝ һьндава ԝәда бь сәбьр ә, чьмки нахԝазә кӧ кәсәк бьмьрә, ле дьхԝазә гьшк жи тʹобә кьн. 10 Рʹожа Йаһоԝа ԝе мина дьзәки бе. Һьнге әʹзман ԝе бь гӧрʹә-гӧрʹәкә мәзьн бәтавәбә, у тьштед ль әʹзмен у сәр әʹрде ԝе бьшәԝьтьн у ԝеран бьн. Әʹрд у кьред сәр әʹрде, ԝе әшкәрә бьн.

11 Жь бо ве йәке кӧ һʹәму тьшт ԝе бенә ԝеранкьрьне, рʹьнд бьфькьрьн кӧ һун гәрәке мәрьвнә чаԝа бьн. Һун гәрәке рʹабун-рʹуньштьна хԝәда пироз бьн у Хԝәдерʹа амьн бьн. 12 Хенщи ве йәке, һивийа рʹожа Йаһоԝа бьн у ԝе рʹоже бир нәкьн. Ԝе рʹоже әʹзман ԝе нав агьрда ԝеран бә, у тьштед сәр әʹрде у әʹзмана ԝе жь гәрма ԛайим бьһʹәльн! 13 Ле әм ль гора созе ԝи, һивийа әʹрд у әʹзманәки ну нә, у сәр әʹрде у әʹзмана рʹасти ԝе һәбә.

14 Ләма бьред дәлал, һʹәта һун һивийа ван тьшта нә, чь жь дәсте ԝә те бькьн, ԝәки ахьрийеда бәр чʹәʹве Хԝәде беләкʹә, бекемаси у әʹдьлайеда бьн. 15 Хенщи ве йәке, сәбьра Хӧдане мә ча хьлазбуна хԝә һʹәсаб кьн. Бьре мәйи дәлал Паԝлос жи әԝ тьшт ԝәрʹа ньвиси, ль гора биланийа кӧ әԝи жь Хԝәде стандийә. 16 Паԝлос һʹәму нәʹмед хԝәда бәʹса ԝан тьшта дькә. Ле ван нәʹмада һьнә тьшт һәнә кӧ фәʹмкьрьна ԝан чәтьн ә. Мәрьвед нәзан у йед кӧ баԝәрийеда сьст ьн, ван тьшта у ӧса жи Ньвисаред Пирозә майин нәрʹаст шьровәдькьн, у бь ве йәке дьбьнә сәбәбе ԛьрʹкьрьна хԝә.

17 Ләма жи бьред дәлал, һун кӧ ван тьшта һе пешда заньн, һаж хԝә һәбьн ԝәки һинкьрьнед ԛәлп йед мәрьвед хьраб ԝә жь рʹе дәрнәхьн, у ԝәки һун жь һʹиме кӧ ԛәԝи сәкьни нә, нәкʹәвьн. 18 Ле бәрдәԝам кьн ӧса бьжин, ԝәки һун кʹәрәма мәзьн жь Хӧдан у Хьлазкʹаре мә Иса Мәсиһ һе зедә бьстиньн, у занәбуна хԝә дәрһәԛа ԝи зедә кьн. Бьра һьм ньһа, һьм жи һʹәта-һʹәтайе ԝирʹа рʹумәт бе дайине. Амин.