НӘʹМА ПЕШЬН ЙА ЙУҺʹӘННА

1 Әм ԝәрʹа дьньвисьн дәрһәԛа кәсе кӧ дәстпекеда һәбу, йе кӧ мә бьһист, мә пе чʹәʹве хԝә дит, мә рʹьнд дина хԝә да ԝи у мә хԝәха дәсте хԝә да ԝи, демәк дәрһәԛа кәсе кӧ хәбәра жийине тинә. 2 (Әре, жийина һʹәта-һʹәтайе мәрʹа һатә әшкәрәкьрьне, у мә әв дит, әм дәрһәԛа ве шәʹдәтийе дьдьн, у ԝәрʹа бәʹса ве дькьн. Әв жийина һʹәта-һʹәтайе жь Баве мә йә у мәрʹа һатә әшкәрәкьрьне.) 3 Әм ԝәрʹа гьли дькьн дәрһәԛа тьштед кӧ мә дитьнә у бьһистьнә, ԝәки һун жи мина мә тʹәви Баве мә у Кӧрʹе ԝи Иса Мәсиһ йәктийеда бьн.* 4 У әм ван тьшта ԝәрʹа дьньвисьн, ԝәки әм гьшк бь шабуне тʹьжә бьн.

5 Мьзгинийа кӧ мә жь Иса бьһистийә у әʹлами ԝә дькьн, әв ә: Хԝәде рʹонайи йә у тʹӧ тәʹри ԝида тʹӧнә. 6 Һәрге әм дьбежьн: «Әм тʹәви ԝи йәктийеда ньн», ле йәкә әм бәрдәԝам дькьн тәʹрийеда дьгәрʹьн, һьнге әм дәрәԝа дькьн у ль гора рʹастийе нажин. 7 Ле һәрге әм рʹонайеда дьгәрʹьн, чаԝа кӧ Хԝәде рʹонайеда йә, һьнге әм тʹәви һәв йәктийеда ньн. У хуна Кӧрʹе ԝи Иса, мә жь һʹәму гӧна паԛьж дькә.

8 Һәрге әм бежьн: «Гӧне мә тʹӧнә», әм хԝәха хԝә дьхапиньн, у дьле мәда рʹасти тʹӧнә. 9 Хԝәде амьн у һәԛ ә, у һәрге әм гӧнед хԝә биньн рʹуйе хԝә, әԝе гӧнед мә бьбахшинә у мә жь һʹәму нәһәԛийа паԛьж кә. 10 Ле һәрге әм бежьн: «Мә ԛә гӧнә нәкьрийә», әм Хԝәде дәрәԝин дәрдьхьн, у хәбәра ԝи дьле мәда тʹӧнә.

2 Зарʹед мьнә дәлал, әз ван тьшта ԝәрʹа дьньвисьм, ԝәки һун гӧнә нәкьн. Ле һәрге кәсәк гӧнә бькә жи, аликʹарәки мәйи һәԛ һәйә, демәк Иса Мәсиһ, йе кӧ бал Баве мә йә. 2 У әԝ нә тʹәне бона гӧнед мә, ле бона гӧнед тʹәмамийа дьнйайе ԛӧрбана льһәвһатьне йә. 3 Һәрге әм бәрдәԝам кьн тʹәмийед ԝи биньн сери, әв йәк избат дькә кӧ әм ԝи нас дькьн. 4 Кʹи кӧ дьбежә: «Әз ԝи нас дькьм», ле тʹәмийед ԝи найнә сери, әԝ дәрәԝин ә у рʹасти дьле ԝида тʹӧнә. 5 Ле кʹи кӧ хԝә ль хәбәра ԝи дьгьрә, избат дькә кӧ әԝ бь рʹасти Хԝәде һʹәз дькә. Һәрге әм жи ӧса бькьн, әме бьдьнә кʹьфше кӧ әм тʹәви ԝи йәктийеда ньн. 6 Кʹи кӧ дьбежә: «Әз тʹәви ԝи йәктийеда дьминьм», гәрәке ӧса бьжи ча Иса дьжит.

7 Бьред дәлал, әз ԝәрʹа нә кӧ тʹәмикә ну дьньвисьм, ле ве тʹәмийа кәвьн, йа кӧ һе жь дәстпекева бал ԝә һәйә. Әв тʹәмийа кәвьн әԝ хәбәр ә, йа кӧ ԝә бьһистийә. 8 Диса жи әв тʹәмийа кӧ әз ԝәрʹа дьньвисьм, ча тʹәмийа ну йә, кʹижан кӧ Иса хԝәха дьани сери у һун жи тиньн сери. Чьмки тәʹри дәрбаз дьбә у рʹонайа рʹаст ида шәԝԛ дьдә.

9 Әԝе кӧ дьбежә: «Әз рʹонайеда мә», ле бьре хԝә нәфрʹәт дькә, әԝ һе тәʹрийеда йә. 10 Әԝе кӧ бьре хԝә һʹәз дькә рʹонайеда дьминә, у ԝида тʹӧ сәбәбе лькʹӧмандьне тʹӧнә. 11 Ле йе кӧ бьре хԝә нәфрʹәт дькә, әԝ тәʹрийеда йә. Әԝ тәʹрийеда дьгәрʹә у ньзанә кʹӧда дьчә, чьмки тәʹрийе чʹәʹвед ԝи кор кьрьнә.

12 Зарʹед мьнә дәлал, әз ԝәрʹа дьньвисьм, чьмки бона хатьре наве ԝи* гӧнед ԝә һатьнә бахшандьне. 13 Бавно, әз ԝәрʹа дьньвисьм, чьмки ԝә әԝ нас кьрийә, йе кӧ һе жь дәстпекева һәйә. Хортно, әз ԝәрʹа дьньвисьм, чьмки һун мьԛабьли Мире-щьна* сәркʹәтьнә. Зарʹно, әз ԝәрʹа дьньвисьм, чьмки ԝә Бав нас кьрийә. 14 Бавно, әз ԝәрʹа дьньвисьм, чьмки ԝә әԝ нас кьрийә, йе кӧ һе жь дәстпекева һәйә. Хортно, әз ԝәрʹа дьньвисьм, чьмки һун ԛәԝи нә, хәбәра Хԝәде дьле ԝәда дьминә у һун мьԛабьли Мире-щьна сәркʹәтьнә.

15 Дьнйайе у тьштед кӧ дьнйайеда һәнә һʹәз нәкьн. Һәрге кәсәк дьнйайе һʹәз дькә, әԝ Бав һʹәз накә. 16 Чьмки һәр тьште кӧ дьнйайеда һәйә, мәсәлә хԝәстьна бәдәне, хԝәстьна чʹәʹва, ԛӧрʹәбуна пе һәбуке, нә жь Бав ә, ле жь дьнйайе йә. 17 Дьнйа у хԝәстьна ԝе жи ԝе дәрбаз бә, ле йе кӧ ԛьрара Хԝәде тинә сери, ԝе һʹәта-һʹәтайе бьминә.

18 Зарʹно, ида сьһʹәта хьлазийе йә. Ԝә бьһистийә кӧ нәйаре Мәсиһ ԝе бе, у бь рʹасти гәләк нәйаред Мәсиһ ида дәркʹәтьнә, жь бо чь жи әм заньн кӧ ньһа сьһʹәта хьлазийе йә. 19 Әԝана жь нав мә дәркʹәтьн, ле мина мә нибун, чьмки һәрге әԝана мина мә буна, ԝе бал мә бьмана. Ле әԝана чун, ԝәки әшкәрә бә, кӧ әԝана мина мә ниньн. 20 Һун алийе Хԝәдайе пирозда һатьнә бьжартьне, у һун һʹәму жи рʹастийе заньн. 21 Әз ԝәрʹа дьньвисьм нә бона ве йәке кӧ һун рʹастийе ньзаньн, ле бона ве йәке кӧ һун рʹастийе заньн, у тʹӧ дәрәԝи жь рʹастийе найе.

22 Кʹи йә дәрәԝин? Нә һәма әԝ ә дәрәԝин, йе кӧ инкʹар дькә ԝәки Иса Мәсиһ ә? Әԝ нәйаре Мәсиһ ә, у әԝ Бав у Кӧрʹ инкʹар дькә. 23 Һәр кәсе кӧ Кӧрʹ инкʹар дькә, Бав жи ԝи ԛәбул накә. Ле һәр кәсе кӧ Кӧрʹ ԛәбул дькә, Бав жи ԝи ԛәбул дькә. 24 Ле чь ԝә дькʹәвә, тьштед кӧ ԝә дәстпекеда бьһистьнә, бьра дьле ԝәда бьминьн. Һәрге тьштед кӧ ԝә дәстпекеда бьһистьнә дьле ԝәда бьминьн, һуне һьм тʹәви Кӧрʹ һьм жи тʹәви Бав йәктийеда бьн. 25 У әԝи соз дайә мә, кӧ әԝе жийина һʹәта-һʹәтайе бьдә мә.

26 Әз ван тьшта ԝәрʹа дьньвисьм, чьмки һьнә кәс дьхԝазьн ԝә бьхапиньн. 27 Ле һун жь алийе Хԝәдеда бь сайа рʹӧһʹе пироз һатьнә бьжартьне у рʹӧһʹе ԝи тʹәви ԝә йә, ләма жи нәлазьм ә кӧ кәсәк ԝә һин кә. Ле Хԝәде бь сайа ви рʹӧһʹи һәр тьшти ԝә һин дькә, у әԝ рʹаст ә, дәрәԝ нинә. Чаԝа кӧ рʹӧһʹ һун һин кьрьнә, бәрдәԝам кьн тʹәви ԝи йәктийеда бьминьн. 28 Аԝа зарʹед мьнә дәлал, тʹәви ԝи йәктийеда бьн, ԝәки гава әԝ хӧйа бә, әм бькарьбьн бь мерхаси хәбәр дьн у ԝәхте һатьна ԝи шәрми нәминьн у хԝә вәнәшерьн. 29 Һәрге һун заньн кӧ әԝ йәки рʹаст ә,* ӧса жи заньбьн ԝәки һәр кәсе кӧ рʹастийе дькә, әԝ зарʹа Хԝәде йә.

3 Һәла бьньһерʹьн Бав чьԛас мә һʹәз дькә! Сәр мә зарʹед Хԝәде те готьне, у бь рʹасти жи әм зарʹед ԝи нә. Ләма жи дьнйа мә нас накә, чьмки дьнйайе Хԝәде нас нәкьрийә. 2 Бьред дәлал, ньһа әм зарʹед Хԝәде нә, ле һе әшкәрә нинә кӧ әме чь щурʹәйи бьн. Ле әм ве йәке заньн: Гава әԝ хӧйа бә, әме бьбьнә мина ԝи, чьмки әԝ чаԝа йә, әме ԝи ӧса бьвиньн. 3 У һәр кәсе кӧ гӧмана хԝә данийә сәр ԝи, хԝә паԛьж дькә, чьмки әԝ паԛьж ә.

4 Һәр кәсе кӧ гӧнә дькә, ԛануне жи дьтʹәрʹьбинә, чьмки гӧнә тʹәрʹьбандьна ԛануне йә. 5 Һун заньн кӧ Иса һат, ԝәки гӧнед мә бьдә һьлдане, у нава ԝида гӧнә тʹӧнә. 6 Һәр кәсе кӧ тʹәви ԝи йәктийеда дьминә, гӧнә накә. Ле йе кӧ гӧнә дькә, әԝи әԝ нә дитийә, нә жи нас кьрийә. 7 Зарʹед мьнә дәлал, бьра тʹӧ кәс ԝә нәхапинә. Йе кӧ рʹастийе дькә, әԝ йәки рʹаст ә, чаԝа Иса рʹаст ә. 8 Йе кӧ гӧнә дькә, жь Мире-щьна йә, чьмки Мире-щьна һе жь дәстпекева* гӧнә дькә. Ләма жи Кӧрʹе Хԝәде һат, ԝәки кьред Мире-щьна хьраб кә.

9 Кәсе кӧ буйә зарʹа Хԝәде, гӧнә накә, чьмки рʹӧһʹе Хԝәде дьле ԝида йә.* Әв кәс нькарә гӧнә бькә, чьмки әԝ зарʹа Хԝәде йә. 10 Зарʹед Хԝәде у зарʹед Мире-щьна бь ве йәке тенә наскьрьне: Йе кӧ рʹастийе накә, жь Хԝәде нинә, у йе кӧ бьре хԝә һʹәз накә, әԝ жи жь Хԝәде нинә. 11 Чьмки ԝә жь дәстпекева әв тʹәми бьһистийә: Гәрәке әм һәвдӧ һʹәз бькьн. 12 Ԝәрә әм мина Ԛайин нибьн, йе кӧ жь Мире-щьна* бу у бьре хԝә кӧшт. Ле чьрʹа әԝи бьре хԝә кӧшт? Чьмки кьред ԝи хьраб бун, ле кьред бьре ԝи рʹаст бун.

13 Бьрано, әʹщебмайи нәминьн кӧ һун бәр чʹәʹве дьнйайе рʹәш ьн. 14 Әм заньн кӧ әм жь мьрьне дәрбази жийине бунә, чьмки әм бьра һʹәз дькьн. Йе кӧ һʹәз накә бьн дәсте мьрьнеда дьминә. 15 Һәр кәсе кӧ бьре хԝә нәфрʹәт дькә, меркӧж ә, у һун заньн кӧ тʹӧ меркӧж ԝе жийина һʹәта-һʹәтайе нәстинә. 16 Бь ви щурʹәйи мә фәʹм кьрийә кӧ һʹәзкьрьн чь йә, чьмки Иса Мәсиһ әʹмьре хԝә бона мә да. У гәрәке әм жи һазьр бьн әʹмьре хԝә бона бьред хԝә бьдьн. 17 Һәрге һәбука кәсәки һәйә у әԝ дьвинә кӧ бьре ԝи һʹәԝще аликʹарийе йә, ле дьле ԝи сәр нашәԝьтә у али ԝи накә, һьнге әԝ ча дькарә бежә кӧ әԝ Хԝәде һʹәз дькә? 18 Зарʹед дәлал, гәрәке әм нә тʹәне пе гьлийед хԝә, ле ӧса жи пе кьред хԝә у жь дьл һʹәз бькьн.

19 Бь ве йәке әме бьзаньбьн кӧ рʹасти бал мә һәйә, у әме дьле хԝә бьдьнә баԝәркьрьне, ԝәки Хԝәде мә һʹәз дькә. 20 Һәрге жи дьле мә бона тьштәки мә сущдар дькә, Хԝәде жь дьле мә мәзьнтьр ә у әԝ һәр тьшти занә. 21 Бьред дәлал, һәрге дьле мә, мә сущдар накә, әм дькарьн аза Хԝәдерʹа хәбәр дьн. 22 У һәр тьште кӧ әм дьхԝазьн, әме жь ԝи бьстиньн, чьмки әм тʹәмийед ԝи тиньн сери у тьштед кӧ ль ԝи хԝәш тен, әм дькьн. 23 Әре, тʹәмийа ԝи әв ә: Әм гәрәке баԝәрийа хԝә наве Кӧрʹе ԝи, Иса Мәсиһ биньн у һәвдӧ һʹәз бькьн, чаԝа әԝи тʹәми дайә мә. 24 Хенщи ве йәке, кʹи кӧ тʹәмийа Хԝәде тинә сери, тʹәви Хԝәде йәктийеда дьминә, у Хԝәде жи тʹәви ԝи йәктийеда йә. У бь сайа рʹӧһʹе кӧ әԝи дайә мә, әм заньн кӧ әԝ тʹәви мә йәктийеда дьминә.

4 Бьред дәлал, баԝәрийа хԝә һәр һинкьрьнәке* нәйньн, йед кӧ ӧса тенә кʹьфше, йанчь жь бина бәр Хԝәде нә. Ле тедәрхьн һәла әв һинкьрьн бь рʹасти жь Хԝәде йә, йан на, чьмки гәләк пʹехәмбәред ԛәлп дәркʹәтьнә дьнйайе.

2 Аһа һун ча дькарьн фәʹм кьн һәла фьлан һинкьрьн бь рʹасти жь Хԝәде йә, йан на: Һәр һинкьрьна кӧ ԛәбул дькә, ԝәки Иса Мәсиһ ча мәрьв һатә сәр әʹрде, жь Хԝәде йә. 3 Ле һәр һинкьрьна кӧ Иса ԛәбул накә, жь Хԝәде нинә. Әԝ һинкьрьн жь нәйаре Мәсиһ йә, дәрһәԛа кʹижани ԝә бьһистьбу кӧ гәрәке бьһата, у ньһа әв һинкьрьн ида дьнйайеда бәла буйә.

4 Зарʹед дәлал, һун жь Хԝәде нә. Ԝә пʹехәмбәред ԛәлп алт кьрьнә, чьмки Хԝәде, йе кӧ тʹәви ԝә йәктийеда йә, жь Мире-щьна, йе кӧ тʹәви дьнйайе йәктийеда йә, мәзьнтьр ә. 5 Әв пʹехәмбәред ԛәлп жь ве дьнйайе нә, ләма готьнед ԝан ль гора ньһерʹандьна дьнйайе нә, у бона ве йәке дьнйа гӧһ дьдә ԝан. 6 Әм жь Хԝәде нә. Һәр кәсе кӧ Хԝәде нас дькә, гӧһ дьдә мә, у һәр кәсе кӧ жь Хԝәде нинә, гӧһ надә мә. Бь ве йәке әм дькарьн фәʹм кьн, һәла фьлан һинкьрьн рʹаст ә йан ԛәлп ә.

7 Бьред дәлал, ԝәрен әм бәрдәԝам кьн һәвдӧ һʹәз бькьн, чьмки һʹәзкьрьн жь Хԝәде йә, у һәр кәсе кӧ һʹәз дькә, зарʹа Хԝәде йә у Хԝәде нас дькә. 8 Кәсе кӧ һʹәз накә, Хԝәде нас накә, чьмки Хԝәде һʹәзкьрьн ә. 9 Бь ви щурʹәйи Хԝәде һʹәзкьрьна хԝә мәрʹа нишан кьр: Әԝи Кӧрʹе хԝәйи тайе тʹәне шандә дьнйайе, ԝәки әм бь сайа ԝи жийине бьстиньн. 10 Һʹәзкьрьн әв ә, нә кӧ мә Хԝәде һʹәз кьр, ле әв ә кӧ әԝи әм һʹәз кьрьн у Кӧрʹе хԝә чаԝа ԛӧрбана льһәвһатьне бона гӧнед мә шанд.

11 Бьред дәлал, һәрге Хԝәде аһа әм һʹәз кьрьн, әм жи гәрәке һәвдӧ һʹәз бькьн. 12 Тʹӧ кәси тʹӧ щара Хԝәде нәдитийә. Һәрге әм бәрдәԝам кьн һәвдӧ һʹәз кьн, Хԝәде ԝе тʹәви мә бә, у һʹәзкьрьна ԝи ԝе нав мәда кʹамьл бә. 13 Әм заньн кӧ әм тʹәви ԝи йәктийеда ньн у әԝ жи тʹәви мә йәктийеда йә, чьмки әԝи рʹӧһʹе хԝә дайә мә. 14 Хенщи ԝе йәке, мә хԝәха дит кӧ Хԝәде Кӧрʹе хԝә ча хьлазкʹаре ве дьнйайе шанд, у әм шәʹдәтийа ве йәке дьдьн. 15 Кʹи кӧ ԛәбул дькә, ԝәки Иса Кӧрʹе Хԝәде йә, Хԝәде тʹәви ԝи йәктийеда дьминә, у әԝ тʹәви Хԝәде йәктийеда дьминә. 16 Мә фәʹм кьр у баԝәр кьр, кӧ Хԝәде мә һʹәз дькә.

Хԝәде һʹәзкьрьн ә. Кәсе кӧ һʹәзкьрьнеда дьминә, тʹәви Хԝәде йәктийеда йә, у Хԝәде жи тʹәви ԝи йәктийеда дьминә. 17 Бь ве йәке һʹәзкьрьн нав мәда кʹамьл дьбә, сәва кӧ әм рʹожа диԝане бь азайи хәбәр дьн, чьмки ве дьнйайеда әм мина Мәсиһ нә. 18 Кәсе кӧ Хԝәде һʹәз дькә, натьрсә. Тьрс бьндәст дькә, ле һʹәзкьрьна кʹамьл тьрсе дур дьхә. Бәле, йе кӧ дьтьрсә, һʹәзкьрьна ԝи кʹамьл нинә. 19 Әм һʹәз дькьн, чьмки пешийе Хԝәде әм һʹәз кьрьн.

20 Һәрге кәсәк бежә: «Әз Хԝәде һʹәз дькьм», ле бьре хԝә нәфрʹәт дькә, әԝ дәрәԝин ә. Чьмки йе кӧ бьре хԝәйи кӧ дьвинә, һʹәз накә, нькарә Хԝәдайе кӧ навинә һʹәз бькә. 21 Тʹәмийа кӧ мә жь ԝи стандийә, әв ә: Кәсе кӧ Хԝәде һʹәз дькә, гәрәке бьре хԝә жи һʹәз бькә.

5 Һәр кәсе кӧ баԝәр дькә ԝәки Иса Мәсиһ ә, әԝ зарʹа Хԝәде йә. У һәр кәсе кӧ Бав һʹәз дькә, зарʹед ԝи жи һʹәз дькә. 2 Һәрге әм Хԝәде һʹәз дькьн у тʹәмийед ԝи тиньн сери, бь ве йәке әм заньн кӧ әм зарʹед Хԝәде һʹәз дькьн. 3 Һʹәзкьрьна һьндава Хԝәде әԝ ә, кӧ әм тʹәмийед ԝи биньн сери, у тʹәмийед ԝи чәтьн ниньн. 4 Чьмки һәр зарʹәкә Хԝәде дьнйайе алт дькә. У әм бь баԝәрийа хԝә дьнйайе алт дькьн.

5 Кʹи дькарә дьнйайе алт кә? Нә әԝе кӧ баԝәр дькә, ԝәки Иса Кӧрʹе Хԝәде йә? 6 Иса Мәсиһ пе аве у хуне һат,* нә тʹәне бь аве, ле бь хуне жи һат. Рʹӧһʹ шәʹде ве йәке йә, чьмки рʹӧһʹ рʹастийе әшкәрә дькә. 7 Се тьшт һәнә, йед кӧ шәʹдәтийе дьдьн, ԝәки Иса кʹи йә: 8 Рʹӧһʹ, ав у хун. Шәʹдәтийа ван һәрсека йәк ә.

9 Бе шьк шәʹдәтийа Хԝәде жь шәʹдәтийа мәрьва, йа кӧ әм ԛәбул дькьн, мәзьнтьр ә, чьмки Хԝәде хԝәха дәрһәԛа Кӧрʹе хԝә шәʹдәтийе дьдә. 10 Кәсе кӧ баԝәрийа хԝә Кӧрʹе Хԝәде тинә, һәр тьште кӧ Хԝәде жерʹа готийә, дьле ԝида йә. Ле кәсе кӧ Хԝәде баԝәр накә, Хԝәде дәрәԝин дәрдьхә, чьмки әԝ баԝәрийа хԝә шәʹдәтийа Хԝәде дәрһәԛа Кӧрʹе ԝи, найнә. 11 Шәʹдәти әв ә: Хԝәде жийина һʹәта-һʹәтайе дайә мә, у әм ве жийине бь сайа Кӧрʹе ԝи дьстиньн. 12 Кәсе кӧ Кӧрʹ ԛәбул дькә, гӧмана ԝийә жийина һʹәта-һʹәтайе һәйә. Ле кәсе кӧ Кӧрʹ ԛәбул накә, гӧмана ԝийә жийина һʹәта-һʹәтайе тʹӧнә.

13 Әз ван тьшта ԝәрʹа дьньвисьм, йед кӧ баԝәрийа хԝә наве Кӧрʹе Хԝәде тиньн, сәва кӧ һун бьзаньбьн ԝәки гӧмана ԝәйә жийина һʹәта-һʹәтайе һәйә. 14 Әм баԝәр дькьн* кӧ гава әм тьштәки ль гора ԛьрара Хԝәде же бьхԝазьн, әԝ гӧһ дьдә мә. 15 У һәрге әм заньн ԝәки чь жи әм жь ԝи һиви дькьн, әԝ гӧһ дьдә мә, әм ӧса жи заньн кӧ әме ван тьшта бьстиньн, чь кӧ мә жь ԝи һиви кьрийә.

16 Һәрге кәсәк бьвинә кӧ бьре ԝи гӧнәки ӧса дькә, кʹижан кӧ бәрбь мьрьне набә, бьра әԝ бона ԝи дӧа бькә, у Хԝәде ԝе жийине бьдә ви бьрайи. Әре, Хԝәде ԝе жийине бьдә ԝан кәса, гӧнед кʹижана набьнә бәрбь мьрьне. Ле һәйә гӧнә, кӧ бәрбь мьрьне дьбә. Әз набежьм кӧ әв кәс гәрәке бона ԝан, йед кӧ гӧнәки ӧса дькьн, дӧа бькә. 17 Һәр нәһәԛи гӧнә йә, ле һәйә гӧнә кӧ бәрбь мьрьне набә.

18 Әм заньн ԝәки һәр кәсе кӧ зарʹа Хԝәде йә, гӧнә накә, ле Кӧрʹе Хԝәде ԝи дьпʹарезә, у Мире-щьна* нькарә зийане бьдә ԝи. 19 Әм заньн кӧ әм жь Хԝәде нә, ле тʹәмамийа дьнйайе бьн дәсте Мире-щьнада йә. 20 Әм заньн кӧ Кӧрʹе Хԝәде һатийә сәр әʹрде, у әԝи фәʹмкʹари дайә мә, кӧ әм бьзаньбьн, ԝәки Хԝәдайе рʹаст кʹи йә. У әм пе Кӧрʹе ԝи, Иса Мәсиһ, тʹәви Хԝәдайе рʹаст йәктийеда ньн. Әре, әԝ Хԝәдайе рʹаст ә у канийа жийина һʹәта-һʹәтайе йә. 21 Зарʹед мьнә дәлал, хԝә жь пʹута дур бьгьрьн.