Сәрһати 68

Дӧ Гәдә Һатьн Сах Кьрьне

ҺӘЛА бьдә һʹәсаве хԝә, дийа зарʹоке ԝе чь һʹалида буйа, һәрге зарʹа ԝе бьмьрийа, ле паше пашда дәстпекьра бьжи? Шабуна де ԝе бе һʹәсав буйа! Ӧса нинә? Ле гәло тьштед ӧса ԛә щарәки ԛәԝьминә? Гәло кәсед кӧ мьрьнә дькарьн пашда бьжин?

Һәла бьньһерʹә ль сәр ви мери, ве кʹӧлфәте у кӧрʹе бьчʹук. Әв мер пʹехәмбәре Хԝәде йә у наве ԝи Елйас ә. Кʹӧлфәт жьнәби йә, әԝ жь шәһәре Сәрәпта йә, у кӧрʹе бьчʹук жи зарʹа ԝе йә. Дә хԝәндкʹаре хԝәрʹа бежьм, дәрбәке зарʹок гәлә нәхԝәш кʹәт, һʹале зарʹе һәр щар һе хьрав дьбу у хьлазийе әԝ мьр. Ԝи чахи Елйас готә дийа ԝи: «Һәла зарʹоке бьдә мьн».

Елйас зарʹ һьлда, бьрә отʹаха жоре у ԝи ль сәр щийа вәләзанд. Паше әԝи дӧа кьр: «Йа Хԝәдайе мьн Йаһоԝа, ӧса бькә кӧ зарʹ диса бьжи». Һәма ԝе дәме зарʹок дәстпекьр бина хԝә бькʹьшинә! Елйас зарʹ һьлда дәсте хԝа, ԝи ани жере у готә дийа ԝи: «Бьньһерʹә, зарʹа тә сах ә!» Аһан чьрʹа дийа зарʹе ӧса ша дьбә.

Диса пʹехәмбәрәки Хԝәде һәбу бь наве Елиша. Ԝәʹде хԝәда әԝ аликʹарийа Елйас дькьр. Ле пашԝәхтийе Йаһоԝа дәстпекьр Елиша жи бьдә хәвате кӧ гәлә кʹәрәмәта бькә. Дәрбәке Елиша чубу шәһәре Шунәм. Ль ԝьр жьнәк ԝирʹа гәлә ԛәнщи дькьр. Паше перʹа кӧрʹәк һатә буйине.

Дәрбәке кӧрʹьк, йе кӧ ида һьнәки мәзьн бьбу, чу щәм баве хԝә, йе кӧ чоле дьхәвьти. Ньшкева зарʹок бь гьринва гот: «Сәре мьн дешә!» Чахе зарʹ анин мале әԝ мьр. Бьдьнә һʹәсаве хԝә, дәрдәки чьԛа гьран кʹәтә дьле дийа зарʹоке! Әԝ ләзә-ләз чу кӧ Елиша бинә вьр.

Гава Елиша гьһиштә щи, әԝ перʹа-перʹа кʹәтә ԝе отʹахе, кʹидәре бәдәне зарʹоке данибун. Әԝи дӧа кьр Йаһоԝарʹа у ль сәр бәдәна ԝи вәләзийа. Һьнә ԝәʹдә шунда бәдәна зарʹе гәрм бу у әԝ һʹәфт щара һеньжи. Бьдә һʹәсаве хԝә, гава дийа зарʹоке дәрда һат у дит кӧ зарʹа ԝи ида сах ә, әԝ чьԛас ша дьбу!

Дь нав тʹәрихийа дьнйайе гәлә мәри мьрьбун. Жь ве йәке мәрийед ԝан у һәвалед ԝан гәлә бәр хԝә дькʹәтьн. Ԛәԝата мә нагьһиже кӧ мәрийа сах кьн, рʹаст ә? Ле ԛәԝата Йаһоԝа дьгьһижә, у паше әме пебьһʹәсьн Хԝәде ԝе чаԝа мьлиона мәрийа сах кә.

1 П’адшати 17:8-24; 2 П’адшати 4:8-37.