Пешготьн

Даудә гьли дькә, кӧ әԝ дь шәһәрәки Африкайеда, гӧндәки бьчʹукда мәзьн буйә. Әԝ дьбежә: «Щарәке чахе әз һе зарʹ бум, ортʹа малбәта мә у малбәтәкә дьн, сәва әʹрдәки шәрʹ дьчу. Һәр дӧ малбәт жи, әв әʹрд дьхԝәстьн. Ләма жи, сәва кӧ сафи кьн һәла әв әʹрд пʹара кʹе ԝе бькʹәвә, гази кʹочʹәк кьрьн. Һьнге кʹочʹәк гази мәрьвәки дьн кьр, нәйньк да дәсте ԝи, у пʹәрче сьпи авитә сәр. Ньшкева мере кӧ бьн пʹәрчәда бу, дәстпекьр бьләрьзә у худан жь ԝи кʹьшийа. Чахе әԝи ль нәйньке ньһерʹи дәстпекьр шьровәкә: ‘Әз дьвиньм кӧ каләмерәки кʹьнщед сьпида, незик дьбә! Әԝ бәжнеда бьльнд ә у зәʹф кал ә, пʹорʹед ԝи сьпи нә у әԝ кузә-куз рʹе те’.

«Әви мери дәрһәԛа кальке мьн гьли дькьр! Паше жи әԝи дәстпекьр тʹәпа хԝәхә у кьрә ԛарʹә-ԛарʹ: ‘Һәгәр һун мьн баԝәр накьн, ԝәрен у хԝәха бьньһерʹьн!’ Һәмьки тʹӧ кәс жь мә нәԝерьбу незик буйа! Кʹочʹәк дәрдана хԝә дәрхьст кʹижанеда кӧ ава жь пʹьнщарʹа чекьри һәбу, ль сәр ԝи һьнәк рʹәшанд, у бь ве йәке әԝ һеса кьр.

«Бь сайа ԝи мәрьви йе кӧ ль нәйньке дьньһерʹи, ‘кальк’ гот, ԝәки әʹрд пʹара малбәта мә дькʹәвә. Хенщи ве йәке, әԝи гот кӧ пирька мьн дькарә архайин ль сәр ви әʹрди бьхәбьтә у бещар кә. Ле малбәта кӧ тʹәви мә шәрʹ дькьр, ве сафикьрьнерʹа ԛайил бу. Бь ви щурʹәйи, әв пьрс һатә сафикьрьне».

Ԛәԝьмандьнед ви щурʹәйи нав тʹәмамийа дьнйайеда, дь гәләк щийада дьԛәԝьмьн. Бь милйона мәри баԝәр дькьн, кӧ мьри бәрдәԝан дькьн ль дьнйа рʹӧһʹанида дьжин, у жь ԝе дәре әԝана дькарьн мә бьвиньн у ль сәр әʹмьре мә жи һʹӧкӧм кьн. Ле гәло әв йәк рʹаст ә? Мьри бь рʹастийе сах ьн? Һәгәр ӧса нинә, ле кʹи дәԝса мьрийа хԝә нишан дькә? Гәләк фәрз ә, ԝәки әм щабед рʹаст ль сәр ван пьрса бьстиньн. Чьмки әʹмьре мә, ве йәкева гьредайи йә.