Гәло Иса Зьвьстане Һатә Буйине?

ДЬ КʹЬТЕБА Пирозда найе готьне дәрһәqа рʹожа буйина Иса. Ле әw әшкәрә дькә, wәки Иса нәжи зьвьстане һатә буйине.

Гәло дь шәһәре Бәйтләһʹмеда, кʹидәре кӧ Иса һатә буйине, зьвьстане һәвва ча бу? Дь мәһа Кислеведа ль гора салнәʹма Ибранийа (Ноембьр/Десамбьр), һәвва гәлә сар бу у баран дьбари. Паши мәһа Кислеве, мәһа Тебет дьһат (Десамбьр/Йануйайе). Әв жи мәһәкә гәлә сар бу у ль сәр чʹийа жи щар-щара бәрф дьбари. Wәрә әм ньһа бьньһерʹьн, кӧ чь Кʹьтеба Пироз дьбежә дәрһәqа һәввайе дь wан щийада.

Дь кʹьтеба Әзрада ньвисар ә, кӧ дь мәһа Кислеведа, бь рʹастийе жи һәвва гәләк сар бу у баран дьбари. Әзра ньвисийә, кӧ «дь мәһа нәһа [Кислев] рʹожа бистида», щьмәʹт ль Оршәлиме тʹоп бьбу. Сәрда жи әw зедә дькә, wәки мәри жь бо барана qәwи дьләрьзин у дьготьн, кӧ wәхте баране дәстпебун у әwана нькарьбун ль дәрва бьсәкьнийана (Әзра 10:9, 13; Йерәмйа 36:22). Аһан, ньһа фәʹмдари йә кӧ чьрʹа зьвьстане, шьванед wан щийа тʹәви кәрийед хwә, шәв дәрва нә дьман.

Дь Кʹьтеба Пирозда те готьне, кӧ wе шәве чахе Иса һатә буйине, шьван ль чоле бәр пәзед хwә бун. Луqайе ньвискʹар ньвисийә, кӧ незики Бәйтләһʹме, шьван «шәв ль чоле ль бәр кәрийед хwә дьман у бь нобәдари чʹәʹвньһерʹийе ль кәрийед хwә дькьрьн» (Луqа 2:8-12). Дина хwә бьде, кӧ шьван нә кӧ тʹәне рʹож дьһатьнә чоле, ле әwана ль wьр дьман, у кәрийед wан жи шәв дь чоледа бун. Гәло шьван зьвьстане wәʹде һәвва сар, дь чоледа дәрва wе бьжитана? Фәʹмдари йә, wәки на! Ләма жи әв әʹламәтийед дәрһәqа рʹожа буйина Иса, дьдьнә кʹьфше, wәки Иса зьвьстане нәһатә буйинеa.

Хәбәра Хwәде рʹастә-рʹаст мәрʹа дьбежә, дәрһәqа рʹожа мьрьна Иса, ле дәрһәqа рʹожа буйина wи, тʹәне һьнә тьшт дәрбази мә дькә. Әв йәк гьлийед Сулеймане Пʹадша тинә бира мә, йе кӧ гот: «Наве qәнщ жь рʹуне бинхwәш» баштьр ә «у рʹожа мьрьне, жь рʹожа буйине . . . хwәштьр ә» (Wаиз 7:1). Ләма жи Кʹьтеба Пироз дәрһәqа qӧльхкьрьн у мьрьна Иса, һур бь һур гьли дькә, ле дәрһәqа рʹожа буйина wи, тʹәне һьнә әʹламәтийа дьдә.