Чьрʹа Лазьм ә Кʹьтеба Пироз Леколин Бьки?
Зани, тʹәрихийа дьнйайеда тʹӧнә буйә кʹьтебәкә ӧса бәлабуйи ча Кʹьтеба Пироз? Әв кʹьтебәкә мәхсус ә. Чьмки мәрийед жь һʹәму мьләта чахе ве кʹьтебе дьхуньн дьлбинийе у гӧмане дьстиньн, ӧса жи әԝана ширәтед керһати сәва әʹмьре хԝәйи һәр рʹожи дьвиньн. Ле иро һәнә мәрьвед ӧса жи, йед кӧ дәрһәԛа Кʹьтеба Пироз ԛә тьштәки ньзаньн. Фьрԛи тʹӧнә һун хԝәденас ьн йан на, дьбәк һун жи дьхԝазьн пебьһʹәсьн дәрһәԛа ве кʹьтебе. Әва брошура илаһи сәва ԝе йәке һатә һазьркьрьне, ԝәки али ԝә бькә Кʹьтеба Пироз һе рʹьнд нас кьн.
ПЕШИЙА ԝе йәке кӧ Кʹьтеба Пироз һьлдьн дәсте хԝә у дәстпекьн бьхуньн, гәләк фәрз ә һьнә тьшта пебьһʹәсьн дәрһәԛа ве кʹьтебе. Кʹьтеба Пироз ӧса жи әʹйан ә ча Ньвисаред Пироз, Тʹәԝрат, Зәбур у Инщил. Тʹәмамийа Кʹьтеба Пироз бь 66 кʹьтеба, йан пʹара һатийә тʹопкьрьне. Кʹьтеба пешьн Дәстпебун ә, ле кʹьтеба хьлазийе Әʹйанти, йан жи Апокалипсис ә.
Ле кʹи йә авторе Кʹьтеба Пироз? Әв пьрсәкә гәләк һʹәԝас ә. Кʹьтеба Пироз нав 1 600 сала зедәтьр бь дәсте 40 пʹехәмбәра һатийә ньвисаре. Ԝан пʹехәмбәра хԝә һʹәсаб нәдькьрьн ча авторе Кʹьтеба Пироз. Жь ван пʹехәмбәра йәки, готийә: «Тʹәмамийа ньвисаре жь бина бәр Хԝәде йә» (2 Тимотʹейо 3:16). Йәки дьн жи ньвисийә: «Рʹӧһʹе Хӧдан [Йаһоԝа, ДТʹ], бь . . . мьнва гот у готьна ԝи, ль сәр зьмане мьн бу» (2 Самуйел 23:2). Бь ве йәке ньвискʹаред Кʹьтеба Пироз нишан дькьрьн, кӧ ԛәбул дькьн ԝәки Авторе ве кʹьтебе Йаһоԝа Хԝәде йә, Сәрԝере тʹәмамийа дьнйайе. Ԝана әʹйан кьр кӧ Хԝәде дьхԝазә незики мәрийа бә.
Чь диса лазьм ә бьзаньбьн дәрһәԛа Кʹьтеба Пироз? Тʹәмамийа Кʹьтеба Пирозда тʹемәк дәрбаз дьбә, избаткьрьна изьна Хԝәде сәрԝертийе ль сәр мәрийа бькә, бь сайа Пʹадшатийа ԝийә әʹзмана. Сәр рʹупʹелед майин һуне бьвиньн, кӧ чаԝа әв тʹема жь Дәстпебуне һʹәта Әʹйанти шьровәдьбә.
Ԝәрә әм пебьһʹәсьн кӧ кʹьтебәкә лапә навдар дьнйайеда, демәк Кʹьтеба Пироз, чь гьли дькә.
a Ве брошуреда ньвисаред кьн, йед ӧса ча «Д.М.», те һʹәсабе «Дәԝрана Мә», ле «Б.Д.М.» те һʹәсабе «Бәри Дәԝрана Мә». Әван ньвисаред кьн тӧйе бьвини хьлазийа һәр рʹупʹеләке, кʹидәре кӧ ԝәʹдә кʹьфшкьри йә.