ПʹАРА 12
Биланийа жь Хԝәде, Рʹебәрийа Әʹмьр Дькә
Кʹьтеба Мәтʹәлокда һатьнә тʹопкьрьне гәләк ширәтед керһати кӧ жь бина бәр Хԝәде нә. Һʹәчʹи зәʹф жь ван ширәта, бь дәсте Сьлеман һатьнә ньвисаре
ГӘЛО Йаһоԝа Хԝәде Сәрԝерәки билан ә? Сәва кӧ щаба ве пьрсе бьстиньн, ԝәрә әм бьфькьрьн сәр ԝан ширәтед кӧ әԝ мәрʹа дьдә. Гәло ширәтед Хԝәде керһати нә, йан на? Йан жи әме бькарьбьн һе бәхтәԝар бьн, һәрге ван ширәта һьлдьн? Сьлеман пʹадшайе билан бь сәда мәтʹәлок ньвисин. Ван мәтʹәлокада сәва әʹмьре мә, гәләк ширәт һәнә. Ԝәрә әм ньһа чәнд жь ван ширәта пебьһʹәсьн.
Гӧмана хԝә бьдә сәр Хԝәде. Һәрге тӧ гӧмана хԝә бьди сәр Йаһоԝа, һәләԛәтийа тә тʹәви ԝи ԝе һе незик бә. Сьлеман ньвиси: «Бь тʹәмамийа дьле хԝә хԝә бьсперә Хӧдан, гӧмана хԝә нәдә ль сәр һʹьше хԝә. Һʹәму рʹийед хԝәда тӧ Хԝәде нас кә у Әԝе һʹәму шьвәрʹийед тә рʹаст-дуз кә» (Мәтʹәлок 3:5, 6). Һәрге әм гӧмана хԝә бьдьн сәр Хԝәде, ширәтед ԝи һьлдьн у гӧрʹа ԝи бькьн, һьнге ԝе нета әʹмьре мә һәбә. Бь ве йәке әме бькарьбьн дьле Йаһоԝа ша кьн, у Йаһоԝа ԝе бькарьбә щаба пьрсед дьжмьне хԝә, Мире-щьна бьдә (Мәтʹәлок 27:11).
Һьндава мәрьвед дьн, бь билани бьн. Ширәтед Хԝәде сәва мера, жьна у зарʹа рʹожа иройин гәләк керһати нә, у ԝәʹдәда ньн. Хԝәде мера һелан дькә, ԝәки әԝана жьнед хԝәрʹа амьн бьн. Әԝ ширәтәкә ӧса дьдә: «Пе жьна хортанийа хԝә ша бә» (Мәтʹәлок 5:18-20). Сәва жьнед меркьри жи, кʹьтеба Мәтʹәлокда һәйә мәсәлә дәрһәԛа жьнәкә ԛәнщ, йа кӧ жь мер у зарʹед хԝә пәсьн ԛазанщ кьр (Мәтʹәлок, сәре 31). Зарʹарʹа жи ширәт те дайине, ԝәки әԝана гӧрʹа де-баве хԝә бькьн (Мәтʹәлок 6:20). Кʹьтеба Мәтʹәлок ӧса жи дина мә дьдә сәр ԝе йәке, ԝәки гәләк фәрз ә кӧ һәвалед мәрийа һәбьн, чьмки чахе мәри нахԝазә һәвалтийе бькә, әԝ дькарә бьбә хԝәһʹьз (Мәтʹәлок 18:1). Әм гәрәке бь билани хԝәрʹа һәвала бьжберьн, чьмки һәвалед мә дькарьн йан баш, йан жи хьраб ль сәр мә һʹӧкӧм кьн (Мәтʹәлок 13:20; 17:17).
Мьԛати хԝә бьн. Кʹьтеба Мәтʹәлок ширәтед пʹьрʹ ԛимәт дьдә, ԝәки мәри ичʹке гәләки вәнәхԝьн у дина хԝә бьдьн ль сәр ԝан тьшта, йед кӧ ԝе мә хԝәй кә у зийане нәдә мә, у ӧса жи ԝәки әм хәбатһʹьз бьн (Мәтʹәлок 6:6; 14:30; 20:1). Әв кʹьтеб ӧса жи мә ширәт дькә кӧ һәрге әм гӧмана хԝә бьдьнә сәр хԝә, нә кӧ сәр биланийа Хԝәде, һьнге әме рʹасти кӧл-дәрда бен (Мәтʹәлок 14:12). Әв кʹьтеб ӧса жи мә һин дькә, ԝәки әм дьле хԝә у нет-фькьред хԝә жь тьштед хьраб хԝәй кьн, чьмки дьл әв һәйә «канийа әʹмьр» (Мәтʹәлок 4:23).
Бь милйона мәрьв нав тʹәмамийа дьнйайеда жь әʹмьре хԝә фәʹм кьрьн, кӧ бь сайа ван ширәта әʹмьре ԝан һе бәхтәԝар дьбә. Ләма жи, гәләк мәʹнийед ԝан һәнә гӧрʹа Сәрԝере хԝә Йаһоԝа бькьн.
—Сәр һʹиме кʹьтеба Мәтʹәлок.