Әʹдьлайи у Бәхтәԝари Зутьрәке ԝе Һәбә!

Аһмәд у Хәзал гәләк ша бун гава пеһʹәсийан кӧ сәр әʹрде тʹәне мәрьвед ԛәнщ у һʹәлал ԝе бьжин, у йед кӧ ԝе һәвдӧ һʹәз бькьн. Әԝана ӧса жи дьфькьрин дәрһәԛа ԝе йәке, кӧ әʹмьр ԝе чьԛаси баш буйа, һәрге бьрʹчибун, нәхԝәши у мьрьн дьнйайеда тʹӧнә буйа, у кʹидәре кӧ һәр кәс ԝе әʹдьлайеда у бәхтәԝарийеда бьжита. У ԝана хԝәст ԝәки әв һʹәму тьшт һе зу бьԛәԝьмийа!

Аһмәд хԝәст пебьһʹәсә: «Гәло әв һʹәму тьшт кʹәнге ԝе бе сери?»

Мьраз щаба ԝи да: «Бәле әв пьрсәкә гәләк баш ә. Ле әз жи дьхԝазьм тьштәки жь тә бьпьрсьм. Тә ԛә дәрһәԛа Иса бьһистийә?»

Аһмәд гот: «Бәле мьн бьһистийә, у әз заньм ԝәки әԝи тьштед билани дьгот. Ле кʹӧ Иса у кʹӧ әз. Әз фәʹм накьм, әв йәк чаԝа пьрса мьнва гьредайи йә?»

Мьраз дәстпедькә шьровәкә: «Зани ча, чьмки шагьртед Иса жи 2 000 сал пешда, һәма әв пьрс данә Иса. Щаба хԝәда, Иса дина ԝана да сәр ‹нишанәке›, кʹижанида гәләк ԛәԝьмандьн дькʹәвьне. Әԝи гот кӧ чахе һʹәму ԛәԝьмандьнед ве нишане дәстпебьн һәврʹа бьԛәԝьмьн, һьнге ԝе фәʹмдари бә, кӧ зутьрәке Хԝәде ԝе әԝи созе хԝә бинә сери, ԝәки һʹале дьнйайе алийе башда бьгӧһезә» (Мәтта 24:3).

Аһмәд пьрси: «Чь? Нишан? Дәрһәԛа кʹижан нишане дьбежи? Дькари гьли ки».

Мьраз щаба Аһмәд дьдә: «Гәләк ԛәԝьмандьнед кӧ дькʹәвьнә нава ве нишане, Кʹьтеба Пирозда ньвисар ьн». Мьраз дина Аһмәд дьдә сәр ван ԛәԝьмандьна:

• «Мьләте рʹабә ль сәр мьләт, пʹадшати ль сәр пʹадшатийе» (Мәтта 24:7).

• «Щи-щийа ԝе хәлайи-щәлайе . . . бьбьн» (Мәтта 24:7).

• «Зедәбуна нәһәԛийе» (Мәтта 24:12).

• «Әʹрдһʹәжед мәзьн» (Луԛа 21:11).

• «Щи-щийа . . . нәхԝәшийа һʹал ԝе бьбьн» (Луԛа 21:11).

Аһмәд у Хәзал ԛайил бун кӧ әв һʹәму тьшт иро дьԛәԝьмьн. Ләма жи әԝана бәр хԝә дькʹәтьн, һәла чь ахьри һивийа ԝан ә.

Мьраз гот: «Ԛәдандьна ве нишане те һʹәсабе, ԝәки зутьрәке Йаһоԝа Хԝәде ԝе сәр әʹрдерʹа пʹадшатийе бькә. Әв сәрԝертийа тʹәзә, Кʹьтеба Пирозда те навкьрьне ча Пʹадшатийа Хԝәде». Паше Мьраз жь Кʹьтеба Пироз рʹезәк Аһмәдрʹа хԝәнд, йе кӧ дьдә кʹьфше һәла әв Пʹадшати ԝе чь бькә:

• «Рʹожед ԝан пʹадшада, Хԝәдайе әʹзмана ԝе пʹадшатийе кʹьфш кә, йе кӧ ԝе тʹӧ щар кʹӧта нәбә. У әв пʹадшати мьләте майинрʹа ԝе нәйе дайине. Әԝ ԝе әԝан һʹәму пʹадшатийа һурдәхԝәши кә у кʹӧта кә, ле хԝәха ԝе һʹәта-һʹәтайе бьминә» (Данийел 2:44, ДТʹ).

Мьраз бәрдәԝам дькә: «Чахе Хԝәде Пʹадшатийа хԝә сәр әʹрде кʹьфш бькә, һьнге зӧлми, нәһәԛи у рʹӧшәти ида ԝе кʹӧта бьн. Бь рʹасти жи, ԝе ԝәʹдәки чьԛас баш бә!»

Әв һʹәму соз дьле Аһмәд у Хәзале хԝәш һатьн. У ԝана хԝәст дьнйа тʹәзәда бьжин, кʹидәре кӧ әʹдьлайи ԝе һәбә.

Аһмәд пьрс дькә: «Ле гәло әз кʹӧлфәта хԝәва чь гәрәке бькьм, сәва кӧ дьнйакә ӧсада бьжин?»

Мьраз щаба ԝи дьдә: «Тӧ у Хәзал рʹьнд заньн, ԝәки ԛимәта һәр тьштед һежа бьһа йә. Һәла бькьнә бира хԝә Адәм у Һеԝайе чь ӧнда кьрьн. Ле гәло әм чь дькарьн һин бьн жь ԝе йәке, чь кӧ ԝана кьр?»

Аһмәд гот: «Әԝана әʹмьре беԛьсур щьнәтеда ӧнда кьрьн, чьмки дәʹԝакьрьнед Йаһоԝа Хԝәде нәдьанин сери».

Мьраз шьровәкьр: «Иро жи, Хԝәде тьштәки жь мә дәʹԝа дькә. Һәрге әм дьхԝазьн щьнәтеда бәхтәԝарийеда бьжин, йе кӧ зутьрәке ԝе сәр әʹрде һәбә, мәрʹа лазьм ә пебьһʹәсьн дәрһәԛа ԝи у дәʹԝакьрьнед ԝи. Әм ӧса жи гәрәке жь алийе хԝәда бьхәбьтьн, ԝәки ль гора дәʹԝакьрьнед ԝи бьжин».

Аһмәд ԛайил бу кӧ әв һʹәму тьшт рʹаст ә, ле йәкә һьнәки дӧдьли бу һәла әԝ у кʹӧлфәта ԝи, ԝе бькарьбьн ӧса бьжин чаԝа кӧ те дәʹԝакьрьне.

Мьраз, Аһмәд гӧман кьр: «Чәтьн нинә кӧ гӧрʹа Йаһоԝа Хԝәде бькьн, чьмки чаԝа Баве бь һʹәзкьрьне тʹьжә, Йаһоԝа мәрʹа дьбежә тʹәне ԝан тьшта бькьн, чь кӧ ԝе кʹаре мәрʹа бинә. Хԝәде нә кӧ тʹәне рʹийа дьнйа тʹәзә нишани мә дькә, ле әԝ ӧса жи мәрʹа дьбежә, кӧ ԝе рʹебәрийа мә бькә у бь ве рʹийа әʹдьлайе мә бьвә». Мьраз жь Кʹьтеба Пироз ԝирʹа дьхунә:

• «Хӧдан Хԝәдайе тә, йе кӧ тьште ԛәнщ фери [һини] тә кьрийә, рʹейа кӧ тӧйе бьмәшәда тә ажотийә әз ьм. Хԝәзьл тә әʹмьред мьн баш гӧһдари бькьрана! Де ԝе гава сьламәта тә мина чʹәм у баԝәрийа тә мина лейед бәʹре бьбуна у ԝе нижада тә мина ԛуме у йед кӧ жь нижада тә дәркʹәтьнә бьбуна мина һәбед ԝе; жь бәр мьн наве ԝи нәдьһат жекьрьн у авитьн у ԝе һәлаԛ нәбуна» (Ишайа 48:17-19).

Аһмәд у Хәзал гәләк дьлгәрм бун жь бо ван рʹезед баш. Чьмки әԝана бь рʹасти жи дьхԝәстьн бьжин ӧса, кӧ тʹәмамийа малбәта ԝан бәхтәԝар бә. У әԝана дьфькьрин кӧ жь ви четьр тʹӧ тьшт тʹӧнә, ԝәки тʹәви зарʹед хԝә дьнйа тʹәзәда бьжин, йа кӧ ԝе бь әʹдьлайе у һәԛийе тʹьжә бә.

Мьраз хәбәрдана хԝә бәрдәԝам кьр: «Һуне бьстиньн ван һʹәму кʹәрәмед баш, һәрге дәрһәԛа дәʹԝакьрьнед Йаһоԝа Хԝәде пебьһʹәсьн у һʹәму тьшти бькьн, кӧ ль гора ван дәʹԝакьрьна бьжин».

Аһмәд пьрси: «Ле гәло әм ча дькарьн дәрһәԛа ван һʹәму тьшта пебьһʹәсьн? Тӧ тʹәви Назе дькари али мә бьки?»

Мьраз шабуна щаба хԝә дьдә: «Бәле сәр чʹәʹварʹа! Щәм мә, һәма тьштәки ӧса һәйә, чь кӧ ԝе али ԝә бькә ԝәки рʹийа әʹдьлайе у бәхтәԝарийе бьвиньн, у ве рʹерʹа һәрʹьн!»