ТʹЕМА ЖЬ РʹУЙЕ ЖУРНАЛЕ | ЧАԜА ЖЬ ХӘБАТА ХԜӘ ШАБУНЕ БЬСТИНЬН
Гәло Хәбата Физики Ԛәдьр у Ԛимәт ә?
Алекс дьхәбьтә дь компанийа баркʹьшандьнеда. Әԝ һәр щар бь кʹәсәр ԛӧтʹийа датинә сәр автойе, у тʹьме пьрсе дьдә хԝә: «Әз чьрʹа һʹәта ньһа сәр ԝе хәбате мамә? Әзе кʹәнге дәрбази хәбатәкә дьн бьм у пешда һәрʹьм? Әзе һе бәхтәԝар бума, һәгәр ԛә нәхәбьтийама!»
Ԝәк Алекс, иро гәләк мәри шабуне настиньн жь хәбата физики. Аарон, йе кӧ пʹешәкʹаре автийа йә, гот кӧ гәләк мәри дьшьрмиш дьбьн, кӧ һәрге хәбата физики бькьн у кәсәкирʹа бьхәбьтьн, әԝ йәк беԛәдьр дькә мәрийа. Аарон ӧса жи гот кӧ гәләк мәри ӧса дьфькьрьн: «Әзе әԝе хәбате бькьм, һʹәта хәбатәкә баш бьвиньм».
Гәло чьрʹа һьнәк дьфькьрьн кӧ хәбата физики нә лайиԛи ԝан ә? Чьмки иро бь телевисионе, интернәте у бь тьштед дьн, гәләк бәла дьбә фькьре ӧса кӧ әʹмьре «идеал» әԝ ә, чахе мәри конфортеда нә у һеса дьжи. Метийу, йе кӧ пʹешәкʹар ә ӧса гот: «Бь дьшьрмишбуна мәрийа, тӧ чьԛас һе зедә хәбата физики дьки, сәва кӧ хԝә хԝәй ки, һаԛас һе зедә тӧ пешдачуйи нини». Шан дьхәбьтә ча дәргәһԝан. Әԝи жи тʹәхмин кьр кӧ нава мәрийа дьшьрмишбуна ӧса һәйә. Әԝи гот: «Мәрьв ида нахԝазьн тʹәмамийа рʹоже бьхәбьтьн, ле пʹәре хәбата рʹоже дьхԝазьн бьстиньн».
Ле һәнә гәләк мәрьвед пешдачуйи, йед кӧ һʹьз дькьн хәбата физики бькьн, у бәхтәԝар ьн. Данийел 25 сали йә у әԝ сәр авакьрьне дьхәбьтә, әԝи ӧса гот: «Әз дьшьрмиш дьбьм, кӧ хәбата физики гәләк бь ԛәдьр у ԛимәт ә, илаһи һәгәр бь ԝе хәбате дькари бьгьһижи нетәкә баш у һежа». Андре жи, йе кӧ 23 сали йә, ӧса гот: «Әз баԝәр дькьм кӧ бәхтәԝари у пешдачуйин, гьредайи йә тʹәви хәбата физикийә гьран. Кемасийа хәбате нә кӧ ԝе бәхтәԝарийе бинә, ле тʹәмбәлбуне!»
Гәло бь сайа чь, мәрийед ӧса ча Данийел у Андре, сәр хәбата физикийә гьран алийе башда дьньһерʹьн? Бь сайа ԝе йәке кӧ әԝана принсипед жь Кʹьтеба Пироз дьдьнә хәбате. Сәва кӧ хәбат бона мә чәтьн нибә у һәԝас бә, Кʹьтеба Пироз мә һелан дькә ԝәки әм хәбатһʹьз бьн. Ле Кʹьтеба Пироз нә кӧ тʹәне һелан дькә ԝәки әм бьхәбьтьн. Әԝ ӧса жи мә һин дькә чаԝа шабуне бьстиньн жь хәбате.
Гәло кʹижан принсипед жь Кʹьтеба Пироз ԝе али тә бькьн, ԝәки хәбатеда пешдачуйи би у ләзәте бьвини? Дь готара дьнда һьнәк жь ԝан принсипа ԝе бенә шьровәкьрьне.