ТʹЕМА ЖЬ РʹУЙЕ ЖУРНАЛЕ
Хԝәде Ча Дьньһерʹә сәр Шәрʹ?
Һуне ча щаба ве пьрсе бьдьн? Гәләк мәрьв дьфькьрьн кӧ Хԝәде шәрʹа ԛәбул дькә. Чьмки әԝана дьбежьн кӧ бәре Хԝәде тʹәми дайә һьнә хьзмәткʹаред хԝә, сәва кӧ әԝана шәрʹ бькьн. У Кʹьтеба Пироз әԝе йәке инкʹар накә. Ле һьнәк жи дьфькьрьн кӧ ньһерʹандьна Хԝәде ль сәр шәрʹ һатә гӧһастьне у рʹожа иройин әԝ шәрʹа ԛәбул накә. Чьмки әԝана дина хԝә дьдьнә ль сәр ве йәке кӧ Кӧрʹе Хԝәде, демәк Иса пәйчуйед хԝә һин кьр кӧ дьжмьне хԝә һʹьз бькьн (Мәтта 5:43, 44).
Ле һун чь дьфькьрьн? Хԝәде шәрʹа ԛәбул дькә? Һәрге әре, әԝ дь шәрʹед иройинда пьштгьрийа кʹе дькә? Һәрге һун щаба ԝан пьрса пебьһʹәсьн, ньһерʹандьна ԝә һьндава шәрʹ дькарә бе гӧһастьне. Мәсәлә, һәрге дь шәрʹда Хԝәде пьштгьрийа ԝи али бькьра, кʹижан кӧ һун пьштгьрийе дькьн, һьнге һьлбәт һуне ша буна. Ле ԝәйе хԝә ча тʹәхмин кьра, һәрге Хԝәде пьштгьрийа ԝи али бькьра, пьштгьрийа кʹижани һун накьн?
Демәк, әԝ йәк кӧ әм ча фәʹм дькьн дәрһәԛа ньһерʹандьна Хԝәде һьндава шәрʹ, дькарә һʹӧкӧм бә ль сәр ньһерʹандьна мә һьндава Хԝәде. Һәрге һун йәк жь ԝан милйона мәрьва нә, йед кӧ жь бо шәрʹ рʹасти кӧл-дәрда һатьнә, бешьк ԝәйе жи бьхԝаста бьзаньбуйа щаба ԝан пьрса: «Гәло шәрʹ бь һеланкьрьна Хԝәде дьбьн, у гәло әԝ ԛәбул дькә ԝан кӧл-дәрдед кӧ жь шәрʹ тен? Йан дьбәкә ԛә хәма Хԝәде нинә кӧ чь һʹалида ньн әԝ мәрьвед кӧ жь бо шәрʹ зийане дьстиньн?»
Дьбәкә һуне әʹщебмайи бьминьн чахе пебьһʹәсьн щаба Кʹьтеба Пироз сәр ԝан пьрса. Бь рʹастийе, чаԝа бәре ӧса жи рʹожа иройин ньһерʹандьна Хԝәде һьндава шәрʹа нәһатийә гӧһастьне. Ԝәрен бьньһерʹьн кӧ ньһерʹандьна Хԝәде ча бу сәр шәрʹа бәре у ԛьрʹна йәкеда. У әԝ йәк ԝе али мә бькә, кӧ әм фәʹм кьн һәла Хԝәде ньһа ча дьньһерʹә сәр шәрʹа, у гәло шәрʹ ԝе тʹьме һәбьн йан на.