Пьрсед Хwәндәвана

Чь те һʹәсабе гьли «Хәбәра Хwәде сах у зор ә», кö ньвисар ә Ибрани 4:12-да?

Жь контексте те кʹьфше кö Паwлосе шанди дәрһәqа әʹламәтийа Хwәде дьгот, демәк qьрара wи, кʹижан кö әм жь Кʹьтеба Пироз педьһʹәсьн.

Гәләк щар Ибрани 4:12 әʹдәбйәтед мәда бь wе нете те хәбьтандьне, кö бьдә кʹьфше wәки Кʹьтеба Пироз дькарә әʹмьре мәрьва бьгöһезә, у әw йәк бь рʹастийе жи öса йә. Ле wе һе баш бә һәрге контекста ве рʹезе фәʹм кьн. Паwлос Мәсиһийед Ибрани һелан дькьр, wәки әwана пьштгьрийа нет-мәрәмед Хwәде бькьн, демәк qьрара wи. Гәләк нет-мәрәмед Хwәде, ньвисаред пирозда һатьнә ньвисаре. Паwлос мәсәлә ани дәрһәqа Исраелийа, йед кö бь сайа Хwәде жь дилтийа Мьсьре аза бун. Исраели дькарьбун бькʹәтана әʹрде создайи кö «шир у һьнгьв же дькʹьшә», у кʹидәре кö wана дькарьбун рʹьһʹәти бьстандана (Дәркʹ. 3:8, ПКʹМ; Qан. Дщр. 12:9, 10).

Әw йәк qьрара Хwәде бу. Ле гәләк Исраелийа дьле хwә һʹьшк кьрьн у нәбаwәри данә кʹьфше, ләма жи нәкʹәтьнә ви әʹрди, демәк рʹьһʹәтийе (Жьмар 14:30; Йешу 14:6-10). Ле Паwлос гот кö созе «бона кʹәтьна нава рʹьһʹәтийа [Хwәде]», диса жи qәwатеда бу (Ибрн. 3:16-19; 4:1). Әʹйан ә, кö әw «соз» пʹарәкә жь qьрара Хwәде бу. Мина Мәсиһийед Ибрани, әм жи дькарьн бьхуньн у пебьһәʹсьн дәрһәqа qьрара Хwәде, у пьштгьрийа qьрара wи бькьн. Паwлос чәнд пʹар жь Дәстпебун 2:2, у Зәбур 95:11 да хәбате, сәва әʹйан кә, wәки әw соз сәр һʹиме Ньвисара йә.

«Созе кö бона кʹәтьна нава рʹьһʹәтийа wи һе дьминә», әв йәк дьле мә дьгьрә. Әв соз реали йә, кö әм дькарьн бькʹәвьнә нава рʹьһʹәтийа Хwәдеда, чьмки Кʹьтеба Пироз әве йәке дьбежә. У сәва бькʹәвьнә ве рʹьһʹәтийе, мә гав авитийә. Ле мә әв гав авитийә нә кö чьмки пәй Qануна Муса чун, йан кьред баш кьрьн сәва qәбулкьрьна Хwәде бьстиньн, ле мә әw кьр жь бо баwәрийа хwә һьндава Хwәде. Әм бь шабуне пьштгьрийа qьрара wи дькьн, у бәрдәwам дькьн öса бькьн. Гьли «Хәбәра Хwәде» йа кö Ибрани 4:12-да ньвисар ә, öса жи дькарә бе һʹәсабе Кʹьтеба Пироз. У бь һʹәзара мәрьв нав тʹәмамийа дьнйайе дәстпедькьн һин бьн Кʹьтеба Пироз у педьһʹәсьн дәрһәqа qьрара Хwәде. Әве йәке али гәләка кьрийә кö әʹмьре хwә бьгöһезьн, баwәрийе бьдьнә кʹьфше у бенә ньхöмандьне. Гöһастьнед кö әwана әʹмьре хwәда дькьн, избат дькә кö «Хәбәра Хwәде» бь рʹастийе «сах у зор ә». Qьрара Хwәде, кʹижан кö Кʹьтеба Пирозда әм педьһʹәсьн, ида ньһа әʹмьре мә алийе башда гöһастийә, у ахьрийеда жи wе диса зорайа хwә мәрʹа нишан кә.