ЖЬ АРХИВЕД МӘ

«Дьле Мә öса бь Хирәт у Һʹьзкьрьне Тʹьжә Нибуйә, Ча Ньһа»

Сала 1922, мәһа Илоне, рʹожа Инийе шәбәqе 8 000 мәрьв тʹоп бьбун. Һәwа ида гәрм дьбу. Бәрпьрсийаре бәрнаме әʹлам кьр, wәки wәʹде ве бәрнама фәрз кʹе дьхwазә дькарә жь оде дәре, ле пашда ида нькарә вәгәрʹә.

Wәʹде дәстпека «Хьзмәтийа Рʹумәт» кʹьлам һатьнә стьране. Паше Щозеф Рутерфорд дәркʹәтә сәр сене. Рʹаст ә гәләк гәрм бу, ле һʹәчʹи зәʹф рʹуньштьбун у гәләк һивийа готаре бун, тʹәне һьнәк дьчун-дьһатьн. Хәбәрван wана һелан кьр, wәки рʹунен у бьбьһен. Чахе готар дәстпебу, пʹәрда мәзьн йа сене жоре тʹопкьри бу.

Наве готара Рутерфорд öса бу «Пʹадшатийа Әʹзмана Незик ә». Әwи сьһʹәт у нивәки бь дәнге хwәйи бьльнд кö одеда бәла дьбу, шьровәдькьр кö чаwа пʹехәмбәред бәре бь мерхаси дәрһәqа һатьна Пʹадшатийе әʹлам дькьрьн. Хьлазийеда, әwи пьрсәкә öса да: «Һун баwәр дькьн wәки Пʹадше рʹумәткьри ида сәрwертийа хwә дәстпекьрийә?» Гöһдарвана бь дәнге бьльнд щаба хwә дан: «Бәле!»

Паше Рутерфорд бь дәнге бьльнд гот: «Wәки öса нә, вәгәрʹьн дәште, гәли зарʹед Хwәдейе һәри мәзьн! Аһан, Пʹадша пʹадшатийе дькә! Һун әʹламдаред wи нә. Ләма жи әʹлам кьн, әʹлам кьн, әʹлам кьн дәрһәqа Пʹадша у Пʹадшатийа wи!»

Wе гаве, пʹәрда мәзьн бәрʹдан у ньвисара сәр һатә кʹьфше: «Әʹлам кьн дәрһәqа Пʹадша у Пʹадшатийа wи!»

Рей Боп, тинә бира хwә: «Гöһдарван зәндәгьрти ман». Ле Анна Гарднер гот кö «жь гьмә-гьма дәстһәвхьстьне стунә дьһәжийан». Фред Тwарош öса гот: «Һʹәму гöһдарван тʹәвайи рʹабунә сәр пʹийа». Ле Евангелос Скоуфас гьли кьр: «Те бежи qәwатәке әм жь щи рʹакьрьн, әм рʹабунә пʹийа у чʹәʹвед мә тʹьжә һесьр бун».

Гәләкед кö сәр ве щьвата мәзьн бун, мьзгинийа Пʹадшатийе ида бәла дькьрьн. Ле паши ве йәке хирәта wана һе зедә бу. Етел Бенекоф гьли кьр, wәки дьле Леколинкʹаред Кʹьтеба Пироз «öса бь хирәт у һʹьзкьрьне тʹьжә нибуйә, ча ньһа». Одесса Так кö wи wәʹдәйи 18 сали бу, паши ве щьвата мәзьн нет дани пешийа хwә, wәки щаба ве пьрсе бьдә «Кʹе wе һәрʹә?» Әwе гот: «Мьн ньзаньбу кʹидәре у чаwа мьзгинийе бәла кьм у чь бежьм. Ле мьн сәд сәләфи заньбу wәки әз дьхwазьм бьбьмә мина Ишайа, кʹижани гот: ‹А вай әз, мьн бьшинә›» (Иша. 6:8). Ралф Лефлер гот: «Әw рʹож дәстпека кампанийа мәзьн бу йа әʹламкьрьна Пʹадшатийе, у иро әw ида сәр тʹәмамийа әʹрде бәла буйә».

Бешьк, әw щьвата мәзьн йа сала 1922 кö Сидар Поинтеда (Оһайо) бу, кʹәтә нава тʹәрихийа тʹәшкиләте у гәләк мәхсус бу! Щорщ Гангас гот: «Әw щьвата мәзьн дьл да мьн, wәки тʹö щар щьватед мәзьн бәрʹнәдьм». У ча те бира wи, рʹасти жи әwи тʹö щар бәрʹнәда. Щулиа Wилкакс ньвиси: «Һәр щар чахе әʹдәбйәтед мәда те готьне дәрһәqа щьвата мәзьнә Сидар Поинтеда йа сала 1922, әз гәләк дьлгәш дьбьм. Әз тʹьме дьхwазьм бежьм ‹Зәʹф рʹази мә Йаһоwа, wәки тә мәщал да мьн кö әз ведәре бум›».

Иро жи гәләк жь мә мина wан хушк-бьра тиньн бира хwә щьватед мәзьн, кʹижан кö гәләк дьле мә гьртьнә у әм бь хирәт у һʹьзкьрьн тʹьжә кьрьнә һьндава Хwәдейе мә у Иса Пʹадша. Гава әм дьфькьрьн сәр wан щьватед мәзьн, әм жи һелан дьбьн бежьн: «Зәʹф рʹази мә Йаһоwа, wәки тә мәщал да мьн кö әз ведәре бум».

Гьшка Дьхwәст Пебьһʹәсьн Әw Се Һʹәрф Чь Тенә Һʹәсабе

Һʹәрфед «ADV» (әw һʹәрфед пешьн ьн, йа хәбәра Инглизи кö те wәлгәрʹандьне «әʹламкьрьн»), һʹәму щийа һәбун, һьн сәр баха, һьн сәр авайа, һәла һе сәр бәрнама щьвата мәзьн жи! Сәр щьвате гьшка дьхwәстьн пебьһʹәсийана кö әw һʹәрф чь тенә һʹәсабе.a

«Картед спи сәр һʹәму qöтʹийед пʹоста һәбун у öса жи бәр дәрийа. Сәр wан карта нәшьркьри бун һʹәрфед мәзьн у рʹәш, ADV. Мә дьпьрси кö әw һʹәрф чь тенә һʹәсабе, ле тʹö кәси ньзаньбу, йан жи кʹе заньбу нәдьготьнә мә» (Едит Бренесен).

a Әw нишана бь һʹәрфа әм ньзаньн чь щурʹәйи бун, чьмки Архивед мәда шьклед wан нишана тʹöнә нә.

Щаба Дöа жь Сене Дәр

Артур у Нели Клаус зу һатьн сәр щьвата мәзьн, wәки хwәрʹа щийе баш бьгьрьн. Артур гот: «Мьн рʹьнд гöһ дьда һәр хәбәрәке». Ле ньшкева зьке wи санщу гьрт. Әw мәщбур бу жь оде дәркʹәвә, у әwи заньбу wәки әw паше нькарә бькʹәвә оде. Бьре кö бәр дәри бу, жь wи пьрси: «Wи wәʹде фәрз тö ча дәртейи?». Ле Артур заньбу wәки әw нькарә дәрнәйе.

Әwи пьшт хwәва бьһист ча одеда гьшк бь дәнге бьльнд дәсте хwә һәв дьхьн. Әwи щики öса дьгәрʹийа сәва гöһе хwә бьде һәла һьндöрʹда чь дьqәwьмә, у әwи щи дит. Әw щи сәр бани бу, кʹижан кö wәкә 4.8 метьр бьльнд бу. Ль wедәре агушкед вәкьри һәбун.

Артур wедәре чәнд бьра дит йед кö бәрхwә дькʹәтьн у жорва сәр хәбәрван дьньһерʹин. Wанрʹа һатьбу готьне, кö чәнд тʹога бьбьрʹьн, wәки плаката бь ньвисаре дәрберʹа вәбә. Ле сәва кö әwана тʹога бьбьрʹьн wанрʹа диса кʹерәк жи лазьм бу. Бьдьнә һʹәсабе хwә wәки щәм Артур кʹера щева һәбу. Әw бьра гәләк ша бун. Артур у бьред дьн щийе хwә гьртьн сәва кö паши нишанәке, тʹога бьбьрʹьн. Гава Рутерфорд щара дöда гот «Әʹлам кьн!», wана тʹог бьрʹи.

Хушк-бьред кö сәр ве щьвате бун, гьли кьрьн wәки чьqас бәдәw, бь се рʹәнга әw плакат вәбу. Ортʹеда Иса нәqьшкьри бу.

Паши щьвате бьра Артуррʹа готьн, wәки әwана пе пʹепәлуке һьлкʹьшийанә сәр бани, ле паше пʹепәлук һатә һьлдане. У әwана нькарьбун пәйа буна сәва аликʹарийе бьхwазьн, ләма жи wана Йаһоwарʹа дöа кьр сәва бьраки бьшинә кö кʹер щәм һәбә. Әw бьра сәд сәләфи баwәр бун, wәки Йаһоwа öса һʹәwас щаба дöайе wан да.