ПЬРСЕД ХWӘНДӘВАНА

Гәло Мәсиһи дькарә бал хwә чʹәк хwәй кә, мәсәлә тʹьвьнг йан qьрме бьчʹук сәва кö хwә хwәй кә?

Бәр чʹәʹве Йаһоwа әʹмьре мәрьва пироз ә. Даwьд зәбурбеж гот кö Йаһоwа «канийа жийане» йә (Зәб. 36:9). Ләма жи һәрге Мәсиһи дьхwазә хwә йан жи һәбука хwә хwәй кә, әw wе һәр тьшти бькә сәва хуна кәсәки нәкʹәвә стуйе wи, демәк wе нәкöжә (Qан. Дщр. 22:8; Зәб. 51:14).

Рʹаст ә һәр тьшт бь чь жи мәрьв хwә хwәй кә, дькарә бьбә мәʹнийа мьрьна кәсәки, ле qьрмә дькарә пера-пера бькöжә, фьрqи тʹöнә ньшкева әw бьqәwьмә йан жи бь һʹәмде хwә кәсәки гöлә кьн.a Хенщи ве йәке, qачах йан дьз кö дьхwазә зийане бьдә кәсәки, әw öса жи тʹәвһәв ә, ле чахе әw дәсте кәсәкида qьрме дьвинә, һʹал һе хьраб дьбә у кәсәк дькарә бе кöштьне.

Иса шәва пешийа мьрьна хwә шагьртед хwәрʹа гот wәки шур тʹәви хwә һьлдьн. Ле әwи нә бона ве йәке гот сәва әwана хwә хwәй кьн (Луqа 22:36, 38). Иса дьхwаст дәрсәке wан һин кә. Әwи гот кö әwана гәрәке зийане нәдьнә кәсәки, һьнге жи гава әʹлаләт пе чʹәка мьqабьли wан дәре (Луqа 22:52). Чахе Пәтрус бь шуре хwә хöламе сәрәккʹаһин бьриндар кьр, Иса тʹәми да Пәтрус: «Шуре хwә бькә щи». Паши ван гьлийа Иса принсипәкә öса гот кö бона Мәсиһийед иройин ә жи: «Кʹи кö шур һьлтинә, әwе бь шур һәрʹә» (Мәт. 26:51, 52).

Ль гора пʹехәмбәртийа Миха 4:3, щьмәʹта Хwәде «шуред хwә» дькьнә «һәсьне гисьне» у «рʹьмед» хwә дькьн «кʹера рәзвана». Бәле, әв йәк öса нә, Мәсиһи гәрәке шәруд нибьн. Әwана дьжин ль гора тʹәмийа Хwәде кʹижан кö бь сайа Паwлос да: «Жь бәр хьрабийева хьрабийе ль тʹö кәси нәкьн. . . . Чьqас жь дәст wә те, тʹәви һʹәму мәрьва әʹдьлайийеда бьн» (Рʹом. 12:17, 18). Паwлос рʹасти гәләк чәтьнайа һат, алийе qачахада жи, ле әwи тʹö щар әв принсипа Хwәде нәтʹәрʹьбанд сәва әʹмьре хwә хwәй кә (2 Корн. 11:26). Wан дәрәщада, Паwлос итʹбарийа хwә Хwәде у биланийа wи дьани, биланийа кö Хәбәра Wида һәйә у жь чʹәкед шәрʹ «qәнщтьр» ә (Wаиз 9:18).

Бона Мәсиһийа әʹмьр жь һәбуке qимәттьр ә. Бәле, «әʹмьре инсен һәбука wива гьредайи нинә» (Луqа 12:15). Ләма жи бәʹса хәбәре, һәрге Мәсиһи бь гьлийед нәрм нькарә qачах йан дьз кö qьрма wи һәйә бьдә сәкьнандьне, һьнге гәрәке пәй ве принсипа Иса һәрʹә: «Мьqабьли хьраба нәсәкьньн». Әв те һʹәсабе чь кö әw жь мә бьхwазә, әме һәр тьшти жерʹа бьдьн (Мәт. 5:39, 40; Луqа 6:29).b Ле лапә баш әв ә wәки нәкʹәвә чʹәʹве qачаха. Чаwа Кʹьтеба Пироз дьбежә кö пе һәбуне хwә qöрʹә нәкьн. У һьн жи һәрге щинар мә нас дькьн ча Шәʹдед Йаһоwа йед кö әʹдьлайиһʹьз ьн, әw йәк жи дькарә мә жь qачахтийе хwәй кә (1 Йуһʹн. 2:16; Мәтʹлк. 18:10).

Мәсиһи исафа мәрьвед дьн һьлдьдьнә һʹәсаб (Рʹом. 14:21). Һәрге щьватеда кәсәк пебьһʹәсә wәки щәм хушк йан бьрак qьрмә һәйә, әwана дькарьн әʹщебмайи бьминьн, у һәла һе бьлькʹöмьн жи. Ләма һәрге жи әм дьфькьрьн кö изьна мә һәйә тьштәки бькьн, ле әв йәк дькарә хушк-бьра бьлькʹöминә, әме жь һʹьзкьрьне тьштед öса нәкьн (1 Корн. 10:32, 33; 13:4, 5).

Мәсиһи гәрәке бона йед дьн мәсәла баш бьн (2 Корн. 4:2; 1 Пәт. 5:2, 3). Һәрге Мәсиһи чʹәк хwәй дькә сәва хwә хwәй кә, рʹуспи wе сәр һʹиме Кʹьтеба Пироз ширәте бьдьнә wи. У һәрге әw Мәсиһи әве ширәте пьшт гöһе хwәва бавежә, бона щьвате әw мәсәла баш нинә. Әw ида нькарә щьватеда кʹьфшкьрьн йан жи щабдарийа бьстинә. Әв принсип бона wан Мәсиһийа йә жи, йед кö wи щийи дьхәбьтьн, кʹидәре кö әwана чʹәк һьлдьдьн дәстед хwә. Бәле, һе баш ә хәбатәкә дьн бьгәрʹьн.c

Мәсиһи гәрәке хwәха сафи кә кö чаwа малбәт у һәбука хwә хwәй кә, у öса жи чь хәбат бьжберә. Ле һәр сафикьрьн гәрәке ль гора принсипед Кʹьтеба Пироз бә. Хwәдейе мәйи билан әw принсип данә мә, чьмки мә һʹьз дькә. Ләма жи Мәсиһийед кö пе принсипед Хwәде дьжин у qайим wи һʹьз дькьн, бона хwәйкьрьна әʹмьре хwә wе тʹö чʹәки һьлнәдьн дәсте хwә у нә жи бал хwә хwәй кьн. Әwана заньн кö һәрге итʹбарийа хwә Хwәде биньн у әʹмьре хwәда принсипед wи бьдьнә хәбате, Хwәде wе хwәйкьрьн у бехофийе һʹәта-һʹәтайе бьдә wан (Зәб. 97:10; Мәтʹлк. 1:33; 2:6, 7).