Ахьрийа Баш жь Qәнщикә Мәсиһи

ҺЬНДЬСТАНЕДА шәһәрики бьчʹук Гущаратида, wәкә 60 сал пешда баве гәдәки бь наве Щон һатә ньхöмандьне. Щон тʹәви се хушкед хwә, дö бьред хwә у дийа хwә, Католикед Ромайи бун. Ләма әwана мьqабьли баwәрийа баве хwә дьчун.

Щарәке баве Щон жерʹа гот wәки нәʹме бьвә бьдә һәвале wийи жь щьвате. Ве шәбәqе пешийа кö Щон нәʹмә бьвьра, тʹьлийа wи кʹур һатә бьрине чахе кодькәкә һʹәсьн вәдькьр. Ле әwи дьхwәст хwәстьна баве хwә бинә сери у ләма пʹинәк тʹьлийа хwәйә бьриндар аланд у нәʹмә һьлда чу.

Чахе Щон чу мала һәвале баве хwә, әw малда нибу, жьна wи мал бу у жь wи нәʹмә һьлда. Әw жи Шәʹде Йаһоwа бу. Әwе дит кö дәсте wи бьриндар ә у гот кö дьхwазә али wи бькә. Әwе тʹьлийа wи пе дәрман тʹәмьз кьр у гьреда. Паше әwе чайәкә гәрм да бәр у бь нәрми дәрһәqа Кʹьтеба Пироз тʹәв wи хәбәр да.

Әв qәнщийа wе öса сәр wи һʹöкöм бу, кö әw нәрм бу һьндава Шәʹдед Йаһоwа. Әwи дö пьрс да wе дәрһәqа баwәрийа Шәʹдед Йаһоwа кʹижан кö жь Дера Католики щöдә дьбу. Әwи же пьрси гәло Иса Хwәде йә, у гәло лазьм ә Мәсиһи Мәрйәме бьһʹәбиньн у жерʹа дöа бькьн. Әw хушк зьмане wи Гужарати заньбу, ләма сәр зьмане wи щаба пьрсед wи жь Кʹьтеба Пироз да. Әwе öса жи сәр зьмане wи бәлавок да бь наве «Мьзгинийа Пʹадшатийа Хwәде» (This Good Nеws of thе Kingdom).

Чахе әwи әв бәлавок хwәнд, фәʹм кьр кö әw щара пешьн рʹастийа Кʹьтеба Пироз дьбьһе. Әw чу бал кʹәшишәки хwә у әв дö пьрс да wи жи. Әв кʹәшиш öса һерс кʹәт кö Кʹьтеба Пироз авитә wи, у кьрә qажини: «Тö буйи Шәйтʹан! Һәла нишани мьн кә кʹидәре Кʹьтеба Пирозда те готьне wәки Иса Хwәде нинә у кö тö гәрәке Мәрйәме нәһʹәбини. Һәла нишани мьн кә!». Щон зәндәгьрти ма кö әв кʹәшиш öса qайим һерс кʹәт, у жерʹа гот: «Ида ньгед мьн ве дера Католики накʹәвә». У öса жи бу!

Щон һинбуна Кʹьтеба Пироз дәстпекьр, рʹасти qәбул кьр у бу хьзмәткʹаре Йаһоwа. Wәʹдә шунда, чәнд нәфәред wи жи һатьнә сәр рʹийа рʹаст. Ида 60 сал дәрбаз буйә, у һʹәта иро әв дәхмә һе сәр тʹьлийа Щон ә. Тʹьме дькʹәвә бира wи кö qәнщикә Мәсиһи ча wи ани сәр рʹийа рʹастийе (2 Корн. 6:4, 6).