Пьрсед Хwәндәвана

Һена бәреда, гәло әʹсә бу wәки мер ньхöри буйа, сәва кö бькʹәта рʹеза wан кал-бава жь кʹижана Мәсиһ гәрәке бьһата?

Әʹдәбйәтед мәда мә чәнд щара бәʹса ве пьрсе кьрийә. Ибрани 12:16-да те готьне, кö Әсаw «тьштед пироз qимәт нәкьр» у «мафе ньхöритийа хwә, бона зькә хwарьн [Аqубрʹа] фьрот, ДТʹ». Жь ве йәке те кʹьфше, кö чахе Аqуб «мафе» ньхöритийе станд, әw жи кʹәтә нава рʹеза кал-бава, жь кʹижана Мәсиһ гәрәке бьһата (Мәт. 1:2, 16; Луqа 3:23, 34).

Ле жь һьнә сәрһатийед Кʹьтеба Пироз те кʹьфше, кö мер сәва бькʹәвә нав рʹеза wан кал-бава, жь кʹижана Мәсиһ гәрәке бьһата, әʹсә нибу кö ньхöри буйа. Wәрә чәнд избаткьрьнед ве йәке шеwьр кьн:

Жь кöрʹед Аqуб (Исраел) кö Леайе жерʹа ани, ньхöри Рубен бу. Ле кöрʹе пешьн жь Рʹаһеле, йа кö Аqуб гәләк ле һʹьз дькьр, Усьв бу. Чахе Рубен гöнә кьр, маф, демәк изьна ньхöритийе, гьһиштә Усьв (Дәстп. 29:31-35; 30:22-25; 35:22-26; 49:22-26; 1 Дир. 5:1, 2). Ле йәкә әwана һәрдö жи нәкʹәтьнә нав рʹеза wан кал-бава, жь кʹижана Мәсиһ гәрәке бьһата. Кöрʹе Аqуб йе чара Щьһуда, кʹижан кö Леайе жерʹа ани, кʹәтә нава ве рʹезе (Дәстп. 49:10).

Луqа 3:32-да те рʹезкьрьне пенщ наве кал-бавед жь хәза Мәсиһ. Ча те кʹьфше һәр йәк жь wан ньхöри бу. Мәсәлә, ньхöрийе Боwаз Овед бу, ле ньхöрийе Овед Йеша бу (Рʹутʹ 4:17, 20-22; 1 Дир. 2:10-12).

Ле әм заньн кö Даwьде кöрʹе Йеша, ньхöри нибу. Әw жь һʹәйшт кöрʹа йе лапи бьчʹук бу. Ле йәкә Мәсиһ жь рʹькʹьнийата Даwьд бу (1 Сам. 16:10, 11; 17:12; Мәт. 1:5, 6). Рʹаст ә Сьлеман ньхöрийе Даwьд нибу, ле әw жи кʹәтә рʹеза wан кал-бава (2 Сам. 3:2-5).

Ле әw найе һʹәсабе кö ньхöрти фәрз нибу. Чьмки малбәтеда йе ньхöри хwәйиqәдьр бу, у гәләк щар паши малхе мале, әw дьбу сәрwер. Öса жи малбәтеда һәбук дöбарә дьданә wи (Дәстп. 43:33; Qан. Дщр. 21:17; Йешу 17:1).

Ле мафе ньхöритийе дькарьбу бьгьһишта кöрʹәки дьн. Әw йәк те кʹьфше чахе Бьраһим ньхöритийа Исмайил да Исһаq (Дәстп. 21:14-21; 22:2). У öса жи ча мә дит, ньхöритийа Рубен гьһиштә Усьв.

Ньһа wәрен әм диса бьхуньн Ибрани 12:16: «Һаш жь хwә һәбьн, нәбә кö йәк бенамус бә, йан мина Әсаw бә, йе кö тьштед пироз qимәт нәкьр у мафе ньхöритийа хwә, бона зькә хwарьн фьрот, ДТʹ». Гәло Паwлос бь ве рʹезе чь дьхwәст бьгота?

Ве рʹезеда Паwлос нә кö дина Мәсиһийа дьда сәр хәза кал-бавед Мәсиһ, ле әwи дьхwәст wана ширәт кьра, wәки «ньгед хwә рʹийа рʹастда» бавежьн. Әwана гәрәке мьqати хwә буна кö нәкʹәтана нав бенамусийе, у «дәсте хwә жь кʹәрәма Хwәде» нәкьрана (Ибрн. 12:12-16). Ле һәрге wана öса нәкьра, wе бьбуна мина Әсаw, йе кö «тьштед пироз qимәт нәкьр», у бу йәки дьнеһʹьз.

Әсаw дьжит һена бавәʹширада, у дьqәwьмә щара изьна wи һәбу һәла һе жи qöрбана бинә (Дәстп. 8:20, 21; 12:7, 8; Иб. 1:4, 5). Ле Әсаw бь бьнйатʹа мәрьвайи дьфькьри, ләма әwи бона тʹасә шорба ниська пьшта хwә да һʹәму кʹәрәмед хwә. Дьqәwьмә әwи әw йәк кьр, чьмки нәдьхwәст wи щәфайи бькʹьшинә, кʹижан кö зöрʹәта Бьраһим гәрәке бьдита, чаwа һатьбу пʹехәмбәртикьрьне (Дәстп. 15:13). Әсаw дö жьнед пʹутпʹарьст ани, у бь ве йәке жи да кʹьфше кö әw дьнеһʹьз бу у тьштед пироз нәдьшекьранд. Әw дö жьн бунә кöла дьле де-баве Әсаw (Дәстп. 26:34, 35). Ле Аqуб чʹәʹв нәда бьре хwә у жьнәкә öса ани йа кö Хwәдейе рʹаст дьһʹәбанд (Дәстп. 28:6, 7; 29:10-12, 18).

Ахьрийеда, әм чь дькарьн бежьн дәрһәqа хәза Мәсиһ? Ча мә дит ве хәзеда нә һʹәмушк ньхöри бун. Щьһуйа әw йәк заньбун у qәбул дькьрьн, öса жи qәбул дькьрьн wәки Мәсиһ бь рʹькʹьнийата Даwьд һат, кʹижан кö кöрʹе Йеша йе бьчʹук бу (Мәт. 22:42).