Пьрсед Хwәндәвана

Гәло Зәбур 144:12-15-да дәрһәqа щьмәʹта Хwәде те готьне, йан дәрһәqа хәрибед хьраб кö рʹеза 11-да ньвисар ә?

Әw йәк кö хәбәред Ибрани щьмледа ча тенә ньвисаре, щурʹә-щурʹә фәʹмкьрьна дьдә. Ле һәнә факторед öса кö али мә дькьн рʹаст фәʹм бькьн дәрһәqа кʹе wедәре те готьне:

1. Дина хwә бьдьнә пʹара дьн йа ве зәбуре. Әw кʹәрәм, дәрһәqа кʹижана рʹезед 12 һʹәта 14-да те гьликьрьне, дьдә кʹьфше wәки әw дәрһәqа wан мәрьвед рʹаст те готьне, йед кö һиви дькьн, wәки жь дәсте мәрьвед хьраб аза бьн у хьлаз бьн (рʹеза 11). Әв фькьр öса жи әʹйан дьбә рʹеза 15-да, кʹидәре кö дö щара әw хәбәр те хәбьтандьне «хwәзи», у әw гьли һәма диса дәрһәqа wан мәрьва те хәбьтандьне, Хöдане кʹижана жи Йаһоwа йә!

2. Әw фәʹмкьрьн ль гора рʹезед дьнә Кʹьтеба Пироз ә, кö соз дьдьн wәки кʹәрәмед Хwәде wе сәр щьмәʹта wийә амьн бәла бә. Әв зәбур баwәрийа Даwьд һьндава ви созе Хwәде дьда кʹьфше, кö паши азабуна Исраелийа жь дьжмьна, Хwәде wе щьмәʹта хwә бь бәхтәwарийе у бь пешдачуйине кʹәрәм кьра (Qан. Каһ. 26:9, 10; Qан. Дщр. 7:13; Зәб. 128:1-6). Мәсәлә, Qануна Дöщари 28:4-да те готьне: «Дöайе ль бәре зьке тә, бәре әʹрде тә, бәре һʹәйwане тә, зайина пәз у дәwаред тә бә». Бь рʹасти wәʹде сәрwертийа Сьлемане кöрʹе Даwьд, щьмәʹт рʹасти әʹдьлайеда бу у пешда дьчу. Хенщи ве йәке, щурʹед сәрwертийа Сьлеман дьданә кʹьфше сәрwертийа Мәсиһе ахьрийе (1 Пʹадш. 4:20, 21; Зәб. 72:1-20).

Хьлазийеда, фәʹмкьрьна Зәбура 144 әʹйан дькә, wәки әв зәбур бь тʹәмами зәлал дьдә кʹьфше баwәрийа хьзмәткʹаред Йаһоwайә qәwи, демәк кö Хwәде wе диwана хьраба бькә, у паше әʹдьлайи wе һʹәта-һʹәтайе һәбә у мәрьвед рʹаст wе бәхтәwарийеда бьжин (Зәб. 37:10, 11).