Чаwа Леколинкьрьна Кʹьтеба Пироз Һе Керһати у Һʹәwас Бькьн

Йешу Qануне дьхунә; диwаред Әриһайе һьлдьшен, ле мала Рʹәхабе һьлнаше; Йешу дәсте хwә бәрбь әʹзмана дькʹьшинә у дöа дькә

ЙЕШУ щабдарийа мәзьн станд. Әwи гәрәке щьмәʹта Исраел бьвьра Әʹрде Создайи, ле әw шьхöл нәһеса бу. Йаһоwа wи qәwи кьр у дьл да wи бь wан гьлийа: «Мерхас у qәwи бә». Öса жи Хwәде готә Йешу, кö һәрге әw Qануна wи һәр рʹож бьхунә у бинә сери, әwе пешда һәрʹә у бь билани тьшта бькә (Йешу 1:7, 8, ДТʹ).

Әм зәманед хьрабда дьжин, у әм жи рʹасти чәтьнайа тен (2 Тимтʹ. 3:1). Әм мина Йешу дькарьн әве ширәта кö Йаһоwа дабу wи, qәбул кьн. Әм дькарьн Кʹьтеба Пироз һәр гав бьхуньн, у принсипед Йаһоwа бьдьнә хәбате wәки сафикьрьнед билан бькьн.

Ле гәләк жь мә дьбәкә qайил бьн, wәки нәһеса йә леколина бькьн. Ле леколинкьрьна Кʹьтеба Пирозә шәхси гәләк фәрз ә. Дина хwә бьдьнә чаргоша бь наве «Әwан Ширәта Биньн Сери», у әw йәк wе али wә бькә леколинкьрьна хwә һе керһати у һʹәwас бькьн.

Зәбурбеж дьстьра: «Мьн бькә wе шьвәрʹийа әʹмьред Хwә, кö wанда дәман у һʹәйран ьм әз бь хwә» (Зәб. 119:35). Һун дькарьн жь леколинкьрьна Хәбәра Хwәде шабуне бьстиньн. Һуне гәләк хьзнед рʹöһʹани бьвиньн, гава бәрдәwам кьн Кʹьтеба Пироз леколин бькьн.

Рʹаст ә мәрʹа мина Йешу нәлазьм ә рʹебәрийа щьмәʹте бькьн, ле чәтьнайед мә жи һәнә. Ләма жи әм гәрәке чʹәʹв бьдьнә wи кö Хәбәра Хwәде леколин бькьн у чь теда ньвисар ә биньн сери. Һәрге әм öса бькьн, әме жи пешдачуйи бьн у тьшта бь билани бькьн.

ӘWАН ШИРӘТА БИНЬН СЕРИ

Пешийа леколинкьрьне дöа бькьн. Кʹьтеба Пирозда фькьред Хwәдейе һьмзор ньвисар ьн, кʹижан кö бона кʹара wә һатьнә ньвисаре. Ләма жи чахе һун Кʹьтеба Пироз дьхуньн, аликʹарийе жь wи бьхwазьн сәва һун чь кö бьхуньн фәʹм кьн, бира хwәда хwәй кьн у әʹмьре хwәда бьдьнә хәбате (Әзр. 7:10).
Пьрса бьдьнә хwә чахе Кʹьтеба Пироз йан әʹдәбйәтед сәр һʹиме Кʹьтеба Пироз дьхуньн. Мәсәлә: «Әw пʹар чь мьн һин дькә дәрһәqа Йаһоwа? Ча әw йәк гьредайи йә тʹәви тʹема сәрәкәйә Кʹьтеба Пироз? Ча әз әwан фькьра дькарьм бьдьмә хәбате сәва али мәрьва бькьм?»
Һун чь дьхуньн сәр бьфькьрьн. Wәʹде хwәндьне бьсәкьньн у бьфькьрьн. Пьрсе бьдьнә хwә: «Ча әw информасийа сәр мьн һʹöкöм дькә? Чьрʹа әw йәк wи щурʹәйи сәр мьн һʹöкöм дькә? Ча әw йәк гьредайи йә тʹәви qәwьмандьнед мьнә бәре, дәрәща мьнә иройин у ахьрийа мьн? Ча әз дькарьм әwан принсип у ширәтед жь Кʹьтеба Пироз әʹмьре хwәда бьдьмә хәбате?» (Иб. 23:5; Зәб. 49:3). Wәʹде леколинкьрьне, бьфькьрьн Йаһоwа чьрʹа щьмәʹта хwә ширәт дькә, wәки хwә жь щурʹә щурʹә тьшта дур бьгьрьн, у әм чь ахьрийе дькарьн бьстиньн сәва кьред хwә (Qан. Дщр. 32:28, 29).
Бьдьнә бәр чʹәʹве хwә ве йәке чь кö дьхуньн. Мәсәлә, һәла бьдьнә бәр чʹәʹве хwә ве дәрәще чахе бьред Усьв wи фьротьнә Исмайилийа (Дәстп. 37:18-28). Ве дәрәщеда һун чь дьвиньн у чь дьбьһен? Һәла хwә дайньн дәwса wан, бәʹса хәбәре әwана чь дьфькьрьн у чь тʹәхмин дькьн? Wи щурʹәйи леколинкьрьна wә wе һʹәwас бә у һуне һе зәʹф кʹаре бьстиньн.
Һащәтед бона леколинкьрьне бьдьнә хәбате, сәва кö леколинкьрьн һе зәʹф кʹаре wәрʹа бинә. Һин бьн чаwа щурʹә-щурʹә һащәта сәр зьмане хwә бьдьнә хәбате, кö бь онлайн у нәшьркьрьнеда һәнә. Шәрм нәкьн жь мәрьвед дьн бьпьрсьн, wәки wәрʹа нишан кьн чаwа әwана һащәта дьдьнә хәбате. Бьдьнә хәбате «Рʹебәрийа Леколинкьрьне бона Шәʹдед Йаһоwа», кʹижан кö дькарә али wә бькә бьвиньн гәләк тʹема у шьровәкьрьна гәләк рʹезед Кʹьтеба Пироз. Бьдьнә хәбате буклета бь наве «Рʹебәри бона Һинбуна Кʹьтеба Пироз». Wедәре информасийа керһати һәйә дәрһәqа щи, тʹәрихийе, гьранийе у чапкьрьне у диса тьштед дьн.
Фькьред сәрәкә кʹьфш кьн. Әw йәк wе али wә бькә бира хwәда хwәй кьн wә чь хwәнд. Wе öса жи һе баш бә, һәрге һун кәсәкирʹа гьли кьн һун чь пеһʹәсийан. Дьбәкә тьштед öса жи һәбьн, кö һун дькарьн хьзмәтийеда бьдьнә хәбате. Һәрге һун wан ширәта биньн сери, һуне фькьред сәрәкә нә кö тʹәне бира хwәда хwәй кьн, ле öса жи бьдьнә хәбате бона кʹара мәрьвед майин.