Wәʹде Бәре Wәʹдә Ча Тедәрдьхьстьн?
ЧАХЕ һун дьхwазьн wәʹдә пебьһʹәсьн, һун чь дькьн? Дьбәкә һун сьһʹәте дьньһерʹьн. Һәрге һәвала wә дьпьрсә сьһʹәт чь йә, һун ча жерʹа сьһʹәт дьбежьн? Һун дькарьн бь щурʹә-щурʹә щаба хwә бьдьн.
Әw йәк гьредайи йә wи щийива, кʹидәре кö һун дьминьн. Мәсәлә, һәрге рʹож ә у сьһʹәт 1 у 30 дәqә йә, һун дькарьн бежьн, «ниве дöда йә». Һьнә щийада жи дькарьн бежьн 1:30 йан жи 13:30.
Һун чаwа хwәндәванед Кʹьтеба Пироз дьхwазьн бьзаньбьн, кö бәре мәрьва ча wәʹдә тедәрдьхьстьн. Wана wәʹдә бь щурʹә-щурʹә һәв башqә дькьрьн. Ньвисаред Ибранида тенә хәбьтандьне әв гьли «сьбәһе зу», «нава рʹоже», «ниврʹож», «бәре еваре» (Дәстп. 8:11; 19:27; 43:16; Qан. Дщр. 28:29; 1 Пʹадш. 18:26). Ле Кʹьтеба Пироз щара һе һур бь һур дәрһәqа wәʹдә дьбежә.
Бәре әʹдәт бу, шәв нобәдар һәбьн. Гәләк qьрʹнә пешийа буйина Иса, Исраелийа шәв сәр се пʹара башqә дькьрьн, у нав дькьрьн нобәдари (Зәб. 63:6). Һʹакьмти 7:19-да те готьне дәрһәqа «нобәдарийа навинә шәв, ДТʹ». Паши буйина Иса, Щьһу жи мина Йунанийа у Рʹомайа, шәв бь чар пʹаред нобәдарийе башqә дькьрьн.
Мьзгинида әw нобәдари гәләк щар те хәбьтандьне. Мәсәлә, чахе Иса сәр аверʹа дьчу бәрбь qәйька шагьртед хwә, те готьне wәки әw йәк «шәв нобәдарийа чарада» бу (Мәт. 14:25, ДО). Мәтʹәлокда жи Иса гот: «Һәгәр хwәйе мале бьзаньбуйа кö дьзе кʹижан дәма [нобәдарийа] шәве бьһата, wе һʹьшйар бьма у нәһьшта кö мала wи дәрәвәкьра» (Мәт. 24:43).
Иса бәʹса wан чар нобәдарийед шәве кьр, чахе готә шагьртед хwә: «Һʹьшйар бьминьн, чьмки һун ньзаньн малхе мале wе кʹәнге бе, еваре йан ниве шәве, йан wәхте бангдана дика, йан сәре сьбәһе» (Марq. 13:35). «Евар» нобәдарийа пешьн бу у дәстпедьбу чахе рʹо дьчу ава, һʹәта еваре wәкә сьһʹәта нәһа. Нобәдарийа дöда «ниве шәве» бу, дәстпедьбу wәкә еваре жь сьһʹәта нәһа, һʹәта ниве шәве. Нобәдарийа сьсийа, пешийа кö рʹо һьлте, «wәхте бангдана дика», дәстпедьбу жь ниве шәве һʹәта бәрбанге сьһʹәта сьсийа. Дьбәкә әw һәма әв wәʹдә бу, гава дик банг да шәв чахе Иса һатә гьртьне (Марq. 14:72). Нобәдарийа чара «сәре сьбәһе» бу, кö дәстпедьбу жь сьһʹәта сьсийа qәрәбәрбанге һʹәта рʹо һьлте.
Рʹаст ә бәре сьһʹәтед мәрьва тʹöнә бун мина йед иройин, ле йәкә wана дькарьбун бь щурʹәки дьн wәʹдә бьдана кʹьфше.