Бир Нәкьн Ԝана, йед кӧ Мала Кал-Пирада Дьминьн
1. Чьрʹа лазьм ә кӧ мьзгинийа хере бьгьһиньнә ԝан мәрийа, йед кӧ дь мала кал-пирада дьжин?
1 Мәрьвед кал-пир рʹасти щурʹә-щурʹә чәтьнайа тен жь бо әʹмьре хԝәйә мәзьн (Ԝаиз 12:1- 7). Һьнә мәрьвед әʹмьре хԝәда мәзьн дь мала кал-пирада дьминьн. Ләма жи ԝәʹде даннасинкьрьна мал бь мал әм нькарьн һәр гав рʹасти ԝан бен. Рʹаст ә дьԛәԝьмә ԝанарʹа чәтьн дьбә рʹе һәрʹьн, у әԝана тьшта зу бир дькьн, ле чь жи һәбә мәрьвед кӧ дь мала кал-пирада дьжин, йәкә ԝе бькарьбьн дәрһәԛа Йаһоԝа һин бьн, әԝи ԛимәт кьн у һʹьз бькьн. Ле ча әм дькарьн мьзгинийа хере йа «гӧмана хԝәзьли» бьгһиньнә ԝан? (Тито 2:13).
2. Жь кʹидәре әм дькарьн әʹламәтийе дәрһәԛа ханийед кал-пира бьстиньн?
2 Чаԝа Дәстпеки: Сәва кӧ ханийед кал-пира бьвиньн, һун дькарьн бьньһерʹьн дь ԝе кʹьтебеда, кʹидәре кӧ ча һʹәжмарʹа тʹела, ӧса жи навнишана ԝи щи һәйә. Тӧ дькари ӧса жи һьлди һʹәсаб ханийед бьчʹук кʹидәре кӧ мьԛати кал-пира дьбьн. Бәрпьрсийаре мьһале дькарә әв шьхӧл сәр хԝә һьлдә у рʹебәрийе бьдә ԛӧльхкʹаред щерʹьбанди, сәва кӧ һәрʹьн мала кал-пира. Һәрге әм рʹьнд һазьр дьбьн у гӧмана хԝә Йаһоԝа тиньн, әме бькарьбьн hинкьрьна Кʹьтеба Пирозә кʹоме дәстпекьн (Мәтʹлк. 21:5; 1 Йуһʹн. 5:14, 15).
3, 4. (а) Әм гәрәке незики кʹе бьн, сәва кӧ һинкьрьна бь кʹоме бькарьбьн дь мала кал-пирада дәрбаз кьн? (б) Ча әм дькарьн бәрнама һинкьрьне һазьр кьн?
3 Һәла ча һун һинкьрьне дәрбаз кьн, ве йәкева гьредайи йә ԝәки әв ханийед чь щурʹәйи нә. Дь ханийед мәзьнда кʹидәре кӧ гәләк мәрьвед кал-пир дьминьн, у хәбатчи дьхәбьтьн, ԝе баш бә кӧ пешийе незики секретаре бьн у бежьн, кӧ дьхԝазьн тʹәви мәзьне ви хани хәбәр дьн. Ле дь ханийед бьчʹукда кʹидәре кӧ чәнд мәрьвед әʹмьре хԝәда мәзьн дьминьн, у дӧ се хәбатчи дьхәбьтьн, ԝе баш бә ԝәки ԝәʹдә бьвини кӧ перʹа-перʹа тʹәви хԝәйе ви хани хәбәр ди.
4 Һʹәму дәрәщада шьровәкә, ԝәки тӧ бь рʹәзәдьли ԝәʹде хԝә дьди, сәва кӧ һелана бьди ԝан мәрийа йед кӧ хԝәндьне у шеԝьркьрьне ль сәр һʹиме сәрһатийед Кʹьтеба Пироз һʹьз дькьн. Дькари пьрски һәла диса кәсәк дь ви ханида һәйә, кӧ ԝе бьхԝәста тʹәви ве шеԝьркьрьна Кʹьтеба Пирозә бь кʹоме, йа кӧ һʹәфтийеда ԝәкә 30 дәԛә ԝе дәрбаз бә, бьбуйа йәк. Щурʹә-щурʹә әʹдәбйәт дькарьн бенә хәбьтандьне. Мәсәлә, гәләка дьбежьн кӧ кʹьтебед ӧса ча «Сәрһатийед Кʹьтеба Пироз» у «Мамостайе Мәзьн, йе кӧ Ԝәхтәки ль сәр Әʹрде Дьжит» рʹьнд тенә стандьне. Дьбәкә тӧйе бьхԝази мәзьне ви ханирʹа жи әʹдәбйәта нишан ки. Дьшьрмиш бьн дәрһәԛа рʹоже, ԝәʹде у оде дәрбазкьрьна һинкьрьне, у әв йәк тʹәви мәзьне хани сафи кә. Паши жи дәрһәԛа ве йәке дькари дь бәрнамеда кʹьфш ки, йа кӧ ханийед кал-пирада һәнә. Шәрм нәкә у нәтьрсә бежи ԝәки тӧ Шәʹде Йаһоԝа йи. Хенщи ԝе йәке али мәзьне ви хани бькә, сәва кӧ әԝ фәʹм бькә ԝәки тӧ нәһати ԛӧльхийа рʹелигийайе дәрбаз ки, ле дьхԝази һинкьрьна ль сәр һʹиме Кʹьтеба Пироз дәрбази мәрийа ки.
5. Кʹижан ширәтед керһати дькарьн аликʹарийе бьдьн, сәва кӧ һинкьрьн бь һʹәԝаси дәрбаз бә у кʹаре жи бинә?
5 Дәрбаз кә Һинкьрьне: Әԝ йәк кӧ чаԝа һинкьрьна тә ԝе дәрбаз бә, бь ԝе йәке гьредайи йә, һәла дәрәща у һʹале ви хани чаԝа нә. Ләма жи лазьм ә сәрԝахт би. Әԝе кӧ һинкьрьне ԝе дәрбаз кә гәрәке чәнд копйед ԝе әʹдәбйәте бинә, бь кʹижани кӧ һинкьрьн ԝе дәрбаз бә. Хьлазийа һинкьрьне жи гәрәке ԝан копйа диса тʹоп кә. Дьбәкә ԝе баш бә, ԝәки копйед әʹдәбйәта бь һʹәрфед гьр бини. Чахе абзас тенә хԝәндьне, пьрс тенә данине у щаб тенә дайине, әв һʹәму тьшт гәрәке ӧса дәрбаз бә, кӧ һәр кәс хԝә рʹьһʹәт тʹәхмин кә. Әԝед кӧ һазьр ьн у хԝәндьне заньн, дькарьн хԝәха жи абзаса йан сәрһатийед Кʹьтеба Пироз бьхуньн. Ԝәʹде һинкьрьне, нәрм у һʹәвалһʹьз бә. У һинкьрьна хԝә ӧса дәрбаз кә, кӧ ԝанарʹа һʹәԝас бә. Бь изьна мәзьне ви хани, тӧ ӧса жи дькари щар-щара видеойед тʹәшкиләта мә жи ԝанарʹа нишан ки. Чьмки әв йәк жи ԝе баԝәрбуна ԝан бьшьдинә. Ӧса жи дькари дина ԝан бьди ль сәр ԝе йәке, кӧ чь дәрс жь сәрһатийед Кʹьтеба Пироз әм дькарьн сәва хԝә һьлдьн. У ԝе баш буйа кӧ һинкьрьн дәстпебуйа у хьлазбуйа бь дӧакьрьне. Һьнә ԛӧльхкʹар һәла һе кʹьламед Пʹадшатийе жи дьстьрен.
6. Чь дькарьн бькьн һәрге кәсәк дьдә кʹьфше, ԝәки әԝ тьштәкида ԛайил нинә?
6 Ле һәрге ԝәʹде һинкьрьне кәсәк ԛайил нинә жь бо тьштед кӧ әԝ хԝәндийә, йан жи бьһистийә? Чахе щаба хԝә дьди, мәрифәт у сәрԝахт бә (Колс. 4:6). Дьԛәԝьмә тӧйе рʹезәк жь Кʹьтеба Пироз нишан ки, йе кӧ пьрса ԝива гьредайи бә. Һәрге әв йәк дәст надә, һьнге дькари бьди кʹьфше кӧ әв йәк тә һьлда һʹәсаб у дәрһәԛа ве йәке паши хьлазкьрьна һинкьрьне, башԛә тʹәви ԝи хәбәр ди.
7. Чь гәрәке бьки, һәрге пьрсәкә шәхси щәм мәри һәйә, йан жи әԝ дьбежә кӧ дьхԝазә һе зедә пебьһʹәсә?
7 Дькарә ӧса жи бьԛәԝьмә кӧ кәсәк жь кал-пира пьрсәке бьдә, йан жи бежә кӧ дьхԝазә һе зедә пебьһʹәсә у һин бә. Хушкәк ԝанарʹа ӧса дьбежә: «Әв пьрсәкә баш ә. Ле жь бо ԝе йәке кӧ әв пьрса ԝәйә шәхси йә, ԝәрен әм һивийа хьлазийа хԝәндьне бьн. У паше тʹәвайи дькарьн шеԝьр бькьн». Һьнге дькарьн тʹәви мәрьвед ӧса башԛә һинкьрьна Кʹьтеба Пироз дәрбаз кьн, ле ида ԝәʹде у дәрәще дьнда.
8. Ча әм дькарьн һинкьрьна бь кʹоме һʹәсаб кьн, у ӧса жи әԝ һинкьрьна кӧ башԛә тʹәви мәри дәрбаз дьбьн?
8 Ԝе баш бә, ԝәки әԝ Шәʹде Йаһоԝа, йе кӧ Һинкьрьна Кʹьтеба Пирозә кʹоме дь ван ханийада дәрбаз дькә, ԝәки һәртʹьм дәрбаз кә. Һәр ԛӧльхкʹарәк, йе кӧ ԝе бе сәва кӧ пьштгьрийа хушке йан бьра бькә, әве һинкьрьна бь кʹоме дәрбаз кә, дькарә ԝәʹдә һʹәсаб кә. Чахе һинкьрьна тәйә бь кʹоме ида кʹьфшкьрийә у тʹьме дәрбаз дьбә, һьнге дькари һәр щар әве йәке ча сәрледанәкә дӧбарә һʹәсаб ки, у кʹотасийа мәһе жи һинкьрьнәкә Кʹьтеба Пироз. Ле чахе башԛә һинкьрьне дәстпедькьн тʹәви ԝан кал-пира, йед кӧ дькарьн һин бьн у фәʹм бькьн, һьнге дькари диса әв ча һинкьрьнәке һʹәсаб кьн.
9, 10. Чь хәйсәт лазьм ә ԝан мәрийарʹа йед кӧ дь ви шьхӧлида кʹар дькьн? Шьровәкә
9 Һинкьрьне Бәрдәԝан кә: Ԝе баш бә, ԝәки сәва һинкьрьна тʹәви кʹоме әм ԝәʹдә у рʹож кʹьфш кьн. Чаԝа мәрьве кӧ ль ԝьр дьминьн, ӧса жи хәбатчи, ԝе жь мә һивийе бьн, ԝәки әв һинкьрьн ль гора бәрнаме һәр гав ԝе дәрбаз бә. У ӧса жи ԝәки ԝәʹде хԝәда дәстпебә у хьлаз бә (Мәт. 5:37). Хенщи ԝе йәке лазьм ә кӧ әве йәке һʹәсаб ки ча щабдари, у бь тʹәрбәтийе жи бьки. Жь һьнә ԛәԝьмандьна те кʹьфше кӧ гәләк баш ә чахе дӧ ԛӧльхкʹаред щерʹьбанди һинкьрьна бь кʹоме дәрбаз дькьн у тʹәви һәв жи шьхӧлкʹарийе дькьн (Ԝаиз 4:9, 10). Ле дь ханийед мәзьнда дьбәкә һе зедә ԛӧльхкʹар лазьм бен.
10 Гәләк фәрз ә ԝәки тӧ ӧса жи һʹәвалһʹьз би, у дәрһәԛа ԝан жи пебьһʹәси (Фили. 2:4). Ԝәʹде сәрледана хԝәйә пешьн, ԝәʹдә бьвинә сәва кӧ насийа хԝә бьди һәр йәке жь ԝан, йед кӧ ԝе ль сәр һинкьрьне бьн. Хԝәрʹа кʹьфш кә у бьхәбьтә кӧ сәр һинкьрьна майин, ида навед ԝан бьзаньби у бира хԝәда хԝәй ки. Мәсәлә һьнә мәрьвед әʹмьре мәзьнда дьхәйидьн, чахе кәсәк наве ԝан һьлнадә йан жи ньзанә. Сәбьркьрьн у дьлшәԝати ԝе аликʹарийе бьдьн, сәва кӧ һәр кәс бькарьбә ль сәр хԝә тʹәхмин кә, кӧ ԝирʹа ша нә у ԝи ԛимәт дькьн.
11. Ча әԝед кӧ һинкьрьна бь кʹоме дәрбаз дькьн, нишан дькьн кӧ ԛәдьре хәбатчийа у нәфәред кал-пира дьгьрьн?
11 Хенщи ԝе йәке гәләк фәрз ә, ԝәки ԛәдьр у ԛәнщи һьндава хәбатчийа у нәфәред ван кал-пира бьдьнә кʹьфше. Һәрге тӧ дьхԝази ԝәʹдә у рʹожа дәрбазкьрьна һинкьрьне бьгӧһези, һьнге ԝе бь аԛьлани бә кӧ пешийе тʹәви мәзьне ви хани хәбәр ди. Щар-щара мәзьне ви ханирʹа гьли кә дәрһәԛа ве йәке, кӧ һинкьрьн чаԝа дәрбаз дьбә. Чахе нәфәред кал-пира ԝәʹде һинкьрьне тен, жь алийе хԝәда бьхәбьтә кӧ рʹасти ԝан бейи. Ԝанарʹа нета дәрбазкьрьна һинкьрьна Кʹьтеба Пироз шьровәкә. Ӧса жи бьдә кʹьфше, ԝәки тӧ бь рʹастийе жи сәва нәфәред мала ԝан дьшьрмиш дьби. Ԝана тʹәглиф кә кӧ әԝ жи рʹунен, у гӧһе хԝә бьдьнә һинкьрьне.
12, 13. Гьли кьн ԛәԝьмандьнед кӧ дьдьнә кʹьфше, ԝәки чь кʹар тинә ԛӧльхкьрьна дь мала кал-пирада.
12 Кʹаранин: Бәрпьрсийаред рʹеԝи у щьват әʹлам дькьн, кӧ бь рʹастийе жи ԛӧльхкьрьна ви щурʹәйи һеланкьрьне у кʹаре тинә. Щарәке ӧса ԛәԝьми, кӧ ԝәкә 20 мәрьвед әʹмьре хԝәда мәзьн ль сәр шеԝьркьрьна пешьн һатьн. У тʹәви шәш жь ԝан мәрийа дәстпекьрьн башԛә һинкьрьна Кʹьтеба Пироз дәрбаз кьн. У йәк жь ԝан мәрийа жи һатә ньхӧмандьне. Хенщи ве йәке дь ханийе дьнда жи, кʹӧлфәтәкә 85 сали дәстпекьр ль сәр щьвата бе у дәрһәԛа хԝәстьна хԝә жи гот, кӧ дьхԝазә бе ньхӧмандьне. Чахе дь ханикида дьхԝәстьн һинкьрьна Кʹьтеба Пирозә кʹомева бьдьнә сәкьнандьне, йед кӧ Шәʹдед Йаһоԝа дәрбаз дькьрьн, һьнге мәрьвед ви хани чун у мәзьне ханирʹа готьн кӧ әве йәке нәкьн! Ԝәʹдә шунда һинкьрьна Кʹьтеба Пироз диса дәстпебу у паше ве йәке ԝәкә 25 у 30 мәри дьһатьн ль сәр ве һинкьрьне.
13 Чахе әм һʹьзкьрьна хԝә дьдьнә кʹьфше һьндава мәрьвед кӧ дь мала кал-пирада ньн, әв гәләк һʹӧкӧм дькә нә кӧ тʹәне ль сәр ԝана, ле сәр йед дьнена жи. Мәсәлә сәва хәбатчийед кӧ ԝе дәре дьхәбьтьн һьнә әʹщебмайи йә, кӧ гәрәке тʹәви мәрьвед әʹмьрда рʹунен у һәла һе һинкьрьнеда жи кʹар бькьн. Чахе әм ԛәԝата хԝә дьдьнә хәбате сәва кӧ нишан кьн, ԝәки әм сәва мәрьвед әʹмьрда мәзьн дьшьрмиш дьбьн, әв йәк жи шәʹдәтикә баш ә сәва мәрьвед дор-бәр (1 Пәт. 2:12). Чахе администраторрʹа дәрһәԛа нета һинкьрьне готьн, әԝи ӧса гот: «Һун һʹәта ньһа кʹӧ бун? Кʹәнге һун дькарьн дәстпекьн?» Мәзьне ханийа дьн жи ӧса готьбу: «Әз бь дьл у щан дьбежьм кӧ һинкьрьна Кʹьтеба Пирозә кʹоме, гәрәке һʹәму ханийед ви щурʹәйида бенә дәрбазкьрьне. Шәʹдед Йаһоԝа бь һазьрбуне әве ԛӧльхийа хԝә дәрбаз дькьн, у һʹәсаб дькьн ча пʹарәке жь ԛӧльхкьрьна хԝә мәрийарʹа». Ль сәр Һаԝайийа жи ханийәк сава кал пира Шәʹдед Йаһоԝарʹа кʹахазәк дан, кʹидәре кӧ пʹайе Шәʹдед Йаһоԝа дьдан сәва ԛӧльхкьрьна ԝанә ӧса баш, у йа бь рʹәзәдьли. Дь ве кʹахазеда әԝана ӧса жи шьровәкьрьн, ԝәки ԛӧльхкʹаред кӧ бь рʹәзәдьли дьхәбьтьн, мина хьзнә пʹьрʹ бь ԛимәт ьн сәва ԝан, йед кӧ дь мала кал-пирада ньн.
14. Чьрʹа әм гәрәке бьхԝазьн бьгьһиньнә ԝан мәрийа, йед кӧ дь мала кал-пирада дьжин?
14 Йаһоԝа хԝәха жи тʹәглиф дькә мәрьвед әʹмьрда мәзьн, сәва кӧ наве ԝи һӧрмәт-рʹумәт кьн (Зәб. 148:12, 13). Әв тʹәглифкьрьн дькʹәвә ԝан мәрийа жи, йед кӧ дь мала кал-пирада дьжин. Ле дь мьһала ԝәда ханийед сәва кал-пира һәнә, кʹидәре кӧ мәрьвед әʹмьрда ԝе шабуна дәрһәԛа мьзгинийа хере пебьһʹәсийана? Бь кʹомәкдайина рʹуспийа у мәзьнед сәва мала кал-пира, әме бькарьбьн шәʹдәтийа баш бьдьн ԝан мәрийарʹа, йед кӧ дь мала кал-пирада дьминьн. Чахе әм бир накьн мәрьвед әʹмьрда мәзьн, бь ве йәке әм чʹәʹв дьдьнә Йаһоԝа (Зәб. 71:9, 18).
[Чаргошә сәр рупела 4]
Шеԝьркьрьна бь Кʹоме дь Мала Кал-Пирада
• Тʹәви мәзьне ви хани йан жи, тʹәви администратор хәбәр дә дәрһәԛа ԝе йәке, ԝәки тӧ кʹәнге бейи кӧ һинкьрьне дәрбаз ки.
• Сәва кʹоме епʹещә әʹдәбйәта бинә. Әʹдәбйәта дь чәнте ӧсада хԝәй кә, кʹидәре кӧ хьраб нәбьн, у паше һинкьрьне жи ван әʹдәбйәта тʹоп кьн.
• Һʹәвалһʹьз бә у һинкьрьне ӧса дәрбаз кә кӧ мәрийарʹа һʹәԝас бә, у ԝәки әԝана хԝә рʹьһʹәт тʹәхмин кьн. Чахе кәсәкирʹа хәбәр дьди, наве ԝан һьлдә.
• Пәй һәв абзаса бьхунә у шьровәкә.
• Пьрсед кьн бьдә хәбате. Пʹайе һʹәмуйа бьдә жь бо щабед ԝан.
• Һәрге мәри тьштәкида ԛайил набә, йан жи жь бо ве йәке дәстпедькә пьрсед дӧдьлийе дайнә, бежә кӧ дәрһәԛа ве йәке һуне паше хәбәр дьн, у сафи кьн ԝәки кʹидәре башԛә һуне шеԝьр бькьн.
• Чахе щаба пьрсед хәбатчийа у нәфәред кал-пира дьди, гәрәке һеса у рʹаст бежи. Хенщи ве йәке фәрз ә кӧ мәрифәт би.
• Жь алийе хԝәда бьхәбьтьн кӧ башԛә дәстпекьн һинкьрьне тʹәви мәрьвед кӧ дь ви ханида дьминьн, нәфәред ԝан у хәбатчийа.