Чаԝа Али Ԝан Бькьн, Кʹижанарʹа кӧ Хԝәндьн Чәтьн ә
1. Мәрьвед кӧ дьхԝазьн дәрһәԛа рʹастийе пебьһʹәсьн, рʹасти кʹижан чәтьнайе дькарьн бен?
1 Дьԛәԝьмә мәрьвед мьһала мәрʹа, кʹижанарʹа кӧ хԝәндьн чәтьн ә, хԝәш те чь кӧ әм ԝанарʹа даннасин дькьн. Ле дьбәкә жь бо ве йәке тьрс дькʹәвә сәр ԝан, чахе әм ԝанарʹа Кʹьтеба Пироз йан жи кʹьтебед дьн дьһельн. Һәрге әм мәрьвед ӧсарʹа дьһельн кʹьтеба ӧса, ча мәсәла «Чь Һин Дькә Кʹьтеба Пироз?», әв йәк ԝе кʹара мәзьн нәйинә. Гәло ча әм дькарьн алийе рʹӧһʹанида кʹомәке бьдьнә ԝан мәрийа? Мә жь 20 ԛӧльхкʹаред щьрʹьбанди пьрс кьр, йед кӧ жь щурʹә-щурʹә ԝәлата бун, һәла ча ԝана әв пьрс сафи дькьр. Ширәтед ԝан жере тенә дайине.
2. Кʹижан һʹащәт әм дькарьн бьдьнә хәбате сәва ԝан мәрийа, кʹижанарʹа кӧ хԝәндьн чәтьн ә?
2 Һәрге мәрьвәки ӧса рʹасти тә те, йе кӧ һәвәки хԝәндьне занә, йан жи фәрәсәтед хԝәндьне щәм ԝи тʹӧнә, һьнге тӧ дькари дәстпеки бь ван брошура: «Гӧһ Бьдә Хԝәде» йан жи «Гӧһ Бьдә Хԝәде у Бьжи Һʹәта-Һʹәтайе». Пешәнгәк жь Дәԝләтед Йәкбуйи, чахе мәрьвед ӧсарʹа даннасин дькә ван брошура дьдә хәбате. Паше жь мәри пьрс дькә, һәла кʹижан брошура ԝирʹа даһа һеса йә. Филиала жь Кенйа әʹламәти дькә, кӧ әв һʹащәт бь рʹастийе жи дь мьһала ԝанда гәләк керһати нә. Чьмки щьмәʹта Африкайе бь әʹдәте хԝә, тʹәне һьнге дькарьн һин бьн чахе ԝанарʹа сәрһатийа гьли дькьн. У шеԝьркьрьн бь пьрс у щаба, ԝанарʹа дькарә әʹщеб бе кʹьфше. Мәсәлә сәва мәрьве хԝәнди дькарә тьштәки бь нормал бә, кӧ бь пьрс у щаба шеԝьркьрьне тʹәви ԝи дәрбаз кьн, у әԝ һеса дькарә әве ԛәбул кә. Ле әв метод дькарә чәтьн бә сәва мәрьве нәхԝанди, чьмки жь бо ве йәке әԝ хԝә рʹьһʹәт ԝе тʹәхмин нәкә. Һәрге мәри дькарә һәвәки жи бьхунә, һьнге гәләк ԛӧльхкʹар дәстпедькьн бь брошура «Мьзгинийа Хԝәде сәва Мәрийа» йан «Тӧ Дькари Бьби Досте Хԝәде», ӧса жи бь ве кʹьтебе «Сәрһатийед Кʹьтеба Пироз».
3. Мәрьвед кӧ хԝәндьне ньзаньн, ча дькарьн жь һинкьрьна мә кʹаре бьвиньн?
3 Пʹайидайин: Әԝед кӧ хԝәндьне һин нәбунә, жь бо ве йәке дькарьн шәрм бькьн, у гәләка жь ԝан жи дьшьрмиш дьбьн кӧ кери тьштәки найен. Тʹьме али ԝан бькьн кӧ әԝана тʹәхмин кьн, ԝәки мәрьвнә һежайинә. Һеланкьрьна ӧса әв гава пешьн ә, кӧ рʹастийе ԝана һин кьн. Һʹәчʹи зәʹф жь мәрийа йед кӧ хԝәндьне ньзаньн, мәрьвнә сәрԝахт ьн у дькарьн һин бьн. Ԛәдьре ԝан мәрийа бьгьрьн у һьндава ԝанда мәрифәт бьн (1 Пәт. 3:15). Һәрге әԝана бьвиньн ԝәки ԛәԝата ԝан бадиһәва начә, һьнге әԝана ԝе һелан бьн һинкьрьне бәрдәԝан кьн, у рʹӧһʹанида жи пешда һәрʹьн. Ләма жи бь мәрдани пʹайе ԝан бьдә.
4. Ча әм дькарьн һелан кьн ԝан мәрийа йед кӧ һәвәки хԝәндьне заньн, ԝәки әԝана бькарьбьн бона һинкьрьне хԝә һазьр кьн?
4 Һәла һе ԝи чахи жи, гава мәри һәвәки хԝәндьне занә жи, йәкә әԝи һелан кьн кӧ сәва һинкьрьне хԝә һазьр кә. Һьнә ԛӧльхкʹаред дь Африкайе Башуреда, һелан дькьн ԝан мәрийа тʹәви кʹижана кӧ һинкьрьне дәрбаз дькьн, ԝәки бежьнә кәсәки кӧ хԝәндьне занә, мәсәлә нәфәред мала хԝә йан жи һәвалед хԝәрʹа, ԝәки али ԝан бькьн. Ԛӧльхкʹарәки дь Британйайеда метода ӧса дьдә хәбате, сәва кӧ мәрийа һелан кә бона һинкьрьне хԝә һазьр кьн: мәсәлә әԝ кʹьтеба хԝә дьдә мәри, сәва кӧ сәр һьнәк абзаса әԝ бькарьбә дина хԝә бьдә ве кʹьтебе у бьвинә кӧ чьԛаси һеса йә щаба пьрса бьвиньн, чахе бь ԛәләме әв щаб жере хәз дькьн. Бьраки жь Һиндьстане жи ӧса дькә: мәрьвед ӧсарʹа әԝ дьбежә кӧ дина хԝә бьдьнә шькьла, йед кӧ ԝе сәре майинда һәбьн, сәва кӧ пешда әԝ бькарьбьн ль сәр ԝан дьшьрмиш бьн у һазьр бьн.
5. Ча әм дькарьн нишан кьн кӧ сәбьр дькьн, чахе тʹәви мәрийа һинкьрьне дәрбаз дькьн?
5 Сәбьр кә: Фьрԛи тʹӧнә тӧ чь әʹдәбйәте дьди хәбате, чь жи һәбә дина хԝә бьдә фькьред фәрз. У али ԝан мәрийа бькә кӧ әԝана бькарьбьн ԝан фькьред фәрз рʹьнд фәʹм бькьн. Дәстпебунеда ԝе баш бә, ԝәки шеԝьркьрьна тә 10, 15 дәԛә бькʹьшинә. Пера-пера зәʹф информасийа нәдә мәрийа. Ле һе баш бә кӧ һәр щар чәнд абзаса дәрбаз бьн. Сәбьр кә, чахе мәри һеди-һеди дьхунә. Һәрге рʹазибуна ԝи һьндава Йаһоԝа мәзьн дьбә, дьбәкә әԝе һе һелан бә, ԝәки фәрәсәтед хԝәйә хԝәндьне баш кә. Али ԝан бькә, кӧ әԝана бькарьбьн әве йәке бькьн. Хенщи ве йәке ԝе баш бә ԝәки чахе дәстпедьки тʹәви ԝан һинкьрьне дәрбаз ки, пера-пера ль сәр щьвата ԝана тʹәглиф ки.
6. Ча әм дькарьн али мәрийа бькьн кӧ хԝәндьне һин бьн?
6 Чахе мәрьв хԝәндьне һин дьбә, әԝе зу рʹӧһʹанида пешда һәрʹә (Зәб. 1:1-3). Мәсәлә һьнә ԛӧльхкʹар паши һинкьрьне, чәнд дәԛә вәдьԛәтиньн сәва кӧ мәрийа һин кьн хԝәндьне. Һәрге мәри дьлтәнг дьбә, тӧ дькари әԝи гӧман ки у нишан ки һьнә тьшта кӧ чаԝа әԝ дькарә һин бә кӧ бькә. Әԝ гӧман кьн, ԝәки Йаһоԝа ԝе ԛәԝата ԝи кʹәрәм бькә. Ӧса жи әԝи һелан кә кӧ сәва аликʹарийе дӧа бькә (Мәтʹлк. 16:3; 1 Йуһʹн. 5:14, 15). Һьнә ԛӧльхкʹаред ль Британийе мәрийа һелан дькьн, ԝәки сәрида һьнә нет дайньн пешийа хԝә. Мәсәлә дәстпекьн алифбе һин бьн, паше жи дькарьн бьвиньн у бьхуньн рʹезед бьжарти жь Кʹьтеба Пироз. Ӧса жи әԝана дькарьн жь әʹдәбйәтед һесакьри бьхуньн. Сәва кӧ хԝәндьне мәрийа һин кьн, әв те һʹәсабе ԝана һелан бькьн кӧ бьхԝазьн әве йәке бькьн.
7. Чьрʹа әм гәрәке дәрһәԛа рʹастийе тʹәви ԝан мәрийа хәбәр дьн кʹижанарʹа кӧ хԝәндьн чәтьн ә, у хԝә жь ԝана дур нәгьрьн?
7 Йаһоԝа һʹәсаб накә, ԝәки мәрьвед нәхԝәнди, йан жи әԝед кӧ һәвәки хԝәндьне заньн, кери тьштәки найен (Иб. 34:19). Чьмки Йаһова дьньһерʹә дьле мәрийа (1 Дир. 28:9). Ләма жи хԝә дур нәгьрә жь ԝан мәрийа, кʹижанарʹа кӧ хԝәндьн чәтьн ә. Дәрһәԛа рʹастийе тʹәви ԝан хәбәр дә. Щәм тә гәләк һʹащәтед баш һәнә, бь сайа чь жи дькари тʹәви ԝан һинкьрьне дәстпеки. Ԝәʹдә шунда тӧйе ида бькарьби һинкьрьне бь ве кʹьтебе дәрбаз ки «Чь Һин Дькә Кʹьтеба Пироз?». У бь ве йәке жи али ԝан бьки, ԝәки һе рʹьнд насийа хԝә бьдьнә Кʹьтеба Пироз.
[Чаргошә сәр рупела 6]
Әԝед кӧ хԝәндьне һин нәбунә, жь бо ве йәке дькарьн шәрм бькьн, у дьшьрмиш дьбьн кӧ кери тьштәки найен. Тʹьме али ԝан бькьн кӧ әԝана тʹәхмин кьн, ԝәки мәрьвнә һежайинә. Һеланкьрьна ӧса әв гава пешьн ә, кӧ рʹастийе ԝана һин кьн
[Чаргошә сәр рупела 6 ]
Һәрге мәри хԝәндьне ньзанә, дькари ван тьшта һьлди һʹәсаб:
• Пешийе бьдә хәбате брошура «Гӧһ Бьдә Хԝәде» йан «Гӧһ Бьдә Хԝәде у Бьжи Һʹәта-Һʹәтайе», йан жи әʹдәбйәтед дьн кӧ лайиԛ ьн.
• Ԛәдьре ԝан бьгьрә у бь мәрдани пʹайе ԝан бьдә.
• Шеԝьркьрьна ԝә гәрәке кьн бә. У пера-пера гәләк информасийа нәдә мәрийа.
• Али ԝан бькә кӧ фәрәсәтед хԝәйә хԝәндьне баш кьн.
Чахе әԝ ида рʹазибуна хԝә сәва рʹастийе ԝе бьдә кʹьфше, у бьхԝазә һе кʹур пебьһʹәсә, һьнге тӧ дькари дәрбаз би ль сәр кʹьтеба «Чь Һин Дькә Кʹьтеба Пироз?» у бь ве һʹащәте һинкьрьне дәрбаз ки.