Бьра Нета Тә әԝ бә, кӧ Мәрийа Бьки Шагьрт
1. Чь лазьм ә, сәва кӧ мәрьв хьлаз бьн?
1 Һʹәсаба хьзмәтийейә һәрсали йа сала 2014, да кʹьфше кӧ щьмәʹта Хԝәде дь даннасинкьрьнеда һазьр бун у бь хирәт мьзгинийа Пʹадшатийе бәла дькьрьн (Мәт. 24:14). Бь аликʹарийа даннасинкьрьна мал бь мал, кампанийа мәхсус сәва бәлакьрьна бәлавока, тʹәглифкьрьна, у ӧса жи бь аликʹарийа даннасинкьрьна ль щийед кӧ гәләк мәрьв тʹоп дьбьн, мә карьбу мьзгини бьгьһиньнә гәләк мәрийа. Чь жи һәбә, һәрге кәсәк дьхԝазә хьлаз бә, әм гәрәке тʹәви ԝана һинкьрьна Кʹьтеба Пироз дәрбаз кьн у али ԝан бькьн бьбьнә шагьртед Иса (1 Тимтʹ. 2:4).
2. Кʹижан пьрс ԝе али мә бькьн, тʹьме һазьр бьн һинкьрьна Кʹьтеба Пироз дәстпекьн?
2 Тʹьме Һазьр бә Һинкьрьна Кʹьтеба Пироз Дәстпеки: Чахе мәрьв һәʹԝаса хԝә дьдә кʹьфше, һьнге тӧ дьхәбьти кӧ навнишана ԝи, йан һәжмара тʹела ԝи һьлди, сәва кӧ бе әгләкьрьн бейи, у тʹәви ԝи һинкьрьна Кʹьтеба Пироз дәстпеки? Щара пашьн тә кʹәнге ль сәр сәрледана хԝәйә пешьн, нишани мәрийа кьр, кӧ чаԝа һинкьрьна Кʹьтеба Пироз дәрбаз дьбә? Һәрге тӧ кәсәкирʹа һәр мәһ журналед тʹәзә дьһели, һьнге щара пашьн тә кʹәнге ԝи мәрьвирʹа гот, кӧ тʹәви ԝи һинкьрьна Кʹьтеба Пироз дәрбаз ки? Тә һʹәвал-хәбаткʹаред хԝәрʹа, һәвал-һогьрарʹа, щинарарʹа, пьсмамарʹа у насийед хԝәйи дьнрʹа нишан кьр, видеойа «Чьрʹа Һин бьн Кʹьтеба Пироз?» йан жи «Ча Дәрбаз Дьбә Һинбуна Кʹьтеба Пироз?» Чахе тӧ бәр стенде сәкьнийи, у кәсәк әʹдәбйәте сәва һинбуне һьлдьдә, һьнге тӧ дьбежи ԝана кӧ бь сайа ԝе әʹдәбйәте, әԝана дькарьн ӧса жи бьстиньн һинбуна Кʹьтеба Пироз бепʹәрә?
3. Чь лазьм ә, сәва кӧ әм бь сәрфьрази, рʹастийе мәрийа һин кьн?
3 Аликʹари жь Йаһоԝа у Иса: Тʹәмийа хԝәда, Иса пешийе гот «һәрʹьн» у паше жи зедә кьр, кӧ мәрийа «бькьн шагьрт». Бь ве йәке әԝи да кʹьфше, кӧ әм гәрәке ԛәԝате бьдьнә хәбате у ӧса жи һазьр бьн. Ләма жи Иса әм тʹәне нәһиштьн, ле әԝи соз да, кӧ ԝе тʹәви мә бә (Мәт. 28:19, 20). Хенщи ԝе йәке, Йаһоԝа рʹӧһʹе хԝәйи пироз да мә, ӧса жи һьнә һащәт у һинкьрьн, чь кӧ мәрʹа гәләк лазьм ьн, сәва кӧ әм бькарьбьн рʹастийе мәрийа һин кьн (Зәкәр. 4:6; 2 Корн. 4:7). Әм гәрәке дӧа бькьн Йаһоԝарʹа, кӧ хԝәстьна мә зедә кә у кӧ әм бькарьбьн дь ве шьхӧла фәрзда, кʹар бькьн (Фили. 2:13).
4. Чьма нета мә гәрәке әԝ бә кӧ мәрийа бькьн шагьрт?
4 Даннасинкьрьна мьзгинийа хере, шабунәкә мәзьн мәрʹа тинә. Ле хԝәстьна мә һьнге һе зедә дьбә, чахе әм кʹәсәки рʹастийе һин дькьн у али ԝи дькьн кӧ тʹәви мә бьсәкьнә ль сәр «рʹийа кӧ дьбә бәрбь жийине» (Мәт. 7:14; 1 Тʹеслн. 2:19, 20). Ле һе фәрз әԝ ә, кӧ чахе әм дьхәбьтьн сәва кӧ мәрьва бькьн шагьрт, бь ве йәке әм дьле Йаһоԝа ша дькьн, йе кӧ «нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәт. 3:9).