Чаԝа Бьгьһиньнә Дьле Ԝан Мәрьва, Кʹижана кӧ Һин Дькьн
1. Һинкьрьна Иса чь щурʹәйи ль сәр дьле гӧһдаред ԝи һʹӧкӧм дькьр?
1 Хәбәрдана Иса Мәсиһ дьгьһиштә дьле гӧһдаред ԝи. Щарәке чахе Иса зәʹлал ԝанарʹа Ньвисара шьровәкьр, әв йәк дьле ԝан гьрт (Луԛа 24:32). Рʹаст ә гӧһдарийа мә гәрәке жь дьл бә, ле чаԝа әм дькарьн бьгьһиньнә дьле ԝан мәрийа кʹижана кӧ һин дькьн, сәва кӧ әԝана һелан бьн дь жийина хԝәда һьнә гӧһастьна бькьн? (Рʹом. 6:17).
2. Сәрԝахти у тактики чаԝа али мә дькьн бьгьһиньнә дьле мәрийа?
2 Сәрԝахти у Тактики Бьдә Хәбате: Сәва гәләка кӧ бежи чь йә рʹаст у нәрʹаст, бәс нинә кӧ әԝана һелан бьн тьштәки бькьн. Һәрге әм бь гәләк рʹезед Кʹьтеба Пироз религийа ԝан сущдар кьн, бь ԝе йәке әме ԝана жь рʹастийе дур хьн. Ле сәва кӧ мәрийа һелан кьн, әм гәрәке сәрԝахт бьн кӧ бькарьбьн тедәрхьн ԝәки чьма әԝ ӧса баԝәр дькә у дьжи. Пьрсед мәйә тактики у рʹьнд бьжарти, ԝе мәрийа һелан кьн кӧ фькьред дьле хԝә мәрʹа әʹйан кьн (Мәтʹлк. 20:5). Тʹәне ԝи чахи әм дькарьн бьзаньбьн кӧ чь әʹламәти жь Хәбәра Хԝәде бьжберьн, сәва кӧ бьгьһиньнә дьле ԝан. Хенщи ԝе йәке әм гәрәке нишан кьн кӧ сәва ԝан хәм дькьн, у һьндава ԝанда сәбьр бьн (Мәтʹлк. 25:15). Бир нәкьн кӧ һәр мәрьв мина һәв ниньн у ләма жи пешдачуйина ԝанә рʹӧһʹани жи, ԝе нә мина һәв бә. Бьһелә кӧ рʹӧһʹе Йаһоԝайи пироз һӧкӧм кә ль сәр фькьр у дьле ԝан мәрийа (Марԛ. 4:26-29).
3. Чаԝа әм дькарьн али мәрийа бькьн хәйсәтед баш нав хԝәда мәзьн кьн?
3 Али Ԝан Бькә Хәйсәтед Баш Нав Хԝәда Мәзьн кьн: Сәрһатийед Кʹьтеба Пироз йед кӧ ԛәнщи у һʹьзкьрьна Йаһоԝа әʹйан дькьн, дькарьн али ԝан мәрийа бькьн хәйсәтед баш нав хԝәда мәзьн кьн. Әм дькарьн рʹезед ӧса бьдьнә хәбате ча, Зәбур 139:1-4 йан Луԛа 12:6, 7, сәва нишан кьн кӧ чьԛас Хԝәде бона мә хәм дькә. Чахе мәрьв рʹазибуна хԝә һьндава Йаһоԝада дьдә кʹьфше, һьнге һʹьзкьрьн у амьнийа ԝи жи һьндава Йаһоԝа мәзьн дьбә (Рʹом. 5:6-8; 1 Йуһʹн. 4:19). Хенщи ԝе йәке, чахе әԝана педьһʹәсьн кӧ шьхӧлед ԝан дькарьн дьле Йаһоԝа бьешиньн, ԝи чахи әԝана дьхәбьтьн кӧ дьле ԝи ша кьн у пәсна бьдьнә ԝи (Зәб. 78:40, 41; Мәтʹлк. 23:15).
4. Чахе әм мәрийа һин дькьн, чаԝа әм дькарьн һьндава азайа ԝанә бьжартьне, ԛәдьр бьдьнә кʹьфше?
4 Йаһоԝа зоре мәрийа накә кӧ гӧрʹа тʹәмийед ԝи бькьн. Ле дәԝсе әԝ ӧса дькә кӧ мәрьв бьвинә биланийа ширәтед ԝи (Иша. 48:17, 18). Чахе әм ӧса мәрийа һин дькьн сәва кӧ бьгьһиньнә дьле ԝан у ԝана һелан кьн хԝәхә тʹәмийа бьԛәдиньн, бь ԝе йәке әм чʹәʹв дьдьнә Йаһоԝа. Чахе мәрьв фәʹм дькә кӧ әԝ гәрәке һьнә гӧһастьна дь жийина хԝәда бькә, бь ԝе йәке әԝ ахрикә баш ԛәзанщ дькә (Рʹом. 12:2). Һьм жи әԝ һе незики Йаһоԝа дьбә, «йе кӧ дьлан пʹак дькә» (Мәтʹлк. 17:3).