Пьрсед Хԝәндәвана

Гәло ль гора 2 Тʹесалоники 3:14, кʹе гәрәке щьватеда кәсәки «рʹачʹәʹв кьн», рʹуспи йан хушк-бьра?

Паԝлосе шанди хушк-бьред ль бажаре Тʹесалоникерʹа ӧса ньвиси: «Һәгәр йәк гӧһдарийа готьнед мәйә ве нәʹмеда нәкә, ԝи рʹачʹәʹв кьн у һәвалтийе ԝирʹа нәкьн, кӧ шәрм бькә» (2 Тʹесалоники 3:14). Бәре, мә дьгот кӧ әв рʹебәри бона рʹуспийа йә. Мә дьгот кӧ һәрге кәсәкирʹа диса у диса ширәт бе дайине, ле әԝ принсипед Кʹьтеба Пироз диса жи пьшт гӧһе хԝәва бавежә, рʹуспи дькарьн готарәке бона ширәткьрьна щьвате бьхуньн. Паши ве йәке, хушк-бьра гәрәке тʹәви ԝи кәси һәвалти нәкьрана.

Ле мә фәʹм кьр, кӧ гәрәке әм ньһерʹандьна хԝә дәрһәԛа ве рʹезе бьгӧһезьн. Әшкәрә йә кӧ ширәта Паԝлосе шанди дәрһәԛа ве йәке бу, кӧ һьнә дәрәщада хушк-бьра гәрәке чь сафи кьн. Ләма жи нә лазьм ә, кӧ рʹуспи готарәке бьхуньн. Гәло мәʹнийа ве гӧһастьне чь йә? Дина хԝә бьдә контекста ве ширәте.

Жь гьлийед Паԝлос те фәʹмкьрьне, кӧ ԝе щьватеда һьнәка «бепʹәргал» дьжитьн. Ԝана гӧһ нәдьда ширәтед кӧ жь бина бәр Хԝәде бун. Бәре, гава Паԝлос чубу ԝе щьвате, әԝи хушк-бьрарʹа ӧса готьбу: «Кʹи нахԝазә бьхәбьтә, бьра нәхԝә жи». Йәкә, һьнә кәса нәдьхԝәст бьхәбьтьн ԝәки әʹбура хԝә бькьн, ле дькарьбун әԝ йәк бькьрана. Сәрда жи, әԝана «тʹәви шьхӧле хәлԛе» дьбун. Гәло ԝи чахи хушк-бьра гәрәке һьндава кәсед ӧса ча буна? (2 Тʹесалоники 3:6, 10-12)

Паԝлосе шанди ӧса гот: «Ԝи рʹачʹәʹв кьн». Әв хәбәр сәр зьмане Йунани те һʹәсабе кӧ гәрәке мәрьв һьндава кәсәки гәләк фәсал бә. Паԝлос әв рʹебәри да тʹәмамийа щьвате, нә тʹәне рʹуспийа (2 Тʹесалоники 1:1; 3:6). Демәк, гава хушк йан бьраки дьдит кӧ кәсәк гӧһ надә ширәтәкә жь бина бәр Хԝәде, әԝи хԝәха дькарьбу сафи кьра, ԝәки ‹һәвалтийе ԝирʹа нәкә›.

Гәло әв йәк дьһатә һʹәсабе кӧ һьндава ԝида гәрәке ӧса буна, чаԝа һьндава кәсе кӧ ида Шәʹде Йаһоԝа нинә? На, чьмки Паԝлос ӧса жи гот: «Мина бьра [ԝи] ширәт кьн». Хушк-бьра диса жи щьватеда у хьзмәтийеда тʹәви ԝи һәвкʹари дькьрьн, ле ԝәʹде һесабуне йан ԝәʹдәдәрбазкьрьне тʹәви ԝи нәдьбун. Гәло чьрʹа? Паԝлос гот: «Кӧ шәрм бькә». Нета рʹачʹәʹвкьрьне, демәк һәләԛәтийа фәсал һьндава ԝи, әԝ бу, ԝәки әԝ кәсе «бепʹәргал», кьред хԝә шәрм бькә у хԝә рʹаст кә (2 Тʹесалоники 3:14, 15).

Гәло әм чаԝа дькарьн әве ширәте иро бьдьнә хәбате? Йа пешьн, әм гәрәке рʹьнд бьзаньбьн кӧ рʹабун-рʹуньштьна кәсәки бь рʹасти жи «бепʹәргал» ә йан на. Паԝлос ве рʹезеда дәрһәԛа ԝан мәрьва нәдьгот, сафикьрьнед кʹижана жь йа мә щӧдә дьбьн, мәсәлә йед ӧса кӧ исафева, йан ньһерʹандьна шәхсива гьредайи нә. Ӧса жи, әԝи дәрһәԛа ԝан кәса нәдьгот, йед кӧ дьле мә ешандьнә. Дәԝсе Паԝлос дәрһәԛа ԝан дьгот, йед кӧ һʹәмде хԝә ширәта жь Кʹьтеба Пироз пьшт гӧһе хԝәва давежьн.

Иро һәрге әм бьвиньн кӧ хушк йан бьрак ширәтед жь Кʹьтеба Пироз пьшт гӧһе хԝәва давежә,a әме хԝәха сафи кьн кӧ перʹа һәвалтийе нәкьн. Жь бәр кӧ әв йәк сафикьрьна шәхси йә, әм гәрәке жь мала хԝә дәр, дәрһәԛа ве йәке хәбәр нәдьн. У әме бәрдәԝам кьн сәр щьвата у хьзмәтийеда тʹәви ԝи кәси һәвкʹарийе бькьн. У гава әԝ ньһерʹандьн у кьред хԝә рʹаст кә, әм ида дькарьн диса тʹәви ԝи һәвалтийе бькьн.