Чьрʹа Шәʹдед Йаһоԝа Тʹәви Мәрьва Накʹәвьнә Дәʹԝе?
Чахе Шәʹдед Йаһоԝа щаба һәр нәһәԛийа у ԛәрфа надьн йед кӧ һьмбәри ԝан пешда тиньн, бь ве йәке әԝан ширәта Кʹьтеба Пироз тиньн сери. Мәсәлә, Кʹьтеба Пирозда те готьне: «Әԝе кӧ пекʹәни ширәт дькә, әԝ беһӧрмәтийе сәр хԝәда тинә» (Мәтʹәлок 9:7, 8; 26:4). Дәԝса кӧ бадиһәԝа бәрхԝә кʹәвьн у бькʹәвьнә шәрʹ-дәʹԝа, бона нәһәԛийед кӧ ль һьмбәри мә дәрдьхьн, әм дина хԝә дьдьнә сәр ве йәке кӧ дьле Хԝәде ша бькьн (Зәбур 119:69).
Һәмьки «ԝәхта һьшбуне һәйә у ԝәхта готьне һәйә» (Ԝаиз 3:7). Мәрʹа һʹәԝас ә тʹәви мәрьвед дьлсах хәбәр дьн, йед кӧ рʹастийе дьгәрʹьн, у әм тʹәви мәрьва накʹәвьнә дәʹԝе. Бь ве йәке әм чʹәʹв дьдьнә Иса у гӧрʹа һинкьрьнед ԝи дькьн, у ӧса жи чʹәʹв дьдьнә Мәсиһийед ԛьрʹна йәке.
Иса щаба тʹӧ кәси нәда чахе ль бәр Пилато нәһәԛи ль ԝи кьрьн (Мәтта 27:11-14; 1 Пәтрус 2:21-23). Әԝи һьнге жи щаба ԝан нәда гава ԝи нәһәԛ дькьрьн кӧ әԝ пәй хԝарьн у вәхԝарьне кʹәти йә. Иса пе принсипа «сәрԝахти бь әʹмәлед хԝә кʹьфш дьбә» дьжит, у бь ве йәке кьред ԝи пеш ԝива хәбәр дьдан (Мәтта 11:19). Ле чахе лазьм бу, әԝи бь мерхаси щаба ԝан дьда, йед кӧ бӧхдан давитьнә ԝи (Мәтта 15:1-3; Марԛос 3:22-30).
Иса шагьртед хԝә һин дькьр, ԝәки рʹуйе нәһәԛийед кӧ ль ԝан тенә кьрьне, дьлтәнг нәбьн. Әԝи гот: «Хԝәзи ль ԝә, гава бона наве мьн ԝә беһӧрмәт кьн, бьзериньн у һәр щурʹә бӧхдан ль ԝә бькьн» (Мәтта 5:11, 12). Щарна әв нәһәԛи мәщал вәдькьрьн, кӧ шагьрт шәʹдәтийе бьдьн. Иса соз да ԝан кӧ дәрәщед ӧсада әԝе бь ви щурʹәйи али ԝан бькә: «Әзе зар-зьман у сәрԝахтийе бьдьмә ԝә, кӧ дьжмьнед ԝәйе нькарьбьн ль бәр ԝә хәбәр дьн йан бьсәкьньн» (Луԛа 21:12-15).
Паԝлосе Шанди Мәсиһийа ширәт дькьр ԝәки тʹәви мьԛабьла нәкʹәвнә шәрʹ-дәʹԝа, чьмки «әԝ бекер у бекʹар ьн» (Тито 3:9; Рʹомайи 16:17, 18).
Пәтрусе Шанди Мәсиһийа һелан дькьр кӧ һәр дәрәщада пьштгьрийа баԝәрийа хԝә бькьн (1 Пәтрус 3:15). Хенщи ве йәке әԝ ԛайил бу, кӧ дьһа баш ә кьред мәрьв пеш ԝива хәбәр дьн, нә кӧ гьлийед мәрьв. Пәтрус ньвиси: «Әв ә ԛьрара Хԝәде, кӧ һун бь ԛәнщикьрьне дәнге мәрьвед беһʹьшә нәзан бьдьнә бьрʹине» (1 Пәтрус 2:12-15).