Һʹьзкьрьне Бьдә Кʹьфше

Проблем

Һеса нинә дәрберʹа һәстед нәфрʹәткьрьне жь дьле хԝә дәрхи. Чаԝа кӧ ԝәʹдә у ԛәԝат лазьм ә сәва кӧ нәхԝәшийе ԛәнщ ки, ӧса жи ԝәʹдә у ԛәԝат лазьм ә, ԝәки нәфрʹәтийе жь дьле хԝә дәрхи. Тӧ чь дькари бьки, сәва кӧ нәфрʹәтийе жь дьле хԝә дәрхи?

Принсипа Кʹьтеба Пироз

Шькьл: 1. Мерәки жь Асйайе дәри вәкьри дьгьрә, ԝәки йе чʹәрмәрʹәш һеса дәрбаз бә. 2. Әв мәрьве чʹәрмәрʹәш һәвалхәбатчийед хԝәрʹа кʹаһве дьдә, ӧса жи кʹӧлфәта Һьндурʹа.

«Һʹьзкьрьне ль хԝә кьн, йа кӧ ван һʹәмуйа бь йәктийа тʹам һәвва гьредьдә» (КОЛОСИ 3:14).

Әв гьли чь тенә һʹәсабе? Чахе әм мәрьварʹа ԛәнщийе дькьн, әв йәк әʹдьлайе тинә. Чьԛас һʹьзкьрьне зедә дьки, һаԛас нәфрʹәти кем дьбә. Әв һʹьзкьрьн ԝе али тә бькә һәстед нәрʹаст һьндава мәрьвада жь дьле хԝә дәрхи.

Чь Дькари Бьки

Бьфькьрә тӧ чаԝа дькари һʹьзкьрьне бьди кʹьфше һьндава ԝан мәрьвада, йед кӧ тә хԝәш найен. Әʹсәйи нинә ве йәке бь кьред мәзьн бьки. Бьхәбьтә кӧ һьнә жь ван ширәта бьди хәбате:

Һәр кьред тәйи бьчʹук жи кӧ һʹьзкьрьне дьдьнә кʹьфше, ԝе тә жь нәфрʹәтийе дур хьн

Мәʹрифәт у бь ԛәдьр бә тʹәви мәрьвед хәриб. Мәсәлә, чахе әԝана дәртен йан дькʹәвьнә һьндӧрʹ, дәри пешийа ԝан вәкә, йан жи транспортеда щи бьдә ԝан.
Тʹәви ԝан бькʹәвә хәбәрдана кьн, һәрге жи әԝана сәр зьмане тә рʹьнд хәбәр надьн.
Бь сәбьр бә гава фәʹм наки чьма әԝана хԝә тʹәбийәти надьнә кʹьфше.
Дьлшәԝат бә, гава әԝана дәрһәԛа проблемед хԝә гьли дькьн.

Мәсәлед Модерн: Назаре (Гинәа-Биссаӧ)

«Бәре мьн фьрԛи дькьрә ортʹа мәрьвед хәриб. Мьн бьһистьбу, ԝәки гәләка жь ԝан диԝан дьхапандьн кӧ йан чь һесир ьн, сәва кӧ пʹәра у кʹомәке бьстиньн, ле бь рʹасти әԝ ԛачах бун. Жь бо ԝе йәке мьнрʹа чәтьн бу ԝана ԛәбул кьм. Ле диса жи әз нәдьфькьрим, кӧ әз фьрԛийе дькьмә ортʹа мәрьва, чьмки һʹәчʹи зәʹф жь мәрьвед дәр-дор ӧса сәр ԝан дьньһерʹин.

«Ԝәʹдә шунда мьн фәʹм кьр, ԝәки әԝ һәсте мьн һьндава ԝанда нәрʹаст ә. Биланийа Кʹьтеба Пироз али мьн кьр, кӧ һʹьзкьрьне нав хԝәда пешда биньм. Ньһа әз хԝә жь ԝана дур нагьрьм. Дәԝсе әз ԝана сьлав дькьм у тʹәви ԝан дькʹәвьмә хәбәрдане. Әз дьхәбьтьм кӧ хәйсәт-һʹӧнӧред ԝани баш бьвиньм. Ньһа ньһерʹандьна мьн һьндава ԝанда баш ә у мьн хԝәш те тʹәви ԝан шьхӧлкʹарийе бькьм».