Техноложи Чь Щурʹәйи Дькарә Һʹӧкӧм бә Сәр Фькьред Тә?

Мәрьв мәкʹтәбеда, сәр хәбате у щийед дьн, тʹьме тьшта һин дьбьн у техноложи ве йәкеда али ԝан дькә. Иро дьһа һеса йә щурʹә-щурʹә информасийа пебьһʹәсьн нә кӧ бәре, у бона ве йәке нәжи лазьм ә жь мале дәрен.

Ле гәләк мәрьвед кӧ тʹьме техноложийе дьдьнә хәбате . . .

нькарьн ча лазьм ә дина хԝә бьдьнә хԝәндьне.
нькарьн ча лазьм ә дина хԝә бьдьнә сәр шьхӧләки.
гава тʹәне дьминьн дәрберʹа һʹәԝаса ԝан дькʹәвә.

ТӦ ГӘРӘКЕ ЧЬ БЬЗАНЬБИ

Кʹәчʹькәк гәләк тьшта щарәкерʹа дькә. Телефонеда смса ледькә, пе видеоконференсийайе тʹәви һәваләкә хԝә хәбәр дьдә, ӧса жи пе компӧтәре у кʹьтебе дәрсед хԝә дькә.

ХԜӘНДЬН

Һьнә мәрьв текстед сәр малпәре дәԝса кӧ бьхуньн, бьн чʹәʹварʹа дәрбаз дькьн.

Чахе тӧ дьхԝази щаба пьрсәкә хԝә зу пебьһʹәси, һьнге хԝәндьна сәрʹа-бәрʹа нә хьраб ә. Ле һәгәр тӧ дьхԝази тьштәки кʹур леколин бьки, хԝәндьна ӧса ԝе али тә нәкә.

БЬФЬКЬРӘ: Тәрʹа һеса йә текстед мәзьн бьхуни? Ча әв йәк дькарә фәрәсәте тәйи һинбуне дьһа баш кә? (МӘТʹӘЛОК 18:15)

ДИНА ТӘ СӘР ЧЬ ЙӘ

Һьнә мәрьв пе техноложийе чәнд тьшта һәврʹа дькьн. Мәсәлә, һьм һин дьбьн һьм жи һәваларʹа смса дьшиньн. Ле чахе дина мәрьв сәр дӧ тьшта йә, әв ԛәт йәке жи нькарә пʹаки бькә.

Рʹаст ә, сәва кӧ дина хԝә бьди тʹәне сәр тьштәки, хԝәгьртьн лазьм ә, ле әв йәк һежа йә. Кәчʹькәкә бь наве Грейс, ӧса дьбежә: «Мьн фәʹм кьр кӧ дьһа баш ә ча лазьм ә дина хԝә бьдьнә сәр тьштәки, нә кӧ чәнд тьшта дәрбәкерʹа бькьн, чьмки ӧса мәрьв кем шашийа дькә у накʹәвә стресе».

БЬФЬКЬРӘ: Чахе тӧ пе техноложийе гәләк тьшт һәврʹа дьки, гәло әв йәк рʹийа тә нагьрә, ԝәки чь тӧ һин дьби, бира хԝәда хԝәй ки? (МӘТʹӘЛОК 17:24)

ЧАХЕ ТӦ ТʹӘНЕ ЙИ

Гәләк мәрьв һʹьз накьн тʹәне бьминьн, ләма жи әԝана һащәтед әләктроник дьдьнә хәбате, ԝәки хԝә тʹәне тʹәхмин нәкьн. Кʹӧлфәтәкә бь наве Оливйа ӧса дьбежә: «Чахе әз 15 дәԛа зедәтьр бе һащәтед әләктроник дьминьм, һʹәԝаса мьн дькʹәвә».

Сәва кӧ тьштәки һин бьн у леколин кьн, мәрьварʹа лазьм ә тʹәне бьминьн, ԝәки бькарьбьн рʹьнд дина хԝә бьдьнә ве йәке у кʹур сәр бьфькьрьн.

БЬФЬКЬРӘ: Чахе тӧ тʹәне йи, тӧ әви ԝәʹдәйи ӧса дьди хәбате, ԝәки кʹаре бьстини? (1 ТИМОТʹЕЙО 4:15)

ТӦ ЧЬ ДЬКАРИ БЬКИ

ТЕДӘРХӘ ТӦ ТЕХНОЛОЖИЙЕ ЧА ДЬДИ ХӘБАТЕ

Тӧ бь сайа техноложийе ча дькари фәрәсәтед хԝәйә һинбуне баш ки? Гава тӧ һин дьби, техноложи ча дькарә рʹийа тә бьгьрә рʹьнд дина хԝә бьди тьштәки?

ПРИНСИПА КʹЬТЕБА ПИРОЗ: «Аԛьл у фьрасәте ԛәԝин бьгьрә». (МӘТʹӘЛОК 3:21)

ПЬРСЕ БЬДӘ ХԜӘ . . .

Гәло мьнрʹа чәтьн ә һащәтед әләктроникда текстед мәзьн бьхуньм у ча лазьм ә дина хԝә бьдьме? Һәгәр әре, һʹәчʹи зәʹф чь дина мьн дьрʹәвинә?
Әз чь дькарьм бькьм, ԝәки дина мьн нәрʹәвә сәр тьштәки дьн?

Ширәт: Дәстпекә текстед бьчʹук бьхунә у һеди-һеди зедә кә. Бь дәнг бьхунә, ԝәки фькьред тә нәрʹәвьн.

Әз чь гӧһастьна дькарьм бькьм, сәва епʹещә ԝәʹдә вәԛәтиньм, ԝәки сәр ве йәке чь кӧ мьн хԝәнд, кʹур бьфькьрьм?

Ширәт: Чахе тӧ тьштәки һин дьби, дәһ дәԛе пашьн бьһелә, ԝәки чь кӧ тӧ һин буйи, бьԝәкʹьлини.

Чь чах әз чәнд тьшта һәврʹа дькьм?
Әз чь дькарьм бькьм, ԝәки дьһа һеса дина хԝә бьдьмә тʹәне сәр тьштәки?

Ширәт: Чахе тӧ гәрәке тьштәки һин би, ван тьштед кӧ ԝе тә әʹщьз бькьн, бәр дәсте хԝә нәһелә?

ПРИНСИПА КʹЬТЕБА ПИРОЗ: «Сәрԝахтийе бьстинә, аԛьл бьстинә». (МӘТʹӘЛОК 4:5)