Сәрһати 25

Малбате Аԛуб Дәрбази Мьсьре Дьбә

УСЬВ ида нькарьбу тәйах кьра, чьмки әԝи дьхԝәст һʹәму тьшт бред хԝәрʹа бьгота. Ләма жи әԝи готә хӧламед хԝә кӧ әԝана жь отʹахе дәркʹәвьн. Чахе Усьв тʹәви бьред хԝә тʹәне ма, әԝи дәстпекьр гьрийа. Бьдьнә һʹәсаве хԝә бьред ԝи чьԛас әʹщевмайи бун, чьмки ԝана ньзаньбу чьрʹа әԝ дьгьри. Ахьрийа ахьрийеда Усьв готә ԝан: «Әз Усьв ьм. Гәло баве мьн сагʹ-сьламәт ә?»

Бьред ԝи зәндәгьрти ман у нькарьбун хәвәр дьн, чьмки әԝана тьрсийан. Ле Усьв готә ԝан: «Жь кʹәрәма хԝә незики мьн бьн». Чахе әԝана незики ԝи бун әԝи гот: «Әз ьм бьре ԝә Усьв, йе кӧ ԝә фьротьбу Мьсьре».

Усьв дәстпедькә бь зьмане нәрм ԝанрʹа хәвәр дә: «Хԝә сущдар нәкьн, кӧ ԝә мьн фьротә Мьсьре. Бь рʹастийе әв йәк ԛьрара Хԝәде бу, кӧ әз бемә Мьсьре сәва кӧ мәрийа хьлаз кьм. Бьньһерʹьн, Фьрәԝьн ль сәр тʹәмамийа ԝәлат әз кьрьм сәрԝер. Ле ньһа ләз кʹәвьн, һәрʹьнә бал баве мьн у һʹәму тьшти ԝирʹа гьли кьн. Бежьн, кӧ бьра бе Мьсьре у вьра бьжи».

Паши ве йәке Усьв бьред хԝә һʹәмез кьр у ԝана һʹәмушка пач кьр. Чахе Фьрәԝьн пеһʹәсийа кӧ бьред Усьв һатьбун бал ԝи, әԝи готә Усьв: «Бьра бьред тә әʹрәба һьлдьн, вәгәрʹьн Кәнане кӧ баве хԝә у малбатед хԝә һьлдьн у пашда бенә Мьсьре. Әзе әʹрдәки жь һʹәмушка баштьр бьдьмә ԝан».

Ԝана ӧса жи кьр. Бьньһерʹә ль сар шькьл, ча малбата Аԛуб дәрбази Мьсьре дьбә. Тӧ дьвини ча Усьв рʹасти баве хԝә те?

Малбата Аԛуб гәлә мәзьн бу. Чахе әԝана дәрбази Мьсьре дьбун, тʹәмамийа нәфәред мала ԝи бь зарʹед у нәбийед ԝи, ӧса жи жьнед у хӧламед ԝи, ԝәкә 70 мәри бун. Әԝана гьшк жи дь Мьсьреда щиԝар бун у дьжитьн. Наве ве щьмәʹте данин Исраели, чьмки Хԝәде наве Аԛуб дани Исраел. Щьмәʹта Исраел сәва Хԝәде ԝе бьбә щьмәʹтәкә гәлә ԛимәт у дәлал, дәрһәԛа ве йәке һе зедә әме паше пебьһʹәсьн.

Дәстпебун 45:1-28; 46:1-27.