Сәрһати 31

Муса У Һарун Тен Щәм Фьрәԝьн

ЧАХЕ Муса һатә Мьсьре, әԝи дәрһәԛа һʹәму кʹәрәмәтед Хԝәде, бьре хԝәйе Һарунрʹа гьли кьр. Паше, ԝана әв кʹәрәмәт нишани исраелийа кьр, у тʹәмамийа щьмәʹте баԝәр кьрьн кӧ Йаһоԝа тʹәви ԝан ә у пьштоване ԝан ә.

Муса у Һарун чун бал Фьрәԝьн, у ԝирʹа готьн: «Йаһоԝа Хԝәдайе исраелийа дьвежә: ‹Щьмәʹта мьн бәрʹдә, кӧ әԝана бькарьбьн се рʹожа дь бәрʹийеда сәре хԝә ль бәр мьн дайньн›». Ле Фьрәԝьн гот: «Әз Йаһоԝа нас накьм. У исраелийа жи бәрʹнадьм».

Фьрәԝьн гәлә һерс кʹәт, чьмки щьмәʹта Исраел дьхԝәст хәвата хԝә бьһишта, ԝәки Йаһоԝарʹа ԛӧльх кьра. Ләма жи Фьрәԝьн бь зорбәтийе һе зедә ԝана дьда хәвате. Ԝи чахи щьмәʹта Исраел дәстпекьрьн Муса сущдар кьн, кӧ сәва ԝи әԝана һаԛас щәфа дькʹьшиньн, у Муса гәлә бәр хԝә дькʹәт. Ле Йаһоԝа ԝи дьл гәрм кьр: «Ԛә бәр хԝә нәкʹәвә, әзе ӧса бькьм, кӧ Фьрәԝьн щьмәʹта мьн ԝе бәрʹдә».

Муса у Һарун диса чун бал Фьрәԝьн. Ижар ԝана ида кʹәрәмәт нишан кьрьн. Һарун шьвдар авитә әʹрде у шьвдар бу мәʹрәки мәзьн. Ле паше аԛьлбәндед у кʹочʹәкед Фьрәԝьн жи шьвдар авитьн у шьвдаред ԝан жи бунә мәʹр. Ле бьньһерʹә! Мәʹре Һарун мәʹред ԝан кʹӧчʹәка дадьԛӧрчʹинә. Ле Фьрәԝьн йәкә щьмәʹте бәрʹнәда.

Ләма жи Йаһоԝа сафи кьр, кӧ дәрсәки бьдә ԝи, сәва кӧ Фьрәԝьн щийе хԝә бьзаньбә. Тӧ зани Хԝәде чь кьр? Әԝи 10 бәла, демәк 10 кӧл у дәрда, шандә сәр Мьсьр.

Паше һәр бәләки Фьрәԝьн гази Муса дькьр у дьготә ԝи: «Ван бәла бьдә сәкьнандьне, у әзе исраелийа бәрʹдьм». Ле һәр гав чахе бәла дьсәкьнин, Фьрәԝьн перʹа-перʹа пʹошман дьбу у нәдьһишт кӧ исраели һәрʹьн. Ле чахе ида бәла 10-һа һатә сәри Фьрәԝьн ахьрийа-ахьрийе щьмәʹта Исраел бәрʹда.

Ле тӧ һәр йәк жь ԝан 10 бәла зани? Бәлге майин вәкә, кӧ хԝәрʹа һин би.

Дәркʹәтьн 4:27-31; 5:1-23; 6:1-13, 26-30; 7:1-13.