Сәрһати 34

Хԝарьна Тʹәзә

ГӘЛО әв мәри жь әʹрде чь тʹоп дькьн? Дина хԝә бьде әв тьшт мина бәрфе сьпи йә, зьрав ә у бьчʹук ә. Ле бь рʹастийе әв бәрф нинә, әв хԝарьн ә.

Һе мәһәк жи дәрбаз нәбьбу паши ԝе йәке ча исраели жь Мьсьре дәркʹәтьн, у дь бәрʹийеда дьжитьн. Чьмки дь бәрʹийеда хԝарьна ԝана һьндьк бу, ԝана дәстпекьр бь шькийате бежьн: «Хԝазьл Йаһоԝа мә дь Мьсьреда бькӧшта. Ԝәй, ԝәй ль сәре мә, дь Мьсьреда хԝарьна мә тʹер-тʹьжә һәбу».

Ләма жи Йаһоԝа гот: «Әзе хԝарьне ԝәрʹа жь әʹзмана бьбариньм». Йаһоԝа ӧса жи кьр. Рʹожа майин, чахе исраелийа дитьн кӧ тьштәки сьпи жорда дьбарә, әԝана һәвдӧ пьрс дькьрьн: «Гәло әва чь йә?»

Муса гот: «Әва әԝ хԝарьн ә, йа кӧ Хԝәде да ԝә кӧ һун бьхԝьн». Мәрийа наве ԝе данин МАНА. Тәʹма ԝе мина тотька пе һьнгьв чекьри бу.

Муса готә ԝан: «Һәр кәс жь ԝә гәрәке һаԛас тʹоп кә, чьԛас дькарә бьхԝә». Ԝана жи мана һәр шәбәԛ тʹоп дькьрьн, чьмки чахе тәʹва ԛайим дәрдькʹәт, жь гәрма, мана йе кӧ ль сәр әʹрде дьма, дьһʹәлийа.

Паше Муса сәрда зедә кьр: «Тʹӧ кәс бьра мане тʹоп нәкә у хԝәй нәкә сәва рʹожа сьбе». Ле һьнәка гӧрʹа Муса нәкьрьн. Зани чь ԛәԝьми? Мана йе кӧ ԝана хԝәй дькьр, рʹожа дьн гәни дьбу у кӧрм теда тʹьжә дьбун!

Ле Йаһоԝа готә исраелийа кӧ рʹожа шәша, демәк инийе, әԝана мане гәрәке дӧ щар зедәтьр тʹоп кьн. Гәло чьрʹа әԝана гәрәке ӧса бькьрана? Чьмки рʹожа һʹәфта Йаһоԝа мана нәдьда ԝан, у ләма жи ԝана гәрәке һьнә мана сәва рʹожа һʹәфта жи бьһиштана. Ле ижар, әв мана хьрав нәдьбу у кӧрм теда тʹоп нәдьбун! Әв жи кʹәрәмәтәкә Хԝәде бу!

Һʹәму ԝәʹдә, чьԛа исраели дь бәрʹийеда бун, Йаһоԝа бь мане ԝана тʹер дькьр.

Дәркʹәтьн 16:1-36; Жьмар 11:7-9; Йешуа 5:10-12.