Сәрһати 47

Дь Исраеледа Дьз Һәйә

БЬНЬҺЕРʹӘ әв мер чь дькә! Әԝ дь чадьра хԝәда кʹьнщәки бәдәԝ у кӧдӧре зерʹ у зива вәдьшерә, йе кӧ әԝи жь шәһәре Әриһайе һьлда. Ле те бира тә, тʹәви ван тьшта ԝана чь гәрәке бькьра?

Ԝана гәрәке һʹәму тьшта бьшәԝьтанда, зерʹ у зив жи бьһанийа сәва хьзна коне Йаһоԝа. Ле мерәки гӧрʹа Йаһоԝа нә кьр, у тьштед кӧ йа Хԝәде бу һьлда хԝәрʹа. Наве ԝи мерьки Акʹан ә, ле әв мәрийед кʹеләка ԝи нәфәред мала ԝи нә. Ԝәрә әм бьньһерʹьн чь ԛәԝьми паше.

Паши ԝе йәке ча Акʹан әԝ тьшт дьзи, Йешу мера дьшинә кӧ пешбәри шәһәре Айе шәрʹ кьн. Дь ви шәрʹида әԝана дьдьнә дәр. Һьнәк жь ԝан һатьн кӧштьне, ле йе дьн жи рʹәвин. Йешу гәлә бәрхԝә кʹәт. Әԝ кʹәтә сәр чока у Хԝәдерʹа дӧа кьр: «Хԝәдан, тә чьрʹа һишт кӧ тьште ӧса сәре мә бьԛәԝьмә?»

Йаһоԝа готе: «Рʹабә сәр ньга! Исраелийа гӧнә кьр. Ԝана һьнә жь ԝан тьшта, йе кӧ гәрәке бьһата шәԝьтандьне, йане гәрәке бьһата анине сәва хьзна коне мьн, һьлда хԝәрʹа у вәшартьн. Ләма жи һʹәта тӧ ван тьшта у ԝан мәрийа, йе кӧ дьзи кьрьн, ԛьрʹ нәки әзе кʹәрәма хԝә нәдьмә тә». Ӧса жи Йаһоԝа готә Йешу, кӧ әԝ ԝе хԝәха ван мәрийа нишани ԝи кә.

Йешу һʹәму мәрийа тʹоп дькә у Йаһоԝа дь нава ԝанда мере гӧнәкʹар у дьз әʹйан дькә. Паше Акʹан дьвежә: «Бәле, мьн гӧнә кьр. Чахе мьн әв кʹьнще бәдәԝ, зерʹ у зив дит, дьле мьн әван тьшта ӧса хԝәст кӧ мьн тәйах нә кьр у һьлда. Һун дькарьн ван тьшта ль чадьре мьнда бьвиньн, әԝ дь әʹрдеда вәшарти нә».

Чахе ԝана әԝ тьшт дит у анин щәм Йешу, әԝи готә Акʹан: «Тә чьрʹа ԛәзийа ль сәр мә ани? Ньһа, Йаһоԝа ԝе ль сәр тә ԛәзийе бинә!» Паши ве йәке тʹәмамийа щьмәʹте, Акʹан у нәфәред ԝи данә бәр кәвьра у әԝана кӧштьн. Әв мәсәлә дәрсәкә баш ә сәва мә, кӧ әм тʹӧ щар гәрәке дьзийе нә кьн. Ӧса нинә?

Һьнә ԝәʹдә шунда исраелийа диса чунә пешбәри шәһәре Ай. Ле ижар Йаһоԝа ида али щьмәʹта хԝә кьр, у ԝана шәһәре Ай кьрьнә бьн дәсте хԝә.

Йешуа 7:1-26; 8:1-29.