Сәрһати 54
Мере Жь Һʹәмуйа Ԛәԝаттьр
ЗАНИ мере жь һʹәмушка ԛәԝаттьр кʹи бу? Наве ԝи Шьмшон бу у әԝ һʹакьме исраелийа бу. Гәло жь кʹе Шьмшон ԛәԝатәкә ӧса мәзьн станд? Бәле, Йаһоԝа ԛәԝата ӧса да ԝи. Йаһоԝа һе пешийа буйина Шьмшон готә дийа ԝи: «Зутьрке кӧрʹәк ԝе тәрʹа бьбә. Әԝ ԝе исраелийа жь дәсте Фьльстиана хԝәй бькә».
Фьльстиан мәрийед гәлә хьрав бун. Әԝана дь Кәнанеда дьжитьн у әскәред ԝан гәләк бун. Ләма жи әԝана исраелийа дьданә чәрчьрандьне. Дәрбәке, чахе Шьмшон кʹеләка әʹрде фьльстианарʹа дәрбаз дьбу, шерәки мәзьн дьһатә пешийа ԝи у дькьрә горини. Бьдә һʹәсаве хԝә әԝи шере мәзьн бь дәсте хԝәйи рʹут кӧшьт. Әԝи ӧса жи ԝәкә сәда фьльстиана кӧштьбу.
Һьнә ԝәʹдә шунда, дьле Шьмшон кʹәтә жьнәке бь наве Дәлила. Ле Дәлила бь рʹастийе Шьмшонрʹа һʹәлал нибу, у щьмәʹта Хԝәде һʹәз нәдькьр. Чахе сәркʹаред фьльстиана Дәлиларʹа соз дан, кӧ һәр кәс жь ԝан ԝе 1 100 зива бьдьнә ԝе, һәрге әԝ бежә ԝан жь чь Шьмшон ӧса ԛайим ә, Дәлила ԛайил бу. Ләма жи әԝе дәстпекьр пьрса бьдә Шьмшон, кӧ жь чь әԝ ӧса ԛәԝат ә, ле Шьмшон щава хԝә нәдьда.
Ахьрийа ахьрийе Шьмшон гӧтә Дәлила: «Жь буйина хԝә әз жь алийе Хԝәде ча ԛӧльхчийе ԝи башԛә, демәк Нәзир һатьм кʹьвшкьрьне. Ләма жи пʹорʹе мьн тʹӧ щар нәһатийә бьрʹине, у һәгәр пʹорʹе мьн бе бьрʹине әзе ԛәԝата хԝә ӧнда кьм».
Аһан чь ԛәԝьми паше. Дәлила сәре Шьмшон дани ль сәр чокед хԝә у ԝи да рʹазане. Паше әԝе гази чәнд мера кьр у пʹорʹе Шьмшон да бьрʹине. Чахе Шьмшон һʹьшйар бу, әԝи тʹәхмин кьр кӧ ԛәԝата ԝи ида тʹӧнә. Фьльстиана Шьмшон гьртьн. Ԝана һәр дӧ чʹәʹве ԝи дәрхьстьн у ԝи кьрьнә дил.
Дәрбәке фьльстиана кʹефәкә мәзьн кʹьвш кьрьн у хӧдане хԝә Дагонрʹа пʹарьсти дькьрьн. Ләма жи ԝана Шьмшон жь кәле дәрхьстьбу кӧ ԛәрфе хԝә ԝи бькьн у бькʹәньн. Ԝи чахи пʹорʹе Шьмшон ида мәзьн бьбун. Гәдәк жи дәсте Шьмшон гьртьбу у ԝи дьбьр-тани. Шьмшон ԝи гәдәрʹа гот: «Мьн бьвә бал ԝан стуна, сәр һиме кʹижани әв авайи сәкьнийә». Паше Шьмшон дӧа дькә Йаһоԝарʹа кӧ ԛәԝате пашда бьстинә, дәсте хԝә датинә ль сәр ван стуна у бь дәнгәки ԛайим дьвежә: «Бьра әз тʹәви фьльстиана бьмьрьм». Гава Шьмшон бь тʹәмамийа ԛәԝата хԝә стуна дәв дьдә, авайи жорда те хԝәре. Ԝи чахи ԝәкә 3 000 фьльстиан, йе кӧ ль ԝьр тʹоп бьбун, һатьнә ԛьрʹкьрьне у мьрьн.
Һʹакьмти сәре 13 һʹәта 16.