Сәрһати 57

Хԝәде Даԝьд Дьжьберә

ҺӘЛА дина хԝә бьдә ль вьр чь дьԛәԝьмә? Һʹьрчʹ бәхьк бьрьбу у дьхԝәст ԝи бьхԝара. Ле кӧрʹәки да пәй у бәхьк жь ләпед һʹьрчʹ хьлаз кьр. Чахе һʹьрчʹ сәр дӧ ләпед хԝә сәкьни, әԝи һʹьрчʹ авитә әʹрде у ԝи кӧшт! Дәрбәке жи әԝи диса пәзәк хьлаз кьр, ле ида жь ләпед шер. Әв кӧрʹ чьԛа мерхас ә! Ӧса нинә? Ле гәло әԝ кʹи йә?

Әв кӧрʹе щаһьл Даԝьд ә. Даԝьд ль Бәйтләһʹме дьминә. Калке ԝи Овед, кӧрʹе Рʹутʹ у Боԝаз бу, дәрһәԛа кʹижани әм ида пеһʹәсийан. Наве баве Даԝьд жи Йеша йә. Даԝьд мьԛати пәзед баве хԝә дьбу. Әԝ һатә буйине, дәһә сал паши ԝе йәке чахе Йаһоԝа Шаԝул кʹьвш кьр ча пʹадша.

Ԝәʹдә һат у Йаһоԝа готә Самуйел: «Рʹуне бинхԝәш һьлдә у һәрә Бәйтләһʹме, мала Йеша. Жь кӧрʹед ԝи, әзе йәки бьжберьм кӧ әԝ бьбә пʹадша». Чахе Самуйел Әлийәб дьвинә, йе кӧ кӧрʹе Йешайә мәзьн бу, әԝ дьле хԝәда дьвежә: «Ԝәлә, әԝ ә жьбартийе Хԝәде». Ле Хԝәде готә Самуйел: «Нәньһерʹә ль сәр бәжнбьльндийа у бәдәԝтийа ԝи. Әз ԝи накьмә пʹадша».

Паше Йеша гази кӧрʹәки хԝәйи дьне, Абинадаб дькә. Ле Самуйел дьвежә: «На, ԝийа жи Йаһоԝа нажьберә». Ижар Йеша гази кӧрʹе хԝә Шамма дькә у Самуйел диса жи дьвежә: «Ԝийа жи Йаһоԝа нажьберә». Ӧса Йеша һʹәфт кӧрʹед хԝә ани бәр Самуйел, ле Йаһоԝа тʹӧ кәс жь ԝана нә жьбарт. Ләма жи Самуйел жь Йеша пьрс кьр «Һʹәму кӧрʹед тә ль вьр ьн, йан диса кәс һәйә?»

Йеша готе: «Бәле, диса кӧрʹәки мьн һәйә. Әԝ һәри бьчʹук ә у ньһа мьԛати пәза дьбә». Чахе Даԝьд бәрбь Самуйел һат, Самуйел дина хԝә дайе кӧ Даԝьд гәдәки хас ә у мьлук ә. Ижар Йаһоԝа готә Самуйел: «Әԝ ә жьбартийе мьн, рʹабә у рʹун сәре ԝи хә». Самуйел һәма ӧса жи кьр. Ле сәва кӧ Даԝьд бьбә пʹадша, ԝәʹдә гәрәке дәрбаз буйа.

1 Самуйел 17:34, 35; 16:1-13.