Сәрһати 61
Даԝьд Дьбә Пʹадша
ШАԜУЛ диса нет кьрә дьле хԝә кӧ Даԝьд бьгьрә. Әԝи 3 000 әскәред жьбарти тʹоп кьр, сәва кӧ Даԝьд бьгәрʹә. Чахе Даԝьд дәрһәԛа ве йәке пеһʹәсийа, әԝи щәʹсус шанд кӧ бьвиньн һәла Шаԝул у әскәред ԝи ишәв кʹӧ щиԝар бунә. Паше Даԝьд жь дӧ мера пьрс кьр: «Кʹи жь ԝә ԝе тʹәви мьн бе бәр чадьра Шаԝул?»
«Әзе бем», Авишә готе. Авишә кӧрʹе хушка Даԝьд Тсәруйа бу. Даԝьд у Авишә һеди-һеди кʹәтьнә нав чадьред ԝан, чахе Шаԝул әскәред хԝәва рʹазайи бу. Ԝана рʹьм у кʹупе Шаԝул жь бәр сәре ԝи ӧса һьлдан, кӧ әскәред ԝи нә жи пеһʹәсийан, чьмки әԝана гьшк жи бь хәԝа гьран рʹаза бун.
Ле бьньһерʹә, ньһа Даԝьд у Авишә кʹӧ нә. Әԝана сах-сьламәт жь ԝе дәре дәркʹәтьн гьһиштьн чʹийе, йе кӧ ида щики бехоф бу. Жь сәре чʹийе Даԝьд гази сәркʹаре әскәра Абнәр кьр у готе: «Абнәр, тӧ чьрʹа мьԛати пʹадше наби? Һәла бьньһерʹә, рʹьм у кʹупе ԝи кʹӧ нә?»
Шаԝул һʹьшйар бу. Тӧ дькари Шаԝул у Абнәр ль сәр ви шькьли бьвини. Шаԝул дәнге Даԝьд нас кьр у же пьрси: «Даԝьд, әв тӧ йи?»
Даԝьд жи щава хԝә да: «Бәле, әз ьм, хԝәйе мьн пʹадша». Паше Даԝьд сәрда зедә кьр: «Чьрʹа тӧ пәй мьн кʹәти? Мьн чь хьрави тә кьрийә? Ԝа рʹьме тә вьр ә, йа пʹадша. Бьра кәсәк жь әскәред тә бе у ԝийә һьлдә».
Шаԝул пʹошман бьбу у готә Даԝьд: «Мьн шаши кьр, у кьред мьн жи беаԛьли бун». Паши ван гьлийа Даԝьд чу рʹийа хԝә, Шаԝул жи вәгәрʹийа мал. Ле Даԝьд дьле хԝәда дьгот: «Дәрбәке әзе бь дәсте Шаԝул йәкә бемә кӧштьне. Кʹа әз бьрʹәвьм ль әʹрде фьльстиана у ԝьр хԝә вәшерьм». Ләма жи әԝи тьштәки ӧса кьр, әԝи фьльстиана да баԝәркьрьне йан чь әԝ ида сәр алийе ԝан ә у пьшта ԝан дьгьрә.
Һьнә ԝәʹдә шунда фьльстиан дәркʹәтьн шәрʹ тʹәви исраелийа. Дь ви шәрʹида Шаԝул у Йонатʹан һатьн кӧштьне. Жь ве йәке Даԝьд гәлә бәрхԝә кʹәт, у әԝи кʹӧламәк ньвиси, нав кʹижани гьлийе ӧса һәбун: «Дьле мьн жь бо тә гәлә дьшәԝьтә, бьрайе мьн, Йонатʹан. Тӧ сәва мьн гәлә бь ԛимәт у дәлал буй!»
Паши ве йәке Даԝьд вәгәрʹийа шәһәре Һәброн. Ль ԝьр шәрʹ дьчу ортʹа пьштоване кӧрʹе Шаԝул Иш-Бошәтʹ у меред кӧ пьштоване Даԝьд бун у дьхԝәстьн кӧ әԝ бьбә пʹадша. Хьлазийе әскәред Даԝьд шәрʹ бьрьн у Даԝьд бу пʹадша. Ԝи чахи әԝ 30 сали бу у әԝи ԝәкә һʹәфт сала нив ль Һәброне сәркʹарти дькьр. Ль ԝьр Даԝьдрʹа чәнд кӧрʹ һатьн буйине навед ԝан әв ьн: «Амнон, Абшалом у Адонийа».
Пашԝәхтийе Даԝьд у әскәред ԝи шәһәрәки гәлә бәдәԝ Оршәлим зәфт кьрьн. Ԝәʹде шәрʹкьрьне Йоаб сәркʹарти ль сәр хԝә һьлдабу. Әԝ кӧрʹе хушка Даԝьд Тсәруйа бу. Даԝьд Йоаб кьрә сәркʹаре тʹәмамийа әскәра, у жь ԝьр дәстпебуйи Даԝьд ида дь шәһәре Оршәлимеда пʹадшати дькьр.
1 Самуйел 26:1-25; 27:1-7; 31:1-6; 2 Самуйел 1:26; 3:1-21; 5:1-10; 1 Дирок 11:1-9.