Сәрһати 62
Кӧл У Дәрдед Мала Даԝьд
ПАШИ ԝе йәке ча Даԝьд бу пʹадша дь Оршәлимеда, Йаһоԝа али ԝи у әскәра дькьр кӧ әԝана шәрʹа бьвьн. Йаһоԝа соз дабу исраелийа кӧ тʹәмамийа әʹрде Кәнане ԝе бьдә дәсте ԝан. У ньһа бь аликʹарийа Йаһоԝа әʹрде Кәнан рʹасти жи бу йа ԝан.
Даԝьд пʹадшаки баш бу, у әԝи Йаһоԝа һʹәз дькьр. Зани гава Оршәлим һатә зәфткьрьне, пешийе Даԝьд чь кьр? Әԝи ԛӧтʹийа пәймане ани Оршәлиме, у һьн жи дьхԝәст пʹарьстгәһ ава кьра, ԝәки ԛӧтʹийе теда щикә.
Ле пашԝәхтийе әԝи гӧнәки гьран кьрә стуйе хԝә. Даԝьд заньбу ԝәки изьна ԝи тʹӧнә тьштед кӧ нә йа ԝи йә һьлдә хԝәрʹа. Ле дәрбәке, чахе әԝ еваре ль сәр банийа мала хԝә һеса дьбу, әԝи жере ньһерʹи у жьнәкә гәлә бәдәԝ дит. Наве ԝе Батʹ-Шәба бу. Ле мере ԝе Урийа Даԝьдрʹа әскәри дькьр.
Батʹ-Шәба дьле Даԝьд гәлә хԝәш һат, у әԝи ле тʹәглифи мала хԝә кьр. Ԝи чахи мере Батʹ-Шәба дь нав шәрʹда бу. Даԝьд тʹәви Батʹ-Шәба рʹаза у пашԝәхтийе пеһʹәсийа кӧ Батʹ-Шәба һʹәмлә дәркʹәт. Жь ве йәке Даԝьд гәлә бәрхԝәкʹәт. Әԝи нәмә шандә Йоабрʹа кӧ бьра Урийа дәрбази мәйдана шәрʹ бькьн, сәва кӧ әԝ бе кӧштьне. Чахе Урийа мьр Даԝьд Батʹ-Шәба кьрә жьна хԝә.
Йаһоԝа гәлә һерс кʹәт сәр Даԝьд. Әԝи ԛӧльхкʹаре хԝә Натʹан шандә щәм Даԝьд. Натʹан гәрәке гӧне Даԝьд ԝирʹа әʹйан кьра. Ль сәр шькьл тӧ дькари бьвини ча Натʹан Даԝьдрʹа хәбәр дьдә. Даԝьд гәлә пʹошман бу сәва кьред хԝә у гӧне хԝә да рʹуйе хԝә. Ләма жи Йаһоԝа ԝи нәкӧшт, ле дәԝса ве йәке гьлийе ӧса готә ԝи: «Чьмки тә гӧнәки гьран кьр, дь мала тәда гәлә кӧл-дәрд ԝе бьԛәԝьмьн». Гәло дәрһәԛа кʹижан кӧл-дәрда хәвәр дан дьчу?
Йа пешьн, кӧрʹе Даԝьд йе жь Батʹ-Шәба мьр. Паше кӧрʹе Даԝьде пешьн Амнон, хушка хԝә Тʹамар зоре тʹәви хԝә вәләзанд. Ле кӧрʹе Даԝьд Абшалом, жь ве йәке ӧса һерс кʹәт кӧ бьре хԝә Амнон кӧшт. Пашԝәхтийе ԛәдьре мәрийа һьндава Абшалом жь бәр һәв зедә бьбу, у әԝи хԝә кьрә пʹадша. Хьлазийе Даԝьд шәрʹе тʹәви Абшалом бьр у Абшалом жи һатә кӧштьне. Бь рʹастийе жи гәлә кӧл-дәрд һатьн сәре Даԝьд.
Ль ԝан ԝәʹда Батʹ-Шәба кӧрʹ ани. Наве ԝи данин Сьлеман. Чахе Даԝьд ида кал бу у нәхԝәш бьбу, кӧрʹе ԝийә Адонийа хԝәст бьбуйа пʹадша. Ле Даԝьд готә кʹаһин, бь наве Тʹсадок, кӧ бьра сәре Сьлеман рʹун бькә. Бь ве йәке һатә кʹьвше кӧ Сьлеман ԝе бьбуйа пʹадша. Ль пәй һьнә ԝәʹда Даԝьде 70-е сали мьр. Әԝи ԝәкә 40 сал пʹадшати кьр. Ньһа пʹадше Исраеле Сьлеман ә.
2 Самуйел 11:1-27; 12:1-18; 1 П’адшати 1:1-48.