Сәрһати 65

Пʹадшати Пʹарчә Дьбә

ЗАНИ әв мер чьрʹа кʹьнща хԝә дьԛәльшинә? Йаһоԝа ӧса ԝирʹа готьбу. Әв мер пʹехәмбәре Хԝәде йә, наве ԝи Аһийа йә. Ле зани пʹехәмбәр кʹи нә? Әԝана жь Хԝәде дәрһәԛа ахьрийе әʹламәти дьстиньн ԝәки мәрийарʹа гьли кьн.

Ньһа Аһийа тʹәви Йәровам хәбәр дьдә. Йәровам мәрики мәзьн у гьринг ә, әԝ бал Сьлеман дьхәвьтә. Чахе Аһийа ль сәр рʹе рʹасти Йәровам һат, әԝи тьштәки әщев кьр. Әԝи кʹьнща хԝәйә ну ль сәр 12 пʹара пʹарчә кьр, у готә Йәровам: «Жь ван кӧдора 10 һәва һьлдә хԝәрʹа». Ле зани чьма Аһийа 10 кӧдор да ԝи?

Аһийа шьровәкьр кӧ Йаһоԝа ԝе жь Сьлеман пʹадшатийе бьстинә. Әԝи гот кӧ Йаһоԝа 10 бәрәка ԝе бьдә дәсте Йәровам. Ле тʹәне дӧ бәрәк, ԝе бьн пʹадшатийа кӧрʹе Сьлеман Рʹәһобоԝам бьминьн.

Гава Сьлеман пеһʹәсийа, кӧ Аһийа чь готә Йәровам, әԝ гәлә һерс кʹәт у дьхԝәст Йәровам бькӧшта. Ләма жи Йәровам рʹәви Мьсьре. Пашԝәхтийе Сьлеман мьр. Әԝ ԝәкә 40 сали пʹадшати кьр, ле ньһа ида кӧрʹе ԝи Рʹәһобоԝам бу пʹадша. Дь Мьсьреда Йәровам пеһʹәсийа кӧ Сьлеман мьр у ләма жи әԝ пашда вәгәрʹийа Исраеле.

Рʹәһобоԝам пʹадшаки баш нибу. Әԝ һәла һе жь баве хԝә хьравтьр бу. Йәровам у һьнә меред гьринг чун бал Рʹәһобоԝам пʹадша у ԝирʹа хәбәр дан ԝәки әԝ һьнәки нәрм бә тʹәви щьмәʹте. Ле Рʹәһобоԝам гӧрʹа ԝан нәкьр, у дәԝса ве йәке һе берʹәʹм дәстпекьр пʹадшатийе бькә. Ләма жи 10 бәрәкед Исраел хԝәрʹа Йәровам кʹьвш кьрьн ча пʹадша. Ле бәрәкед Бьнйамин у Щьһуда бьн пʹадшатийа Рʹәһобоԝам дьминьн.

Йәровам нәдьхԝәст кӧ щьмәʹта ԝи һәрʹьнә Оршәлиме, ԝәки дь пʹарьстгәһеда сәре хԝә бәр Йаһоԝа дайньн. Ләма жи әԝи дӧ голькед зерʹ чекьр, ԝәки 10 бәрәкед исраелийа бәр ԝан сәре хԝә дайньн. Һьнә ԝәʹдә шунда тʹәмамийа ԝәлат бь зӧлмийе у зорбәтийе тʹьжә бу.

Ле кӧл-дәрде дӧ бәрәкед дьн жи һәбун. Паши ԝе йәке ча Рʹәһобоԝам бу пʹадша, һәла һе пенщ сал жи дәрбаз нә бьбу ча ньшкева пʹадше Мьсьре бь шәрʹ чубу ль сәр Оршәлим. Әԝи тʹәви хԝә гәлә зерʹ у зиве пʹарьстгәһа Йаһоԝа һьлда у бьр. Нава ԝәʹдәки кьн, пʹарьстгәһе пешда һатьбу ава кьрьне ида нә әԝ пʹарьстгәһ бу.

1 П’адшати 11:26-43; 12:1-33; 14:21-31.