Сәрһати 66

Изабел Жьн-пʹадше Зӧлмкʹар

ПАШИ Йәровам, һәр пʹадша йе кӧ ль сәр 10 бәрәке Исраел пʹадшати дькьрьн, хьрав бун. Ле жь ԝан һʹәмушка хьравтьр Аһаб бу. Зани чьрʹа? Мәʹнийа пешьн жьна ԝийә Изабел бу, йа кӧ гәлә зӧлмкʹар бу.

Изабел ԛиза пʹадше Сайде бу, у әԝ нә исраели бу. Әԝе бәр хӧданед ԛәлп Баәʹл сәре хԝә датани. Әԝе ӧса жи мере хԝә Аһаб у гәлә исраелийа дәʹвда кӧ әԝана жи бәр Баәʹл сәре хԝә дайньн. Изабел һʹәму пʹехәмбәре Йаһоԝа дьда кӧштьне, чьмки әԝе Йаһоԝа һʹәз нәдькьр. Ле һьнә пʹехәмбәра хԝә дь шкәфтеда вәдьшартьн, у ӧса хԝә жь мьрьне хьлаз кьрьн. Гава Изабел тьштәки дьхԝәст, әԝ һазьр бу мәрийа жи бькӧжә, тʹәне нета хԝә бьанийа сәри.

Рʹожәке Аһаб пʹадша гәлә мәʹдәкьри бу, у Изабел жь ԝи пьрси: «Тӧ чьрʹа иро ӧса мәʹдәкьри йи?»

Аһаб готе: «Әз жь бо гьлийе Набот бәр хԝә кʹәтьм. Мьн бахче тьрийа ԝи дьхԝәст бькʹьрийа, ле әԝ ԛайил нәбу».

«Ԛә бәр хԝә нәкʹәвә» әԝе готе. «Әзе ԝи шьхӧли сафи кьм».

Паши ван гьлийа Изабел нәмә ньвиси сәркʹаред ԝи шәһәрирʹа, кʹидәре Набот дьжит. Әԝе готә ԝан: «Һьнә меред ахмах бьвиньн, йе кӧ бькарьбьн шәрʹ ль сәр Набот гьли кьн, йан чь әԝи ньфьрʹа Хԝәде у пʹадша кьр. Паше ԝи жь шәһәре бьвьнә дәр у ль ԝьр ԝи бьдьнә бәр кәвьра».

Гава Изабел пеһʹәсийа кӧ Набот данә кӧштьне, әԝе готә мере хԝә: «Ньһа дькари бахче тьрийе ԝи һьлди хԝәрʹа». Әԝе гәлә тьштәки нәһәԛ кьр у һежайи сущ кьрьне бу! Ӧса нинә?

Ләма жи, һьнә ԝәʹдә шунда, Йаһоԝа мерәк бь наве Йаһу шанд кӧ әԝ щәза Изабеле бькә. Гава Изабел пеһʹәсийа кӧ Йаһу те щәм ԝи, әԝе сәр чʹәʹве хԝә бәдәԝ кьр у хԝа чекьр сәва Йаһу. Ле чахе Йаһу һат у дит кӧ Изабел бәр пʹәнщәре рʹуньштийә, әԝи гази меред кʹеләке кьр у готә ԝан: «Ле жорда бавежьн жере!» Ԝана жи гӧрʹа Йаһу кьр. Әв йәк ль сәр шькьли рʹьнд те кʹьвше. Ԝана ле авитә жере у Изабел мьр. Бь ве йәке рʹожед жьн-пʹадше зӧлмкʹар хьлаз бун.

1 Пʹадшати 16:29-33; 18:1-4; 21:1-16; 2 Пʹадшати 9:30-37.